೪. ಸುಜಾತಾಥೇರೀಗಾಥಾ

೧೪೫. ‘‘ಅಲಙ್ಕತಾ ಸುವಸನಾ, ಮಾಲಿನೀ ಚನ್ದನೋಕ್ಖಿತಾ;

ಸಬ್ಬಾಭರಣಸಞ್ಛನ್ನಾ, ದಾಸೀಗಣಪುರಕ್ಖತಾ.

೧೪೬. ‘‘ಅನ್ನಂ ಪಾನಞ್ಚ ಆದಾಯ, ಖಜ್ಜಂ ಭೋಜ್ಜಂ ಅನಪ್ಪಕಂ;

ಗೇಹತೋ ನಿಕ್ಖಮಿತ್ವಾನ, ಉಯ್ಯಾನಮಭಿಹಾರಯಿಂ.

೧೪೭. ‘‘ತತ್ಥ ರಮಿತ್ವಾ ಕೀಳಿತ್ವಾ, ಆಗಚ್ಛನ್ತೀ ಸಕಂ ಘರಂ;

ವಿಹಾರಂ ದಟ್ಠುಂ ಪಾವಿಸಿಂ, ಸಾಕೇತೇ ಅಞ್ಜನಂ ವನಂ.

೧೪೮. ‘‘ದಿಸ್ವಾನ ಲೋಕಪಜ್ಜೋತಂ, ವನ್ದಿತ್ವಾನ ಉಪಾವಿಸಿಂ;

ಸೋ ಮೇ ಧಮ್ಮಮದೇಸೇಸಿ, ಅನುಕಮ್ಪಾಯ ಚಕ್ಖುಮಾ.

೧೪೯. ‘‘ಸುತ್ವಾ ಚ ಖೋ ಮಹೇಸಿಸ್ಸ, ಸಚ್ಚಂ ಸಮ್ಪಟಿವಿಜ್ಝಹಂ;

ತತ್ಥೇವ ವಿರಜಂ ಧಮ್ಮಂ, ಫುಸಯಿಂ ಅಮತಂ ಪದಂ.

೧೫೦. ‘‘ತತೋ ವಿಞ್ಞಾತಸದ್ಧಮ್ಮಾ, ಪಬ್ಬಜಿಂ ಅನಗಾರಿಯಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಅಮೋಘಂ ಬುದ್ಧಸಾಸನ’’ನ್ತಿ.

… ಸುಜಾತಾ ಥೇರೀ….