೮. ಸಿಙ್ಗಾಲಸುತ್ತಂ

೧೬೪. ಸಾವತ್ಥಿಯಂ ವಿಹರತಿ…ಪೇ… ‘‘ದಾರುಣೋ, ಭಿಕ್ಖವೇ, ಲಾಭಸಕ್ಕಾರಸಿಲೋಕೋ…ಪೇ… ಅಧಿಗಮಾಯ. ಅಸ್ಸುತ್ಥ ನೋ ತುಮ್ಹೇ, ಭಿಕ್ಖವೇ, ರತ್ತಿಯಾ ಪಚ್ಚೂಸಸಮಯಂ ಜರಸಿಙ್ಗಾಲಸ್ಸ [ಸಿಙ್ಗಾಲಸ್ಸ (ಕ.), ಜರಸಿಗಾಲಸ್ಸ (ಸೀ. ಸ್ಯಾ. ಕಂ.)] ವಸ್ಸಮಾನಸ್ಸಾ’’ತಿ? ‘‘ಏವಂ, ಭನ್ತೇ’’. ‘‘ಏಸೋ ಖೋ, ಭಿಕ್ಖವೇ, ಜರಸಿಙ್ಗಾಲೋ ಉಕ್ಕಣ್ಡಕೇನ [ಉಕ್ಕಣ್ಡಕೇನ (ಸೀ.), ಉಕ್ಕಣ್ಣಕೇನ (ಸ್ಯಾ. ಕಂ. ಪೀ.)] ನಾಮ ರೋಗಜಾತೇನ ಫುಟ್ಠೋ ನೇವ ಬಿಲಗತೋ ರಮತಿ, ನ ರುಕ್ಖಮೂಲಗತೋ ರಮತಿ, ನ ಅಜ್ಝೋಕಾಸಗತೋ ರಮತಿ; ಯೇನ ಯೇನ ಗಚ್ಛತಿ, ಯತ್ಥ ಯತ್ಥ ತಿಟ್ಠತಿ, ಯತ್ಥ ಯತ್ಥ ನಿಸೀದತಿ, ಯತ್ಥ ಯತ್ಥ ನಿಪಜ್ಜತಿ; ತತ್ಥ ತತ್ಥ ಅನಯಬ್ಯಸನಂ ಆಪಜ್ಜತಿ. ಏವಮೇವ ಖೋ, ಭಿಕ್ಖವೇ, ಇಧೇಕಚ್ಚೋ ಭಿಕ್ಖು ಲಾಭಸಕ್ಕಾರಸಿಲೋಕೇನ ಅಭಿಭೂತೋ ಪರಿಯಾದಿಣ್ಣಚಿತ್ತೋ ನೇವ ಸುಞ್ಞಾಗಾರಗತೋ ರಮತಿ, ನ ರುಕ್ಖಮೂಲಗತೋ ರಮತಿ, ನ ಅಜ್ಝೋಕಾಸಗತೋ ರಮತಿ; ಯೇನ ಯೇನ ಗಚ್ಛತಿ, ಯತ್ಥ ಯತ್ಥ ತಿಟ್ಠತಿ, ಯತ್ಥ ಯತ್ಥ ನಿಸೀದತಿ, ಯತ್ಥ ಯತ್ಥ ನಿಪಜ್ಜತಿ; ತತ್ಥ ತತ್ಥ ಅನಯಬ್ಯಸನಂ ಆಪಜ್ಜತಿ. ಏವಂ ದಾರುಣೋ ಖೋ, ಭಿಕ್ಖವೇ, ಲಾಭಸಕ್ಕಾರಸಿಲೋಕೋ…ಪೇ… ಏವಞ್ಹಿ ವೋ, ಭಿಕ್ಖವೇ, ಸಿಕ್ಖಿತಬ್ಬ’’ನ್ತಿ. ಅಟ್ಠಮಂ.