೧. ಮಞ್ಜಿಟ್ಠಕವಿಮಾನವತ್ಥು

೬೮೯. ‘‘ಮಞ್ಜಿಟ್ಠಕೇ [ಮಞ್ಜೇಟ್ಠಕೇ (ಸೀ.)] ವಿಮಾನಸ್ಮಿಂ, ಸೋಣ್ಣವಾಲುಕಸನ್ಥತೇ [ಸೋವಣ್ಣವಾಲುಕಸನ್ಥತೇ (ಸ್ಯಾ. ಪೀ.), ಸೋವಣ್ಣವಾಲಿಕಸನ್ಥತೇ (ಕ.)];

ಪಞ್ಚಙ್ಗಿಕೇ ತುರಿಯೇನ [ತುರಿಯೇನ (ಸೀ. ಸ್ಯಾ. ಪೀ.)], ರಮಸಿ ಸುಪ್ಪವಾದಿತೇ.

೬೯೦. ‘‘ತಮ್ಹಾ ವಿಮಾನಾ ಓರುಯ್ಹ, ನಿಮ್ಮಿತಾ ರತನಾಮಯಾ;

ಓಗಾಹಸಿ ಸಾಲವನಂ, ಪುಪ್ಫಿತಂ ಸಬ್ಬಕಾಲಿಕಂ.

೬೯೧. ‘‘ಯಸ್ಸ ಯಸ್ಸೇವ ಸಾಲಸ್ಸ, ಮೂಲೇ ತಿಟ್ಠಸಿ ದೇವತೇ;

ಸೋ ಸೋ ಮುಞ್ಚತಿ ಪುಪ್ಫಾನಿ, ಓನಮಿತ್ವಾ ದುಮುತ್ತಮೋ.

೬೯೨. ‘‘ವಾತೇರಿತಂ ಸಾಲವನಂ, ಆಧುತಂ [ಆಧೂತಂ (ಸೀ.)] ದಿಜಸೇವಿತಂ;

ವಾತಿ ಗನ್ಧೋ ದಿಸಾ ಸಬ್ಬಾ, ರುಕ್ಖೋ ಮಞ್ಜೂಸಕೋ ಯಥಾ.

೬೯೩. ‘‘ಘಾಯಸೇ ತಂ ಸುಚಿಗನ್ಧಂ, ರೂಪಂ ಪಸ್ಸಸಿ ಅಮಾನುಸಂ;

ದೇವತೇ ಪುಚ್ಛಿತಾಚಿಕ್ಖ, ಕಿಸ್ಸ ಕಮ್ಮಸ್ಸಿದಂ ಫಲ’’ನ್ತಿ.

೬೯೪. ‘‘ಅಹಂ ಮನುಸ್ಸೇಸು ಮನುಸ್ಸಭೂತಾ, ದಾಸೀ ಅಯಿರಕುಲೇ [ಅಯ್ಯಿರಕುಲೇ (ಸ್ಯಾ. ಕ.)] ಅಹುಂ;

ಬುದ್ಧಂ ನಿಸಿನ್ನಂ ದಿಸ್ವಾನ, ಸಾಲಪುಪ್ಫೇಹಿ ಓಕಿರಿಂ.

೬೯೫. ‘‘ವಟಂಸಕಞ್ಚ ಸುಕತಂ, ಸಾಲಪುಪ್ಫಮಯಂ ಅಹಂ;

ಬುದ್ಧಸ್ಸ ಉಪನಾಮೇಸಿಂ, ಪಸನ್ನಾ ಸೇಹಿ ಪಾಣಿಭಿ.

೬೯೬. ‘‘ತಾಹಂ ಕಮ್ಮಂ ಕರಿತ್ವಾನ, ಕುಸಲಂ ಬುದ್ಧವಣ್ಣಿತಂ;

ಅಪೇತಸೋಕಾ ಸುಖಿತಾ, ಸಮ್ಪಮೋದಾಮನಾಮಯಾ’’ತಿ.

ಮಞ್ಜಿಟ್ಠಕವಿಮಾನಂ ಪಠಮಂ.