೨. ಚೇತಸಿಕಪರಿಚ್ಛೇದೋ

ಸಮ್ಪಯೋಗಲಕ್ಖಣಂ

೧. ಏಕುಪ್ಪಾದನಿರೋಧಾ ಚ, ಏಕಾಲಮ್ಬಣವತ್ಥುಕಾ.

ಚೇತೋಯುತ್ತಾ ದ್ವಿಪಞ್ಞಾಸ, ಧಮ್ಮಾ ಚೇತಸಿಕಾ ಮತಾ.

ಅಞ್ಞಸಮಾನಚೇತಸಿಕಂ

೨. ಕಥಂ? ಫಸ್ಸೋ ವೇದನಾ ಸಞ್ಞಾ ಚೇತನಾ ಏಕಗ್ಗತಾ ಜೀವಿತಿನ್ದ್ರಿಯಂ ಮನಸಿಕಾರೋ ಚೇತಿ ಸತ್ತಿಮೇ ಚೇತಸಿಕಾ ಸಬ್ಬಚಿತ್ತಸಾಧಾರಣಾ ನಾಮ.

೩. ವಿತಕ್ಕೋ ವಿಚಾರೋ ಅಧಿಮೋಕ್ಖೋ ವೀರಿಯಂ ಪೀತಿ ಛನ್ದೋ ಚಾತಿ ಛ ಇಮೇ ಚೇತಸಿಕಾ ಪಕಿಣ್ಣಕಾ ನಾಮ.

೪. ಏವಮೇತೇ ತೇರಸ ಚೇತಸಿಕಾ ಅಞ್ಞಸಮಾನಾತಿ ವೇದಿತಬ್ಬಾ.

ಅಕುಸಲಚೇತಸಿಕಂ

೫. ಮೋಹೋ ಅಹಿರಿಕಂ ಅನೋತ್ತಪ್ಪಂ ಉದ್ಧಚ್ಚಂ ಲೋಭೋ ದಿಟ್ಠಿ ಮಾನೋ ದೋಸೋ ಇಸ್ಸಾ ಮಚ್ಛರಿಯಂ ಕುಕ್ಕುಚ್ಚಂ ಥಿನಂ ಮಿದ್ಧಂ ವಿಚಿಕಿಚ್ಛಾ ಚೇತಿ ಚುದ್ದಸಿಮೇ ಚೇತಸಿಕಾ ಅಕುಸಲಾ ನಾಮ.

ಸೋಭನಚೇತಸಿಕಂ

೬. ಸದ್ಧಾ ಸತಿ ಹಿರೀ ಓತ್ತಪ್ಪಂ ಅಲೋಭೋ ಅದೋಸೋ ತತ್ರಮಜ್ಝತ್ತತಾ ಕಾಯಪಸ್ಸದ್ಧಿ ಚಿತ್ತಪಸ್ಸದ್ಧಿ ಕಾಯಲಹುತಾ ಚಿತ್ತಲಹುತಾ ಕಾಯಮುದುತಾ ಚಿತ್ತಮುದುತಾ ಕಾಯಕಮ್ಮಞ್ಞತಾ ಚಿತ್ತಕಮ್ಮಞ್ಞತಾ ಕಾಯಪಾಗುಞ್ಞತಾ ಚಿತ್ತಪಾಗುಞ್ಞತಾ ಕಾಯುಜುಕತಾ ಚಿತ್ತುಜುಕತಾ ಚೇತಿ ಏಕೂನವೀಸತಿಮೇ ಚೇತಸಿಕಾ ಸೋಭನಸಾಧಾರಣಾ ನಾಮ.

೭. ಸಮ್ಮಾವಾಚಾ ಸಮ್ಮಾಕಮ್ಮನ್ತೋ ಸಮ್ಮಾಆಜೀವೋ ಚೇತಿ ತಿಸ್ಸೋ ವಿರತಿಯೋ ನಾಮ.

೮. ಕರುಣಾ ಮುದಿತಾ ಅಪ್ಪಮಞ್ಞಾಯೋ ನಾಮಾತಿ ಸಬ್ಬಥಾಪಿ ಪಞ್ಞಿನ್ದ್ರಿಯೇನ ಸದ್ಧಿಂ ಪಞ್ಚವೀಸತಿಮೇ ಚೇತಸಿಕಾ ಸೋಭನಾತಿ ವೇದಿತಬ್ಬಾ.

೯. ಏತ್ತಾವತಾ ಚ –

ತೇರಸಞ್ಞಸಮಾನಾ ಚ, ಚುದ್ದಸಾಕುಸಲಾ ತಥಾ;

ಸೋಭನಾ ಪಞ್ಚವೀಸಾತಿ, ದ್ವಿಪಞ್ಞಾಸ ಪವುಚ್ಚರೇ.

ಸಮ್ಪಯೋಗನಯೋ

೧೦. ತೇಸಂ ಚಿತ್ತಾವಿಯುತ್ತಾನಂ, ಯಥಾಯೋಗಮಿತೋ ಪರಂ.

ಚಿತ್ತುಪ್ಪಾದೇಸು ಪಚ್ಚೇಕಂ, ಸಮ್ಪಯೋಗೋ ಪವುಚ್ಚತಿ.

೧೧. ಸತ್ತ ಸಬ್ಬತ್ಥ ಯುಜ್ಜನ್ತಿ, ಯಥಾಯೋಗಂ ಪಕಿಣ್ಣಕಾ.

ಚುದ್ದಸಾಕುಸಲೇಸ್ವೇವ, ಸೋಭನೇಸ್ವೇವ ಸೋಭನಾ.

ಅಞ್ಞಸಮಾನಚೇತಸಿಕಸಮ್ಪಯೋಗನಯೋ

೧೨. ಕಥಂ? ಸಬ್ಬಚಿತ್ತಸಾಧಾರಣಾ ತಾವ ಸತ್ತಿಮೇ ಚೇತಸಿಕಾ ಸಬ್ಬೇಸುಪಿ ಏಕೂನನವುತಿಚಿತ್ತುಪ್ಪಾದೇಸು ಲಬ್ಭನ್ತಿ.

೧೩. ಪಕಿಣ್ಣಕೇಸು ಪನ ವಿತಕ್ಕೋ ತಾವ ದ್ವಿಪಞ್ಚವಿಞ್ಞಾಣವಜ್ಜಿತಕಾಮಾವಚರಚಿತ್ತೇಸು ಚೇವ ಏಕಾದಸಸು ಪಠಮಜ್ಝಾನಚಿತ್ತೇಸು ಚೇತಿ ಪಞ್ಚಪಞ್ಞಾಸಚಿತ್ತೇಸು ಉಪ್ಪಜ್ಜತಿ.

೧೪. ವಿಚಾರೋ ಪನ ತೇಸು ಚೇವ ಏಕಾದಸಸು ದುತಿಯಜ್ಝಾನಚಿತ್ತೇಸು ಚಾತಿ ಛಸಟ್ಠಿಚಿತ್ತೇಸು.

೧೫. ಅಧಿಮೋಕ್ಖೋ ದ್ವಿಪಞ್ಚವಿಞ್ಞಾಣವಿಚಿಕಿಚ್ಛಾಸಹಗತವಜ್ಜಿತಚಿತ್ತೇಸು.

೧೬. ವೀರಿಯಂ ಪಞ್ಚದ್ವಾರಾವಜ್ಜನದ್ವಿಪಞ್ಚವಿಞ್ಞಾಣಸಮ್ಪಟಿಚ್ಛನಸನ್ತೀರಣವಜ್ಜಿತಚಿತ್ತೇಸು.

೧೭. ಪೀತಿ ದೋಮನಸ್ಸುಪೇಕ್ಖಾಸಹಗತಕಾಯವಿಞ್ಞಾಣಚತುತ್ಥಜ್ಝಾನವಜ್ಜಿತಚಿತ್ತೇಸು.

೧೮. ಛನ್ದೋ ಅಹೇತುಕಮೋಮೂಹವಜ್ಜಿತಚಿತ್ತೇಸೂತಿ.

೧೯. ತೇ ಪನ ಚಿತ್ತುಪ್ಪಾದಾ ಯಥಾಕ್ಕಮಂ –

ಛಸಟ್ಠಿ ಪಞ್ಚಪಞ್ಞಾಸ, ಏಕಾದಸ ಚ ಸೋಳಸ;

ಸತ್ತತಿ ವೀಸತಿ ಚೇವ, ಪಕಿಣ್ಣಕವಿವಜ್ಜಿತಾ.

ಪಞ್ಚಪಞ್ಞಾಸ ಛಸಟ್ಠಿಟ್ಠಸತ್ತತಿ ತಿಸತ್ತತಿ;

ಏಕಪಞ್ಞಾಸ ಚೇಕೂನಸತ್ತತಿ ಸಪಕಿಣ್ಣಕಾ.

ಅಕುಸಲಚೇತಸಿಕಸಮ್ಪಯೋಗನಯೋ

೨೦. ಅಕುಸಲೇಸು ಪನ ಮೋಹೋ ಅಹಿರಿಕಂ ಅನೋತ್ತಪ್ಪಂ ಉದ್ಧಚ್ಚಞ್ಚಾತಿ ಚತ್ತಾರೋಮೇ ಚೇತಸಿಕಾ ಸಬ್ಬಾಕುಸಲಸಾಧಾರಣಾ ನಾಮ, ಸಬ್ಬೇಸುಪಿ ದ್ವಾದಸಾ ಕುಸಲೇಸು ಲಬ್ಭನ್ತಿ.

೨೧. ಲೋಭೋ ಅಟ್ಠಸು ಲೋಭಸಹಗತಚಿತ್ತೇಸ್ವೇವ ಲಬ್ಭತಿ.

೨೨. ದಿಟ್ಠಿ ಚತೂಸು ದಿಟ್ಠಿಗತಸಮ್ಪಯುತ್ತೇಸು.

೨೩. ಮಾನೋ ಚತೂಸು ದಿಟ್ಠಿಗತವಿಪ್ಪಯುತ್ತೇಸು.

೨೪. ದೋಸೋ ಇಸ್ಸಾ ಮಚ್ಛರಿಯಂ ಕುಕ್ಕುಚ್ಚಞ್ಚಾತಿ ದ್ವೀಸು ಪಟಿಘಸಮ್ಪಯುತ್ತಚಿತ್ತೇಸು.

೨೫. ಥಿನಮಿದ್ಧಂ ಪಞ್ಚಸು ಸಸಙ್ಖಾರಿಕಚಿತ್ತೇಸು.

೨೬. ವಿಚಿಕಿಚ್ಛಾ ವಿಚಿಕಿಚ್ಛಾಸಹಗತಚಿತ್ತೇಯೇವಾತಿ.

೨೭. ಸಬ್ಬಾಪುಞ್ಞೇಸು ಚತ್ತಾರೋ,

ಲೋಭಮೂಲೇ ತಯೋ ಗತಾ;

ದೋಸಮೂಲೇಸು ಚತ್ತಾರೋ,

ಸಸಙ್ಖಾರೇ ದ್ವಯಂ ತಥಾ.

ವಿಚಿಕಿಚ್ಛಾ ವಿಚಿಕಿಚ್ಛಾ-ಚಿತ್ತೇ ಚಾತಿ ಚತುದ್ದಸ;

ದ್ವಾದಸಾಕುಲೇಸ್ವೇವ, ಸಮ್ಪಯುಜ್ಜನ್ತಿ ಪಞ್ಚಧಾ.

ಸೋಭನಚೇತಸಿಕಸಮ್ಪಯೋಗನಯೋ

೨೮. ಸೋಭನೇಸು ಪನ ಸೋಭನಸಾಧಾರಣಾ ತಾವ ಏಕೂನವೀಸತಿಮೇ ಚೇತಸಿಕಾ ಸಬ್ಬೇಸುಪಿ ಏಕೂನಸಟ್ಠಿಸೋಭನಚಿತ್ತೇಸು ಸಂವಿಜ್ಜನ್ತಿ.

೨೯. ವಿರತಿಯೋ ಪನ ತಿಸ್ಸೋಪಿ ಲೋಕುತ್ತರಚಿತ್ತೇಸು ಸಬ್ಬಥಾಪಿ ನಿಯತಾ ಏಕತೋವ ಲಬ್ಭನ್ತಿ, ಲೋಕಿಯೇಸು ಪನ ಕಾಮಾವಚರಕುಸಲೇಸ್ವೇವ ಕದಾಚಿ ಸನ್ದಿಸ್ಸನ್ತಿ ವಿಸುಂ ವಿಸುಂ.

೩೦. ಅಪ್ಪಮಞ್ಞಾಯೋ ಪನ ದ್ವಾದಸಸು ಪಞ್ಚಮಜ್ಝಾನವಜ್ಜಿತಮಹಗ್ಗತಚಿತ್ತೇಸು ಚೇವ ಕಾಮಾವಚರಕುಸಲೇಸು ಚ ಸಹೇತುಕಕಾಮಾವಚರಕಿರಿಯಚಿತ್ತೇಸು ಚಾತಿ ಅಟ್ಠವೀಸತಿಚಿತ್ತೇಸ್ವೇವ ಕದಾಚಿ ನಾನಾ ಹುತ್ವಾ ಜಾಯನ್ತಿ, ಉಪೇಕ್ಖಾಸಹಗತೇಸು ಪನೇತ್ಥ ಕರುಣಾಮುದಿತಾ ನ ಸನ್ತೀತಿ ಕೇಚಿ ವದನ್ತಿ.

೩೧. ಪಞ್ಞಾ ಪನ ದ್ವಾದಸಸು ಞಾಣಸಮ್ಪಯುತ್ತಕಾಮಾವಚರಚಿತ್ತೇಸು ಚೇವ ಸಬ್ಬೇಸುಪಿ ಪಞ್ಚತಿಂಸಮಹಗ್ಗತಲೋಕುತ್ತರಚಿತ್ತೇಸು ಚಾತಿ ಸತ್ತಚತ್ತಾಲೀಸಚಿತ್ತೇಸು ಸಮ್ಪಯೋಗಂ ಗಚ್ಛತೀತಿ.

೩೨. ಏಕೂನವೀಸತಿ ಧಮ್ಮಾ, ಜಾಯನ್ತೇಕೂನಸಟ್ಠಿಸು.

ತಯೋ ಸೋಳಸಚಿತ್ತೇಸು, ಅಟ್ಠವೀಸತಿಯಂ ದ್ವಯಂ.

ಪಞ್ಞಾ ಪಕಾಸಿತಾ, ಸತ್ತಚತ್ತಾಲೀಸವಿಧೇಸುಪಿ;

ಸಮ್ಪಯುತ್ತಾ ಚತುಧೇವಂ, ಸೋಭನೇಸ್ವೇವ ಸೋಭನಾ.

೩೩. ಇಸ್ಸಾಮಚ್ಛೇರಕುಕ್ಕುಚ್ಚ-ವಿರತಿಕರುಣಾದಯೋ.

ನಾನಾ ಕದಾಚಿ ಮಾನೋ ಚ, ಥಿನ ಮಿದ್ಧಂ ತಥಾ ಸಹ.

೩೪. ಯಥಾವುತ್ತಾನುಸಾರೇನ, ಸೇಸಾ ನಿಯತಯೋಗಿನೋ.

ಸಙ್ಗಹಞ್ಚ ಪವಕ್ಖಾಮಿ, ತೇಸಂ ದಾನಿ ಯಥಾರಹಂ.

ಸಙ್ಗಹನಯೋ

೩೫. ಛತ್ತಿಂಸಾನುತ್ತರೇ ಧಮ್ಮಾ, ಪಞ್ಚತಿಂಸ ಮಹಗ್ಗತೇ.

ಅಟ್ಠತಿಂಸಾಪಿ ಲಬ್ಭನ್ತಿ, ಕಾಮಾವಚರಸೋಭನೇ.

ಸತ್ತವೀಸತಿಪುಞ್ಞಮ್ಹಿ, ದ್ವಾದಸಾಹೇತುಕೇತಿ ಚ;

ಯಥಾಸಮ್ಭವಯೋಗೇನ, ಪಞ್ಚಧಾ ತತ್ಥ ಸಙ್ಗಹೋ.

ಲೋಕುತ್ತರಚಿತ್ತಸಙ್ಗಹನಯೋ

೩೬. ಕಥಂ? ಲೋಕುತ್ತರೇಸು ತಾವ ಅಟ್ಠಸು ಪಠಮಜ್ಝಾನಿಕಚಿತ್ತೇಸು ಅಞ್ಞಸಮಾನಾ ತೇರಸ ಚೇತಸಿಕಾ, ಅಪ್ಪಮಞ್ಞಾವಜ್ಜಿತಾ ತೇವೀಸತಿ ಸೋಭನಚೇತಸಿಕಾ ಚೇತಿ ಛತ್ತಿಂಸ ಧಮ್ಮಾ ಸಙ್ಗಹಂ ಗಚ್ಛನ್ತಿ, ತಥಾ ದುತಿಯಜ್ಝಾನಿಕಚಿತ್ತೇಸು ವಿತಕ್ಕವಜ್ಜಾ, ತತಿಯಜ್ಝಾನಿಕಚಿತ್ತೇಸು ವಿತಕ್ಕವಿಚಾರವಜ್ಜಾ, ಚತುತ್ಥಜ್ಝಾನಿಕಚಿತ್ತೇಸು ವಿತಕ್ಕವಿಚಾರಪೀತಿವಜ್ಜಾ, ಪಞ್ಚಮಜ್ಝಾನಿಕಚಿತ್ತೇಸುಪಿ ಉಪೇಕ್ಖಾಸಹಗತಾ ತೇ ಏವ ಸಙ್ಗಯ್ಹನ್ತೀತಿ ಸಬ್ಬಥಾಪಿ ಅಟ್ಠಸು ಲೋಕುತ್ತರಚಿತ್ತೇಸು ಪಞ್ಚಕಜ್ಝಾನವಸೇನ ಪಞ್ಚಧಾವ ಸಙ್ಗಹೋ ಹೋತೀತಿ.

೩೭. ಛತ್ತಿಂಸ ಪಞ್ಚತಿಂಸ ಚ, ಚತುತ್ತಿಂಸ ಯಥಾಕ್ಕಮಂ.

ತೇತ್ತಿಂಸದ್ವಯಮಿಚ್ಚೇವಂ, ಪಞ್ಚಧಾನುತ್ತರೇ ಠಿತಾ.

ಮಹಗ್ಗತಚಿತ್ತಸಙ್ಗಹನಯೋ

೩೮. ಮಹಗ್ಗತೇಸು ಪನ ತೀಸು ಪಠಮಜ್ಝಾನಿಕಚಿತ್ತೇಸು ತಾವ ಅಞ್ಞಸಮಾನಾ ತೇರಸ ಚೇತಸಿಕಾ, ವಿರತಿತ್ತಯವಜ್ಜಿತಾ ದ್ವಾವೀಸತಿ ಸೋಭನಚೇತಸಿಕಾ ಚೇತಿ ಪಞ್ಚತಿಂಸ ಧಮ್ಮಾ ಸಙ್ಗಹಂ ಗಚ್ಛನ್ತಿ, ಕರುಣಾಮುದಿತಾ ಪನೇತ್ಥ ಪಚ್ಚೇಕಮೇವ ಯೋಜೇತಬ್ಬಾ, ತಥಾ ದುತಿಯಜ್ಝಾನಿಕಚಿತ್ತೇಸು ವಿತಕ್ಕವಜ್ಜಾ, ತತಿಯಜ್ಝಾನಿಕಚಿತ್ತೇಸು ವಿತಕ್ಕವಿಚಾರವಜ್ಜಾ, ಚತುತ್ಥಜ್ಝಾನಿಕಚಿತ್ತೇಸು ವಿತಕ್ಕವಿಚಾರಪೀತಿವಜ್ಜಾ, ಪಞ್ಚಮಜ್ಝಾನಿಕಚಿತ್ತೇಸು ಪನ ಪನ್ನರಸಸು ಅಪ್ಪಮಞ್ಞಾಯೋ ನ ಲಬ್ಭನ್ತೀತಿ ಸಬ್ಬಥಾಪಿ ಸತ್ತವೀಸತಿಮಹಗ್ಗತಚಿತ್ತೇಸು ಪಞ್ಚಕಜ್ಝಾನವಸೇನ ಪಞ್ಚಧಾವ ಸಙ್ಗಹೋ ಹೋತೀತಿ.

೩೯. ಪಞ್ಚತಿಂಸ ಚತುತ್ತಿಂಸ, ತೇತ್ತಿಂಸ ಚ ಯಥಾಕ್ಕಮಂ.

ಬಾತ್ತಿಂಸ ಚೇವ ತಿಂಸೇತಿ, ಪಞ್ಚಧಾವ ಮಹಗ್ಗತೇ.

ಕಾಮಾವಚರಸೋಭನಚಿತ್ತಸಙ್ಗಹನಯೋ

೪೦. ಕಾಮಾವಚರಸೋಭನೇಸು ಪನ ಕುಸಲೇಸು ತಾವ ಪಠಮದ್ವಯೇ ಅಞ್ಞಸಮಾನಾ ತೇರಸ ಚೇತಸಿಕಾ, ಪಞ್ಚವೀಸತಿ ಸೋಭನಚೇತಸಿಕಾ ಚೇತಿ ಅಟ್ಠತಿಂಸ ಧಮ್ಮಾ ಸಙ್ಗಹಂ ಗಚ್ಛನ್ತಿ, ಅಪ್ಪಮಞ್ಞಾವಿರತಿಯೋ ಪನೇತ್ಥ ಪಞ್ಚಪಿ ಪಚ್ಚೇಕಮೇವ ಯೋಜೇತಬ್ಬಾ, ತಥಾ ದುತಿಯದ್ವಯೇ ಞಾಣವಜ್ಜಿತಾ, ತತಿಯದ್ವಯೇ ಞಾಣಸಮ್ಪಯುತ್ತಾ ಪೀತಿವಜ್ಜಿತಾ, ಚತುತ್ಥದ್ವಯೇ ಞಾಣಪೀತಿವಜ್ಜಿತಾ ತೇ ಏವ ಸಙ್ಗಯ್ಹನ್ತಿ. ಕಿರಿಯಚಿತ್ತೇಸುಪಿ ವಿರತಿವಜ್ಜಿತಾ ತಥೇವ ಚತೂಸುಪಿ ದುಕೇಸು ಚತುಧಾವ ಸಙ್ಗಯ್ಹನ್ತಿ. ತಥಾ ವಿಪಾಕೇಸು ಚ ಅಪ್ಪಮಞ್ಞಾವಿರತಿವಜ್ಜಿತಾ ತೇ ಏವ ಸಙ್ಗಯ್ಹನ್ತೀತಿ ಸಬ್ಬಥಾಪಿ ಚತುವೀಸತಿಕಾಮಾವಚರಸೋಭನಚಿತ್ತೇಸು ದುಕವಸೇನ ದ್ವಾದಸಧಾವ ಸಙ್ಗಹೋ ಹೋತೀತಿ.

೪೧. ಅಟ್ಠತಿಂಸ ಸತ್ತತಿಂಸ, ದ್ವಯಂ ಛತ್ತಿಂಸಕಂ ಸುಭೇ.

ಪಞ್ಚತಿಂಸ ಚತುತ್ತಿಂಸ, ದ್ವಯಂ ತೇತ್ತಿಂಸಕಂ ಕ್ರಿಯೇ;

ತೇತ್ತಿಂಸ ಪಾಕೇ ಬಾತ್ತಿಂಸ, ದ್ವಯೇಕತಿಂಸಕಂ ಭವೇ;

ಸಹೇತುಕಾಮಾವಚರಪುಞ್ಞ-ಪಾಕಕ್ರಿಯಾಮನೇ.

೪೨. ನವಿಜ್ಜನ್ತೇತ್ಥ ವಿರತೀ, ಕ್ರಿಯೇಸು ಚ ಮಹಗ್ಗತೇ.

ಅನುತ್ತರೇ ಅಪ್ಪಮಞ್ಞಾ, ಕಾಮಪಾಕೇ ದ್ವಯಂ ತಥಾ;

ಅನುತ್ತರೇ ಝಾನಧಮ್ಮಾ, ಅಪ್ಪಮಞ್ಞಾ ಚ ಮಜ್ಝಿಮೇ;

ವಿರತೀ ಞಾಣಪೀತೀ ಚ, ಪರಿತ್ತೇಸು ವಿಸೇಸಕಾ.

ಅಕುಸಲಚಿತ್ತಸಙ್ಗಹನಯೋ

೪೩. ಅಕುಸಲೇಸು ಪನ ಲೋಭಮೂಲೇಸು ತಾವ ಪಠಮೇ ಅಸಙ್ಖಾರಿಕೇ ಅಞ್ಞಸಮಾನಾ ತೇರಸ ಚೇತಸಿಕಾ, ಅಕುಸಲಸಾಧಾರಣಾ ಚತ್ತಾರೋ ಚಾತಿ ಸತ್ತರಸ ಲೋಭದಿಟ್ಠೀಹಿ ಸದ್ಧಿಂ ಏಕೂನವೀಸತಿ ಧಮ್ಮಾ ಸಙ್ಗಹಂ ಗಚ್ಛನ್ತಿ.

೪೪. ತಥೇವ ದುತಿಯೇ ಅಸಙ್ಖಾರಿಕೇ ಲೋಭಮಾನೇನ.

೪೫. ತತಿಯೇ ತಥೇವ ಪೀತಿವಜ್ಜಿತಾ ಲೋಭದಿಟ್ಠೀಹಿ ಸಹ ಅಟ್ಠಾರಸ.

೪೬. ಚತುತ್ಥೇ ತಥೇವ ಲೋಭಮಾನೇನ.

೪೭. ಪಞ್ಚಮೇ ಪನ ಪಟಿಘಸಮ್ಪಯುತ್ತೇ ಅಸಙ್ಖಾರಿಕೇ ದೋಸೋ ಇಸ್ಸಾ ಮಚ್ಛರಿಯಂ ಕುಕ್ಕುಚ್ಚಞ್ಚಾತಿ ಚತೂಹಿ ಸದ್ಧಿಂ ಪೀತಿವಜ್ಜಿತಾ ತೇ ಏವ ವೀಸತಿ ಧಮ್ಮಾ ಸಙ್ಗಯ್ಹನ್ತಿ, ಇಸ್ಸಾಮಚ್ಛರಿಯಕುಕ್ಕುಚ್ಚಾನಿ ಪನೇತ್ಥ ಪಚ್ಚೇಕಮೇವ ಯೋಜೇತಬ್ಬಾನಿ.

೪೮. ಸಸಙ್ಖಾರಿಕಪಞ್ಚಕೇಪಿ ತಥೇವ ಥಿನಮಿದ್ಧೇನ ವಿಸೇಸೇತ್ವಾ ಯೋಜೇತಬ್ಬಾ.

೪೯. ಛನ್ದಪೀತಿವಜ್ಜಿತಾ ಪನ ಅಞ್ಞಸಮಾನಾ ಏಕಾದಸ, ಅಕುಸಲಸಾಧಾರಣಾ ಚತ್ತಾರೋ ಚಾತಿ ಪನ್ನರಸ ಧಮ್ಮಾ ಉದ್ಧಚ್ಚಸಹಗತೇ ಸಮ್ಪಯುಜ್ಜನ್ತಿ.

೫೦. ವಿಚಿಕಿಚ್ಛಾಸಹಗತಚಿತ್ತೇ ಚ ಅಧಿಮೋಕ್ಖವಿರಹಿತಾ ವಿಚಿಕಿಚ್ಛಾಸಹಗತಾ ತಥೇವ ಪನ್ನರಸ ಧಮ್ಮಾ ಸಮುಪಲಬ್ಭನ್ತೀತಿ ಸಬ್ಬಥಾಪಿ ದ್ವಾದಸಾಕುಸಲಚಿತ್ತುಪ್ಪಾದೇಸು ಪಚ್ಚೇಕಂ ಯೋಜಿಯಮಾನಾಪಿ ಗಣನವಸೇನ ಸತ್ತಧಾವ ಸಙ್ಗಹಿತಾ ಭವನ್ತೀತಿ.

೫೧. ಏಕೂನವೀಸಾಟ್ಠಾರಸ, ವೀಸೇಕವೀಸ ವೀಸತಿ.

ದ್ವಾವೀಸ ಪನ್ನರಸೇತಿ, ಸತ್ತಧಾ ಕುಸಲೇಠಿತಾ.

೫೨. ಸಾಧಾರಣಾ ಚ ಚತ್ತಾರೋ, ಸಮಾನಾ ಚ ದಸಾಪರೇ.

ಚುದ್ದಸೇತೇ ಪವುಚ್ಚನ್ತಿ, ಸಬ್ಬಾಕುಸಲಯೋಗಿನೋ.

ಅಹೇತುಕಚಿತ್ತಸಙ್ಗಹನಯೋ

೫೩. ಅಹೇತುಕೇಸು ಪನ ಹಸನಚಿತ್ತೇ ತಾವ ಛನ್ದವಜ್ಜಿತಾ ಅಞ್ಞಸಮಾನಾ ದ್ವಾದಸ ಧಮ್ಮಾ ಸಙ್ಗಹಂ ಗಚ್ಛನ್ತಿ.

೫೪. ತಥಾ ವೋಟ್ಠಬ್ಬನೇ ಛನ್ದಪೀತಿವಜ್ಜಿತಾ.

೫೫. ಸುಖಸನ್ತೀರಣೇ ಛನ್ದವೀರಿಯವಜ್ಜಿತಾ.

೫೬. ಮನೋಧಾತುತ್ತಿಕಾಹೇತುಕಪಟಿಸನ್ಧಿಯುಗಳೇ ಛನ್ದಪೀತಿವೀರಿಯವಜ್ಜಿತಾ.

೫೭. ದ್ವಿಪಞ್ಚವಿಞ್ಞಾಣೇ ಪಕಿಣ್ಣಕವಜ್ಜಿತಾ ತೇಯೇವ ಸಙ್ಗಯ್ಹನ್ತೀತಿ ಸಬ್ಬಥಾಪಿ ಅಟ್ಠಾರಸಸು ಅಹೇತುಕೇಸು ಗಣನವಸೇನ ಚತುಧಾವ ಸಙ್ಗಹೋ ಹೋತೀತಿ.

೫೮. ದ್ವಾದಸೇಕಾದಸ ದಸ, ಸತ್ತ ಚಾತಿ ಚತುಬ್ಬಿಧೋ.

ಅಟ್ಠಾರಸಾಹೇತುಕೇಸು, ಚಿತ್ತುಪ್ಪಾದೇಸು ಸಙ್ಗಹೋ.

೫೯. ಅಹೇತುಕೇಸು ಸಬ್ಬತ್ಥ, ಸತ್ತ ಸೇಸಾ ಯಥಾರಹಂ.

ಇತಿ ವಿತ್ಥಾರತೋ ವುತ್ತೋ, ತೇತ್ತಿಂಸವಿಧಸಙ್ಗಹೋ.

೬೦. ಇತ್ಥಂ ಚಿತ್ತಾವಿಯುತ್ತಾನಂ, ಸಮ್ಪಯೋಗಞ್ಚ ಸಙ್ಗಹಂ.

ಞತ್ವಾ ಭೇದಂ ಯಥಾಯೋಗಂ, ಚಿತ್ತೇನ ಸಮಮುದ್ದಿಸೇ.

ಇತಿ ಅಭಿಧಮ್ಮತ್ಥಸಙ್ಗಹೇ ಚೇತಸಿಕಸಙ್ಗಹವಿಭಾಗೋ ನಾಮ

ದುತಿಯೋ ಪರಿಚ್ಛೇದೋ.