೩. ಠಾನಿಯಸುತ್ತಂ

೨೦೪. ‘‘ಕಾಮರಾಗಟ್ಠಾನಿಯಾನಂ, [ಕಾಮರಾಗಟ್ಠಾನೀಯಾನಂ (ಸೀ.)] ಭಿಕ್ಖವೇ, ಧಮ್ಮಾನಂ ಮನಸಿಕಾರಬಹುಲೀಕಾರಾ ಅನುಪ್ಪನ್ನೋ ಚೇವ ಕಾಮಚ್ಛನ್ದೋ ಉಪ್ಪಜ್ಜತಿ, ಉಪ್ಪನ್ನೋ ಚ ಕಾಮಚ್ಛನ್ದೋ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತಿ. ಬ್ಯಾಪಾದಟ್ಠಾನಿಯಾನಂ, ಭಿಕ್ಖವೇ, ಧಮ್ಮಾನಂ ಮನಸಿಕಾರಬಹುಲೀಕಾರಾ ಅನುಪ್ಪನ್ನೋ ಚೇವ ಬ್ಯಾಪಾದೋ ಉಪ್ಪಜ್ಜತಿ, ಉಪ್ಪನ್ನೋ ಚ ಬ್ಯಾಪಾದೋ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತಿ. ಥಿನಮಿದ್ಧಟ್ಠಾನಿಯಾನಂ, ಭಿಕ್ಖವೇ, ಧಮ್ಮಾನಂ ಮನಸಿಕಾರಬಹುಲೀಕಾರಾ ಅನುಪ್ಪನ್ನಞ್ಚೇವ ಥಿನಮಿದ್ಧಂ ಉಪ್ಪಜ್ಜತಿ, ಉಪ್ಪನ್ನಞ್ಚ ಥಿನಮಿದ್ಧಂ ಭಿಯ್ಯೋಭಾವಾಯ ವೇಪುಲ್ಲಾಯಂ ಸಂವತ್ತತಿ. ಉದ್ಧಚ್ಚಕುಕ್ಕುಚ್ಚಟ್ಠಾನಿಯಾನಂ, ಭಿಕ್ಖವೇ, ಧಮ್ಮಾನಂ ಮನಸಿಕಾರಬಹುಲೀಕಾರಾ ಅನುಪ್ಪನ್ನಞ್ಚೇವ ಉದ್ಧಚ್ಚಕುಕ್ಕುಚ್ಚಂ ಉಪ್ಪಜ್ಜತಿ, ಉಪ್ಪನ್ನಞ್ಚ ಉದ್ಧಚ್ಚಕುಕ್ಕುಚ್ಚಂ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತಿ. ವಿಚಿಕಿಚ್ಛಾಟ್ಠಾನಿಯಾನಂ, ಭಿಕ್ಖವೇ, ಧಮ್ಮಾನಂ ಮನಸಿಕಾರಬಹುಲೀಕಾರಾ ಅನುಪ್ಪನ್ನಾ ಚೇವ ವಿಚಿಕಿಚ್ಛಾ ಉಪ್ಪಜ್ಜತಿ, ಉಪ್ಪನ್ನಾ ಚ ವಿಚಿಕಿಚ್ಛಾ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತಿ.

‘‘ಸತಿಸಮ್ಬೋಜ್ಝಙ್ಗಟ್ಠಾನಿಯಾನಂ, ಭಿಕ್ಖವೇ, ಧಮ್ಮಾನಂ ಮನಸಿಕಾರಬಹುಲೀಕಾರಾ ಅನುಪ್ಪನ್ನೋ ಚೇವ ಸತಿಸಮ್ಬೋಜ್ಝಙ್ಗೋ ಉಪ್ಪಜ್ಜತಿ, ಉಪ್ಪನ್ನೋ ಚ ಸತಿಸಮ್ಬೋಜ್ಝಙ್ಗೋ ಭಾವನಾಪಾರಿಪೂರಿಂ ಗಚ್ಛತಿ…ಪೇ… ಉಪೇಕ್ಖಾಸಮ್ಬೋಜ್ಝಙ್ಗಟ್ಠಾನಿಯಾನಂ, ಭಿಕ್ಖವೇ, ಧಮ್ಮಾನಂ ಮನಸಿಕಾರಬಹುಲೀಕಾರಾ ಅನುಪ್ಪನ್ನೋ ಚೇವ ಉಪೇಕ್ಖಾಸಮ್ಬೋಜ್ಝಙ್ಗೋ ಉಪ್ಪಜ್ಜತಿ, ಉಪ್ಪನ್ನೋ ಚ ಉಪೇಕ್ಖಾಸಮ್ಬೋಜ್ಝಙ್ಗೋ ಭಾವನಾಪಾರಿಪೂರಿಂ ಗಚ್ಛತೀ’’ತಿ. ತತಿಯಂ.