೮. ಅಮ್ಬವಿಮಾನವತ್ಥು

೭೮೩. ‘‘ದಿಬ್ಬಂ ತೇ ಅಮ್ಬವನಂ ರಮ್ಮಂ, ಪಾಸಾದೇತ್ಥ ಮಹಲ್ಲಕೋ;

ನಾನಾತುರಿಯಸಙ್ಘುಟ್ಠೋ, ಅಚ್ಛರಾಗಣಘೋಸಿತೋ.

೭೮೪. ‘‘ಪದೀಪೋ ಚೇತ್ಥ ಜಲತಿ, ನಿಚ್ಚಂ ಸೋವಣ್ಣಯೋ ಮಹಾ;

ದುಸ್ಸಫಲೇಹಿ ರುಕ್ಖೇಹಿ, ಸಮನ್ತಾ ಪರಿವಾರಿತೋ.

೭೮೫. ‘‘ಕೇನ ತೇತಾದಿಸೋ ವಣ್ಣೋ…ಪೇ…ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ;

೭೮೭. ಸಾ ದೇವತಾ ಅತ್ತಮನಾ…ಪೇ… ಯಸ್ಸ ಕಮ್ಮಸ್ಸಿದಂ ಫಲಂ.

೭೮೮. ‘‘ಅಹಂ ಮನುಸ್ಸೇಸು ಮನುಸ್ಸಭೂತಾ, ಪುರಿಮಾಯ ಜಾತಿಯಾ ಮನುಸ್ಸಲೋಕೇ;

ವಿಹಾರಂ ಸಙ್ಘಸ್ಸ ಕಾರೇಸಿಂ, ಅಮ್ಬೇಹಿ ಪರಿವಾರಿತಂ.

೭೮೯. ‘‘ಪರಿಯೋಸಿತೇ ವಿಹಾರೇ, ಕಾರೇನ್ತೇ ನಿಟ್ಠಿತೇ ಮಹೇ;

ಅಮ್ಬೇಹಿ ಛಾದಯಿತ್ವಾನ [ಅಮ್ಬೇ ಅಚ್ಛಾದಯಿತ್ವಾನ (ಸೀ. ಸ್ಯಾ.), ಅಮ್ಬೇಹಚ್ಛಾದಯಿತ್ವಾನ (ಪೀ. ಕ.)], ಕತ್ವಾ ದುಸ್ಸಮಯೇ ಫಲೇ.

೭೯೦. ‘‘ಪದೀಪಂ ತತ್ಥ ಜಾಲೇತ್ವಾ, ಭೋಜಯಿತ್ವಾ ಗಣುತ್ತಮಂ;

ನಿಯ್ಯಾದೇಸಿಂ ತಂ ಸಙ್ಘಸ್ಸ, ಪಸನ್ನಾ ಸೇಹಿ ಪಾಣಿಭಿ.

೭೯೧. ‘‘ತೇನ ಮೇ ಅಮ್ಬವನಂ ರಮ್ಮಂ, ಪಾಸಾದೇತ್ಥ ಮಹಲ್ಲಕೋ;

ನಾನಾತುರಿಯಸಙ್ಘುಟ್ಠೋ, ಅಚ್ಛರಾಗಣಘೋಸಿತೋ.

೭೯೨. ‘‘ಪದೀಪೋ ಚೇತ್ಥ ಜಲತಿ, ನಿಚ್ಚಂ ಸೋವಣ್ಣಯೋ ಮಹಾ;

ದುಸ್ಸಫಲೇಹಿ ರುಕ್ಖೇಹಿ, ಸಮನ್ತಾ ಪರಿವಾರಿತೋ.

೭೯೩. ‘‘ತೇನ ಮೇತಾದಿಸೋ ವಣ್ಣೋ…ಪೇ…ವಣ್ಣೋ ಚ ಮೇ ಸಬ್ಬದಿಸಾ ಪಭಾಸತೀ’’ತಿ.

ಅಮ್ಬವಿಮಾನಂ ಅಟ್ಠಮಂ.