೭. ಪೇಸವತೀವಿಮಾನವತ್ಥು

೬೪೬. ‘‘ಫಲಿಕರಜತಹೇಮಜಾಲಛನ್ನಂ, ವಿವಿಧಚಿತ್ರತಲಮದ್ದಸಂ ಸುರಮ್ಮಂ;

ಬ್ಯಮ್ಹಂ ಸುನಿಮ್ಮಿತಂ ತೋರಣೂಪಪನ್ನಂ, ರುಚಕುಪಕಿಣ್ಣಮಿದಂ ಸುಭಂ ವಿಮಾನಂ.

೬೪೭. ‘‘ಭಾತಿ ಚ ದಸ ದಿಸಾ ನಭೇವ ಸುರಿಯೋ, ಸರದೇ ತಮೋನುದೋ ಸಹಸ್ಸರಂಸೀ;

ತಥಾ ತಪತಿಮಿದಂ ತವ ವಿಮಾನಂ, ಜಲಮಿವ ಧೂಮಸಿಖೋ ನಿಸೇ ನಭಗ್ಗೇ.

೬೪೮. ‘‘ಮುಸತೀವ ನಯನಂ ಸತೇರತಾವ [ಸತೇರಿತಾವ (ಸ್ಯಾ. ಕ.)], ಆಕಾಸೇ ಠಪಿತಮಿದಂ ಮನುಞ್ಞಂ;

ವೀಣಾಮುರಜಸಮ್ಮತಾಳಘುಟ್ಠಂ, ಇದ್ಧಂ ಇನ್ದಪುರಂ ಯಥಾ ತವೇದಂ.

೬೪೯. ‘‘ಪದುಮಕುಮುದುಪ್ಪಲಕುವಲಯಂ, ಯೋಧಿಕ [ಯೂಧಿಕ (ಸೀ.)] ಬನ್ಧುಕನೋಜಕಾ [ಯೋಥಿಕಾ ಭಣ್ಡಿಕಾ ನೋಜಕಾ (ಸ್ಯಾ.)] ಚ ಸನ್ತಿ;

ಸಾಲಕುಸುಮಿತಪುಪ್ಫಿತಾ ಅಸೋಕಾ, ವಿವಿಧದುಮಗ್ಗಸುಗನ್ಧಸೇವಿತಮಿದಂ.

೬೫೦. ‘‘ಸಳಲಲಬುಜಭುಜಕ [ಸುಜಕ (ಸೀ. ಸ್ಯಾ.)] ಸಂಯುತ್ತಾ [ಸಞ್ಞತಾ (ಸೀ.)], ಕುಸಕಸುಫುಲ್ಲಿತಲತಾವಲಮ್ಬಿನೀಹಿ;

ಮಣಿಜಾಲಸದಿಸಾ ಯಸಸ್ಸಿನೀ, ರಮ್ಮಾ ಪೋಕ್ಖರಣೀ ಉಪಟ್ಠಿತಾ ತೇ.

೬೫೧. ‘‘ಉದಕರುಹಾ ಚ ಯೇತ್ಥಿ ಪುಪ್ಫಜಾತಾ, ಥಲಜಾ ಯೇ ಚ ಸನ್ತಿ ರುಕ್ಖಜಾತಾ;

ಮಾನುಸಕಾಮಾನುಸ್ಸಕಾ ಚ ದಿಬ್ಬಾ, ಸಬ್ಬೇ ತುಯ್ಹಂ ನಿವೇಸನಮ್ಹಿ ಜಾತಾ.

೬೫೨. ‘‘ಕಿಸ್ಸ ಸಂಯಮದಮಸ್ಸಯಂ ವಿಪಾಕೋ, ಕೇನಾಸಿ ಕಮ್ಮಫಲೇನಿಧೂಪಪನ್ನಾ;

ಯಥಾ ಚ ತೇ ಅಧಿಗತಮಿದಂ ವಿಮಾನಂ, ತದನುಪದಂ ಅವಚಾಸಿಳಾರಪಮ್ಹೇ’’ತಿ [ಪಖುಮೇತಿ (ಸೀ.)].

೬೫೩. ‘‘ಯಥಾ ಚ ಮೇ ಅಧಿಗತಮಿದಂ ವಿಮಾನಂ, ಕೋಞ್ಚಮಯೂರಚಕೋರ [ಚಙ್ಕೋರ (ಕ.)] ಸಙ್ಘಚರಿತಂ;

ದಿಬ್ಯ [ದಿಬ್ಬ (ಸೀ. ಪೀ.)] ಪಿಲವಹಂಸರಾಜಚಿಣ್ಣಂ, ದಿಜಕಾರಣ್ಡವಕೋಕಿಲಾಭಿನದಿತಂ.

೬೫೪. ‘‘ನಾನಾಸನ್ತಾನಕಪುಪ್ಫರುಕ್ಖವಿವಿಧಾ, ಪಾಟಲಿಜಮ್ಬುಅಸೋಕರುಕ್ಖವನ್ತಂ;

ಯಥಾ ಚ ಮೇ ಅಧಿಗತಮಿದಂ ವಿಮಾನಂ, ತಂ ತೇ ಪವೇದಯಾಮಿ [ಪವದಿಸ್ಸಾಮಿ (ಸೀ.), ಪವೇದಿಸ್ಸಾಮಿ (ಪೀ.)] ಸುಣೋಹಿ ಭನ್ತೇ.

೬೫೫. ‘‘ಮಗಧವರಪುರತ್ಥಿಮೇನ, ನಾಳಕಗಾಮೋ ನಾಮ ಅತ್ಥಿ ಭನ್ತೇ;

ತತ್ಥ ಅಹೋಸಿಂ ಪುರೇ ಸುಣಿಸಾ, ಪೇಸವತೀತಿ [ಸೇಸವತೀತಿ (ಸೀ. ಸ್ಯಾ.)] ತತ್ಥ ಜಾನಿಂಸು ಮಮಂ.

೬೫೬. ‘‘ಸಾಹಮಪಚಿತತ್ಥಧಮ್ಮಕುಸಲಂ, ದೇವಮನುಸ್ಸಪೂಜಿತಂ ಮಹನ್ತಂ;

ಉಪತಿಸ್ಸಂ ನಿಬ್ಬುತಮಪ್ಪಮೇಯ್ಯಂ, ಮುದಿತಮನಾ ಕುಸುಮೇಹಿ ಅಬ್ಭುಕಿರಿಂ [ಅಬ್ಭೋಕಿರಿಂ (ಸೀ. ಸ್ಯಾ. ಪೀ. ಕ.)].

೬೫೭. ‘‘ಪರಮಗತಿಗತಞ್ಚ ಪೂಜಯಿತ್ವಾ, ಅನ್ತಿಮದೇಹಧರಂ ಇಸಿಂ ಉಳಾರಂ;

ಪಹಾಯ ಮಾನುಸಕಂ ಸಮುಸ್ಸಯಂ, ತಿದಸಗತಾ ಇಧ ಮಾವಸಾಮಿ ಠಾನ’’ನ್ತಿ.

ಪೇಸವತೀವಿಮಾನಂ ಸತ್ತಮಂ.