ಸುತ್ತನ್ತಿಕದುಕಮಾತಿಕತ್ಥವಣ್ಣನಾ

ಸುತ್ತನ್ತಿಕದುಕೇಸು ವೇದೇತಿ, ವಿವಿಧೇನ ವಾ ಆಕಾರೇನ ಜಾನಾತೀತಿ ವಿಜ್ಜಾ, ವಿಪಸ್ಸನಾಞಾಣಮನೋಮಯಿದ್ಧಿಛಅಭಿಞ್ಞಾವಸಪ್ಪವತ್ತಾ ಪಞ್ಞಾ, ತಸ್ಮಿಂ ವಿಜ್ಜಾಭಾಗೇ ವಿಜ್ಜಾಕೋಟ್ಠಾಸೇ ವಿಜ್ಜಾಸಭಾವೇ ವತ್ತನ್ತೀತಿ ವಿಜ್ಜಾಭಾಗಿನೋ. ತಾ ಏವ ವಿಜ್ಜಾ, ತಂ ವಾ ವಿಜ್ಜಂ ಸಮ್ಪಯೋಗವಸೇನ ಭಜನ್ತೀತಿಪಿ ವಿಜ್ಜಾಭಾಗಿನೋ, ಅಟ್ಠವಿಧವಿಜ್ಜಾಸಮ್ಪಯುತ್ತಧಮ್ಮಾ. ತಾಸು ಯಾ ಕಾಚಿ ಏಕಾ ವಿಜ್ಜಾ ವಿಜ್ಜಾ, ಸೇಸಾ ವಿಜ್ಜಾಭಾಗಿನೋತಿ ಏವಂ ವಿಜ್ಜಾಪಿ ವಿಜ್ಜಾಸಮ್ಪಯುತ್ತಧಮ್ಮಾಪಿ ವಿಜ್ಜಾಭಾಗಿನೋತ್ವೇವ ವೇದಿತಬ್ಬಾ, ಇಧ ಪನ ವಿಜ್ಜಾಸಮ್ಪಯುತ್ತಾ ಧಮ್ಮಾವ ಅಧಿಪ್ಪೇತಾ. ನ ವಿಜಾನಾತೀತಿ ಅವಿಜ್ಜಾ, ಚತುಸಚ್ಚಚ್ಛಾದಕವಸೇನ ಚತುಬ್ಬಿಧೋ ಮೋಹೋ, ತಸ್ಮಿಂ ಅವಿಜ್ಜಾಭಾಗೇ ಅವಿಜ್ಜಾಕೋಟ್ಠಾಸೇ ಅವಿಜ್ಜಾಸಭಾವೇ ವತ್ತನ್ತೀತಿ ಅವಿಜ್ಜಾಭಾಗಿನೋ. ತಾ ಏವ ಅವಿಜ್ಜಾ, ತಂ ವಾ ಅವಿಜ್ಜಂ ಸಮ್ಪಯೋಗವಸೇನ ಭಜನ್ತೀತಿಪಿ ಅವಿಜ್ಜಾಭಾಗಿನೋ, ಅವಿಜ್ಜಾಸಮ್ಪಯುತ್ತಧಮ್ಮಾ. ಏವಂ ಅವಿಜ್ಜಾಪಿ ಅವಿಜ್ಜಾಸಮ್ಪಯುತ್ತಧಮ್ಮಾಪಿ ಅವಿಜ್ಜಾಭಾಗಿನೋತ್ವೇವ ವೇದಿತಬ್ಬಾ, ಇಧ ಪನ ಅವಿಜ್ಜಾಸಮ್ಪಯುತ್ತಧಮ್ಮಾವ ಅಧಿಪ್ಪೇತಾ.

ತತ್ಥ ಅರಹತ್ತಮಗ್ಗಚಿತ್ತಂ, ಪಞ್ಞಾವಿರಹಿತತಂಸಮ್ಪಯುತ್ತಾ ಚ ವಿಜ್ಜಾಭಾಗಿನೋ ಚ ಞಾಣಸಮ್ಪಯುತ್ತಕಾಮಾವಚರಜವನಾನಿ, ಞಾಣವಿರಹಿತತಂಸಮ್ಪಯುತ್ತಾ ಚ ವಿಪಸ್ಸನಾಭಾವೇನ ಪವತ್ತಿಯಂ ವಿಜ್ಜಾಭಾಗಿನೋ, ಅಞ್ಞದಾ ನ ವತ್ತಬ್ಬಾ. ರೂಪಾವಚರಚತುತ್ಥಜ್ಝಾನಿಕಜವನಚಿತ್ತಾನಿ, ಪಞ್ಞಾವಿರಹಿತತಂಸಮ್ಪಯುತ್ತಾ ಚ ಮನೋಮಯಿದ್ಧಿಭಾವೇನ ಚ ಪಞ್ಚಾಭಿಞ್ಞಾಭಾವೇನ ಚ ಪವತ್ತಿಯಂ ವಿಜ್ಜಾಭಾಗಿನೋ, ಅಞ್ಞದಾ ನ ವತ್ತಬ್ಬಾ. ತತ್ಥ ದ್ವಾದಸಾಕುಸಲಚಿತ್ತಾನಿ, ಅವಿಜ್ಜಾವಿರಹಿತತಂಸಮ್ಪಯುತ್ತಾ ಚ ಅವಿಜ್ಜಾಭಾಗಿನೋವ, ಇಧ ಪನ ಅವಿಜ್ಜಾ, ಸೇಸಚಿತ್ತರೂಪನಿಬ್ಬಾನಾನಿ ಚ ನ ವತ್ತಬ್ಬಾವ. ಚೇತಸಿಕೇಸು ಪನ ಮೋಹಅಪ್ಪಮಞ್ಞಾ ನ ವತ್ತಬ್ಬಾವ, ಸೇಸಾ ಕುಸಲಾಬ್ಯಾಕತಾ ಸಿಯಾ ವಿಜ್ಜಾಭಾಗಿನೋ, ಸಿಯಾ ನ ವತ್ತಬ್ಬಾ, ತಿಜಾತಿಕಾ ದ್ವಿಧಾಪಿ ನ ವತ್ತಬ್ಬಾ ಚ. ಸೇಸಂ ಸುವಿಞ್ಞೇಯ್ಯಮೇವ. ಪಠಮಂ.

ಪುನ ಅನಜ್ಝೋತ್ಥರಣವಸೇನ ಕಿಲೇಸನ್ಧಕಾರಂ ವಿದ್ಧಂಸೇತುಂ ಅಸಮತ್ಥತಾಯ ವಿಜ್ಜು ಉಪಮಾ ಏತೇಸನ್ತಿ ವಿಜ್ಜೂಪಮಾ, ಆದಿತೋ ತೀಸು ಮಗ್ಗೇಸು ಞಾಣಂವ. ನಿಸ್ಸೇಸಂ ವಿದ್ಧಂಸನಸಮತ್ಥತಾಯ ವಜಿರಂ ಉಪಮಾ ಏತೇಸನ್ತಿ ವಜಿರೂಪಮಾ, ಅರಹತ್ತಮಗ್ಗೇ ಞಾಣಂ. ಯಥಾ ಹಿ ಮೇಘನ್ಧಕಾರೇ ಮಗ್ಗಪಟಿಪನ್ನಸ್ಸ ಪಟಿಚ್ಛಾದನಅನ್ಧಕಾರಂ ವಿಧಮಿತ್ವಾ ವಿಜ್ಜುಯಾ ಉಪ್ಪನ್ನಕ್ಖಣೇ ಚಾತುದಿಸಾ ಮಗ್ಗಾ ಪಾಕಟಾ ಹೋನ್ತಿ, ವಿಜ್ಜುಯಾ ನಿರುದ್ಧಾಯ ಪುನ ಅನ್ಧಕಾರೋ ಓತ್ಥರಿತ್ವಾ ಮಗ್ಗಂ ಪಟಿಚ್ಛಾದೇತಿ, ಏವಂ ವಿಪಸ್ಸನಾಯಾನಿಕಸ್ಸ ಯಥಾಸಕಂ ಸಚ್ಚಚ್ಛಾದಕಕಿಲೇಸನ್ಧಕಾರಂ ವಿಧಮಿತ್ವಾ ತೀಸು ಮಗ್ಗೇಸು ಯಥಾಕ್ಕಮಂ ಉಪ್ಪನ್ನೇಸು ಚತ್ತಾರಿ ಸಚ್ಚಾನಿ ಪಾಕಟಾನಿ ಹೋನ್ತಿ, ತೇಸು ನಿರುದ್ಧೇಸು ಪುನ ಅವಸಿಟ್ಠಕಿಲೇಸನ್ಧಕಾರೋ ಚತುಸಚ್ಚಂ ಪಟಿಚ್ಛಾದೇತಿ, ತಸ್ಮಾ ತೀಸು ಮಗ್ಗೇಸು ಪಞ್ಞಾ ವಿಜ್ಜೂಪಮಾ ವುತ್ತಾ. ಯಥಾ ಪನ ವಜಿರಸ್ಸ ಅಭೇಜ್ಜೋ ಪಾಸಾಣೋ ನಾಮ ನತ್ಥಿ, ತಞ್ಚ ನಿಸ್ಸೇಸತೋ ವಜಿರಂ ಖೇಪೇತಿ, ವಜಿರೇನ ಚ ಗತಮಗ್ಗೇ ಪಾಸಾಣಸ್ಸ ಪುನ ಪಾಕತಿಕಭಾವೋ ನತ್ಥಿ, ಏವಂ ಅರಹತ್ತಮಗ್ಗಞಾಣಸ್ಸ ಅವಜ್ಝಕಿಲೇಸೋ ನಾಮ ನತ್ಥಿ, ತಞ್ಚ ನಿಸ್ಸೇಸತೋ ಅರಹತ್ತಮಗ್ಗಞಾಣಂ ಖೇಪೇತಿ, ತೇನ ಚ ಖೇಪಿತೇ ಕಿಲೇಸೇ ಅವಸಿಟ್ಠಕಿಲೇಸಾಭಾವತೋ ತಸ್ಸ ಪುನ ಪಚ್ಚುದಾವತ್ತನಂ ನಾಮ ನತ್ಥಿ, ತಸ್ಮಾ ಚತುತ್ಥಮಗ್ಗೇ ಪಞ್ಞಾ ವಜಿರೂಪಮಾ ವುತ್ತಾ. ಪಞ್ಞಾ ಏವ ಹೇತ್ಥ ಸಿಯಾ ವಿಜ್ಜೂಪಮಾ, ಸಿಯಾ ನ ವತ್ತಬ್ಬಾ ಚ ಹೋತಿ. ಸೇಸಚೇತಸಿಕಚಿತ್ತರೂಪನಿಬ್ಬಾನಾನಿ ಪನ ಸಬ್ಬಾನಿ ನ ವತ್ತಬ್ಬಾನೇವ. ದುತಿಯಂ.

ಬಾಲೇಸು ಠಿತತ್ತಾ, ಯತ್ಥ ಠಿತಾ ತದುಪಚಾರೇನ ಬಾಲಾ, ಬಾಲಕರತ್ತಾ ವಾ ಬಾಲಾ, ದ್ವಾದಸಾಕುಸಲಚಿತ್ತಾನಿ. ಇಧ ಪನ ಅಹಿರಿಕಞ್ಚ ಅನೋತ್ತಪ್ಪಞ್ಚ ಬಾಲಾ ನಾಮ. ಪಣ್ಡಿತೇಸು ಠಿತತ್ತಾ ಪಣ್ಡಿತಾ, ಪಣ್ಡಿತಕರತ್ತಾ ವಾ ಪಣ್ಡಿತಾ, ಏಕವೀಸತಿ ಕುಸಲಚಿತ್ತಾನಿ. ಇಧ ಪನ ಹಿರೀ ಚ ಓತ್ತಪ್ಪಞ್ಚ ಪಣ್ಡಿತಾ ನಾಮ. ಸೇಸಚಿತ್ತರೂಪನಿಬ್ಬಾನಾನಿ ನ ವತ್ತಬ್ಬಾನಿ. ಸೇಸಂ ಸುವಿಞ್ಞೇಯ್ಯಮೇವ. ತತಿಯಂ.

ಕಣ್ಹಾತಿ ಕಾಳಕಾ, ಚಿತ್ತಸ್ಸ ಅಪಭಸ್ಸರಭಾವಕರಣಾ. ಸುಕ್ಕಾತಿ ಓದಾತಾ, ಪಭಸ್ಸರಭಾವಕರಣಾ. ಸೇಸಂ ಸಬ್ಬಂ ಬಾಲದುಕಸದಿಸಮೇವ. ಚತುತ್ಥಂ.

ಇಧ ಚೇವ ಸಮ್ಪರಾಯೇ ಚ ತಪೇನ್ತೀತಿ ತಪನೀಯಾ. ನ ತಪನೀಯಾ ಅತಪನೀಯಾ. ಸೇಸಂ ಬಾಲದುಕಸದಿಸಮೇವ. ಪಞ್ಚಮಂ.

‘‘ಸಿರಿವಡ್ಢಕೋ ಧನವಡ್ಢಕೋ’’ತಿಆದಯೋ ವಿಯ ವಚನಮತ್ತಮೇವ ಅಧಿಕಾರಂ ಕತ್ವಾ ಪವತ್ತಾ ಅಧಿವಚನಾ ನಾಮ. ನಾಮಧೇಯ್ಯನ್ತಿ ತೇಸಂ ತೇಸಂ ಧಮ್ಮಾನಂ ನಾಮಾನಿ. ತಾನಿ ಚತುಬ್ಬಿಧಾನಿ ಸಾಮಞ್ಞನಾಮಂ ಗುಣನಾಮಂ ಕಿತ್ತಿಮನಾಮಂ ಓಪಪಾತಿಕನಾಮನ್ತಿ. ತತ್ಥ ಪಠಮಕಪ್ಪಿಕೇಸು ಮಹಾಜನೇನ ಸಮ್ಮನ್ನಿತ್ವಾ ಠಪಿತತ್ತಾ ‘‘ಮಹಾಸಮ್ಮತೋ’’ತಿ ರಞ್ಞೋ ನಾಮನ್ತಿ ಏವರೂಪಂ ಸಾಮಞ್ಞನಾಮಂ ನಾಮ. ‘‘ಧಮ್ಮಕಥಿಕೋ ಪಂಸುಕೂಲಿಕೋ ಕಾಳೋ ರಸ್ಸೋ’’ತಿ ಏವರೂಪಂ ಗುಣತೋ ಆಗತಂ, ‘‘ಭಗವಾ ಅರಹಂ ಸಮ್ಮಾಸಮ್ಬುದ್ಧೋ’’ತಿಆದೀನಿಪಿ ತಥಾಗತಸ್ಸ ಅನೇಕಾನಿ ನಾಮಸತಾನಿ ಗುಣನಾಮಂ ನಾಮ. ಯಂ ಪನ ಜಾತಸ್ಸ ಕುಮಾರಸ್ಸ ಞಾತಕಾ ಕಪ್ಪೇತ್ವಾ ಪಕಪ್ಪೇತ್ವಾ ‘‘ಅಯಂ ಅಸುಕೋ ನಾಮಾ’’ತಿ ನಾಮಂ ಕರೋನ್ತಿ, ಇದಂ ಕಿತ್ತಿಮನಾಮಂ ನಾಮ. ಯಾ ಪನ ಪುರಿಮಪಞ್ಞತ್ತಿ ಅಪರಪಞ್ಞತ್ತಿಯಂ ನಿಪತತಿ, ಸೇಯ್ಯಥಿದಂ – ಪುರಿಮಕಪ್ಪೇಪಿ ಚನ್ದೋ ಚನ್ದೋ ಏವ, ಏತರಹಿಪಿ ಅನಾಗತೇಪಿ ಚನ್ದೋ ಏವ. ತಥಾ ‘‘ಸೂರಿಯೋ ಸಮುದ್ದೋ ಪಥವೀ ರೂಪಂ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣಂ ನಿಬ್ಬಾನ’’ನ್ತಿಏವಮಾದಿ ಓಪಪಾತಿಕನಾಮಂ ನಾಮ. ತಾನಿ ಪುನ ವಿಜ್ಜಮಾನಪಞ್ಞತ್ತಿ ಅವಿಜ್ಜಮಾನಪಞ್ಞತ್ತಿ ವಿಜ್ಜಮಾನೇನಅವಿಜ್ಜಮಾನಪಞ್ಞತ್ತಿ ಅವಿಜ್ಜಮಾನೇನವಿಜ್ಜಮಾನಪಞ್ಞತ್ತಿ ವಿಜ್ಜಮಾನೇನವಿಜ್ಜಮಾನಪಞ್ಞತ್ತಿ ಅವಿಜ್ಜಮಾನೇನಅವಿಜ್ಜಮಾನಪಞ್ಞತ್ತೀತಿ ಏವಂ ನಾಮಪಞ್ಞತ್ತಿವಸೇನ ಛಬ್ಬಿಧಾನಿ ಹೋನ್ತಿ.

ತತ್ಥ ಪರಮತ್ಥತೋ ಉಪಲಬ್ಭಮಾನಾ ಯಥಾವುತ್ತದ್ವಾಸತ್ತತಿವಿಧಾ ನಾಮರೂಪಧಮ್ಮಾ ವಿಜ್ಜಮಾನಾ ನಾಮ, ತೇಸಂ ಪಕಾರೇಹಿ ಞಾಪನತೋ ಪಞ್ಞತ್ತಿ ವಿಜ್ಜಮಾನಪಞ್ಞತ್ತಿ ನಾಮ, ‘‘ಚಿತ್ತಂ ಫಸ್ಸೋ ಪಥವೀ ರೂಪಂ ನಿಬ್ಬಾನ’’ನ್ತಿಆದಯೋ ಪರಮತ್ಥವಾಚಕಾ ಸದ್ದಾ. ಉಪಾದಿನ್ನನಾಮರೂಪಧಮ್ಮೇ ಪನ ಉಪಾದಾಯ ಪಞ್ಞತ್ತಾ ಸತ್ತಪುಗ್ಗಲಇತ್ಥಿಪುರಿಸದೇವಮನುಸ್ಸತಿರಚ್ಛಾನಾದಿಭೇದಾ, ಅನುಪಾದಿನ್ನರೂಪಧಮ್ಮೇ ಉಪಾದಾಯ ಪಞ್ಞತ್ತಾ ಭೂಮಿಪಬ್ಬತರುಕ್ಖಸಕಟಚನ್ದಸೂರಿಯನಕ್ಖತ್ತದಿಸಾಕಾಲಕಸಿಣಾದಿಭೇದಾ ಚ ಪರಮತ್ಥತೋ ಅನುಪಲಬ್ಭಮಾನಾ ಅವಿಜ್ಜಮಾನಾ ನಾಮ, ತೇಸಂ ಪಞ್ಞತ್ತಿ ಅವಿಜ್ಜಮಾನಪಞ್ಞತ್ತಿ ನಾಮ. ತಥಾ ‘‘ಅತ್ತಾ ಭೂಮೀ’’ತಿಆದಯೋ ಅತ್ಥಪಞ್ಞತ್ತಿವಾಚಕಾ ಸದ್ದಾ ಚ ಚಿತ್ತಸನ್ತತಿವಣ್ಣುಪಗನ್ತಿಆದಿ ವಿಜ್ಜಮಾನತ್ಥವಾಚಕಾ ಸದ್ದಾ ವಿಜ್ಜಮಾನೇನಅವಿಜ್ಜಮಾನಪಞ್ಞತ್ತಿ ನಾಮ. ‘‘ಪುರಿಸಸ್ಸ ಚಿತ್ತಂ, ಮೇಘವಣ್ಣೋ’’ತಿಆದೀಸು ಅವಿಜ್ಜಮಾನೇನವಿಜ್ಜಮಾನಪಞ್ಞತ್ತಿ ನಾಮ. ‘‘ಚಿತ್ತಲಹುತಾ ಪಥವೀಗನ್ಧೋ’’ತಿಆದಿ ವಿಜ್ಜಮಾನೇನವಿಜ್ಜಮಾನಪಞ್ಞತ್ತಿ ನಾಮ. ‘‘ಮನುಸ್ಸಸರೀರಂ ರುಕ್ಖಸಾಖಾ’’ತಿಆದಿ ಅವಿಜ್ಜಮಾನೇನಅವಿಜ್ಜಮಾನಪಞ್ಞತ್ತಿ ನಾಮ. ಏವಂ ಛಬ್ಬಿಧಾಪಿ ಚೇತಾ ಅಧಿಪ್ಪಾಯಂ ವಿಞ್ಞಾಪೇತುಕಾಮತಾಚಿತ್ತಸಮುಟ್ಠಾಪಿತಸವಿಞ್ಞತ್ತಿಸದ್ದಾನುಸಾರೇನ ಞಾತಸಙ್ಕೇತಸ್ಸ ಸೋತವಿಞ್ಞಾಣವೀಥಿಅನನ್ತರಂ ಉಪ್ಪನ್ನೇಹಿ ಮನೋದ್ವಾರಿಕವಿಞ್ಞಾಣೇಹಿ ‘‘ಇಮಸ್ಸೇದಂ ನಾಮ’’ನ್ತಿ ಅನೇಕಸದ್ದೇಸು ಏಕತ್ತಮಾರೋಪೇತ್ವಾ ವವತ್ಥಾಪಿತಾ ಅತ್ಥಾಭಿಮುಖಂ ನಮನತೋ ಪಕಾರೇಹಿ ಅತ್ಥಸ್ಸ ಞಾಪನತೋ ‘‘ನಾಮಪಞ್ಞತ್ತೀ’’ತಿ ವುಚ್ಚನ್ತಿ, ತೇಸಂ ಅಧಿವಚನಾನಂ ಪಥಾ ಅತ್ಥಾ ಅಧಿವಚನಪಥಾ, ಸಮ್ಮುತಿಪರಮತ್ಥಭೇದಾ ಸಬ್ಬೇ ಧಮ್ಮಾ ಸದ್ದವಚನೀಯಸಭಾವಾ. ಛಟ್ಠಂ.

ಇತೋ ಪರಂ ದ್ವೇ ದುಕಾ ಅಧಿವಚನದುಕಸದಿಸಾವ, ಕೇವಲಂ ಪದತ್ಥಮತ್ತಮೇವ ವಿಸೇಸೋ. ತತ್ಥ ಅಭಿಸಙ್ಖರೋನ್ತೀತಿ ಸಙ್ಖಾರಾತಿ ಏವಂ ನಿದ್ಧಾರೇತ್ವಾ ಸಹೇತುಕಂ ಕತ್ವಾ ವುಚ್ಚಮಾನಾ ನಿರುತ್ತಿ ನಾಮ, ‘‘ತಕ್ಕೋ ವಿತಕ್ಕೋ ಸಙ್ಕಪ್ಪೋ’’ತಿ ಏವಂ ತೇನ ತೇನ ಪಕಾರೇನ ಞಾಪನತೋ ಪಞ್ಞತ್ತಿ ನಾಮ, ಯಥಾವುತ್ತನಾಮಪಞ್ಞತ್ತಿಯೋವ. ನ ಹಿ ಅಧಿವಚನನಿರುತ್ತಿಪಞ್ಞತ್ತೀಸು ಅತ್ಥತೋ ಕೋಚಿಪಿ ಭೇದೋ ಅತ್ಥಿ, ನಿಬ್ಬತ್ತಿನಿಮಿತ್ತಭೇದದಸ್ಸನತ್ಥಂ ಪನ ನೇಸಂ ವಿಭಾಗೇನ ಪದತ್ಥೋ ದಸ್ಸಿತೋ. ಇಮೇಸು ಚ ತೀಸು ದುಕೇಸು ಪಞ್ಞತ್ತಿಸಹಿತಾ ಸಬ್ಬೇ ಧಮ್ಮಾ ಲಬ್ಭನ್ತಿ, ಅನನ್ತರೇ ನಾಮರೂಪದುಕೇ ಪಞ್ಞತ್ತಿರಹಿತಾತಿ ಇಮೇ ಚತ್ತಾರೋ ದುಕಾ ಇಮೇಸು ಸುತ್ತನ್ತಿಕದುಕೇಸು ನಿಪ್ಪದೇಸಾ, ಸೇಸಾ ಪನ ಅಟ್ಠತಿಂಸಾಪಿ ಸಪ್ಪದೇಸಾತಿ ವೇದಿತಬ್ಬಾ. ಸತ್ತಮಟ್ಠಮಾನಿ.

ನಾಮಕರಣಟ್ಠೇನ, ನಮನಟ್ಠೇನ, ನಾಮನಟ್ಠೇನ ಚ ನಾಮಂ, ಅರೂಪಕ್ಖನ್ಧನಿಬ್ಬಾನಾನಿ. ತಾನಿ ಹಿ ಸಬ್ಬದಾಪಿ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣಂ ನಿಬ್ಬಾನನ್ತಿ ಓಪಪಾತಿಕನಾಮವಸೇನ ಅತ್ತನೋ ನಾಮಂ ಕರೋನ್ತಾವ ಪವತ್ತನ್ತಿ ಚನ್ದಸೂರಿಯಾದಯೋ ವಿಯ. ನ ಹಿ ತೇಸಂ ಸಾಮಞ್ಞಗುಣಕಿತ್ತಿಮವಸೇನ ನಾಮಕರಣಕಿಚ್ಚಂ ಅತ್ಥೀತಿ. ಏವಂ ನಾಮಕರಣಟ್ಠೇನ ನಾಮಂ ವೇದಿತಬ್ಬಂ. ಆರಮ್ಮಣಾಭಿಮುಖಂ ಪನ ನಮನಟ್ಠೇನ, ಅಞ್ಞಮಞ್ಞಂ ತತ್ಥ ನಾಮನಟ್ಠೇನ ಚ ಚತ್ತಾರೋ ಅರೂಪಕ್ಖನ್ಧಾವ ನಾಮಂ. ನಿಬ್ಬಾನಂ ಪನ ಆರಮ್ಮಣಾಧಿಪತಿಪಚ್ಚಯತಾಯ ಅತ್ತನಿ ಅನವಜ್ಜಧಮ್ಮಾನಂ ನಾಮನಟ್ಠೇನೇವ ನಾಮಂ ವೇದಿತಬ್ಬಂ. ರುಪ್ಪನಟ್ಠೇನ ರೂಪಂ, ರೂಪಕ್ಖನ್ಧೋ. ನವಮಂ.

ಅವಿಜ್ಜಾತಿ ದುಕ್ಖಾದಿಪಟಿಚ್ಛಾದಕೋ ಸಬ್ಬೋ ಮೋಹೋ. ಭವತಣ್ಹಾತಿ ಭವಪತ್ಥನಾವಸೇನ ಪವತ್ತೋ ಲೋಭೋ. ತಥಾ ಅಪ್ಪವತ್ತೋ ಪನೇತ್ಥ ಲೋಭೋ, ಸೇಸಚೇತಸಿಕಚಿತ್ತರೂಪನಿಬ್ಬಾನಾನಿ ಚ ನ ವತ್ತಬ್ಬಾನಿ. ಇತೋ ಪರಂ ಪನ ಏವಂ ನವತ್ತಬ್ಬವಿಭಾಗಂ ಅದಸ್ಸೇತ್ವಾ ಪದತ್ಥಸರೂಪಮತ್ತಮೇವ ದಸ್ಸಯಿಸ್ಸಾಮ, ದಸ್ಸಿತಾವಸೇಸಾ ನ ವತ್ತಬ್ಬಾತಿ ಗಹೇತಬ್ಬಾ. ದಸಮಂ.

ಭವೋ ವುಚ್ಚತಿ ಸಸ್ಸತಂ. ‘‘ಭವಿಸ್ಸತಿ ಅತ್ತಾ ಚ ಲೋಕೋ ಚಾ’’ತಿ ಸಸ್ಸತವಸೇನ ಉಪ್ಪಜ್ಜನಕದಿಟ್ಠಿ ಭವದಿಟ್ಠಿ ನಾಮ. ವಿಭವೋ ವುಚ್ಚತಿ ಉಚ್ಛೇದೋ. ‘‘ನ ಭವಿಸ್ಸತಿ ಅತ್ತಾ ಚ ಲೋಕೋ ಚಾ’’ತಿ ಉಚ್ಛೇದವಸೇನ ಉಪ್ಪಜ್ಜನಕದಿಟ್ಠಿ ವಿಭವದಿಟ್ಠಿ ನಾಮ. ಉಭಯೇನಾಪಿ ಮಿಚ್ಛಾದಿಟ್ಠಿ ಗಹಿತಾ. ತಥಾ ಅನನ್ತರೇಸುಪಿ ತೀಸು ದುಕೇಸು. ಏಕಾದಸಮಂ.

ಖನ್ಧಪಞ್ಚಕಂ ‘‘ಅತ್ತಾ ಚ ಲೋಕೋ ಚಾ’’ತಿ ಗಹೇತ್ವಾ ‘‘ಸಸ್ಸತೋ ಅತ್ತಾ ಚ ಲೋಕೋ ಚಾ’’ತಿ ಪವತ್ತಾ ದಿಟ್ಠಿ ಸಸ್ಸತದಿಟ್ಠಿ ನಾಮ. ತಥಾ ‘‘ಉಚ್ಛಿಜ್ಜಿಸ್ಸತೀ’’ತಿ ಪವತ್ತಾ ದಿಟ್ಠಿ ಉಚ್ಛೇದದಿಟ್ಠಿ ನಾಮ. ‘‘ಅನ್ತವಾ’’ತಿ ಪವತ್ತಾ ಅನ್ತವಾದಿಟ್ಠಿ ನಾಮ. ‘‘ಅನನ್ತವಾ’’ತಿ ಪವತ್ತಾ ಅನನ್ತವಾದಿಟ್ಠಿ ನಾಮ. ಪುಬ್ಬನ್ತಂ ಅನುಗತಾ ಬ್ರಹ್ಮಜಾಲೇ ವುತ್ತನಯೇನ ಅತೀತಕೋಟ್ಠಾಸಂ ಆರಮ್ಮಣಂ ಕತ್ವಾ ಪವತ್ತಾ ಅಟ್ಠಾರಸವಿಧಾ ಪುಬ್ಬನ್ತಾನುದಿಟ್ಠಿ ನಾಮ. ಅಪರನ್ತಂ ಅನುಗತಾ ತತ್ಥೇವ ಆಗತನಯೇನ ಅನಾಗತಕೋಟ್ಠಾಸಂ ಆರಮ್ಮಣಂ ಕತ್ವಾ ಪವತ್ತಾ ಚತುಚತ್ತಾಲೀಸವಿಧಾ ಅಪರನ್ತಾನುದಿಟ್ಠಿ ನಾಮ. ಅಯಮೇತ್ಥ ಸಙ್ಖೇಪೋ, ವಿತ್ಥಾರೋ ಪನ ಬ್ರಹ್ಮಜಾಲೇ (ದೀ. ನಿ. ೧.೨೮), ತದಟ್ಠಕಥಾಯ (ದೀ. ನಿ. ಅಟ್ಠ. ೧.೨೮) ಚ ವೇದಿತಬ್ಬೋ. ದ್ವಾದಸಮತೇರಸಮಚುದ್ದಸಮಾನಿ.

ಅಹಿರಿಕದುಕಂ, ಹಿರಿದುಕಞ್ಚ ಸುವಿಞ್ಞೇಯ್ಯಮೇವ. ಪಞ್ಚದಸಮಸೋಳಸಮಾನಿ.

ದುಕ್ಖಂ ವಚೋ ಏತಸ್ಮಿಂ ವಿಪ್ಪಟಿಕೂಲಗಾಹಿಮ್ಹಿ ವಿಪಚ್ಚನೀಕಸಾತೇ ಅನಾದರೇ ಪುಗ್ಗಲೇತಿ ದುಬ್ಬಚೋ, ಸಹಧಮ್ಮಿಕಂ ದಸ್ಸೇತ್ವಾ ಓವದಿಯಮಾನೇ ಅನಾದರಕಾರಕೋ ಪುಗ್ಗಲೋ, ತಸ್ಸ ಕಮ್ಮಂ ದೋವಚಸ್ಸಂ, ತಸ್ಸ ಭಾವೋ ದೋವಚಸ್ಸತಾ, ಅನಾದರವಸೇನ ಪವತ್ತಾ ದ್ವೇ ಪಟಿಘಚಿತ್ತಾ, ತಂಸಮ್ಪಯುತ್ತಾ ಚ. ಪಾಪಾ ಅಸ್ಸದ್ಧಾದಯೋ ಪುಗ್ಗಲಾ ಏತಸ್ಸ ಮಿತ್ತಾತಿ ಪಾಪಮಿತ್ತೋ, ತಸ್ಸ ಭಾವೋ ಪಾಪಮಿತ್ತತಾ, ಪಾಪಪುಗ್ಗಲೇಸು ದಳ್ಹಭತ್ತಿವಸೇನ, ಕಾಯಚಿತ್ತೇಹಿ ತಂಸೇವನಾತನ್ನಿನ್ನತಾವಸೇನ ಚ ಪವತ್ತಾನಿ ಅಟ್ಠ ಲೋಭಚಿತ್ತಾನಿ. ಸತ್ತರಸಮಂ.

ಸೋವಚಸ್ಸತಾ, ಕಲ್ಯಾಣಮಿತ್ತತಾ ಚ ವುತ್ತಪಟಿಪಕ್ಖವಸೇನ ವೇದಿತಬ್ಬಾ. ಅತ್ಥತೋ ಪನ ತಥಾಪವತ್ತಾನಿ ಸಹೇತುಕಕಾಮಾವಚರಕುಸಲಕಿರಿಯಚಿತ್ತಾನಿ. ಅಟ್ಠಾರಸಮಂ.

ಪಞ್ಚಸು, ಸತ್ತಸು ವಾ ಆಪತ್ತೀಸು ಕುಸಲಭಾವೋ ಆಪತ್ತಿಕುಸಲತಾ, ಸಹ ವತ್ಥುನಾ ತಾಸಂ ಆಪತ್ತೀನಂ ಆಪಜ್ಜನಪರಿಚ್ಛೇದಜಾನನವಸೇನ ಪವತ್ತಾ ಕಾಮಾವಚರಜವನಪಞ್ಞಾ. ಆಪತ್ತೀಹಿ ವುಟ್ಠಾನೇ ಕುಸಲಭಾವೋ ಆಪತ್ತಿವುಟ್ಠಾನಕುಸಲತಾ, ವುಟ್ಠಾನವಿಧಾನೇನ ಸದ್ಧಿಂ ಆಪತ್ತಿವುಟ್ಠಾನಪರಿಚ್ಛೇದಜಾನನವಸೇನ ಪವತ್ತಾ ಯಥಾವುತ್ತಚಿತ್ತಸಮ್ಪಯುತ್ತಪಞ್ಞಾವ. ಏಕೂನವೀಸತಿಮಂ.

ಸಮಾಪಜ್ಜಿತಬ್ಬತೋ ಸಮಾಪತ್ತಿ, ತಾಸು ಲೋಕಿಯಲೋಕುತ್ತರಾಸು ಸವಿತಕ್ಕಸವಿಚಾರಾದೀಸು ಸಮಾಪತ್ತೀಸು ಕುಸಲತಾ ಸಮಾಪತ್ತಿಕುಸಲತಾ, ಸಹ ಪರಿಕಮ್ಮೇನ ಅಪ್ಪನಾಪರಿಚ್ಛೇದಜಾನನವಸೇನ ಪವತ್ತಾ ಪಞ್ಞಾ. ಸಮಾಪತ್ತೀಹಿ ವುಟ್ಠಾನೇ ಕುಸಲಭಾವೋ ಸಮಾಪತ್ತಿವುಟ್ಠಾನಕುಸಲತಾ, ಯಥಾಪರಿಚ್ಛಿನ್ನಕಾಲೇಯೇವ ತಾಹಿ ವುಟ್ಠಾನಕಪಞ್ಞಾ ಕಾಮಾವಚರಜವನಪಞ್ಞಾವ. ವೀಸತಿಮಂ.

ಅಟ್ಠಾರಸಸು ಧಾತೂಸು ಕುಸಲಭಾವೋ ಧಾತುಕುಸಲತಾ, ಸವನಧಾರಣಪಟಿವೇಧಪಚ್ಚವೇಕ್ಖಣಪಞ್ಞಾ. ತಾಸಞ್ಞೇವ ಧಾತೂನಂ ಮನಸಿಕಾರೇ ಕುಸಲಭಾವೋ ಮನಸಿಕಾರಕುಸಲತಾ, ತಾಸಂ ಸಮ್ಮಸನಪಟಿವೇಧಪಚ್ಚವೇಕ್ಖಣಪಞ್ಞಾ. ಏಸ ನಯೋ ಆಯತನಕುಸಲತಾಯಪಿ. ತತ್ಥ ಹಿ ಸವನಧಾರಣಪಚ್ಚವೇಕ್ಖಣಾ ಕಾಮಾವಚರಾವ, ಪಟಿವೇಧೋ ಲೋಕುತ್ತರೋವ, ಸಮ್ಮಸನಂ ಕಾಮಾವಚರಲೋಕುತ್ತರಂ. ಅಞ್ಞಮಞ್ಞಂ ಪಟಿಚ್ಚ ಸಹಿತಂ ಫಲಂ ಉಪ್ಪಾದೇತೀತಿ ಪಟಿಚ್ಚಸಮುಪ್ಪಾದೋ, ಅವಿಜ್ಜಾದೀಹಿ ನಿದ್ದಿಟ್ಠೋ ಪಚ್ಚಯಸಮೂಹೋ, ತಸ್ಮಿಂ ದ್ವಾದಸಙ್ಗೇ ಅನುಲೋಮಪಟಿಚ್ಚಸಮುಪ್ಪಾದೇ ಕುಸಲಭಾವೋ ಪಟಿಚ್ಚಸಮುಪ್ಪಾದಕುಸಲತಾ, ‘‘ಇಮಿನಾ ಪಚ್ಚಯೇನ ಇದಂ ಹೋತೀ’’ತಿ ಜಾನನವಸೇನ ಪವತ್ತಾ ಲೋಕಿಯಜವನಪಞ್ಞಾವ. ಏಕವೀಸತಿಮದ್ವಾವೀಸತಿಮಾನಿ.

ತಿಟ್ಠತಿ ಏತ್ಥ ಫಲಂ ತದಾಯತ್ತವುತ್ತಿತಾಯಾತಿ ಠಾನಂ, ಕಾರಣಂ, ತಸ್ಮಿಂ ಠಾನೇ ಕುಸಲತಾ ಠಾನಕುಸಲತಾ. ನ ಠಾನೇ ಕುಸಲತಾ ಅಟ್ಠಾನಕುಸಲತಾ. ತೇವೀಸತಿಮಂ.

ಉಜುಭಾವೋ ಅಜ್ಜವೋ. ಮುದುಭಾವೋ ಮದ್ದವೋ. ಕಾಯಚಿತ್ತುಜುಕತಾಮುದುಕತಾದ್ವಯಂ. ಚತುವೀಸತಿಮಂ.

ಅಧಿವಾಸನಸಙ್ಖಾತಾ ಖಮನಂ ಖನ್ತಿ, ತಥಾಪವತ್ತಕಾಮಾವಚರಜವನಾನಿ. ಪಾಪತೋ ಸುಟ್ಠು ಓರತೋ ವಿರತೋತಿ ಸೋರತೋ, ತಸ್ಸ ಭಾವೋ ಸೋರಚ್ಚಂ. ಕಾಯವಚೀಮನೋಸಂವರಸೀಲಸಙ್ಖಾತಾನಿ ಲೋಕಿಯಲೋಕುತ್ತರಜವನಾನಿ. ಪಞ್ಚವೀಸತಿಮಂ.

ಸಮ್ಮೋದಕಪಿಯವಾದಿತಾಸಙ್ಖಾತೋ ಸಖಿಲಭಾವೋ ಸಾಖಲ್ಯಂ, ಯಥಾ ಪರೇಹಿ ಸದ್ಧಿಂ ಅತ್ತನೋ ಛಿದ್ದಂ ವಿವರಂ ನ ಹೋತಿ, ಏವಂ ಧಮ್ಮಾಮಿಸೇಹಿ ಪಟಿಸನ್ಥರಣಂ ಪಟಿಚ್ಛಾದನಂ ಪಟಿಸನ್ಥಾರೋ. ಆಗನ್ತುಕಸ್ಸ ಹಿ ಪಚ್ಚುಗ್ಗಮನಪತ್ತಚೀವರಪಟಿಗ್ಗಹಣಆಸನದಾನಬೀಜನಪಾದಧೋವನಮಕ್ಖನಾದಿನಾ, ಪಾನೀಯೇನ ಆಪುಚ್ಛನೇನ, ಕಾಲೇ ಆಗತಸ್ಸ ಯಾಗುಆದೀನಂ, ವಿಕಾಲೇ ಪಾನಕಾದೀನಞ್ಚ ದಾನೇನ, ಪುನದಿವಸೇ ಪಿಣ್ಡಾಯ ಚರಣಟ್ಠಾನದಸ್ಸನಪವೇಸನನಿಕ್ಖಮನಕಾಲಾರೋಚನಾದಿನಾ ಚ ಪಬ್ಬಜಿತಾ, ಗಹಟ್ಠಾನಞ್ಚ ವಿನಯೇ ಆಗತನಯೇನ ಯಥಾನುರೂಪಂ ಆಮಿಸಪಟಿಸನ್ಥಾರೋ ಕಾತಬ್ಬೋ. ಆಗನ್ತುಕಂ ಪನ ಉಪಸಙ್ಕಮಿತ್ವಾ ‘‘ತುಮ್ಹೇ ಕತರಭಾಣಕಾ’’ತಿ ಅಪುಚ್ಛಿತ್ವಾ ‘‘ಆಚರಿಯುಪಜ್ಝಾಯಾ ವೋ ಕತರಂ ಗನ್ಥಂ ವಳಞ್ಜೇನ್ತೀ’’ತಿ ಪುಚ್ಛಿತ್ವಾ ತಸ್ಸ ವಿಸಯೇ ಪಞ್ಹಪುಚ್ಛನೇನ ಸಚೇ ನ ಸಕ್ಕೋತಿ, ಸಯಂ ಕಥೇತ್ವಾ ದಾನೇನ, ಧಮ್ಮಕಥನಪಞ್ಹವಿಸ್ಸಜ್ಜನಕಮ್ಮಟ್ಠಾನಕಥನಕುಕ್ಕುಚ್ಚದಿಟ್ಠಿವಿನೋದನಾದಿನಾ, ಪರಿವಾಸಾದಿವಿನಯಕಮ್ಮಕರಣೇನ, ಪಬ್ಬಾಜನಉಪಸಮ್ಪದಾದಿನಾ ಚ ಧಮ್ಮಪಟಿಸನ್ಥಾರೋ ಕಾತಬ್ಬೋ. ಅಯಮೇತ್ಥ ಸಙ್ಖೇಪೋ, ವಿತ್ಥಾರತೋ ಪನಾಯಂ ಸದ್ಧಿಂ ಆನಿಸಂಸದೀಪಕವತ್ಥೂಹಿ ಅಟ್ಠಸಾಲಿನಿಯಂ (ಧ. ಸ. ಅಟ್ಠ. ೧೩೫೧) ಞಾತಬ್ಬೋ. ಏತಸ್ಮಿಂ ದುವಿಧೇ ಪಟಿಸನ್ಥಾರೇ ಕುಸಲಭಾವೋ ಪಟಿಸನ್ಥಾರಕುಸಲತಾ, ತಥಾಪವತ್ತಕಾಮಾವಚರಜವನಾನಿ ಏವ. ಛಬ್ಬೀಸತಿಮಂ.

ಇನ್ದ್ರಿಯೇಸು ಮನಚ್ಛಟ್ಠೇಸು ಆಪಾಥಗತರೂಪಾದೀಸು ಆರಮ್ಮಣೇಸು ನಿಮಿತ್ತಗಹಣಾದಿನಾ ಇನ್ದ್ರಿಯಸಂವರಭೇದಸಙ್ಖಾತೋ ಅಗುತ್ತದ್ವಾರಭಾವೋ ಇನ್ದ್ರಿಯೇಸು ಅಗುತ್ತದ್ವಾರತಾ. ಪಟಿಗ್ಗಹಣಪರಿಭೋಗವಸೇನ ಭೋಜನೇ ಮತ್ತಂ ಅಜಾನನಭಾವೋ ಭೋಜನೇ ಅಮತ್ತಞ್ಞುತಾ, ತಥಾಪವತ್ತಅಕುಸಲಚಿತ್ತಾನಿ. ಸತ್ತವೀಸತಿಮಂ.

ಅನನ್ತರದುಕೇಪಿ ವುತ್ತಪಟಿಪಕ್ಖವಸೇನ ಕಾಮಾವಚರಸಹೇತುಕಕುಸಲಕಿರಿಯಚಿತ್ತಾನಿ ವೇದಿತಬ್ಬಾನಿ. ಅಟ್ಠವೀಸತಿಮಂ.

ಸತಿವಿಪ್ಪವಾಸಸಙ್ಖಾತೋ ಮುಟ್ಠಸತಿಭಾವೋ ಮುಟ್ಠಸ್ಸಚ್ಚಂ, ಸಬ್ಬೇ ಅಕುಸಲಾ ಧಮ್ಮಾ, ಅಸಮ್ಪಜಾನನಭಾವೋ ಅಸಮ್ಪಜಞ್ಞಂ, ಮೋಹೋ. ಏಕೂನತಿಂಸತಿಮಂ.

ಅನನ್ತರದುಕೇ ಚತುಭೂಮಿಕಾ ಸತಿಪಞ್ಞಾವ ವುತ್ತಾ. ತಿಂಸತಿಮಂ.

ಅಪ್ಪಟಿಸಙ್ಖಾನೇ ಅಪ್ಪಟಿವಾನಸಙ್ಖಾತೇ ಅಕಮ್ಪಿಯಟ್ಠೇನ ಯೋನಿಸೋದಸ್ಸನಸಙ್ಖಾತಂ ಪಟಿಸಙ್ಖಾನಮೇವ ಬಲನ್ತಿ ಪಟಿಸಙ್ಖಾನಬಲಂ, ಕಾಮಾವಚರಪಞ್ಞಾವ. ಸತ್ತಬೋಜ್ಝಙ್ಗಾದಿಭಾವನಾವಸೇನ ಪವತ್ತಾ ಚತುಭೂಮಕಧಮ್ಮಾ ಭಾವನಾಬಲಂ. ಏಕತಿಂಸತಿಮಂ.

ಪಚ್ಚನೀಕಧಮ್ಮೇ ಸಮೇತೀತಿ ಸಮಥೋ, ಸೋ ತಿವಿಧೋ ಚಿತ್ತಸಮಥೋ ಅಧಿಕರಣಸಮಥೋ ಸಬ್ಬಸಙ್ಖಾರಸಮಥೋತಿ. ತತ್ಥ ಚ ಪುಬ್ಬಭಾಗಾಸು ಅಟ್ಠಸಮಾಪತ್ತೀಸು ಏಕಗ್ಗತಾ ಚಿತ್ತಸಮಥೋ ನಾಮ, ಸಮ್ಮುಖಾವಿನಯಾದಿ ಸತ್ತವಿಧೋ ಅಧಿಕರಣಸಮಥೋ ನಾಮ, ನಿಬ್ಬಾನಂ ಸಬ್ಬಸಙ್ಖಾರಸಮಥೋ ನಾಮ. ಇಧ ಪನ ಚತುಭೂಮಕೋ ಸಮಾಧಿ ಅಧಿಪ್ಪೇತೋ. ಅನಿಚ್ಚಾದಿವಸೇನ ವಿವಿಧೇನಾಕಾರೇನ ಪಸ್ಸತೀತಿ ವಿಪಸ್ಸನಾ, ಲೋಕಿಯಲೋಕುತ್ತರಾ ವಿಪಸ್ಸನಾಪಞ್ಞಾವ. ಬಾತ್ತಿಂಸತಿಮಂ.

ಸಮಥೋವ ತಂ ಆಕಾರಂ ಗಹೇತ್ವಾ ಪುನ ಪವತ್ತೇತಬ್ಬಸ್ಸ ಸಮಥಸ್ಸ ನಿಮಿತ್ತನ್ತಿ ಸಮಥನಿಮಿತ್ತಂ. ಪಗ್ಗಾಹನಿಮಿತ್ತೇಪಿ ಏಸೇವ ನಯೋ. ಚತುಭೂಮಕಸಮಾಧಿವೀರಿಯಾನಿ ಏವ. ತೇತ್ತಿಂಸತಿಮಂ.

ಅನನ್ತರದುಕೇಪಿ ವೀರಿಯಸಮಾಧೀ ಏವ ವುತ್ತಾ. ಚತುತ್ತಿಂಸತಿಮಂ.

ಸೀಲವಿನಾಸಿಕಾ ಅಸಂವರಸಙ್ಖಾತಾ ಸೀಲಸ್ಸ ವಿಪತ್ತೀತಿ ಸೀಲವಿಪತ್ತಿ, ತಥಾಪವತ್ತಾ ಅಕುಸಲಧಮ್ಮಾ. ಸಮ್ಮಾದಿಟ್ಠಿಯಾ ವಿಪತ್ತಿ ದಿಟ್ಠಿವಿಪತ್ತಿ, ಮಿಚ್ಛಾದಿಟ್ಠಿ ಏವ. ಪಞ್ಚತಿಂಸತಿಮಂ.

ಸೋರಚ್ಚಮೇವ ಸೀಲಸ್ಸ ಸಮ್ಪಾದನತೋ ಸೀಲಪರಿಪೂರಣತೋ ಸೀಲಸ್ಸ ಸಮ್ಪದಾತಿ ಸೀಲಸಮ್ಪದಾ. ದಿಟ್ಠಿಪಾರಿಪೂರಿಭೂತಂ ಞಾಣಮೇವ ದಿಟ್ಠಿಯಾ ಸಮ್ಪದಾತಿ ದಿಟ್ಠಿಸಮ್ಪದಾ. ಚತುಭೂಮಕಾ ಸೀಲಪಞ್ಞಾವ. ತಥಾ ಅನನ್ತರದುಕೇಪಿ. ಛತ್ತಿಂಸತಿಮಂ.

ವಿಸುದ್ಧಿಭಾವಂ ಸಮ್ಪತ್ತಾ ಸೀಲಸಙ್ಖಾತಾ ಸೀಲಸ್ಸ ವಿಸುದ್ಧಿ ಸೀಲವಿಸುದ್ಧಿ. ನಿಬ್ಬಾನಸಙ್ಖಾತಂ ವಿಸುದ್ಧಿಂ ಪಾಪೇತುಂ ಸಮತ್ಥಾ ದಸ್ಸನಸಙ್ಖಾತಾ ದಿಟ್ಠಿಯಾ ವಿಸುದ್ಧಿ ದಿಟ್ಠಿವಿಸುದ್ಧಿ. ಸತ್ತತ್ತಿಂಸತಿಮಂ.

ಕಮ್ಮಸ್ಸಕತಾಸಚ್ಚಾನುಲೋಮಿಕಮಗ್ಗಫಲಸಮ್ಪಯುತ್ತಪಞ್ಞಾ ದಿಟ್ಠಿ ವಿಸುದ್ಧಿ ನಾಮ. ಯಥಾದಿಟ್ಠಿಸ್ಸ ತದನುರೂಪಂ ಪಧಾನಂ ಯಥಾದಿಟ್ಠಿಸ್ಸ ಚ ಪಧಾನಂ ನಾಮ. ಅಟ್ಠತಿಂಸತಿಮಂ.

ಸಂವೇಗಜನಕಾನಿ ಜಾತಿಜರಾಬ್ಯಾಧಿಮರಣಸಙ್ಖಾತಾನಿ ಕಾರಣಾನಿ ಸಂವೇಜನೀಯಟ್ಠಾನಾನಿ ನಾಮ, ತೇಸು ಜಾತಿಆದಿಪಟಿಚ್ಚಸಮುಪ್ಪನ್ನಭಯಸಙ್ಖಾತಂ ಸಂವಿಜನಂ ಸಂವೇಗೋ ನಾಮ, ತಥಾಪವತ್ತಕುಸಲಾದಿ ಏವ. ಏವಂ ಸಂವೇಗಜಾತಸ್ಸ ಯೋನಿಸೋ ಉಪಾಯೇನ ಪಧಾನಂ ಸಂವಿಗ್ಗಸ್ಸ ಯೋನಿಸೋ ಪಧಾನಂ, ಲೋಕಿಯಲೋಕುತ್ತರವೀರಿಯಮೇವ. ಏಕೂನಚತ್ತಾಲೀಸತಿಮಂ.

ಕುಸಲಧಮ್ಮಪೂರಣೇ ಅಸನ್ತುಟ್ಠಿಭಾವೋ ಅಸನ್ತುಟ್ಠಿತಾ. ಯೋ ಪನ ದಾನಂ ದತ್ವಾ ತತೋ ತೇನ ಅಸನ್ತುಟ್ಠೋ ಹುತ್ವಾ ಸರಣಗಮನಂ ಆಕಙ್ಖತಿ, ತತೋ ಪಞ್ಚಸೀಲಾದಿಂ, ಪಬ್ಬಜ್ಜಂ, ಬುದ್ಧವಚನಾನಂ ಉಗ್ಗಣ್ಹನಂ, ಸಮಥವಿಪಸ್ಸನಂ, ತತೋ ತೇನಾಪಿ ಅಸನ್ತುಟ್ಠೋ ಅನುಕ್ಕಮೇನ ಅರಹತ್ತಂ ಗಣ್ಹಾತಿ, ಅಯಂ ಅಸನ್ತುಟ್ಠಿತಾ ಕುಸಲೇಸು ಧಮ್ಮೇಸು. ಅಧಿಕುಸಲಧಮ್ಮಾನಂ ಭಾವನಾಯ ಉಕ್ಕಣ್ಠಮಾನೋ ಪಧಾನಂ ಪಟಿವಾಪೇತಿ ನಿವತ್ತಾಪೇತೀತಿ ಪಟಿವಾನಿ, ನ ಪಟಿವಾನಿ ಅಪ್ಪಟಿವಾನಿ, ತಸ್ಸ ಭವೋ ಅಪ್ಪಟಿವಾನಿತಾ. ಅರಹತ್ತಂ ಅಪ್ಪತ್ವಾ ಪಧಾನಸ್ಮಿಂ ಅನಿವತ್ತನತಾ ಅನೋಸಕ್ಕನತಾ, ತಥಾಪವತ್ತಲೋಕಿಯಲೋಕುತ್ತರಕುಸಲಾ ಧಮ್ಮಾ. ಚತ್ತಾಲೀಸತಿಮಂ.

ವಿಜಾನನತೋ ವಿಜ್ಜಾ, ಪುಬ್ಬೇನಿವಾಸಚುತೂಪಪಾತಆಸವಕ್ಖಯಞಾಣಾನಿ. ವಿಮುಚ್ಚನತೋ ವಿಮುತ್ತಿ, ಅಟ್ಠ ಸಮಾಪತ್ತಿಯೋ, ನಿಬ್ಬಾನಞ್ಚ. ಅಟ್ಠ ಸಮಾಪತ್ತಿಯೋ ಹಿ ಆರಮ್ಮಣೇ ಅಧಿಮುಚ್ಚನತೋ, ಸಯಂ ವಿಕ್ಖಮ್ಭಿತಕಿಲೇಸೇಹಿ ವಿಮುಚ್ಚನಟ್ಠೇನ ಚ ವಿಮುತ್ತೀತಿ ವುತ್ತಾ, ನಿಬ್ಬಾನಂ ಪನ ಸಬ್ಬಕಿಲೇಸೇಹಿ ಅಚ್ಚನ್ತವಿಮುಚ್ಚನಟ್ಠೇನ. ಏಕಚತ್ತಾಲೀಸತಿಮಂ.

ಕಿಲೇಸಕ್ಖಯಕರೇಸು ಚತೂಸು ಅರಿಯಮಗ್ಗೇಸು ಞಾಣಂ ಖಯೇ ಞಾಣಂ ನಾಮ. ಪಟಿಸನ್ಧಿವಸೇನ ಅನುಪ್ಪಾದಭೂತೇ ತಂತಂಮಗ್ಗವಜ್ಝಕಿಲೇಸಾನಂ ಅನುಪ್ಪಾದಪರಿಯೋಸಾನೇ ಉಪ್ಪನ್ನಅರಿಯಫಲೇ ಞಾಣಂ ಅನುಪ್ಪಾದೇ ಞಾಣಂ ನಾಮ. ಸೇಸಂ ಸಬ್ಬತ್ಥ ಸುವಿಞ್ಞೇಯ್ಯಮೇವ. ದ್ವಾಚತ್ತಾಲೀಸತಿಮಂ.

ಸುತ್ತನ್ತಿಕದುಕಮಾತಿಕತ್ಥವಣ್ಣನಾ ನಿಟ್ಠಿತಾ.

ಮೋಹವಿಚ್ಛೇದನಿಯಾ ಅಭಿಧಮ್ಮಮಾತಿಕತ್ಥವಣ್ಣನಾಯ

ಧಮ್ಮಸಙ್ಗಣೀಮಾತಿಕತ್ಥವಣ್ಣನಾ ನಿಟ್ಠಿತಾ.