೧೦. ಏಕಾದಸನಿಪಾತೋ

೧. ಕಿಸಾಗೋತಮೀಥೇರೀಗಾಥಾ

೨೧೩. ‘‘ಕಲ್ಯಾಣಮಿತ್ತತಾ ಮುನಿನಾ, ಲೋಕಂ ಆದಿಸ್ಸ ವಣ್ಣಿತಾ;

ಕಲ್ಯಾಣಮಿತ್ತೇ ಭಜಮಾನೋ, ಅಪಿ ಬಾಲೋ ಪಣ್ಡಿತೋ ಅಸ್ಸ.

೨೧೪. ‘‘ಭಜಿತಬ್ಬಾ ಸಪ್ಪುರಿಸಾ, ಪಞ್ಞಾ ತಥಾ ವಡ್ಢತಿ ಭಜನ್ತಾನಂ;

ಭಜಮಾನೋ ಸಪ್ಪುರಿಸೇ, ಸಬ್ಬೇಹಿಪಿ ದುಕ್ಖೇಹಿ ಪಮುಚ್ಚೇಯ್ಯ.

೨೧೫. ‘‘ದುಕ್ಖಞ್ಚ ವಿಜಾನೇಯ್ಯ, ದುಕ್ಖಸ್ಸ ಚ ಸಮುದಯಂ ನಿರೋಧಂ;

ಅಟ್ಠಙ್ಗಿಕಞ್ಚ ಮಗ್ಗಂ, ಚತ್ತಾರಿಪಿ ಅರಿಯಸಚ್ಚಾನಿ.

೨೧೬. ‘‘ದುಕ್ಖೋ ಇತ್ಥಿಭಾವೋ, ಅಕ್ಖಾತೋ ಪುರಿಸದಮ್ಮಸಾರಥಿನಾ;

ಸಪತ್ತಿಕಮ್ಪಿ ಹಿ ದುಕ್ಖಂ, ಅಪ್ಪೇಕಚ್ಚಾ ಸಕಿಂ ವಿಜಾತಾಯೋ.

೨೧೭. ‘‘ಗಲಕೇ ಅಪಿ ಕನ್ತನ್ತಿ, ಸುಖುಮಾಲಿನಿಯೋ ವಿಸಾನಿ ಖಾದನ್ತಿ;

ಜನಮಾರಕಮಜ್ಝಗತಾ, ಉಭೋಪಿ ಬ್ಯಸನಾನಿ ಅನುಭೋನ್ತಿ.

೨೧೮. ‘‘ಉಪವಿಜಞ್ಞಾ ಗಚ್ಛನ್ತೀ, ಅದ್ದಸಾಹಂ ಪತಿಂ ಮತಂ;

ಪನ್ಥಮ್ಹಿ ವಿಜಾಯಿತ್ವಾನ, ಅಪ್ಪತ್ತಾವ ಸಕಂ ಘರಂ.

೨೧೯. ‘‘ದ್ವೇ ಪುತ್ತಾ ಕಾಲಕತಾ, ಪತೀ ಚ ಪನ್ಥೇ ಮತೋ ಕಪಣಿಕಾಯ;

ಮಾತಾ ಪಿತಾ ಚ ಭಾತಾ, ಡಯ್ಹನ್ತಿ ಚ ಏಕಚಿತಕಾಯಂ.

೨೨೦. ‘‘ಖೀಣಕುಲೀನೇ ಕಪಣೇ, ಅನುಭೂತಂ ತೇ ದುಖಂ ಅಪರಿಮಾಣಂ;

ಅಸ್ಸೂ ಚ ತೇ ಪವತ್ತಂ, ಬಹೂನಿ ಚ ಜಾತಿಸಹಸ್ಸಾನಿ.

೨೨೧. ‘‘ವಸಿತಾ ಸುಸಾನಮಜ್ಝೇ, ಅಥೋಪಿ ಖಾದಿತಾನಿ ಪುತ್ತಮಂಸಾನಿ;

ಹತಕುಲಿಕಾ ಸಬ್ಬಗರಹಿತಾ, ಮತಪತಿಕಾ ಅಮತಮಧಿಗಚ್ಛಿಂ.

೨೨೨. ‘‘ಭಾವಿತೋ ಮೇ ಮಗ್ಗೋ, ಅರಿಯೋ ಅಟ್ಠಙ್ಗಿಕೋ ಅಮತಗಾಮೀ;

ನಿಬ್ಬಾನಂ ಸಚ್ಛಿಕತಂ, ಧಮ್ಮಾದಾಸಂ ಅವೇಕ್ಖಿಂಹಂ [ಅಪೇಕ್ಖಿಹಂ (ಸೀ.)].

೨೨೩. ‘‘ಅಹಮಮ್ಹಿ ಕನ್ತಸಲ್ಲಾ, ಓಹಿತಭಾರಾ ಕತಞ್ಹಿ ಕರಣೀಯಂ;

ಕಿಸಾ ಗೋತಮೀ ಥೇರೀ, ವಿಮುತ್ತಚಿತ್ತಾ ಇಮಂ ಭಣೀ’’ತಿ.

… ಕಿಸಾ ಗೋತಮೀ ಥೇರೀ….

ಏಕಾದಸನಿಪಾತೋ ನಿಟ್ಠಿತೋ.