೧೧. ಸುನಿಕ್ಖಿತ್ತವಿಮಾನವತ್ಥು

೧೨೮೨. ‘‘ಉಚ್ಚಮಿದಂ ಮಣಿಥೂಣಂ ವಿಮಾನಂ, ಸಮನ್ತತೋ ದ್ವಾದಸ ಯೋಜನಾನಿ;

ಕೂಟಾಗಾರಾ ಸತ್ತಸತಾ ಉಳಾರಾ, ವೇಳುರಿಯಥಮ್ಭಾ ರುಚಕತ್ಥತಾ ಸುಭಾ.

೧೨೮೩. ‘‘ತತ್ಥಚ್ಛಸಿ ಪಿವಸಿ ಖಾದಸಿ ಚ, ದಿಬ್ಬಾ ಚ ವೀಣಾ ಪವದನ್ತಿ ವಗ್ಗುಂ;

ದಿಬ್ಬಾ ರಸಾ ಕಾಮಗುಣೇತ್ಥ ಪಞ್ಚ, ನಾರಿಯೋ ಚ ನಚ್ಚನ್ತಿ ಸುವಣ್ಣಛನ್ನಾ.

೧೨೮೪. ‘‘ಕೇನ ತೇತಾದಿಸೋ ವಣ್ಣೋ, ಕೇನ ತೇ ಇಧ ಮಿಜ್ಝತಿ;

ಉಪ್ಪಜ್ಜನ್ತಿ ಚ ತೇ ಭೋಗಾ, ಯೇ ಕೇಚಿ ಮನಸೋ ಪಿಯಾ.

೧೨೮೫. ‘‘ಪುಚ್ಛಾಮಿ ‘ತಂ ದೇವ ಮಹಾನುಭಾವ, ಮನುಸ್ಸಭೂತೋ ಕಿಮಕಾಸಿ ಪುಞ್ಞಂ;

ಕೇನಾಸಿ ಏವಂ ಜಲಿತಾನುಭಾವೋ, ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ.

೧೨೮೬. ಸೋ ದೇವಪುತ್ತೋ ಅತ್ತಮನೋ, ಮೋಗ್ಗಲ್ಲಾನೇನ ಪುಚ್ಛಿತೋ;

ಪಞ್ಹಂ ಪುಟ್ಠೋ ವಿಯಾಕಾಸಿ, ಯಸ್ಸ ಕಮ್ಮಸ್ಸಿದಂ ಫಲಂ.

೧೨೮೭. ‘‘ದುನ್ನಿಕ್ಖಿತ್ತಂ ಮಾಲಂ ಸುನಿಕ್ಖಿಪಿತ್ವಾ, ಪತಿಟ್ಠಪೇತ್ವಾ ಸುಗತಸ್ಸ ಥೂಪೇ;

ಮಹಿದ್ಧಿಕೋ ಚಮ್ಹಿ ಮಹಾನುಭಾವೋ, ದಿಬ್ಬೇಹಿ ಕಾಮೇಹಿ ಸಮಙ್ಗಿಭೂತೋ.

೧೨೮೮. ‘‘ತೇನ ಮೇತಾದಿಸೋ ವಣ್ಣೋ,

ತೇನ ಮೇ ಇಧ ಮಿಜ್ಝತಿ;

ಉಪ್ಪಜ್ಜನ್ತಿ ಚ ಮೇ ಭೋಗಾ,

ಯೇ ಕೇಚಿ ಮನಸೋ ಪಿಯಾ.

೧೨೮೯. ‘‘ಅಕ್ಖಾಮಿ ತೇ ಭಿಕ್ಖು ಮಹಾನುಭಾವ,

ಮನುಸ್ಸಭೂತೋ ಯಮಹಂ ಅಕಾಸಿಂ;

ತೇನಮ್ಹಿ ಏವಂ ಜಲಿತಾನುಭಾವೋ,

ವಣ್ಣೋ ಚ ಮೇ ಸಬ್ಬದಿಸಾ ಪಭಾಸತೀ’’ತಿ.

ಸುನಿಕ್ಖಿತ್ತವಿಮಾನಂ ಏಕಾದಸಮಂ.

ಸುನಿಕ್ಖಿತ್ತವಗ್ಗೋ ಸತ್ತಮೋ ನಿಟ್ಠಿತೋ.

ತಸ್ಸುದ್ದಾನಂ –

ದ್ವೇ ದಲಿದ್ದಾ ವನವಿಹಾರಾ, ಭತಕೋ ಗೋಪಾಲಕಣ್ಡಕಾ;

ಅನೇಕವಣ್ಣಮಟ್ಠಕುಣ್ಡಲೀ, ಸೇರೀಸಕೋ ಸುನಿಕ್ಖಿತ್ತಂ;

ಪುರಿಸಾನಂ ತತಿಯೋ ವಗ್ಗೋ ಪವುಚ್ಚತೀತಿ.

ಭಾಣವಾರಂ ಚತುತ್ಥಂ ನಿಟ್ಠಿತಂ.