೩. ಪಕಿಣ್ಣಕಪರಿಚ್ಛೇದೋ

೧. ಸಮ್ಪಯುತ್ತಾ ಯಥಾಯೋಗಂ, ತೇಪಞ್ಞಾಸ ಸಭಾವತೋ.

ಚಿತ್ತಚೇತಸಿಕಾ ಧಮ್ಮಾ, ತೇಸಂ ದಾನಿ ಯಥಾರಹಂ.

೨. ವೇದನಾಹೇತುತೋ ಕಿಚ್ಚದ್ವಾರಾಲಮ್ಬಣವತ್ಥುತೋ.

ಚಿತ್ತುಪ್ಪಾದವಸೇನೇವ, ಸಙ್ಗಹೋ ನಾಮ ನೀಯತೇ.

ವೇದನಾಸಙ್ಗಹೋ

೩. ತತ್ಥ ವೇದನಾಸಙ್ಗಹೇ ತಾವ ತಿವಿಧಾ ವೇದನಾ ಸುಖಂ ದುಕ್ಖಂ ಅದುಕ್ಖಮಸುಖಾ ಚೇತಿ, ಸುಖಂ ದುಕ್ಖಂ ಸೋಮನಸ್ಸಂ ದೋಮನಸ್ಸಂ ಉಪೇಕ್ಖಾತಿ ಚ ಭೇದೇನ ಪನ ಪಞ್ಚಧಾ ಹೋತಿ.

೪. ತತ್ಥ ಸುಖಸಹಗತಂ ಕುಸಲವಿಪಾಕಂ ಕಾಯವಿಞ್ಞಾಣಮೇಕಮೇವ, ತಥಾ ದುಕ್ಖಸಹಗತಂ ಅಕುಸಲವಿಪಾಕಂ.

೫. ಸೋಮನಸ್ಸಸಹಗತಚಿತ್ತಾನಿ ಪನ ಲೋಭಮೂಲಾನಿ ಚತ್ತಾರಿ, ದ್ವಾದಸ ಕಾಮಾವಚರಸೋಭನಾನಿ, ಸುಖಸನ್ತೀರಣಹಸನಾನಿ ಚ ದ್ವೇತಿ ಅಟ್ಠಾರಸ ಕಾಮಾವಚರಸೋಮನಸ್ಸಸಹಗತಚಿತ್ತಾನಿ ಚೇವ ಪಠಮದುತಿಯತತಿಯಚತುತ್ಥಜ್ಝಾನಸಙ್ಖಾತಾನಿ ಚತುಚತ್ತಾಲೀಸ ಮಹಗ್ಗತಲೋಕುತ್ತರಚಿತ್ತಾನಿ ಚೇತಿ ದ್ವಾಸಟ್ಠಿವಿಧಾನಿ ಭವನ್ತಿ.

೬. ದೋಮನಸ್ಸಸಹಗತಚಿತ್ತಾನಿ ಪನ ದ್ವೇ ಪಟಿಘಸಮ್ಪಯುತ್ತಚಿತ್ತಾನೇವ.

೭. ಸೇಸಾನಿ ಸಬ್ಬಾನಿಪಿ ಪಞ್ಚಪಞ್ಞಾಸ ಉಪೇಕ್ಖಾಸಹಗತಚಿತ್ತಾನೇವಾತಿ.

೮. ಸುಖಂ ದುಕ್ಖಮುಪೇಕ್ಖಾತಿ, ತಿವಿಧಾ ತತ್ಥ ವೇದನಾ.

ಸೋಮನಸ್ಸಂ ದೋಮನಸ್ಸಮಿತಿಭೇದೇನ ಪಞ್ಚಧಾ.

೯. ಸುಖಮೇಕತ್ಥ ದುಕ್ಖಞ್ಚ, ದೋಮನಸ್ಸಂ ದ್ವಯೇ ಠಿತಂ.

ದ್ವಾಸಟ್ಠೀಸು ಸೋಮನಸ್ಸಂ, ಪಞ್ಚಪಞ್ಞಾಸಕೇತರಾ.

ಹೇತುಸಙ್ಗಹೋ

೧೦. ಹೇತುಸಙ್ಗಹೇ ಹೇತೂ ನಾಮ ಲೋಭೋ ದೋಸೋ ಮೋಹೋ ಅಲೋಭೋ ಅದೋಸೋ ಅಮೋಹೋ ಚಾತಿ ಛಬ್ಬಿಧಾ ಭವನ್ತಿ.

೧೧. ತತ್ಥ ಪಞ್ಚದ್ವಾರಾವಜ್ಜನದ್ವಿಪಞ್ಚವಿಞ್ಞಾಣಸಮ್ಪಟಿಚ್ಛನಸನ್ತೀರಣವೋಟ್ಠಬ್ಬನಹಸನವಸೇನ ಅಹೇತುಕಚಿತ್ತಾನಿ ನಾಮ.

೧೨. ಸೇಸಾನಿ ಸಬ್ಬಾನಿಪಿ ಏಕಸತ್ತತಿ ಚಿತ್ತಾನಿ ಸಹೇತುಕಾನೇವ.

೧೩. ತತ್ಥಾಪಿ ದ್ವೇ ಮೋಮೂಹಚಿತ್ತಾನಿ ಏಕಹೇತುಕಾನಿ.

೧೪. ಸೇಸಾನಿ ದಸ ಅಕುಸಲಚಿತ್ತಾನಿ ಚೇವ ಞಾಣವಿಪ್ಪಯುತ್ತಾನಿ ದ್ವಾದಸ ಕಾಮಾವಚರಸೋಭನಾನಿ ಚೇತಿ ದ್ವಾವೀಸತಿ ದ್ವಿಹೇತುಕಚಿತ್ತಾನಿ.

೧೫. ದ್ವಾದಸ ಞಾಣಸಮ್ಪಯುತ್ತಕಾಮಾವಚರಸೋಭನಾನಿ ಚೇವ ಪಞ್ಚತಿಂಸ ಮಹಗ್ಗತಲೋಕುತ್ತರಚಿತ್ತಾನಿ ಚೇತಿ ಸತ್ತಚತ್ತಾಲೀಸ ತಿಹೇತುಕಚಿತ್ತಾನೀತಿ.

೧೬. ಲೋಭೋ ದೋಸೋ ಚ ಮೋಹೋ ಚ,

ಹೇತೂ ಅಕುಸಲಾ ತಯೋ;

ಅಲೋಭಾದೋಸಾಮೋಹೋ ಚ,

ಕುಸಲಾಬ್ಯಾಕತಾ ತಥಾ.

೧೭. ಅಹೇತುಕಾಟ್ಠಾರಸೇಕಹೇತುಕಾ ದ್ವೇ ದ್ವಾವೀಸತಿ.

ದ್ವಿಹೇತುಕಾ ಮತಾ ಸತ್ತಚತ್ತಾಲೀಸತಿಹೇತುಕಾ.

ಕಿಚ್ಚಸಙ್ಗಹೋ

೧೮. ಕಿಚ್ಚಸಙ್ಗಹೇ ಕಿಚ್ಚಾನಿ ನಾಮ ಪಟಿಸನ್ಧಿಭವಙ್ಗಾವಜ್ಜನದಸ್ಸನಸವನಘಾಯನಸಾಯನಫುಸನಸಮ್ಪಟಿಚ್ಛನಸನ್ತೀರಣವೋಟ್ಠಬ್ಬನಜವನತದಾರಮ್ಮಣಚುತಿವಸೇನ ಚುದ್ದಸವಿಧಾನಿ ಭವನ್ತಿ.

೧೯. ಪಟಿಸನ್ಧಿಭವಙ್ಗಾವಜ್ಜನಪಞ್ಚವಿಞ್ಞಾಣಠಾನಾದಿವಸೇನ ಪನ ತೇಸಂ ದಸಧಾ ಠಾನಭೇದೋ ವೇದಿತಬ್ಬೋ.

೨೦. ತತ್ಥ ದ್ವೇ ಉಪೇಕ್ಖಾಸಹಗತಸನ್ತೀರಣಾನಿ ಚೇವ ಅಟ್ಠ ಮಹಾವಿಪಾಕಾನಿ ಚ ನವ ರೂಪಾರೂಪವಿಪಾಕಾನಿ ಚೇತಿ ಏಕೂನವೀಸತಿ ಚಿತ್ತಾನಿ ಪಟಿಸನ್ಧಿಭವಙ್ಗಚುತಿಕಿಚ್ಚಾನಿ ನಾಮ.

೨೧. ಆವಜ್ಜನಕಿಚ್ಚಾನಿ ಪನ ದ್ವೇ.

೨೨. ತಥಾ ದಸ್ಸನಸವನಘಾಯನಸಾಯನಫುಸನಸಮ್ಪಟಿಚ್ಛನಕಿಚ್ಚಾನಿ ಚ.

೨೩. ತೀಣಿ ಸನ್ತೀರಣಕಿಚ್ಚಾನಿ.

೨೪. ಮನೋದ್ವಾರಾವಜ್ಜನಮೇವ ಪಞ್ಚದ್ವಾರೇ ವೋಟ್ಠಬ್ಬನಕಿಚ್ಚಂ ಸಾಧೇತಿ.

೨೫. ಆವಜ್ಜನದ್ವಯವಜ್ಜಿತಾನಿ ಕುಸಲಾಕುಸಲಫಲಕಿರಿಯಚಿತ್ತಾನಿ ಪಞ್ಚಪಞ್ಞಾಸ ಜವನಕಿಚ್ಚಾನಿ.

೨೬. ಅಟ್ಠ ಮಹಾವಿಪಾಕಾನಿ ಚೇವ ಸನ್ತೀರಣತ್ತಯಞ್ಚೇತಿ ಏಕಾದಸ ತದಾರಮ್ಮಣಕಿಚ್ಚಾನಿ.

೨೭. ತೇಸು ಪನ ದ್ವೇ ಉಪೇಕ್ಖಾಸಹಗತಸನ್ತೀರಣಚಿತ್ತಾನಿ ಪಟಿಸನ್ಧಿಭವಙ್ಗಚುತಿತದಾರಮ್ಮಣಸನ್ತೀರಣವಸೇನ ಪಞ್ಚಕಿಚ್ಚಾನಿ ನಾಮ.

೨೮. ಮಹಾವಿಪಾಕಾನಿ ಅಟ್ಠ ಪಟಿಸನ್ಧಿಭವಙ್ಗಚುತಿತದಾರಮ್ಮಣವಸೇನ ಚತುಕಿಚ್ಚಾನಿ ನಾಮ.

೨೯. ಮಹಗ್ಗತವಿಪಾಕಾನಿ ನವ ಪಟಿಸನ್ಧಿಭವಙ್ಗಚುತಿವಸೇನ ತಿಕಿಚ್ಚಾನಿ ನಾಮ.

೩೦. ಸೋಮನಸ್ಸಸನ್ತೀರಣಂ ಸನ್ತೀರಣತದಾರಮ್ಮಣವಸೇನ ದುಕಿಚ್ಚಂ.

೩೧. ತಥಾ ವೋಟ್ಠಬ್ಬನಂ ವೋಟ್ಠಬ್ಬನಾವಜ್ಜನವಸೇನ.

೩೨. ಸೇಸಾನಿ ಪನ ಸಬ್ಬಾನಿಪಿ ಜವನಮನೋಧಾತುತ್ತಿಕದ್ವಿಪಞ್ಚವಿಞ್ಞಾಣಾನಿ ಯಥಾಸಮ್ಭವಮೇಕಕಿಚ್ಚಾನೀತಿ.

೩೩. ಪಟಿಸನ್ಧಾದಯೋ ನಾಮ, ಕಿಚ್ಚಭೇದೇನ ಚುದ್ದಸ.

ದಸಧಾ ಠಾನಭೇದೇನ, ಚಿತ್ತುಪ್ಪಾದಾ ಪಕಾಸಿತಾ.

೩೪. ಅಟ್ಠಸಟ್ಠಿ ತಥಾ ದ್ವೇ ಚ, ನವಾಟ್ಠ ದ್ವೇ ಯಥಾಕ್ಕಮಂ.

ಏಕದ್ವಿತಿಚತುಪಞ್ಚಕಿಚ್ಚಠಾನಾನಿ ನಿದ್ದಿಸೇ.

ದ್ವಾರಸಙ್ಗಹೋ

೩೫. ದ್ವಾರಸಙ್ಗಹೇ ದ್ವಾರಾನಿ ನಾಮ ಚಕ್ಖುದ್ವಾರಂ ಸೋತದ್ವಾರಂ ಘಾನದ್ವಾರಂ ಜಿವ್ಹಾದ್ವಾರಂ ಕಾಯದ್ವಾರಂ ಮನೋದ್ವಾರಞ್ಚೇತಿ ಛಬ್ಬಿಧಾನಿ ಭವನ್ತಿ.

೩೬. ತತ್ಥ ಚಕ್ಖುಮೇವ ಚಕ್ಖುದ್ವಾರಂ.

೩೭. ತಥಾ ಸೋತಾದಯೋ ಸೋತದ್ವಾರಾದೀನಿ.

೩೮. ಮನೋದ್ವಾರಂ ಪನ ಭವಙ್ಗನ್ತಿ ಪವುಚ್ಚತಿ.

೩೯. ತತ್ಥ ಪಞ್ಚದ್ವಾರಾವಜ್ಜನಚಕ್ಖುವಿಞ್ಞಾಣಸಮ್ಪಟಿಚ್ಛನಸನ್ತೀರಣವೋಟ್ಠಬ್ಬನಕಾಮಾವಚರಜವನತದಾರಮ್ಮಣವಸೇನ ಛಚತ್ತಾಲೀಸ ಚಿತ್ತಾನಿ ಚಕ್ಖುದ್ವಾರೇ ಯಥಾರಹಂ ಉಪ್ಪಜ್ಜನ್ತಿ, ತಥಾ ಪಞ್ಚದ್ವಾರಾವಜ್ಜನಸೋತವಿಞ್ಞಾಣಾದಿವಸೇನ ಸೋತದ್ವಾರಾದೀಸುಪಿ ಛಚತ್ತಾಲೀಸೇವ ಭವನ್ತೀತಿ ಸಬ್ಬಥಾಪಿ ಪಞ್ಚದ್ವಾರೇ ಚತುಪಞ್ಞಾಸ ಚಿತ್ತಾನಿ ಕಾಮಾವಚರಾನೇವ.

೪೦. ಮನೋದ್ವಾರೇ ಪನ ಮನೋದ್ವಾರಾವಜ್ಜನಪಞ್ಚಪಞ್ಞಾಸಜವನತದಾರಮ್ಮಣವಸೇನ ಸತ್ತಸಟ್ಠಿ ಚಿತ್ತಾನಿ ಭವನ್ತಿ.

೪೧. ಏಕೂನವೀಸತಿ ಪಟಿಸನ್ಧಿಭವಙ್ಗಚುತಿವಸೇನ ದ್ವಾರವಿಮುತ್ತಾನಿ.

೪೨. ತೇಸು ಪನ ಪಞ್ಚವಿಞ್ಞಾಣಾನಿ ಚೇವ ಮಹಗ್ಗತಲೋಕುತ್ತರಜವನಾನಿ ಚೇತಿ ಛತ್ತಿಂಸ ಯಥಾರಹಮೇಕದ್ವಾರಿಕಚಿತ್ತಾನಿ ನಾಮ.

೪೩. ಮನೋಧಾತುತ್ತಿಕಂ ಪನ ಪಞ್ಚದ್ವಾರಿಕಂ.

೪೪. ಸುಖಸನ್ತೀರಣವೋಟ್ಠಬ್ಬನಕಾಮಾವಚರಜವನಾನಿ ಛದ್ವಾರಿಕಚಿತ್ತಾನಿ.

೪೫. ಉಪೇಕ್ಖಾಸಹಗತಸನ್ತೀರಣಮಹಾವಿಪಾಕಾನಿ ಛದ್ವಾರಿಕಾನಿ ಚೇವ ದ್ವಾರವಿಮುತ್ತಾನಿ ಚ.

೪೬. ಮಹಗ್ಗತವಿಪಾಕಾನಿ ದ್ವಾರವಿಮುತ್ತಾನೇವಾತಿ.

೪೭. ಏಕದ್ವಾರಿಕಚಿತ್ತಾನಿ, ಪಞ್ಚಛದ್ವಾರಿಕಾನಿ ಚ.

ಛದ್ವಾರಿಕವಿಮುತ್ತಾನಿ, ವಿಮುತ್ತಾನಿ ಚ ಸಬ್ಬಥಾ.

ಛತ್ತಿಂಸತಿ ತಥಾ ತೀಣಿ, ಏಕತಿಂಸ ಯಥಾಕ್ಕಮಂ;

ದಸಧಾ ನವಧಾ ಚೇತಿ, ಪಞ್ಚಧಾ ಪರಿದೀಪಯೇ.

ಆಲಮ್ಬಣಸಙ್ಗಹೋ

೪೮. ಆಲಮ್ಬಣಸಙ್ಗಹೇ ಆರಮ್ಮಣಾನಿ ನಾಮ ರೂಪಾರಮ್ಮಣಂ ಸದ್ದಾರಮ್ಮಣಂ ಗನ್ಧಾರಮ್ಮಣಂ ರಸಾರಮ್ಮಣಂ ಫೋಟ್ಠಬ್ಬಾರಮ್ಮಣಂ ಧಮ್ಮಾರಮ್ಮಣಞ್ಚೇತಿ ಛಬ್ಬಿಧಾನಿ ಭವನ್ತಿ.

೪೯. ತತ್ಥ ರೂಪಮೇವ ರೂಪಾರಮ್ಮಣಂ, ತಥಾ ಸದ್ದಾದಯೋ ಸದ್ದಾರಮ್ಮಣಾದೀನಿ.

೫೦. ಧಮ್ಮಾರಮ್ಮಣಂ ಪನ ಪಸಾದಸುಖುಮರೂಪಚಿತ್ತಚೇತಸಿಕನಿಬ್ಬಾನಪಞ್ಞತ್ತಿವಸೇನ ಛಧಾ ಸಙ್ಗಯ್ಹತಿ.

೫೧. ತತ್ಥ ಚಕ್ಖುದ್ವಾರಿಕಚಿತ್ತಾನಂ ಸಬ್ಬೇಸಮ್ಪಿ ರೂಪಮೇವ ಆರಮ್ಮಣಂ, ತಞ್ಚ ಪಚ್ಚುಪ್ಪನ್ನಂ. ತಥಾ ಸೋತದ್ವಾರಿಕಚಿತ್ತಾದೀನಮ್ಪಿ ಸದ್ದಾದೀನಿ, ತಾನಿ ಚ ಪಚ್ಚುಪ್ಪನ್ನಾನಿಯೇವ.

೫೨. ಮನೋದ್ವಾರಿಕಚಿತ್ತಾನಂ ಪನ ಛಬ್ಬಿಧಮ್ಪಿ ಪಚ್ಚುಪ್ಪನ್ನಮತೀತಂ ಅನಾಗತಂ ಕಾಲವಿಮುತ್ತಞ್ಚ ಯಥಾರಹಮಾರಮ್ಮಣಂ ಹೋತಿ.

೫೩. ದ್ವಾರವಿಮುತ್ತಾನಞ್ಚ ಪಟಿಸನ್ಧಿಭವಙ್ಗಚುತಿಸಙ್ಖಾತಾನಂ ಛಬ್ಬಿಧಮ್ಪಿ ಯಥಾಸಮ್ಭವಂ ಯೇಭುಯ್ಯೇನ ಭವನ್ತರೇ ಛದ್ವಾರಗ್ಗಹಿತಂ ಪಚ್ಚುಪ್ಪನ್ನಮತೀತಂ ಪಞ್ಞತ್ತಿಭೂತಂ ವಾ ಕಮ್ಮಕಮ್ಮನಿಮಿತ್ತಗತಿನಿಮಿತ್ತಸಮ್ಮತಂ ಆರಮ್ಮಣಂ ಹೋತಿ.

೫೪. ತೇಸು ಚಕ್ಖುವಿಞ್ಞಾಣಾದೀನಿ ಯಥಾಕ್ಕಮಂ ರೂಪಾದಿಏಕೇಕಾರಮ್ಮಣಾನೇವ.

೫೫. ಮನೋಧಾತುತ್ತಿಕಂ ಪನ ರೂಪಾದಿಪಞ್ಚಾರಮ್ಮಣಂ.

೫೬. ಸೇಸಾನಿ ಕಾಮಾವಚರವಿಪಾಕಾನಿ ಹಸನಚಿತ್ತಞ್ಚೇತಿ ಸಬ್ಬಥಾಪಿ ಕಾಮಾವಚರಾರಮ್ಮಣಾನೇವ.

೫೭. ಅಕುಸಲಾನಿ ಚೇವ ಞಾಣವಿಪ್ಪಯುತ್ತಕಾಮಾವಚರಜವನಾನಿ ಚೇತಿ ಲೋಕುತ್ತರವಜ್ಜಿತಸಬ್ಬಾರಮ್ಮಣಾನಿ.

೫೮. ಞಾಣಸಮ್ಪಯುತ್ತಕಾಮಾವಚರಕುಸಲಾನಿ ಚೇವ ಪಞ್ಚಮಜ್ಝಾನಸಙ್ಖಾತಂ ಅಭಿಞ್ಞಾಕುಸಲಞ್ಚೇತಿ ಅರಹತ್ತಮಗ್ಗಫಲವಜ್ಜಿತಸಬ್ಬಾರಮ್ಮಣಾನಿ.

೫೯. ಞಾಣಸಮ್ಪಯುತ್ತಕಾಮಾವಚರಕಿರಿಯಾನಿ ಚೇವ ಕಿರಿಯಾಭಿಞ್ಞಾವೋಟ್ಠಬ್ಬನಞ್ಚೇತಿ ಸಬ್ಬಥಾಪಿ ಸಬ್ಬಾರಮ್ಮಣಾನಿ.

೬೦. ಆರುಪ್ಪೇಸು ದುತಿಯಚತುತ್ಥಾನಿ ಮಹಗ್ಗತಾರಮ್ಮಣಾನಿ.

೬೧. ಸೇಸಾನಿ ಮಹಗ್ಗತಚಿತ್ತಾನಿ ಸಬ್ಬಾನಿಪಿ ಪಞ್ಞತ್ತಾರಮ್ಮಣಾನಿ.

೬೨. ಲೋಕುತ್ತರಚಿತ್ತಾನಿ ನಿಬ್ಬಾನಾರಮ್ಮಣಾನೀತಿ.

೬೩. ಪಞ್ಚವೀಸ ಪರಿತ್ತಮ್ಹಿ, ಛ ಚಿತ್ತಾನಿ ಮಹಗ್ಗತೇ.

ಏಕವೀಸತಿ ವೋಹಾರೇ, ಅಟ್ಠ ನಿಬ್ಬಾನಗೋಚರೇ.

ವೀಸಾನುತ್ತರಮುತ್ತಮ್ಹಿ, ಅಗ್ಗಮಗ್ಗಫಲುಜ್ಝಿತೇ;

ಪಞ್ಚ ಸಬ್ಬತ್ಥ ಛಚ್ಚೇತಿ, ಸತ್ತಧಾ ತತ್ಥ ಸಙ್ಗಹೋ.

ವತ್ಥುಸಙ್ಗಹೋ

೬೪. ವತ್ಥುಸಙ್ಗಹೇ ವತ್ಥೂನಿ ನಾಮ ಚಕ್ಖುಸೋತಘಾನಜಿವ್ಹಾಕಾಯಹದಯವತ್ಥು ಚೇತಿ ಛಬ್ಬಿಧಾನಿ ಭವನ್ತಿ.

೬೫. ತಾನಿ ಕಾಮಲೋಕೇ ಸಬ್ಬಾನಿಪಿ ಲಬ್ಭನ್ತಿ.

೬೬. ರೂಪಲೋಕೇ ಪನ ಘಾನಾದಿತ್ತಯಂ ನತ್ಥಿ.

೬೭. ಅರೂಪಲೋಕೇ ಪನ ಸಬ್ಬಾನಿಪಿ ನ ಸಂವಿಜ್ಜನ್ತಿ.

೬೮. ತತ್ಥ ಪಞ್ಚವಿಞ್ಞಾಣಧಾತುಯೋ ಯಥಾಕ್ಕಮಂ ಏಕನ್ತೇನ ಪಞ್ಚ ಪಸಾದವತ್ಥೂನಿ ನಿಸ್ಸಾಯೇವ ಪವತ್ತನ್ತಿ.

೬೯. ಪಞ್ಚದ್ವಾರಾವಜ್ಜನಸಮ್ಪಟಿಚ್ಛನಸಙ್ಖಾತಾ ಪನ ಮನೋಧಾತು ಚ ಹದಯಂ ನಿಸ್ಸಿತಾಯೇವ ಪವತ್ತನ್ತಿ.

೭೦. ಅವಸೇಸಾ ಪನ ಮನೋವಿಞ್ಞಾಣಧಾತುಸಙ್ಖಾತಾ ಚ ಸನ್ತೀರಣಮಹಾವಿಪಾಕಪಟಿಘದ್ವಯಪಠಮಮಗ್ಗಹಸನರೂಪಾವಚರವಸೇನ ಹದಯಂ ನಿಸ್ಸಾಯೇವ ಪವತ್ತನ್ತಿ.

೭೧. ಅವಸೇಸಾ ಕುಸಲಾಕುಸಲಕಿರಿಯಾನುತ್ತರವಸೇನ ಪನ ನಿಸ್ಸಾಯ ವಾ ಅನಿಸ್ಸಾಯ ವಾ.

೭೨. ಆರುಪ್ಪವಿಪಾಕವಸೇನ ಹದಯಂ ಅನಿಸ್ಸಾಯೇವಾತಿ.

೭೩. ಛವತ್ಥುಂ ನಿಸ್ಸಿತಾ ಕಾಮೇ, ಸತ್ತ ರೂಪೇ ಚತುಬ್ಬಿಧಾ.

ತಿವತ್ಥುಂ ನಿಸ್ಸಿತಾರುಪ್ಪೇ, ಧಾತ್ವೇಕಾ ನಿಸ್ಸಿತಾ ಮತಾ.

೭೪. ತೇಚತ್ತಾಲೀಸ ನಿಸ್ಸಾಯ, ದ್ವೇಚತ್ತಾಲೀಸ ಜಾಯರೇ.

ನಿಸ್ಸಾಯ ಚ ಅನಿಸ್ಸಾಯ, ಪಾಕಾರುಪ್ಪಾ ಅನಿಸ್ಸಿತಾ.

ಇತಿ ಅಭಿಧಮ್ಮತ್ಥಸಙ್ಗಹೇ ಪಕಿಣ್ಣಕಸಙ್ಗಹವಿಭಾಗೋ ನಾಮ

ತತಿಯೋ ಪರಿಚ್ಛೇದೋ.