೧೧. ದ್ವಾದಸಕನಿಪಾತೋ

೨೨೪. ‘‘ಉಭೋ ಮಾತಾ ಚ ಧೀತಾ ಚ, ಮಯಂ ಆಸುಂ [ಆಭುಂ (ಸೀ.)] ಸಪತ್ತಿಯೋ;

ತಸ್ಸಾ ಮೇ ಅಹು ಸಂವೇಗೋ, ಅಬ್ಭುತೋ ಲೋಮಹಂಸನೋ.

೨೨೫. ‘‘ಧಿರತ್ಥು ಕಾಮಾ ಅಸುಚೀ, ದುಗ್ಗನ್ಧಾ ಬಹುಕಣ್ಟಕಾ;

ಯತ್ಥ ಮಾತಾ ಚ ಧೀತಾ ಚ, ಸಭರಿಯಾ ಮಯಂ ಅಹುಂ.

೨೨೬. ‘‘ಕಾಮೇಸ್ವಾದೀನವಂ ದಿಸ್ವಾ, ನೇಕ್ಖಮ್ಮಂ ದಟ್ಠು ಖೇಮತೋ;

ಸಾ ಪಬ್ಬಜ್ಜಿಂ ರಾಜಗಹೇ, ಅಗಾರಸ್ಮಾನಗಾರಿಯಂ.

೨೨೭. ‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖುಂ ವಿಸೋಧಿತಂ;

ಚೇತೋಪರಿಚ್ಚಞಾಣಞ್ಚ, ಸೋತಧಾತು ವಿಸೋಧಿತಾ.

೨೨೮. ‘‘ಇದ್ಧೀಪಿ ಮೇ ಸಚ್ಛಿಕತಾ, ಪತ್ತೋ ಮೇ ಆಸವಕ್ಖಯೋ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ.

೨೨೯. ‘‘ಇದ್ಧಿಯಾ ಅಭಿನಿಮ್ಮಿತ್ವಾ, ಚತುರಸ್ಸಂ ರಥಂ ಅಹಂ;

ಬುದ್ಧಸ್ಸ ಪಾದೇ ವನ್ದಿತ್ವಾ, ಲೋಕನಾಥಸ್ಸ ತಾದಿನೋ’’ [ಸಿರೀಮತೋ (ಸ್ಯಾ. ಕ.)].

೨೩೦. ‘‘ಸುಪುಪ್ಫಿತಗ್ಗಂ ಉಪಗಮ್ಮ ಪಾದಪಂ, ಏಕಾ ತುವಂ ತಿಟ್ಠಸಿ ಸಾಲಮೂಲೇ [ರುಕ್ಖಮೂಲೇ (ಸ್ಯಾ. ಕ.)];

ನ ಚಾಪಿ ತೇ ದುತಿಯೋ ಅತ್ಥಿ ಕೋಚಿ, ನ ತ್ವಂ ಬಾಲೇ ಭಾಯಸಿ ಧುತ್ತಕಾನಂ’’.

೨೩೧. ‘‘ಸತಂ ಸಹಸ್ಸಾನಿಪಿ ಧುತ್ತಕಾನಂ, ಸಮಾಗತಾ ಏದಿಸಕಾ ಭವೇಯ್ಯುಂ;

ಲೋಮಂ ನ ಇಞ್ಜೇ ನಪಿ ಸಮ್ಪವೇಧೇ, ಕಿಂ ಮೇ ತುವಂ ಮಾರ ಕರಿಸ್ಸಸೇಕೋ.

೨೩೨. ‘‘ಏಸಾ ಅನ್ತರಧಾಯಾಮಿ, ಕುಚ್ಛಿಂ ವಾ ಪವಿಸಾಮಿ ತೇ;

ಭಮುಕನ್ತರೇ ತಿಟ್ಠಾಮಿ, ತಿಟ್ಠನ್ತಿಂ ಮಂ ನ ದಕ್ಖಸಿ.

೨೩೩. ‘‘ಚಿತ್ತಮ್ಹಿ ವಸೀಭೂತಾಹಂ, ಇದ್ಧಿಪಾದಾ ಸುಭಾವಿತಾ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ.

೨೩೪. ‘‘ಸತ್ತಿಸೂಲೂಪಮಾ ಕಾಮಾ, ಖನ್ಧಾಸಂ ಅಧಿಕುಟ್ಟನಾ;

ಯಂ ತ್ವಂ ‘ಕಾಮರತಿಂ’ ಬ್ರೂಸಿ, ‘ಅರತೀ’ ದಾನಿ ಸಾ ಮಮ.

೨೩೫. ‘‘ಸಬ್ಬತ್ಥ ವಿಹತಾ ನನ್ದೀ, ತಮೋಖನ್ಧೋ ಪದಾಲಿತೋ;

ಏವಂ ಜಾನಾಹಿ ಪಾಪಿಮ, ನಿಹತೋ ತ್ವಮಸಿ ಅನ್ತಕಾ’’ತಿ.

… ಉಪ್ಪಲವಣ್ಣಾ ಥೇರೀ….

ದ್ವಾದಸನಿಪಾತೋ ನಿಟ್ಠಿತೋ.