೨. ಅನಿಚ್ಚನಿಬ್ಬಾನಸಪ್ಪಾಯಸುತ್ತಂ

೧೪೭. ‘‘ನಿಬ್ಬಾನಸಪ್ಪಾಯಂ ವೋ, ಭಿಕ್ಖವೇ, ಪಟಿಪದಂ ದೇಸೇಸ್ಸಾಮಿ. ತಂ ಸುಣಾಥ…ಪೇ… ಕತಮಾ ಚ ಸಾ, ಭಿಕ್ಖವೇ, ನಿಬ್ಬಾನಸಪ್ಪಾಯಾ ಪಟಿಪದಾ? ಇಧ, ಭಿಕ್ಖವೇ, ಭಿಕ್ಖು ಚಕ್ಖುಂ ಅನಿಚ್ಚನ್ತಿ ಪಸ್ಸತಿ, ರೂಪಾ ಅನಿಚ್ಚಾತಿ ಪಸ್ಸತಿ, ಚಕ್ಖುವಿಞ್ಞಾಣಂ ಅನಿಚ್ಚನ್ತಿ ಪಸ್ಸತಿ, ಚಕ್ಖುಸಮ್ಫಸ್ಸೋ ಅನಿಚ್ಚೋತಿ ಪಸ್ಸತಿ. ಯಮ್ಪಿದಂ ಚಕ್ಖುಸಮ್ಫಸ್ಸಪಚ್ಚಯಾ ಉಪ್ಪಜ್ಜತಿ ವೇದಯಿತಂ ಸುಖಂ ವಾ ದುಕ್ಖಂ ವಾ ಅದುಕ್ಖಮಸುಖಂ ವಾ ತಮ್ಪಿ ಅನಿಚ್ಚನ್ತಿ ಪಸ್ಸತಿ…ಪೇ… ಜಿವ್ಹಾ ಅನಿಚ್ಚಾತಿ ಪಸ್ಸತಿ, ರಸಾ ಅನಿಚ್ಚಾತಿ ಪಸ್ಸತಿ, ಜಿವ್ಹಾವಿಞ್ಞಾಣಂ ಅನಿಚ್ಚನ್ತಿ ಪಸ್ಸತಿ, ಜಿವ್ಹಾಸಮ್ಫಸ್ಸೋ ಅನಿಚ್ಚೋತಿ ಪಸ್ಸತಿ, ಯಮ್ಪಿದಂ ಜಿವ್ಹಾಸಮ್ಫಸ್ಸಪಚ್ಚಯಾ ಉಪ್ಪಜ್ಜತಿ ವೇದಯಿತಂ ಸುಖಂ ವಾ ದುಕ್ಖಂ ವಾ ಅದುಕ್ಖಮಸುಖಂ ವಾ ತಮ್ಪಿ ಅನಿಚ್ಚನ್ತಿ ಪಸ್ಸತಿ…ಪೇ… ಮನೋ ಅನಿಚ್ಚೋತಿ ಪಸ್ಸತಿ, ಧಮ್ಮಾ ಅನಿಚ್ಚಾತಿ ಪಸ್ಸತಿ, ಮನೋವಿಞ್ಞಾಣಂ ಅನಿಚ್ಚನ್ತಿ ಪಸ್ಸತಿ, ಮನೋಸಮ್ಫಸ್ಸೋ ಅನಿಚ್ಚೋತಿ ಪಸ್ಸತಿ, ಯಮ್ಪಿದಂ ಮನೋಸಮ್ಫಸ್ಸಪಚ್ಚಯಾ ಉಪ್ಪಜ್ಜತಿ ವೇದಯಿತಂ ಸುಖಂ ವಾ ದುಕ್ಖಂ ವಾ ಅದುಕ್ಖಮಸುಖಂ ವಾ ತಮ್ಪಿ ಅನಿಚ್ಚನ್ತಿ ಪಸ್ಸತಿ. ಅಯಂ ಖೋ ಸಾ, ಭಿಕ್ಖವೇ, ನಿಬ್ಬಾನಸಪ್ಪಾಯಾ ಪಟಿಪದಾ’’ತಿ. ದುತಿಯಂ.