೪. ಓಕ್ಖಾಸುತ್ತಂ

೨೨೬. ಸಾವತ್ಥಿಯಂ ವಿಹರತಿ…ಪೇ… ‘‘ಯೋ, ಭಿಕ್ಖವೇ, ಪುಬ್ಬಣ್ಹಸಮಯಂ ಓಕ್ಖಾಸತಂ ದಾನಂ ದದೇಯ್ಯ, ಯೋ ಮಜ್ಝನ್ಹಿಕಸಮಯಂ ಓಕ್ಖಾಸತಂ ದಾನಂ ದದೇಯ್ಯ, ಯೋ ಸಾಯನ್ಹಸಮಯಂ ಓಕ್ಖಾಸತಂ ದಾನಂ ದದೇಯ್ಯ, ಯೋ ವಾ ಪುಬ್ಬಣ್ಹಸಮಯಂ ಅನ್ತಮಸೋ ಗದ್ದುಹನಮತ್ತಮ್ಪಿ ಮೇತ್ತಚಿತ್ತಂ ಭಾವೇಯ್ಯ, ಯೋ ವಾ ಮಜ್ಝನ್ಹಿಕಸಮಯಂ ಅನ್ತಮಸೋ ಗದ್ದುಹನಮತ್ತಮ್ಪಿ ಮೇತ್ತಚಿತ್ತಂ ಭಾವೇಯ್ಯ, ಯೋ ವಾ ಸಾಯನ್ಹಸಮಯಂ ಅನ್ತಮಸೋ ಗದ್ದುಹನಮತ್ತಮ್ಪಿ ಮೇತ್ತಚಿತ್ತಂ ಭಾವೇಯ್ಯ, ಇದಂ ತತೋ ಮಹಪ್ಫಲತರಂ. ತಸ್ಮಾತಿಹ, ಭಿಕ್ಖವೇ, ಏವಂ ಸಿಕ್ಖಿತಬ್ಬಂ – ‘ಮೇತ್ತಾ ನೋ ಚೇತೋವಿಮುತ್ತಿ ಭಾವಿತಾ ಭವಿಸ್ಸತಿ ಬಹುಲೀಕತಾ ಯಾನೀಕತಾ ವತ್ಥುಕತಾ ಅನುಟ್ಠಿತಾ ಪರಿಚಿತಾ ಸುಸಮಾರದ್ಧಾ’ತಿ. ಏವಞ್ಹಿ ವೋ, ಭಿಕ್ಖವೇ, ಸಿಕ್ಖಿತಬ್ಬ’’ನ್ತಿ. ಚತುತ್ಥಂ.