ಸತ್ತಮೋ ಪರಿಚ್ಛೇದೋ

೨೭೦. ದ್ವಿಹೇತುಕಾಹೇತುಕಾನಂ, ನ ಸಮ್ಪಜ್ಜತಿ ಅಪ್ಪನಾ;

ಅರಹತ್ತಞ್ಚ ನತ್ಥೀತಿ, ನತ್ಥೇವ ಜವನಕ್ರಿಯಾ.

೨೭೧. ಞಾಣಪಾಕಾ ನ ವತ್ತನ್ತಿ, ಜಳತ್ತಾ ಮೂಲಸನ್ಧಿಯಾ;

ದ್ವಿಹೇತುಕತದಾಲಮ್ಬಂ, ಸಿಯಾ ಸುಗತಿಯಂ ನ ವಾ.

೨೭೨. ತಿಹೇತುಕಾನಂ ಸತ್ತಾನಂ, ಸಮಥಞ್ಚ ವಿಪಸ್ಸನಂ;

ಭಾವೇನ್ತಾನಂ ಪವತ್ತನ್ತಿ, ಛಬ್ಬೀಸತಿಪಿ ಅಪ್ಪನಾ.

೨೭೩. ಅರಹನ್ತಾನ ಸತ್ತಾನಂ, ಭವನ್ತಿ ಜವನಕ್ರಿಯಾ;

ಯಥಾಭೂಮಿನಿಯಾಮೇನ, ಞಾಣಪಾಕಾ ಚ ಲಬ್ಭರೇ.

೨೭೪. ವಜ್ಝಾ ಪಠಮಮಗ್ಗೇನ, ಕಙ್ಖಾದಿಟ್ಠಿಯುತಾ ಪನ;

ಪಟಿಘಂ ತತಿಯೇನೇವ, ಕಮ್ಮಮನ್ತೇನ ಸಾಸವಂ.

೨೭೫. ತಸ್ಮಾ ತೇಸಂ ನ ವತ್ತನ್ತಿ, ತಾನಿ ಚಿತ್ತಾನಿ ಸಬ್ಬಥಾ;

ಮಗ್ಗಟ್ಠಾನಂ ತು ಮಗ್ಗೋವ, ನಾಞ್ಞಂ ಸಮ್ಭೋತಿ ಕಿಞ್ಚಿಪಿ.

೨೭೬. ಅಹೇತುಕವಿಪಾಕಾನಿ, ಲಬ್ಭಮಾನಾಯ ವೀಥಿಯಾ;

ಸಬ್ಬಥಾಪಿ ಚ ಸಬ್ಬೇಸಂ, ಸಮ್ಭವನ್ತಿ ಯಥಾರಹಂ.

೨೭೭. ಪಞ್ಚದ್ವಾರೇ ಮನೋದ್ವಾರೇ, ಧುವಮಾವಜ್ಜನದ್ವಯಂ;

ಪರಿತ್ತಪುಞ್ಞಾಪುಞ್ಞಾನಿ, ಲಬ್ಭನ್ತಿ ಲಹುವುತ್ತಿತೋ.

೨೭೮. ಕ್ರಿಯಾಜವನಮಪ್ಪನಾ, ನತ್ಥಾಪಾಯೇಸು ಕಾರಣಂ;

ನತ್ಥಿ ಸಹೇತುಕಾ ಪಾಕಾ, ದುಗ್ಗತತ್ತಾ ಹಿ ಸನ್ಧಿಯಾ.

೨೭೯. ಬ್ರಹ್ಮಾನಂ ಪಟಿಘಂ ನತ್ಥಿ, ಝಾನವಿಕ್ಖಮ್ಭಿತಂ ತಥಾ;

ಹೇಟ್ಠಾಝಾನಂ ವಿರತ್ತತ್ತಾ, ನ ಭಾವೇನ್ತಿ ಅರೂಪಿನೋ.

೨೮೦. ಪುಬ್ಬೇವ ದಿಟ್ಠಸಚ್ಚಾವ, ಅರಿಯಾರೂಪಭೂಮಕಾ;

ತಸ್ಮಾದಿಮಗ್ಗೋ ನತ್ಥೇತ್ಥ, ಕಾಯಾಭಾವಾ ಸಿತಂ ತಥಾ.

೨೮೧. ಸುದ್ಧಾವಾಸಾಪಿ ಪತ್ತಾವ, ಹೇಟ್ಠಾನುತ್ತರಪಞ್ಚಕಂ;

ಸತ್ತಪಾಪಪಹೀನಾ ಚ, ತಸ್ಮಾ ನತ್ಥೇತ್ಥ ತಾನಿ ಚ.

೨೮೨. ಪಞ್ಚದ್ವಾರಿಕಚಿತ್ತಾನಿ, ದ್ವಾರಾಭಾವೇ ನ ವಿಜ್ಜರೇ;

ಸಹೇತುಕವಿಪಾಕಾ ಚ, ಯಥಾಭೂಮಿವವತ್ಥಿತಾ.

೨೮೩. ಸಮ್ಭವಾಸಮ್ಭವಞ್ಚೇವಂ, ಞತ್ವಾ ಪುಗ್ಗಲಭೂಮಿಸು;

ಲಬ್ಭಮಾನವಸಾ ತತ್ಥ, ಚಿತ್ತಸಙ್ಗಹಮುದ್ದಿಸೇ.

೨೮೪. ಕುಸಲಾದಿಪ್ಪಭೇದಾ ಚ, ತಥಾ ಭೂಮಾದಿಭೇದತೋ;

ವತ್ಥುದ್ವಾರಾರಮ್ಮಣತೋ, ಭೂಮಿಪುಗ್ಗಲತೋಪಿ ಚ.

೨೮೫. ವಿಭಾಗೋ ಯೋ ಸಮುದ್ದಿಟ್ಠೋ,

ಚಿತ್ತಾನಞ್ಚ ತು ಸಮ್ಭವಾ;

ಞೇಯ್ಯೋ ಚೇತಸಿಕಾನಞ್ಚ,

ಸಮ್ಪಯೋಗಾನುಸಾರತೋತಿ.

ಇತಿ ಚಿತ್ತವಿಭಾಗೇ ಭೂಮಿಪುಗ್ಗಲಸಮ್ಭವಕಥಾ ನಿಟ್ಠಿತಾ.

ಸತ್ತಮೋ ಪರಿಚ್ಛೇದೋ.

ನಿಟ್ಠಿತೋ ಚ ಚಿತ್ತವಿಭಾಗೋ.