೯. ಪೀತವಿಮಾನವತ್ಥು

೭೯೫. ‘‘ಪೀತವತ್ಥೇ ಪೀತಧಜೇ, ಪೀತಾಲಙ್ಕಾರಭೂಸಿತೇ;

ಪೀತಚನ್ದನಲಿತ್ತಙ್ಗೇ, ಪೀತಉಪ್ಪಲಮಾಲಿನೀ [ಪೀತುಪ್ಪಲಮಧಾರಿನೀ (ಸ್ಯಾ. ಕ.), ಪೀತುಪ್ಪಲಮಾಲಿನೀ (ಪೀ.)].

೭೯೬. ‘‘ಪೀತಪಾಸಾದಸಯನೇ, ಪೀತಾಸನೇ ಪೀತಭಾಜನೇ;

ಪೀತಛತ್ತೇ ಪೀತರಥೇ, ಪೀತಸ್ಸೇ ಪೀತಬೀಜನೇ.

೭೯೭. ‘‘ಕಿಂ ಕಮ್ಮಮಕರೀ ಭದ್ದೇ, ಪುಬ್ಬೇ ಮಾನುಸಕೇ ಭವೇ;

ದೇವತೇ ಪುಚ್ಛಿತಾಚಿಕ್ಖ, ಕಿಸ್ಸ ಕಮ್ಮಸ್ಸಿದಂ ಫಲ’’ನ್ತಿ.

೭೯೮. ‘‘ಕೋಸಾತಕೀ ನಾಮ ಲತತ್ಥಿ ಭನ್ತೇ, ತಿತ್ತಿಕಾ ಅನಭಿಚ್ಛಿತಾ;

ತಸ್ಸಾ ಚತ್ತಾರಿ ಪುಪ್ಫಾನಿ, ಥೂಪಂ ಅಭಿಹರಿಂ ಅಹಂ.

೭೯೯. ‘‘ಸತ್ಥು ಸರೀರಮುದ್ದಿಸ್ಸ, ವಿಪ್ಪಸನ್ನೇನ ಚೇತಸಾ;

ನಾಸ್ಸ ಮಗ್ಗಂ ಅವೇಕ್ಖಿಸ್ಸಂ, ನ ತಗ್ಗಮನಸಾ [ತದಗ್ಗಮನಸಾ (ಸೀ.), ತದಙ್ಗಮನಸಾ (ಸ್ಯಾ.)] ಸತೀ.

೮೦೦. ‘‘ತತೋ ಮಂ ಅವಧೀ ಗಾವೀ, ಥೂಪಂ ಅಪತ್ತಮಾನಸಂ;

ತಞ್ಚಾಹಂ ಅಭಿಸಞ್ಚೇಯ್ಯಂ, ಭಿಯ್ಯೋ [ಭೀಯೋ (ಸೀ. ಅಟ್ಠ.)] ನೂನ ಇತೋ ಸಿಯಾ.

೮೦೧. ‘‘ತೇನ ಕಮ್ಮೇನ ದೇವಿನ್ದ, ಮಘವಾ ದೇವಕುಞ್ಜರೋ;

ಪಹಾಯ ಮಾನುಸಂ ದೇಹಂ, ತವ ಸಹಬ್ಯ [ಸಹಬ್ಯತ (ಸೀ. ಸ್ಯಾ.)] ಮಾಗತಾ’’ತಿ.

೮೦೨. ಇದಂ ಸುತ್ವಾ ತಿದಸಾಧಿಪತಿ, ಮಘವಾ ದೇವಕುಞ್ಜರೋ;

ತಾವತಿಂಸೇ ಪಸಾದೇನ್ತೋ, ಮಾತಲಿಂ ಏತದಬ್ರವಿ [ಏತದಬ್ರೂವೀತಿ (ಸೀ.)].

೮೦೩. ‘‘ಪಸ್ಸ ಮಾತಲಿ ಅಚ್ಛೇರಂ, ಚಿತ್ತಂ ಕಮ್ಮಫಲಂ ಇದಂ;

ಅಪ್ಪಕಮ್ಪಿ ಕತಂ ದೇಯ್ಯಂ, ಪುಞ್ಞಂ ಹೋತಿ ಮಹಪ್ಫಲಂ.

೮೦೪. ‘‘ನತ್ಥಿ ಚಿತ್ತೇ ಪಸನ್ನಮ್ಹಿ, ಅಪ್ಪಕಾ ನಾಮ ದಕ್ಖಿಣಾ;

ತಥಾಗತೇ ವಾ ಸಮ್ಬುದ್ಧೇ, ಅಥ ವಾ ತಸ್ಸ ಸಾವಕೇ.

೮೦೫. ‘‘ಏಹಿ ಮಾತಲಿ ಅಮ್ಹೇಪಿ, ಭಿಯ್ಯೋ ಭಿಯ್ಯೋ ಮಹೇಮಸೇ;

ತಥಾಗತಸ್ಸ ಧಾತುಯೋ, ಸುಖೋ ಪುಞ್ಞಾನ ಮುಚ್ಚಯೋ.

೮೦೬. ‘‘ತಿಟ್ಠನ್ತೇ ನಿಬ್ಬುತೇ ಚಾಪಿ, ಸಮೇ ಚಿತ್ತೇ ಸಮಂ ಫಲಂ;

ಚೇತೋಪಣಿಧಿಹೇತು ಹಿ, ಸತ್ತಾ ಗಚ್ಛನ್ತಿ ಸುಗ್ಗತಿಂ.

೮೦೭. ‘‘ಬಹೂನಂ [ಬಹುನ್ನಂ (ಸೀ. ಸ್ಯಾ.)] ವತ ಅತ್ಥಾಯ, ಉಪ್ಪಜ್ಜನ್ತಿ ತಥಾಗತಾ;

ಯತ್ಥ ಕಾರಂ ಕರಿತ್ವಾನ, ಸಗ್ಗಂ ಗಚ್ಛನ್ತಿ ದಾಯಕಾ’’ತಿ.

ಪೀತವಿಮಾನಂ ನವಮಂ.