೯. ಇನ್ದ್ರಿಯಸಮ್ಪನ್ನಸುತ್ತಂ

೧೫೪. ಅಥ ಖೋ ಅಞ್ಞತರೋ ಭಿಕ್ಖು ಯೇನ ಭಗವಾ ತೇನುಪಸಙ್ಕಮಿ…ಪೇ… ಏಕಮನ್ತಂ ನಿಸಿನ್ನೋ ಖೋ ಸೋ ಭಿಕ್ಖು ಭಗವನ್ತಂ ಏತದವೋಚ – ‘‘‘ಇನ್ದ್ರಿಯಸಮ್ಪನ್ನೋ, ಇನ್ದ್ರಿಯಸಮ್ಪನ್ನೋ’ತಿ, ಭನ್ತೇ, ವುಚ್ಚತಿ. ಕಿತ್ತಾವತಾ ನು ಖೋ, ಭನ್ತೇ, ಇನ್ದ್ರಿಯಸಮ್ಪನ್ನೋ ಹೋತೀ’’ತಿ?

‘‘ಚಕ್ಖುನ್ದ್ರಿಯೇ ಚೇ, ಭಿಕ್ಖು, ಉದಯಬ್ಬಯಾನುಪಸ್ಸೀ ವಿಹರನ್ತೋ ಚಕ್ಖುನ್ದ್ರಿಯೇ ನಿಬ್ಬಿನ್ದತಿ…ಪೇ… ಜಿವ್ಹಿನ್ದ್ರಿಯೇ ಚೇ, ಭಿಕ್ಖು, ಉದಯಬ್ಬಯಾನುಪಸ್ಸೀ ವಿಹರನ್ತೋ ಜಿವ್ಹಿನ್ದ್ರಿಯೇ ನಿಬ್ಬಿನ್ದತಿ…ಪೇ… ಮನಿನ್ದ್ರಿಯೇ ಚೇ, ಭಿಕ್ಖು, ಉದಯಬ್ಬಯಾನುಪಸ್ಸೀ ವಿಹರನ್ತೋ ಮನಿನ್ದ್ರಿಯೇ ನಿಬ್ಬಿನ್ದತಿ. ನಿಬ್ಬಿನ್ದಂ ವಿರಜ್ಜತಿ…ಪೇ… ವಿಮುತ್ತಸ್ಮಿಂ ವಿಮುತ್ತಮಿತಿ ಞಾಣಂ ಹೋತಿ. ‘ಖೀಣಾ ಜಾತಿ, ವುಸಿತಂ ಬ್ರಹ್ಮಚರಿಯಂ, ಕತಂ ಕರಣೀಯಂ, ನಾಪರಂ ಇತ್ಥತ್ತಾಯಾ’ತಿ ಪಜಾನಾತಿ. ಏತ್ತಾವತಾ ಖೋ, ಭಿಕ್ಖು, ಇನ್ದ್ರಿಯಸಮ್ಪನ್ನೋ ಹೋತೀ’’ತಿ. ನವಮಂ.