೧೦. ಸೇರೀಸಕವಿಮಾನವತ್ಥು

೧೨೨೮. [ಪೇ. ವ. ೬೦೪] ಸುಣೋಥ ಯಕ್ಖಸ್ಸ ಚ ವಾಣಿಜಾನ ಚ, ಸಮಾಗಮೋ ಯತ್ಥ ತದಾ ಅಹೋಸಿ;

ಯಥಾ ಕಥಂ ಇತರಿತರೇನ ಚಾಪಿ, ಸುಭಾಸಿತಂ ತಞ್ಚ ಸುಣಾಥ ಸಬ್ಬೇ.

೧೨೨೯. ‘‘ಯೋ ಸೋ ಅಹು ರಾಜಾ ಪಾಯಾಸಿ ನಾಮ [ನಾಮೋ (ಸೀ.)], ಭುಮ್ಮಾನಂ ಸಹಬ್ಯಗತೋ ಯಸಸ್ಸೀ;

ಸೋ ಮೋದಮಾನೋವ ಸಕೇ ವಿಮಾನೇ, ಅಮಾನುಸೋ ಮಾನುಸೇ ಅಜ್ಝಭಾಸೀತಿ.

೧೨೩೦. ‘‘ವಙ್ಕೇ ಅರಞ್ಞೇ ಅಮನುಸ್ಸಟ್ಠಾನೇ, ಕನ್ತಾರೇ ಅಪ್ಪೋದಕೇ ಅಪ್ಪಭಕ್ಖೇ;

ಸುದುಗ್ಗಮೇ ವಣ್ಣುಪಥಸ್ಸ ಮಜ್ಝೇ, ವಙ್ಕಂ ಭಯಾ [ಧಙ್ಕಂಭಯಾ (ಕ.)] ನಟ್ಠಮನಾ ಮನುಸ್ಸಾ.

೧೨೩೧. ‘‘ನಯಿಧ ಫಲಾ ಮೂಲಮಯಾ ಚ ಸನ್ತಿ, ಉಪಾದಾನಂ ನತ್ಥಿ ಕುತೋಧ ಭಕ್ಖೋ;

ಅಞ್ಞತ್ರ ಪಂಸೂಹಿ ಚ ವಾಲುಕಾಹಿ ಚ, ತತಾಹಿ ಉಣ್ಹಾಹಿ ಚ ದಾರುಣಾಹಿ ಚ.

೧೨೩೨. ‘‘ಉಜ್ಜಙ್ಗಲಂ ತತ್ತಮಿವಂ ಕಪಾಲಂ, ಅನಾಯಸಂ ಪರಲೋಕೇನ ತುಲ್ಯಂ;

ಲುದ್ದಾನಮಾವಾಸಮಿದಂ ಪುರಾಣಂ, ಭೂಮಿಪ್ಪದೇಸೋ ಅಭಿಸತ್ತರೂಪೋ.

೧೨೩೩. ‘‘ಅಥ ತುಮ್ಹೇ ಕೇನ [ಕೇನ ನು (ಸ್ಯಾ. ಕ.)] ವಣ್ಣೇನ, ಕಿಮಾಸಮಾನಾ ಇಮಂ ಪದೇಸಂ ಹಿ;

ಅನುಪವಿಟ್ಠಾ ಸಹಸಾ ಸಮೇಚ್ಚ, ಲೋಭಾ ಭಯಾ ಅಥ ವಾ ಸಮ್ಪಮೂಳ್ಹಾ’’ತಿ.

೧೨೩೪. ‘‘ಮಗಧೇಸು ಅಙ್ಗೇಸು ಚ ಸತ್ಥವಾಹಾ, ಆರೋಪಯಿತ್ವಾ ಪಣಿಯಂ ಪುಥುತ್ತಂ;

ತೇ ಯಾಮಸೇ ಸಿನ್ಧುಸೋವೀರಭೂಮಿಂ, ಧನತ್ಥಿಕಾ ಉದ್ದಯಂ ಪತ್ಥಯಾನಾ.

೧೨೩೫. ‘‘ದಿವಾ ಪಿಪಾಸಂ ನಧಿವಾಸಯನ್ತಾ, ಯೋಗ್ಗಾನುಕಮ್ಪಞ್ಚ ಸಮೇಕ್ಖಮಾನಾ,

ಏತೇನ ವೇಗೇನ ಆಯಾಮ ಸಬ್ಬೇ [ಸಬ್ಬೇ ತೇ (ಕ.)], ರತ್ತಿಂ ಮಗ್ಗಂ ಪಟಿಪನ್ನಾ ವಿಕಾಲೇ.

೧೨೩೬. ‘‘ತೇ ದುಪ್ಪಯಾತಾ ಅಪರದ್ಧಮಗ್ಗಾ, ಅನ್ಧಾಕುಲಾ ವಿಪ್ಪನಟ್ಠಾ ಅರಞ್ಞೇ;

ಸುದುಗ್ಗಮೇ ವಣ್ಣುಪಥಸ್ಸ ಮಜ್ಝೇ, ದಿಸಂ ನ ಜಾನಾಮ ಪಮೂಳ್ಹಚಿತ್ತಾ.

೧೨೩೭. ‘‘ಇದಞ್ಚ ದಿಸ್ವಾನ ಅದಿಟ್ಠಪುಬ್ಬಂ, ವಿಮಾನಸೇಟ್ಠಞ್ಚ ತವಞ್ಚ ಯಕ್ಖ;

ತತುತ್ತರಿಂ ಜೀವಿತಮಾಸಮಾನಾ, ದಿಸ್ವಾ ಪತೀತಾ ಸುಮನಾ ಉದಗ್ಗಾ’’ತಿ.

೧೨೩೮. ‘‘ಪಾರಂ ಸಮುದ್ದಸ್ಸ ಇಮಞ್ಚ ವಣ್ಣುಂ [ವನಂ (ಸ್ಯಾ.), ವಣ್ಣಂ (ಕ.)], ವೇತ್ತಾಚರಂ [ವೇತ್ತಂ ಪರಂ (ಸ್ಯಾ.), ವೇತ್ತಾಚಾರಂ (ಕ.)] ಸಙ್ಕುಪಥಞ್ಚ ಮಗ್ಗಂ;

ನದಿಯೋ ಪನ ಪಬ್ಬತಾನಞ್ಚ ದುಗ್ಗಾ, ಪುಥುದ್ದಿಸಾ ಗಚ್ಛಥ ಭೋಗಹೇತು.

೧೨೩೯. ‘‘ಪಕ್ಖನ್ದಿಯಾನ ವಿಜಿತಂ ಪರೇಸಂ, ವೇರಜ್ಜಕೇ ಮಾನುಸೇ ಪೇಕ್ಖಮಾನಾ;

ಯಂ ವೋ ಸುತಂ ವಾ ಅಥ ವಾಪಿ ದಿಟ್ಠಂ, ಅಚ್ಛೇರಕಂ ತಂ ವೋ ಸುಣೋಮ ತಾತಾ’’ತಿ.

೧೨೪೦. ‘‘ಇತೋಪಿ ಅಚ್ಛೇರತರಂ ಕುಮಾರ, ನ ತೋ ಸುತಂ ವಾ ಅಥ ವಾಪಿ ದಿಟ್ಠಂ;

ಅತೀತಮಾನುಸ್ಸಕಮೇವ ಸಬ್ಬಂ, ದಿಸ್ವಾನ ತಪ್ಪಾಮ ಅನೋಮವಣ್ಣಂ.

೧೨೪೧. ‘‘ವೇಹಾಯಸಂ ಪೋಕ್ಖರಞ್ಞೋ ಸವನ್ತಿ, ಪಹೂತಮಲ್ಯಾ [ಪಹೂತಮಾಲ್ಯಾ (ಸ್ಯಾ.)] ಬಹುಪುಣ್ಡರೀಕಾ;

ದುಮಾ ಚಿಮೇ [ದುಮಾ ಚ ತೇ (ಸ್ಯಾ. ಕ.)] ನಿಚ್ಚಫಲೂಪಪನ್ನಾ, ಅತೀವ ಗನ್ಧಾ ಸುರಭಿಂ ಪವಾಯನ್ತಿ.

೧೨೪೨. ‘‘ವೇಳೂರಿಯಥಮ್ಭಾ ಸತಮುಸ್ಸಿತಾಸೇ, ಸಿಲಾಪವಾಳಸ್ಸ ಚ ಆಯತಂಸಾ;

ಮಸಾರಗಲ್ಲಾ ಸಹಲೋಹಿತಙ್ಗಾ, ಥಮ್ಭಾ ಇಮೇ ಜೋತಿರಸಾಮಯಾಸೇ.

೧೨೪೩. ‘‘ಸಹಸ್ಸಥಮ್ಭಂ ಅತುಲಾನುಭಾವಂ, ತೇಸೂಪರಿ ಸಾಧುಮಿದಂ ವಿಮಾನಂ;

ರತನನ್ತರಂ ಕಞ್ಚನವೇದಿಮಿಸ್ಸಂ, ತಪನೀಯಪಟ್ಟೇಹಿ ಚ ಸಾಧುಛನ್ನಂ.

೧೨೪೪. ‘‘ಜಮ್ಬೋನದುತ್ತತ್ತಮಿದಂ ಸುಮಟ್ಠೋ, ಪಾಸಾದಸೋಪಾಣಫಲೂಪಪನ್ನೋ;

ದಳ್ಹೋ ಚ ವಗ್ಗು ಚ ಸುಸಙ್ಗತೋ ಚ [ವಗ್ಗು ಸುಮುಖೋ ಸುಸಙ್ಗತೋ (ಸೀ.)], ಅತೀವ ನಿಜ್ಝಾನಖಮೋ ಮನುಞ್ಞೋ.

೧೨೪೫. ‘‘ರತನನ್ತರಸ್ಮಿಂ ಬಹುಅನ್ನಪಾನಂ, ಪರಿವಾರಿತೋ ಅಚ್ಛರಾಸಙ್ಗಣೇನ;

ಮುರಜಆಲಮ್ಬರತೂರಿಯಘುಟ್ಠೋ, ಅಭಿವನ್ದಿತೋಸಿ ಥುತಿವನ್ದನಾಯ.

೧೨೪೬. ‘‘ಸೋ ಮೋದಸಿ ನಾರಿಗಣಪ್ಪಬೋಧನೋ, ವಿಮಾನಪಾಸಾದವರೇ ಮನೋರಮೇ;

ಅಚಿನ್ತಿಯೋ ಸಬ್ಬಗುಣೂಪಪನ್ನೋ, ರಾಜಾ ಯಥಾ ವೇಸ್ಸವಣೋ ನಳಿನ್ಯಾ [ನಳಿಞ್ಞಂ (ಕ.)].

೧೨೪೭. ‘‘ದೇವೋ ನು ಆಸಿ ಉದವಾಸಿ ಯಕ್ಖೋ, ಉದಾಹು ದೇವಿನ್ದೋ ಮನುಸ್ಸಭೂತೋ;

ಪುಚ್ಛನ್ತಿ ತಂ ವಾಣಿಜಾ ಸತ್ಥವಾಹಾ, ಆಚಿಕ್ಖ ಕೋ ನಾಮ ತುವಂಸಿ ಯಕ್ಖೋ’’ತಿ.

೧೨೪೮. ‘‘ಸೇರೀಸಕೋ [ಸೇರಿಸ್ಸಕೋ (ಸೀ. ಸ್ಯಾ.)] ನಾಮ ಅಹಮ್ಹಿ ಯಕ್ಖೋ, ಕನ್ತಾರಿಯೋ ವಣ್ಣುಪಥಮ್ಹಿ ಗುತ್ತೋ;

ಇಮಂ ಪದೇಸಂ ಅಭಿಪಾಲಯಾಮಿ, ವಚನಕರೋ ವೇಸ್ಸವಣಸ್ಸ ರಞ್ಞೋ’’ತಿ.

೧೨೪೯. ‘‘ಅಧಿಚ್ಚಲದ್ಧಂ ಪರಿಣಾಮಜಂ ತೇ, ಸಯಂ ಕತಂ ಉದಾಹು ದೇವೇಹಿ ದಿನ್ನಂ;

ಪುಚ್ಛನ್ತಿ ತಂ ವಾಣಿಜಾ ಸತ್ಥವಾಹಾ, ಕಥಂ ತಯಾ ಲದ್ಧಮಿದಂ ಮನುಞ್ಞ’’ನ್ತಿ.

೧೨೫೦. ‘‘ನಾಧಿಚ್ಚಲದ್ಧಂ ನ ಪರಿಣಾಮಜಂ ಮೇ, ನ ಸಯಂ ಕತಂ ನ ಹಿ ದೇವೇಹಿ ದಿನ್ನಂ;

ಸಕೇಹಿ ಕಮ್ಮೇಹಿ ಅಪಾಪಕೇಹಿ, ಪುಞ್ಞೇಹಿ ಮೇ ಲದ್ಧಮಿದಂ ಮನುಞ್ಞ’’ನ್ತಿ.

೧೨೫೧. ‘‘ಕಿಂ ತೇ ವತಂ ಕಿಂ ಪನ ಬ್ರಹ್ಮಚರಿಯಂ, ಕಿಸ್ಸ ಸುಚಿಣ್ಣಸ್ಸ ಅಯಂ ವಿಪಾಕೋ;

ಪುಚ್ಛನ್ತಿ ತಂ ವಾಣಿಜಾ ಸತ್ಥವಾಹಾ, ಕಥಂ ತಯಾ ಲದ್ಧಮಿದಂ ವಿಮಾನ’’ನ್ತಿ.

೧೨೫೨. ‘‘ಮಮಂ ಪಾಯಾಸೀತಿ ಅಹು ಸಮಞ್ಞಾ, ರಜ್ಜಂ ಯದಾ ಕಾರಯಿಂ ಕೋಸಲಾನಂ;

ನತ್ಥಿಕದಿಟ್ಠಿ ಕದರಿಯೋ ಪಾಪಧಮ್ಮೋ, ಉಚ್ಛೇದವಾದೀ ಚ ತದಾ ಅಹೋಸಿಂ.

೧೨೫೩. ‘‘ಸಮಣೋ ಚ ಖೋ ಆಸಿ ಕುಮಾರಕಸ್ಸಪೋ, ಬಹುಸ್ಸುತೋ ಚಿತ್ತಕಥೀ ಉಳಾರೋ;

ಸೋ ಮೇ ತದಾ ಧಮ್ಮಕಥಂ ಅಭಾಸಿ [ಅಕಾಸಿ (ಸೀ.)], ದಿಟ್ಠಿವಿಸೂಕಾನಿ ವಿನೋದಯೀ ಮೇ.

೧೨೫೪. ‘‘ತಾಹಂ ತಸ್ಸ [ತಾಹಂ (ಕ.)] ಧಮ್ಮಕಥಂ ಸುಣಿತ್ವಾ, ಉಪಾಸಕತ್ತಂ ಪಟಿವೇದಯಿಸ್ಸಂ;

ಪಾಣಾತಿಪಾತಾ ವಿರತೋ ಅಹೋಸಿಂ, ಲೋಕೇ ಅದಿನ್ನಂ ಪರಿವಜ್ಜಯಿಸ್ಸಂ;

ಅಮಜ್ಜಪೋ ನೋ ಚ ಮುಸಾ ಅಭಾಣಿಂ, ಸಕೇನ ದಾರೇನ ಚ ಅಹೋಸಿ ತುಟ್ಠೋ.

೧೨೫೫. ‘‘ತಂ ಮೇ ವತಂ ತಂ ಪನ ಬ್ರಹ್ಮಚರಿಯಂ, ತಸ್ಸ ಸುಚಿಣ್ಣಸ್ಸ ಅಯಂ ವಿಪಾಕೋ;

ತೇಹೇವ ಕಮ್ಮೇಹಿ ಅಪಾಪಕೇಹಿ, ಪುಞ್ಞೇಹಿ ಮೇ ಲದ್ಧಮಿದಂ ವಿಮಾನ’’ನ್ತಿ.

೧೨೫೬. ‘‘ಸಚ್ಚಂ ಕಿರಾಹಂಸು ನರಾ ಸಪಞ್ಞಾ, ಅನಞ್ಞಥಾ ವಚನಂ ಪಣ್ಡಿತಾನಂ;

ಯಹಿಂ ಯಹಿಂ ಗಚ್ಛತಿ ಪುಞ್ಞಕಮ್ಮೋ, ತಹಿಂ ತಹಿಂ ಮೋದತಿ ಕಾಮಕಾಮೀ.

೧೨೫೭. ‘‘ಯಹಿಂ ಯಹಿಂ ಸೋಕಪರಿದ್ದವೋ ಚ, ವಧೋ ಚ ಬನ್ಧೋ ಚ ಪರಿಕ್ಕಿಲೇಸೋ;

ತಹಿಂ ತಹಿಂ ಗಚ್ಛತಿ ಪಾಪಕಮ್ಮೋ, ನ ಮುಚ್ಚತಿ ದುಗ್ಗತಿಯಾ ಕದಾಚೀ’’ತಿ.

೧೨೫೮. ‘‘ಸಮ್ಮೂಳ್ಹರೂಪೋವ ಜನೋ ಅಹೋಸಿ, ಅಸ್ಮಿಂ ಮುಹುತ್ತೇ ಕಲಲೀಕತೋವ;

ಜನಸ್ಸಿಮಸ್ಸ ತುಯ್ಹಞ್ಚ ಕುಮಾರ, ಅಪ್ಪಚ್ಚಯೋ ಕೇನ ನು ಖೋ ಅಹೋಸೀ’’ತಿ.

೧೨೫೯. ‘‘ಇಮೇ ಚ ಸಿರೀಸವನಾ [ಇಮೇ ಸಿರೀಸೂಪವನಾ ಚ (ಸೀ.), ಇಮೇಪಿ ಸಿರೀಸವನಾ ಚ (ಪೀ. ಕ.)] ತಾತಾ, ದಿಬ್ಬಾ [ದಿಬ್ಬಾ ಚ (ಪೀ. ಕ.)] ಗನ್ಧಾ ಸುರಭೀ [ಸುರಭಿಂ (ಸೀ. ಕ.)] ಸಮ್ಪವನ್ತಿ [ಸಮ್ಪವಾಯನ್ತಿ (ಕ.)];

ತೇ ಸಮ್ಪವಾಯನ್ತಿ ಇಮಂ ವಿಮಾನಂ, ದಿವಾ ಚ ರತ್ತೋ ಚ ತಮಂ ನಿಹನ್ತ್ವಾ.

೧೨೬೦. ‘‘ಇಮೇಸಞ್ಚ ಖೋ ವಸ್ಸಸತಚ್ಚಯೇನ, ಸಿಪಾಟಿಕಾ ಫಲತಿ ಏಕಮೇಕಾ;

ಮಾನುಸ್ಸಕಂ ವಸ್ಸಸತಂ ಅತೀತಂ, ಯದಗ್ಗೇ ಕಾಯಮ್ಹಿ ಇಧೂಪಪನ್ನೋ.

೧೨೬೧. ‘‘ದಿಸ್ವಾನಹಂ ವಸ್ಸಸತಾನಿ ಪಞ್ಚ, ಅಸ್ಮಿಂ ವಿಮಾನೇ ಠತ್ವಾನ ತಾತಾ;

ಆಯುಕ್ಖಯಾ ಪುಞ್ಞಕ್ಖಯಾ ಚವಿಸ್ಸಂ, ತೇನೇವ ಸೋಕೇನ ಪಮುಚ್ಛಿತೋಸ್ಮೀ’’ತಿ [ಸಮುಚ್ಛಿತೋಸ್ಮೀತಿ (ಪೀ. ಕ.)].

೧೨೬೨. ‘‘ಕಥಂ ನು ಸೋಚೇಯ್ಯ ತಥಾವಿಧೋ ಸೋ, ಲದ್ಧಾ ವಿಮಾನಂ ಅತುಲಂ ಚಿರಾಯ;

ಯೇ ಚಾಪಿ ಖೋ ಇತ್ತರಮುಪಪನ್ನಾ, ತೇ ನೂನ ಸೋಚೇಯ್ಯುಂ ಪರಿತ್ತಪುಞ್ಞಾ’’ತಿ.

೧೨೬೩. ‘‘ಅನುಚ್ಛವಿಂ ಓವದಿಯಞ್ಚ ಮೇ ತಂ, ಯಂ ಮಂ ತುಮ್ಹೇ ಪೇಯ್ಯವಾಚಂ ವದೇಥ;

ತುಮ್ಹೇ ಚ ಖೋ ತಾತಾ ಮಯಾನುಗುತ್ತಾ, ಯೇನಿಚ್ಛಕಂ ತೇನ ಪಲೇಥ ಸೋತ್ಥಿ’’ನ್ತಿ.

೧೨೬೪. ‘‘ಗನ್ತ್ವಾ ಮಯಂ ಸಿನ್ಧುಸೋವೀರಭೂಮಿಂ, ಧನತ್ಥಿಕಾ ಉದ್ದಯಂ ಪತ್ಥಯಾನಾ;

ಯಥಾಪಯೋಗಾ ಪರಿಪುಣ್ಣಚಾಗಾ, ಕಾಹಾಮ ಸೇರೀಸಮಹಂ ಉಳಾರ’’ನ್ತಿ.

೧೨೬೫. ‘‘ಮಾ ಚೇವ ಸೇರೀಸಮಹಂ ಅಕತ್ಥ, ಸಬ್ಬಞ್ಚ ವೋ ಭವಿಸ್ಸತಿ ಯಂ ವದೇಥ;

ಪಾಪಾನಿ ಕಮ್ಮಾನಿ ವಿವಜ್ಜಯಾಥ, ಧಮ್ಮಾನುಯೋಗಞ್ಚ ಅಧಿಟ್ಠಹಾಥ.

೧೨೬೬. ‘‘ಉಪಾಸಕೋ ಅತ್ಥಿ ಇಮಮ್ಹಿ ಸಙ್ಘೇ, ಬಹುಸ್ಸುತೋ ಸೀಲವತೂಪಪನ್ನೋ;

ಸದ್ಧೋ ಚ ಚಾಗೀ ಚ ಸುಪೇಸಲೋ ಚ, ವಿಚಕ್ಖಣೋ ಸನ್ತುಸಿತೋ ಮುತೀಮಾ.

೧೨೬೭. ‘‘ಸಞ್ಜಾನಮಾನೋ ನ ಮುಸಾ ಭಣೇಯ್ಯ, ಪರೂಪಘಾತಾಯ ನ ಚೇತಯೇಯ್ಯ;

ವೇಭೂತಿಕಂ ಪೇಸುಣಂ ನೋ ಕರೇಯ್ಯ, ಸಣ್ಹಞ್ಚ ವಾಚಂ ಸಖಿಲಂ ಭಣೇಯ್ಯ.

೧೨೬೮. ‘‘ಸಗಾರವೋ ಸಪ್ಪಟಿಸ್ಸೋ ವಿನೀತೋ, ಅಪಾಪಕೋ ಅಧಿಸೀಲೇ ವಿಸುದ್ಧೋ;

ಸೋ ಮಾತರಂ ಪಿತರಞ್ಚಾಪಿ ಜನ್ತು, ಧಮ್ಮೇನ ಪೋಸೇತಿ ಅರಿಯವುತ್ತಿ.

೧೨೬೯. ‘‘ಮಞ್ಞೇ ಸೋ ಮಾತಾಪಿತೂನಂ ಕಾರಣಾ, ಭೋಗಾನಿ ಪರಿಯೇಸತಿ ನ ಅತ್ತಹೇತು;

ಮಾತಾಪಿತೂನಞ್ಚ ಯೋ [ಸೋ (?)] ಅಚ್ಚಯೇನ, ನೇಕ್ಖಮ್ಮಪೋಣೋ ಚರಿಸ್ಸತಿ ಬ್ರಹ್ಮಚರಿಯಂ.

೧೨೭೦. ‘‘ಉಜೂ ಅವಙ್ಕೋ ಅಸಠೋ ಅಮಾಯೋ, ನ ಲೇಸಕಪ್ಪೇನ ಚ ವೋಹರೇಯ್ಯ;

ಸೋ ತಾದಿಸೋ ಸುಕತಕಮ್ಮಕಾರೀ, ಧಮ್ಮೇ ಠಿತೋ ಕಿನ್ತಿ ಲಭೇಥ ದುಕ್ಖಂ.

೧೨೭೧. ‘‘ತಂ ಕಾರಣಾ ಪಾತುಕತೋಮ್ಹಿ ಅತ್ತನಾ, ತಸ್ಮಾ ಧಮ್ಮಂ ಪಸ್ಸಥ ವಾಣಿಜಾಸೇ;

ಅಞ್ಞತ್ರ ತೇನಿಹ ಭಸ್ಮೀ [ಭಸ್ಮಿ (ಸ್ಯಾ.), ಭಸ್ಮ (ಕ.)] ಭವೇಥ, ಅನ್ಧಾಕುಲಾ ವಿಪ್ಪನಟ್ಠಾ ಅರಞ್ಞೇ;

ತಂ ಖಿಪ್ಪಮಾನೇನ ಲಹುಂ ಪರೇನ, ಸುಖೋ ಹವೇ ಸಪ್ಪುರಿಸೇನ ಸಙ್ಗಮೋ’’ತಿ.

೧೨೭೨. ‘‘ಕಿಂ ನಾಮ ಸೋ ಕಿಞ್ಚ ಕರೋತಿ ಕಮ್ಮಂ,

ಕಿಂ ನಾಮಧೇಯ್ಯಂ ಕಿಂ ಪನ ತಸ್ಸ ಗೋತ್ತಂ;

ಮಯಮ್ಪಿ ನಂ ದಟ್ಠುಕಾಮಮ್ಹ ಯಕ್ಖ, ಯಸ್ಸಾನುಕಮ್ಪಾಯ ಇಧಾಗತೋಸಿ;

ಲಾಭಾ ಹಿ ತಸ್ಸ, ಯಸ್ಸ ತುವಂ ಪಿಹೇಸೀ’’ತಿ.

೧೨೭೩. ‘‘ಯೋ ಕಪ್ಪಕೋ ಸಮ್ಭವನಾಮಧೇಯ್ಯೋ,

ಉಪಾಸಕೋ ಕೋಚ್ಛಫಲೂಪಜೀವೀ;

ಜಾನಾಥ ನಂ ತುಮ್ಹಾಕಂ ಪೇಸಿಯೋ ಸೋ,

ಮಾ ಖೋ ನಂ ಹೀಳಿತ್ಥ ಸುಪೇಸಲೋ ಸೋ’’ತಿ.

೧೨೭೪. ‘‘ಜಾನಾಮಸೇ ಯಂ ತ್ವಂ ಪವದೇಸಿ [ವದೇಸಿ (ಸೀ.)] ಯಕ್ಖ,

ನ ಖೋ ನಂ ಜಾನಾಮ ಸ ಏದಿಸೋತಿ;

ಮಯಮ್ಪಿ ನಂ ಪೂಜಯಿಸ್ಸಾಮ ಯಕ್ಖ,

ಸುತ್ವಾನ ತುಯ್ಹಂ ವಚನಂ ಉಳಾರ’’ನ್ತಿ.

೧೨೭೫. ‘‘ಯೇ ಕೇಚಿ ಇಮಸ್ಮಿಂ ಸತ್ಥೇ ಮನುಸ್ಸಾ,

ದಹರಾ ಮಹನ್ತಾ ಅಥವಾಪಿ ಮಜ್ಝಿಮಾ;

ಸಬ್ಬೇವ ತೇ ಆಲಮ್ಬನ್ತು ವಿಮಾನಂ,

ಪಸ್ಸನ್ತು ಪುಞ್ಞಾನಂ ಫಲಂ ಕದರಿಯಾ’’ತಿ.

೧೨೭೬. ತೇ ತತ್ಥ ಸಬ್ಬೇವ ‘ಅಹಂ ಪುರೇ’ತಿ,

ತಂ ಕಪ್ಪಕಂ ತತ್ಥ ಪುರಕ್ಖತ್ವಾ [ಪುರಕ್ಖಿಪಿತ್ವಾ (ಸೀ.)];

ಸಬ್ಬೇವ ತೇ ಆಲಮ್ಬಿಂಸು ವಿಮಾನಂ,

ಮಸಕ್ಕಸಾರಂ ವಿಯ ವಾಸವಸ್ಸ.

೧೨೭೭. ತೇ ತತ್ಥ ಸಬ್ಬೇವ ‘ಅಹಂ ಪುರೇ’ತಿ, ಉಪಾಸಕತ್ತಂ ಪಟಿವೇದಯಿಂಸು;

ಪಾಣಾತಿಪಾತಾ ವಿರತಾ ಅಹೇಸುಂ, ಲೋಕೇ ಅದಿನ್ನಂ ಪರಿವಜ್ಜಯಿಂಸು;

ಅಮಜ್ಜಪಾ ನೋ ಚ ಮುಸಾ ಭಣಿಂಸು, ಸಕೇನ ದಾರೇನ ಚ ಅಹೇಸುಂ ತುಟ್ಠಾ.

೧೨೭೮. ತೇ ತತ್ಥ ಸಬ್ಬೇವ ‘ಅಹಂ ಪುರೇ’ತಿ, ಉಪಾಸಕತ್ತಂ ಪಟಿವೇದಯಿತ್ವಾ;

ಪಕ್ಕಾಮಿ ಸತ್ಥೋ ಅನುಮೋದಮಾನೋ, ಯಕ್ಖಿದ್ಧಿಯಾ ಅನುಮತೋ ಪುನಪ್ಪುನಂ.

೧೨೭೯. ‘‘ಗನ್ತ್ವಾನ ತೇ ಸಿನ್ಧುಸೋವೀರಭೂಮಿಂ, ಧನತ್ಥಿಕಾ ಉದ್ದಯಂ [ಉದಯ (ಪೀ. ಕ.)] ಪತ್ಥಯಾನಾ;

ಯಥಾಪಯೋಗಾ ಪರಿಪುಣ್ಣಲಾಭಾ, ಪಚ್ಚಾಗಮುಂ ಪಾಟಲಿಪುತ್ತಮಕ್ಖತಂ.

೧೨೮೦. ‘‘ಗನ್ತ್ವಾನ ತೇ ಸಙ್ಘರಂ ಸೋತ್ಥಿವನ್ತೋ,

ಪುತ್ತೇಹಿ ದಾರೇಹಿ ಸಮಙ್ಗಿಭೂತಾ;

ಆನನ್ದೀ ವಿತ್ತಾ [ಆನನ್ದಚಿತ್ತಾ (ಸ್ಯಾ.), ಆನನ್ದೀಚಿತ್ತಾ (ಕ.)] ಸುಮನಾ ಪತೀತಾ,

ಅಕಂಸು ಸೇರೀಸಮಹಂ ಉಳಾರಂ;

ಸೇರೀಸಕಂ ತೇ ಪರಿವೇಣಂ ಮಾಪಯಿಂಸು.

೧೨೮೧. ಏತಾದಿಸಾ ಸಪ್ಪುರಿಸಾನ ಸೇವನಾ,

ಮಹತ್ಥಿಕಾ ಧಮ್ಮಗುಣಾನ ಸೇವನಾ;

ಏಕಸ್ಸ ಅತ್ಥಾಯ ಉಪಾಸಕಸ್ಸ,

ಸಬ್ಬೇವ ಸತ್ತಾ ಸುಖಿತಾ [ಸುಖಿನೋ (ಪೀ. ಕ.)] ಅಹೇಸುನ್ತಿ.

ಸೇರೀಸಕವಿಮಾನಂ ದಸಮಂ.