೩. ಖೇಮಾಥೇರೀಗಾಥಾ

೧೩೯. ‘‘ದಹರಾ ತ್ವಂ ರೂಪವತೀ, ಅಹಮ್ಪಿ ದಹರೋ ಯುವಾ;

ಪಞ್ಚಙ್ಗಿಕೇನ ತುರಿಯೇನ [ತೂರೇನ (ಕ.)], ಏಹಿ ಖೇಮೇ ರಮಾಮಸೇ’’.

೧೪೦. ‘‘ಇಮಿನಾ ಪೂತಿಕಾಯೇನ, ಆತುರೇನ ಪಭಙ್ಗುನಾ;

ಅಟ್ಟಿಯಾಮಿ ಹರಾಯಾಮಿ, ಕಾಮತಣ್ಹಾ ಸಮೂಹತಾ.

೧೪೧. ‘‘ಸತ್ತಿಸೂಲೂಪಮಾ ಕಾಮಾ, ಖನ್ಧಾಸಂ ಅಧಿಕುಟ್ಟನಾ;

ಯಂ ‘ತ್ವಂ ಕಾಮರತಿಂ’ ಬ್ರೂಸಿ, ‘ಅರತೀ’ ದಾನಿ ಸಾ ಮಮ.

೧೪೨. ‘‘ಸಬ್ಬತ್ಥ ವಿಹತಾ ನನ್ದೀ, ತಮೋಖನ್ಧೋ ಪದಾಲಿತೋ;

ಏವಂ ಜಾನಾಹಿ ಪಾಪಿಮ, ನಿಹತೋ ತ್ವಮಸಿ ಅನ್ತಕ.

೧೪೩. ‘‘ನಕ್ಖತ್ತಾನಿ ನಮಸ್ಸನ್ತಾ, ಅಗ್ಗಿಂ ಪರಿಚರಂ ವನೇ;

ಯಥಾಭುಚ್ಚಮಜಾನನ್ತಾ, ಬಾಲಾ ಸುದ್ಧಿಮಮಞ್ಞಥ.

೧೪೪. ‘‘ಅಹಞ್ಚ ಖೋ ನಮಸ್ಸನ್ತೀ, ಸಮ್ಬುದ್ಧಂ ಪುರಿಸುತ್ತಮಂ;

ಪಮುತ್ತಾ [ಪರಿಮುತ್ತಾ (ಸೀ. ಸ್ಯಾ.)] ಸಬ್ಬದುಕ್ಖೇಹಿ, ಸತ್ಥುಸಾಸನಕಾರಿಕಾ’’ತಿ.

… ಖೇಮಾ ಥೇರೀ….