೯. ನವಕನಿಪಾತೋ

೧. ವಡ್ಢಮಾತುಥೇರೀಗಾಥಾ

೨೦೪. ‘‘ಮಾ ಸು ತೇ ವಡ್ಢ ಲೋಕಮ್ಹಿ, ವನಥೋ ಆಹು ಕುದಾಚನಂ;

ಮಾ ಪುತ್ತಕ ಪುನಪ್ಪುನಂ, ಅಹು ದುಕ್ಖಸ್ಸ ಭಾಗಿಮಾ.

೨೦೫. ‘‘ಸುಖಞ್ಹಿ ವಡ್ಢ ಮುನಯೋ, ಅನೇಜಾ ಛಿನ್ನಸಂಸಯಾ;

ಸೀತಿಭೂತಾ ದಮಪ್ಪತ್ತಾ, ವಿಹರನ್ತಿ ಅನಾಸವಾ.

೨೦೬. ‘‘ತೇಹಾನುಚಿಣ್ಣಂ ಇಸೀಭಿ, ಮಗ್ಗಂ ದಸ್ಸನಪತ್ತಿಯಾ;

ದುಕ್ಖಸ್ಸನ್ತಕಿರಿಯಾಯ, ತ್ವಂ ವಡ್ಢ ಅನುಬ್ರೂಹಯ’’.

೨೦೭. ‘‘ವಿಸಾರದಾವ ಭಣಸಿ, ಏತಮತ್ಥಂ ಜನೇತ್ತಿ ಮೇ;

ಮಞ್ಞಾಮಿ ನೂನ ಮಾಮಿಕೇ, ವನಥೋ ತೇ ನ ವಿಜ್ಜತಿ’’.

೨೦೮. ‘‘ಯೇ ಕೇಚಿ ವಡ್ಢ ಸಙ್ಖಾರಾ, ಹೀನಾ ಉಕ್ಕಟ್ಠಮಜ್ಝಿಮಾ;

ಅಣೂಪಿ ಅಣುಮತ್ತೋಪಿ, ವನಥೋ ಮೇ ನ ವಿಜ್ಜತಿ.

೨೦೯. ‘‘ಸಬ್ಬೇ ಮೇ ಆಸವಾ ಖೀಣಾ, ಅಪ್ಪಮತ್ತಸ್ಸ ಝಾಯತೋ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ’’.

೨೧೦. ‘‘ಉಳಾರಂ ವತ ಮೇ ಮಾತಾ, ಪತೋದಂ ಸಮವಸ್ಸರಿ;

ಪರಮತ್ಥಸಞ್ಹಿತಾ ಗಾಥಾ, ಯಥಾಪಿ ಅನುಕಮ್ಪಿಕಾ.

೨೧೧. ‘‘ತಸ್ಸಾಹಂ ವಚನಂ ಸುತ್ವಾ, ಅನುಸಿಟ್ಠಿಂ ಜನೇತ್ತಿಯಾ;

ಧಮ್ಮಸಂವೇಗಮಾಪಾದಿಂ, ಯೋಗಕ್ಖೇಮಸ್ಸ ಪತ್ತಿಯಾ.

೨೧೨. ‘‘ಸೋಹಂ ಪಧಾನಪಹಿತತ್ತೋ, ರತ್ತಿನ್ದಿವಮತನ್ದಿತೋ;

ಮಾತರಾ ಚೋದಿತೋ ಸನ್ತೋ, ಅಫುಸಿಂ ಸನ್ತಿಮುತ್ತಮಂ’’.

… ವಡ್ಢಮಾತಾ ಥೇರೀ….

ನವಕನಿಪಾತೋ ನಿಟ್ಠಿತೋ.