೮. ಮಲ್ಲಿಕಾವಿಮಾನವತ್ಥು

೬೫೮. ‘‘ಪೀತವತ್ಥೇ ಪೀತಧಜೇ, ಪೀತಾಲಙ್ಕಾರಭೂಸಿತೇ;

ಪೀತನ್ತರಾಹಿ ವಗ್ಗೂಹಿ, ಅಪಿಳನ್ಧಾವ ಸೋಭಸಿ.

೬೫೯. ‘‘ಕಾ ಕಮ್ಬುಕಾಯೂರಧರೇ [ಕಕಮ್ಬುಕಾಯುರಧರೇ (ಸ್ಯಾ.)], ಕಞ್ಚನಾವೇಳಭೂಸಿತೇ;

ಹೇಮಜಾಲಕಸಞ್ಛನ್ನೇ [ಪಚ್ಛನ್ನೇ (ಸೀ.)], ನಾನಾರತನಮಾಲಿನೀ.

೬೬೦. ‘‘ಸೋವಣ್ಣಮಯಾ ಲೋಹಿತಙ್ಗಮಯಾ [ಲೋಹಿತಙ್ಕಮಯಾ (ಸೀ. ಸ್ಯಾ.)] ಚ, ಮುತ್ತಾಮಯಾ ವೇಳುರಿಯಮಯಾ ಚ;

ಮಸಾರಗಲ್ಲಾ ಸಹಲೋಹಿತಙ್ಗಾ [ಸಹಲೋಹಿತಙ್ಕಾ (ಸೀ.), ಸಹಲೋಹಿತಕಾ (ಸ್ಯಾ.)], ಪಾರೇವತಕ್ಖೀಹಿ ಮಣೀಹಿ ಚಿತ್ತತಾ.

೬೬೧. ‘‘ಕೋಚಿ ಕೋಚಿ ಏತ್ಥ ಮಯೂರಸುಸ್ಸರೋ, ಹಂಸಸ್ಸ ರಞ್ಞೋ ಕರವೀಕಸುಸ್ಸರೋ;

ತೇಸಂ ಸರೋ ಸುಯ್ಯತಿ ವಗ್ಗುರೂಪೋ, ಪಞ್ಚಙ್ಗಿಕಂ ತೂರಿಯಮಿವಪ್ಪವಾದಿತಂ.

೬೬೨. ‘‘ರಥೋ ಚ ತೇ ಸುಭೋ ವಗ್ಗು [ವಗ್ಗೂ (ಸ್ಯಾ.)], ನಾನಾರತನಚಿತ್ತಿತೋ [ನಾನಾರತನಚಿತ್ತಙ್ಗೋ (ಸ್ಯಾ.)];

ನಾನಾವಣ್ಣಾಹಿ ಧಾತೂಹಿ, ಸುವಿಭತ್ತೋವ ಸೋಭತಿ.

೬೬೩. ‘‘ತಸ್ಮಿಂ ರಥೇ ಕಞ್ಚನಬಿಮ್ಬವಣ್ಣೇ, ಯಾ ತ್ವಂ [ಯತ್ಥ (ಕ. ಸೀ. ಸ್ಯಾ. ಕ.)] ಠಿತಾ ಭಾಸಸಿ ಮಂ ಪದೇಸಂ;

ದೇವತೇ ಪುಚ್ಛಿತಾಚಿಕ್ಖ, ಕಿಸ್ಸ ಕಮ್ಮಸ್ಸಿದಂ ಫಲ’’ನ್ತಿ.

೬೬೪. ‘‘ಸೋವಣ್ಣಜಾಲಂ ಮಣಿಸೋಣ್ಣಚಿತ್ತಿತಂ [ವಿಚಿತ್ತಂ (ಕ.), ಚಿತ್ತಂ (ಸೀ. ಸ್ಯಾ.)], ಮುತ್ತಾಚಿತಂ ಹೇಮಜಾಲೇನ ಛನ್ನಂ [ಸಞ್ಛನ್ನಂ (ಕ.)];

ಪರಿನಿಬ್ಬುತೇ ಗೋತಮೇ ಅಪ್ಪಮೇಯ್ಯೇ, ಪಸನ್ನಚಿತ್ತಾ ಅಹಮಾಭಿರೋಪಯಿಂ.

೬೬೫. ‘‘ತಾಹಂ ಕಮ್ಮಂ ಕರಿತ್ವಾನ, ಕುಸಲಂ ಬುದ್ಧವಣ್ಣಿತಂ;

ಅಪೇತಸೋಕಾ ಸುಖಿತಾ, ಸಮ್ಪಮೋದಾಮನಾಮಯಾ’’ತಿ.

ಮಲ್ಲಿಕಾವಿಮಾನಂ ಅಟ್ಠಮಂ.