ಛಟ್ಠೋ ಪರಿಚ್ಛೇದೋ

೬. ಭೂಮಿಪುಗ್ಗಲಚಿತ್ತಪ್ಪವತ್ತಿಕಥಾ

೨೩೨. ಕಾಮಸುಗತಿಯಂ ಹೋನ್ತಿ, ಮಹಾಪಾಕಾ ಯಥಾರಹಂ;

ಮಹಗ್ಗತವಿಪಾಕಾ ಚ, ಯಥಾಸನ್ಧಿವವತ್ಥಿತಾ.

೨೩೩. ವೋಟ್ಠಬ್ಬಕಾಮಪುಞ್ಞಾನಿ, ವಿಯುತ್ತಾನಿ ಚ ದಿಟ್ಠಿಯಾ;

ಉದ್ಧಚ್ಚಸಹಿತಞ್ಚೇತಿ, ಹೋನ್ತಿ ಸಬ್ಬತ್ಥ ಚುದ್ದಸ.

೨೩೪. ಸನ್ತೀರಣಮನೋಧಾತು-ಚಕ್ಖುಸೋತಮನಾ ಪನ;

ದಸ ಚಿತ್ತಾನಿ ಜಾಯನ್ತಿ, ಸಬ್ಬತ್ಥಾರೂಪವಜ್ಜಿತೇ.

೨೩೫. ದಿಟ್ಠಿಗತಸಮ್ಪಯುತ್ತಾ, ವಿಚಿಕಿಚ್ಛಾಯುತಾ ತಥಾ;

ಪಞ್ಚ ಸಬ್ಬತ್ಥ ಜಾಯನ್ತಿ, ಸುದ್ಧಾವಾಸವಿವಜ್ಜಿತೇ.

೨೩೬. ದೋಸಮೂಲದ್ವಯಞ್ಚೇವ, ಘಾನಾದಿತ್ತಯಮಾನಸಾ;

ಅಟ್ಠ ಸಬ್ಬತ್ಥ ಜಾಯನ್ತಿ, ಮಹಗ್ಗತವಿವಜ್ಜಿತೇ.

೨೩೭. ಚತುತ್ಥಾರುಪ್ಪಜವನಂ, ಅನಾಗಾಮಿಫಲಾದಯೋ;

ಮಹಾಕ್ರಿಯಾ ಚ ಜಾಯನ್ತಿ, ತೇರಸಾಪಾಯವಜ್ಜಿತೇ.

೨೩೮. ಹೇಟ್ಠಾರುಪ್ಪಜವಾ ದ್ವೇ ದ್ವೇ, ಛಾಪಾಯುಪರಿವಜ್ಜಿತೇ;

ಸಿತರೂಪಜವಾ ಹೋನ್ತಿ, ಅರೂಪಾಪಾಯವಜ್ಜಿತೇ.

೨೩೯. ಸೋತಾಪತ್ತಿಫಲಾದೀನಿ, ಸುದ್ಧಾಪಾಯವಿವಜ್ಜಿತೇ;

ಪಠಮಾನುತ್ತರಂ ಸುದ್ಧಾ-ಪಾಯಾರೂಪವಿವಜ್ಜಿತೇ.

೨೪೦. ಅವತ್ಥಾಭೂಮಿಭೂತತ್ತಾ, ನ ಗಯ್ಹನ್ತಿ ಅನುತ್ತರಾ;

ಏಕವೋಕಾರಭೂಮಿ ಚ, ರೂಪಮತ್ತಾ ನ ಗಯ್ಹತಿ.

೨೪೧. ಸಭುಮ್ಮಾ ಸಬ್ಬಭುಮ್ಮಾ ಚ, ಏಕದ್ವಿತ್ತಯವಜ್ಜಿತಾ;

ತಥಾರೂಪಸುದ್ಧಾವಾಸ-ಬ್ರಹ್ಮಾಪಾಯವಸಾತಿ ಚ.

೨೪೨. ಮಾನಸಾ ಪಞ್ಚ ಕೋಟ್ಠಾಸಾ, ಸತ್ತರಸ ಚತುದ್ದಸ;

ಛತ್ತಿಂಸತೇಕವೀಸಾ ಚ, ಏಕಞ್ಚೇವ ಯಥಾಕ್ಕಮಂ.

೨೪೩. ಅಟ್ಠಾರಸಾಪಿ ಹೋನ್ತೇತೇ, ನವಧಾಪಿ ಪುನೇಕಧಾ;

ಚತುಧಾ ತಿವಿಧಾ ಚೇವ, ಏಕಧಾತಿ ಚ ಭೇದತೋ.

೨೪೪. ತೇರಸಾಪಿ ಚ ಕೋಟ್ಠಾಸಾ, ಭವನ್ತೇಕತಿಭೂಮಕಾ;

ಛಸತ್ತೇಕಾದಸಸತ್ತ-ರಸಭೂಮಕಮಾನಸಾ.

೨೪೫. ಏಕದ್ವಯತಿಚತುಕ್ಕಪಞ್ಚಕಾಧಿಕವೀಸಜಾ;

ಛಬ್ಬೀಸತಿಂಸಜಾ ಚೇತಿ, ಯಥಾನುಕ್ಕಮತೋ ಭವೇ.

೨೪೬. ಚತ್ತಾರಿ ಪುನ ಚತ್ತಾರಿ, ಏಕಮಟ್ಠಟ್ಠ ಚೇಕಕಂ;

ಚತ್ತಾರೇಕಾದಸ ದ್ವೇ ದ್ವೇ, ಸತ್ತ ತೇವೀಸ ಚುದ್ದಸ.

೨೪೭. ಕ್ರಿಯಾಜವಮಹಾಪಾಕಾ, ಲೋಕುತ್ತರಮಹಗ್ಗತಾ;

ದ್ವೇಪಞ್ಞಾಸ ನ ಲಬ್ಭನ್ತಿ, ಚತುರಾಪಾಯಭೂಮಿಯಂ.

೨೪೮. ಕಾಮಾವಚರದೇವೇಸು, ಛಸು ಭುಮ್ಮೇ ಚ ಮಾನವೇ;

ಕಾಮಸುಗತಿಯಂ ನತ್ಥಿ, ನವ ಪಾಕಾ ಮಹಗ್ಗತಾ.

೨೪೯. ದೋಸಮೂಲಮಹಾಪಾಕಾ, ಘಾನಾದಿತ್ತಯಮಾನಸಾ;

ನತ್ಥಾರೂಪವಿಪಾಕಾ ಚ, ವೀಸತೀ ರೂಪಭೂಮಿಯಂ.

೨೫೦. ಕಙ್ಖಾದಿಟ್ಠಿಯುತಾ ಪಞ್ಚಾರೂಪಪಾಕಾ ಚತುಬ್ಬಿಧಾ;

ಪಞ್ಚಾದೋನುತ್ತರಾ ಚೇವ, ಸುದ್ಧಾವಾಸೇ ನ ಲಬ್ಭರೇ.

೨೫೧. ಆದಾವಜ್ಜನಮಗ್ಗಾ ಚ, ಪಟಿಘಾರೂಪಮಾನಸಾ;

ಕಾಮಪಾಕಾ ಸಿತಾರೂಪೇ, ತೇಚತ್ತಾಲೀಸ ನತ್ಥಿ ತೇ.

೨೫೨. ಸತ್ತತಿಂಸ ಪರಿತ್ತಾ ಚ, ಲಬ್ಭನ್ತಾಪಾಯಭೂಮಿಯಂ;

ಮಾನಸಾಸೀತಿ ಲಬ್ಭನ್ತಿ, ಕಾಮಸುಗತಿಯಂ ಪನ.

೨೫೩. ಏಕೂನಸತ್ತತಿ ರೂಪೇ, ಸುದ್ಧೇ ಪಞ್ಞಾಸ ಪಞ್ಚ ಚ;

ಛಚತ್ತಾಲೀಸ ಆರುಪ್ಪೇ, ನತ್ಥಾಸಞ್ಞೀಸು ಕಿಞ್ಚಿಪಿ.

೨೫೪. ಇತ್ಥಮೇಕದ್ವಿತಿಚತುಪಞ್ಚಭುಮ್ಮಾನಿ ಸೋಳಸ;

ದಸ ಪಞ್ಚದಸೇವಾಥ, ಚತುತ್ತಿಂಸ ಚತುದ್ದಸ.

೨೫೫. ಅಪಾಯಾಹೇತುಕಾನಂ ತು, ಮಹಾಪಾಕಕ್ರಿಯಾಜವೇ;

ಹಿತ್ವಾ ಸೇಸಪರಿತ್ತಾನಿ, ಚಿತ್ತಾನಿ ಪನ ಲಬ್ಭರೇ.

೨೫೬. ದ್ವಿಹೇತುಕಾಹೇತುಕಾನಂ, ಸೇಸಾನಂ ಕಾಮಮಾನಸಾ;

ಲಬ್ಭನ್ತಿ ಪನ ಹಿತ್ವಾನ, ಞಾಣಪಾಕಕ್ರಿಯಾಜವೇ.

೨೫೭. ತಿಹೇತುಕಾನಂ ಸತ್ತಾನಂ, ತತ್ಥ ತತ್ಥೂಪಪತ್ತಿಯಂ;

ತತ್ಥ ತತ್ಥೂಪಪನ್ನಾನಂ, ಲಬ್ಭಮಾನಾನಿ ಲಬ್ಭರೇ.

೨೫೮. ತಿಹೇತುಕಾನಂ ಸಬ್ಬೇಪಿ, ಮಾನಸಾಪಾಯಪಾಣಿನಂ;

ಸತ್ತತಿಂಸಾವಸೇಸಾನಂ, ಏಕತಾಲೀಸ ನಿದ್ದಿಸೇ.

೨೫೯. ಪುಥುಜ್ಜನಾನ ಸೇಕ್ಖಾನಂ, ನ ಸನ್ತಿ ಜವನಕ್ರಿಯಾ;

ನ ಸನ್ತಿ ವೀತರಾಗಾನಂ, ಪುಞ್ಞಾಪುಞ್ಞಾನಿ ಸಬ್ಬಥಾ.

೨೬೦. ಕಙ್ಖಾದಿಟ್ಠಿಯುತಾ ಪಞ್ಚ, ಸೇಕ್ಖಾನಂ ನತ್ಥಿ ಮಾನಸಾ;

ದೋಸಮೂಲದ್ವಯಞ್ಚಾಪಿ, ನತ್ಥಾನಾಗಾಮಿನೋ ಪನ.

೨೬೧. ವವತ್ಥಿತಾರಿಯೇಸ್ವೇವ, ಯಥಾಸಕಮನುತ್ತರಾ;

ಮಗ್ಗಟ್ಠಾನಂ ಸಕೋ ಮಗ್ಗೋ, ನತ್ಥಞ್ಞಂ ಕಿಞ್ಚಿ ಸಬ್ಬಥಾ.

೨೬೨. ಪುಥುಜ್ಜನಾನಂ ದ್ವಿನ್ನಮ್ಪಿ, ಫಲಟ್ಠಾನಂ ಯಥಾಕ್ಕಮಂ;

ತತಿಯಸ್ಸ ಫಲಟ್ಠಸ್ಸ, ಚತುತ್ಥಸ್ಸ ಚ ಸಮ್ಭವಾ.

೨೬೩. ತೇಸಟ್ಠಿ ಚೇವ ಚಿತ್ತಾನಿ, ಲಬ್ಭನ್ತೇಕೂನಸಟ್ಠಿ ಚ;

ಸತ್ತಪಞ್ಞಾಸ ಚಿತ್ತಾನಿ, ತೇಪಞ್ಞಾಸ ಚ ಸಬ್ಬಥಾ.

೨೬೪. ಚತುಪಞ್ಞಾಸ ಪಞ್ಞಾಸ, ಪಞ್ಞಾಸದ್ವಯಹೀನಕಾ;

ಕಾಮೇಸು ತೇಸಂ ಸಮ್ಭೋನ್ತಿ, ಚತುತಾಲೀಸ ಚಕ್ಕಮಾ.

೨೬೫. ತೇಚತ್ತಾಲೀಸ ಚೇಕೂನಚತ್ತಾಲೀಸ ಯಥಾಕ್ಕಮಂ;

ಭವನ್ತೇಕೂನತಾಲೀಸ, ಪಞ್ಚತ್ತಿಂಸ ಚ ರೂಪಿಸು.

೨೬೬. ಸತ್ತವೀಸ ಚ ತೇವೀಸ, ತೇವೀಸ ಚ ಯಥಾಕ್ಕಮಂ;

ಆರುಪ್ಪೇಸುಪಿ ಲಬ್ಭನ್ತಿ, ತೇಸಮಟ್ಠಾರಸೇವ ಚ.

೨೬೭. ಪುಥುಜ್ಜನಾ ಚ ಚತ್ತಾರೋ, ಅಪಾಯಾಹೇತುಕಾದಯೋ;

ಅರಿಯಾ ಚೇವ ಅಟ್ಠಾತಿ, ದ್ವಾದಸನ್ನಂ ವಸಾ ಸಿಯುಂ.

೨೬೮. ಛಬ್ಬಿಧಾ ಚಿತ್ತಕೋಟ್ಠಾಸಾ, ಏಕಪುಗ್ಗಲಿಕಾ ತಥಾ;

ಚತುಪಞ್ಚಛಸತ್ತಟ್ಠ-ಪುಗ್ಗಲಟ್ಠಾತಿ ಚಕ್ಕಮಾ.

೨೬೯. ಛಬ್ಬೀಸ ಚುದ್ದಸೇವಾಥ, ತೇರಸ ದ್ವೇ ಚ ಮಾನಸಾ;

ದಸ ಸತ್ತಾಧಿಕಾ ಚೇವ, ಪುನ ಸತ್ತಾಧಿಕಾ ದಸಾತಿ.

ಇತಿ ಚಿತ್ತವಿಭಾಗೇ ಭೂಮಿಪುಗ್ಗಲಚಿತ್ತಪ್ಪವತ್ತಿಕಥಾ ನಿಟ್ಠಿತಾ.

ಛಟ್ಠೋ ಪರಿಚ್ಛೇದೋ.