೧೫. ಚತ್ತಾಲೀಸನಿಪಾತೋ

೧. ಇಸಿದಾಸೀಥೇರೀಗಾಥಾ

೪೦೨. ನಗರಮ್ಹಿ ಕುಸುಮನಾಮೇ, ಪಾಟಲಿಪುತ್ತಮ್ಹಿ ಪಥವಿಯಾ ಮಣ್ಡೇ;

ಸಕ್ಯಕುಲಕುಲೀನಾಯೋ, ದ್ವೇ ಭಿಕ್ಖುನಿಯೋ ಹಿ ಗುಣವತಿಯೋ.

೪೦೩. ಇಸಿದಾಸೀ ತತ್ಥ ಏಕಾ, ದುತಿಯಾ ಬೋಧೀತಿ ಸೀಲಸಮ್ಪನ್ನಾ ಚ;

ಝಾನಜ್ಝಾಯನರತಾಯೋ, ಬಹುಸ್ಸುತಾಯೋ ಧುತಕಿಲೇಸಾಯೋ.

೪೦೪. ತಾ ಪಿಣ್ಡಾಯ ಚರಿತ್ವಾ, ಭತ್ತತ್ಥಂ [ಭತ್ತತ್ತಂ (ಸೀ.)] ಕರಿಯ ಧೋತಪತ್ತಾಯೋ;

ರಹಿತಮ್ಹಿ ಸುಖನಿಸಿನ್ನಾ, ಇಮಾ ಗಿರಾ ಅಬ್ಭುದೀರೇಸುಂ.

೪೦೫. ‘‘ಪಾಸಾದಿಕಾಸಿ ಅಯ್ಯೇ, ಇಸಿದಾಸಿ ವಯೋಪಿ ತೇ ಅಪರಿಹೀನೋ;

ಕಿಂ ದಿಸ್ವಾನ ಬ್ಯಾಲಿಕಂ, ಅಥಾಸಿ ನೇಕ್ಖಮ್ಮಮನುಯುತ್ತಾ’’.

೪೦೬. ಏವಮನುಯುಞ್ಜಿಯಮಾನಾ ಸಾ, ರಹಿತೇ ಧಮ್ಮದೇಸನಾಕುಸಲಾ;

ಇಸಿದಾಸೀ ವಚನಮಬ್ರವಿ, ‘‘ಸುಣ ಬೋಧಿ ಯಥಾಮ್ಹಿ ಪಬ್ಬಜಿತಾ.

೪೦೭. ‘‘ಉಜ್ಜೇನಿಯಾ ಪುರವರೇ, ಮಯ್ಹಂ ಪಿತಾ ಸೀಲಸಂವುತೋ ಸೇಟ್ಠಿ;

ತಸ್ಸಮ್ಹಿ ಏಕಧೀತಾ, ಪಿಯಾ ಮನಾಪಾ ಚ ದಯಿತಾ ಚ.

೪೦೮. ‘‘ಅಥ ಮೇ ಸಾಕೇತತೋ ವರಕಾ, ಆಗಚ್ಛುಮುತ್ತಮಕುಲೀನಾ;

ಸೇಟ್ಠೀ ಪಹೂತರತನೋ, ತಸ್ಸ ಮಮಂ ಸುಣ್ಹಮದಾಸಿ ತಾತೋ.

೪೦೯. ‘‘ಸಸ್ಸುಯಾ ಸಸ್ಸುರಸ್ಸ ಚ, ಸಾಯಂ ಪಾತಂ ಪಣಾಮಮುಪಗಮ್ಮ;

ಸಿರಸಾ ಕರೋಮಿ ಪಾದೇ, ವನ್ದಾಮಿ ಯಥಾಮ್ಹಿ ಅನುಸಿಟ್ಠಾ.

೪೧೦. ‘‘ಯಾ ಮಯ್ಹಂ ಸಾಮಿಕಸ್ಸ, ಭಗಿನಿಯೋ ಭಾತುನೋ ಪರಿಜನೋ ವಾ;

ತಮೇಕವರಕಮ್ಪಿ ದಿಸ್ವಾ, ಉಬ್ಬಿಗ್ಗಾ ಆಸನಂ ದೇಮಿ.

೪೧೧. ‘‘ಅನ್ನೇನ ಚ ಪಾನೇನ ಚ, ಖಜ್ಜೇನ ಚ ಯಞ್ಚ ತತ್ಥ ಸನ್ನಿಹಿತಂ;

ಛಾದೇಮಿ ಉಪನಯಾಮಿ ಚ, ದೇಮಿ ಚ ಯಂ ಯಸ್ಸ ಪತಿರೂಪಂ.

೪೧೨. ‘‘ಕಾಲೇನ ಉಪಟ್ಠಹಿತ್ವಾ [ಉಟ್ಠಹಿತ್ವಾ (ಸ್ಯಾ. ಕ.), ಉಪಟ್ಠಹಿತುಂ (?)], ಘರಂ ಸಮುಪಗಮಾಮಿ ಉಮ್ಮಾರೇ;

ಧೋವನ್ತೀ ಹತ್ಥಪಾದೇ, ಪಞ್ಜಲಿಕಾ ಸಾಮಿಕಮುಪೇಮಿ.

೪೧೩. ‘‘ಕೋಚ್ಛಂ ಪಸಾದಂ ಅಞ್ಜನಿಞ್ಚ, ಆದಾಸಕಞ್ಚ ಗಣ್ಹಿತ್ವಾ;

ಪರಿಕಮ್ಮಕಾರಿಕಾ ವಿಯ, ಸಯಮೇವ ಪತಿಂ ವಿಭೂಸೇಮಿ.

೪೧೪. ‘‘ಸಯಮೇವ ಓದನಂ ಸಾಧಯಾಮಿ, ಸಯಮೇವ ಭಾಜನಂ ಧೋವನ್ತೀ;

ಮಾತಾವ ಏಕಪುತ್ತಕಂ, ತಥಾ [ತದಾ (ಸೀ.)] ಭತ್ತಾರಂ ಪರಿಚರಾಮಿ.

೪೧೫. ‘‘ಏವಂ ಮಂ ಭತ್ತಿಕತಂ, ಅನುರತ್ತಂ ಕಾರಿಕಂ ನಿಹತಮಾನಂ;

ಉಟ್ಠಾಯಿಕಂ [ಉಟ್ಠಾಹಿಕಂ (ಕ.)] ಅನಲಸಂ, ಸೀಲವತಿಂ ದುಸ್ಸತೇ ಭತ್ತಾ.

೪೧೬. ‘‘ಸೋ ಮಾತರಞ್ಚ ಪಿತರಞ್ಚ, ಭಣತಿ ‘ಆಪುಚ್ಛಹಂ ಗಮಿಸ್ಸಾಮಿ;

ಇಸಿದಾಸಿಯಾ ನ ಸಹ ವಚ್ಛಂ, ಏಕಾಗಾರೇಹಂ [ಏಕಘರೇಪ’ಹಂ (?)] ಸಹ ವತ್ಥುಂ’.

೪೧೭. ‘‘‘ಮಾ ಏವಂ ಪುತ್ತ ಅವಚ, ಇಸಿದಾಸೀ ಪಣ್ಡಿತಾ ಪರಿಬ್ಯತ್ತಾ;

ಉಟ್ಠಾಯಿಕಾ ಅನಲಸಾ, ಕಿಂ ತುಯ್ಹಂ ನ ರೋಚತೇ ಪುತ್ತ’.

೪೧೮. ‘‘‘ನ ಚ ಮೇ ಹಿಂಸತಿ ಕಿಞ್ಚಿ, ನ ಚಹಂ ಇಸಿದಾಸಿಯಾ ಸಹ ವಚ್ಛಂ;

ದೇಸ್ಸಾವ ಮೇ ಅಲಂ ಮೇ, ಅಪುಚ್ಛಾಹಂ [ಆಪುಚ್ಛಾಹಂ (ಸ್ಯಾ.), ಆಪುಚ್ಛಹಂ-ನಾಪುಚ್ಛಹಂ (?)] ಗಮಿಸ್ಸಾಮಿ’.

೪೧೯. ‘‘ತಸ್ಸ ವಚನಂ ಸುಣಿತ್ವಾ, ಸಸ್ಸು ಸಸುರೋ ಚ ಮಂ ಅಪುಚ್ಛಿಂಸು;

‘ಕಿಸ್ಸ [ಕಿಂಸ (?)] ತಯಾ ಅಪರದ್ಧಂ, ಭಣ ವಿಸ್ಸಟ್ಠಾ ಯಥಾಭೂತಂ’.

೪೨೦. ‘‘‘ನಪಿಹಂ ಅಪರಜ್ಝಂ ಕಿಞ್ಚಿ, ನಪಿ ಹಿಂಸೇಮಿ ನ ಭಣಾಮಿ ದುಬ್ಬಚನಂ;

ಕಿಂ ಸಕ್ಕಾ ಕಾತುಯ್ಯೇ, ಯಂ ಮಂ ವಿದ್ದೇಸ್ಸತೇ ಭತ್ತಾ’.

೪೨೧. ‘‘ತೇ ಮಂ ಪಿತುಘರಂ ಪಟಿನಯಿಂಸು, ವಿಮನಾ ದುಖೇನ ಅಧಿಭೂತಾ;

‘ಪುತ್ತಮನುರಕ್ಖಮಾನಾ, ಜಿತಾಮ್ಹಸೇ ರೂಪಿನಿಂ ಲಕ್ಖಿಂ’.

೪೨೨. ‘‘ಅಥ ಮಂ ಅದಾಸಿ ತಾತೋ, ಅಡ್ಢಸ್ಸ ಘರಮ್ಹಿ ದುತಿಯಕುಲಿಕಸ್ಸ;

ತತೋ ಉಪಡ್ಢಸುಙ್ಕೇನ, ಯೇನ ಮಂ ವಿನ್ದಥ ಸೇಟ್ಠಿ.

೪೨೩. ‘‘ತಸ್ಸಪಿ ಘರಮ್ಹಿ ಮಾಸಂ, ಅವಸಿಂ ಅಥ ಸೋಪಿ ಮಂ ಪಟಿಚ್ಛರಯಿ [ಪಟಿಚ್ಛಸಿ (ಸೀ. ಕ.), ಪಟಿಚ್ಛತಿ (ಸ್ಯಾ.), ಪಟಿಚ್ಛರತಿ (ಕ.)];

ದಾಸೀವ ಉಪಟ್ಠಹನ್ತಿಂ, ಅದೂಸಿಕಂ ಸೀಲಸಮ್ಪನ್ನಂ.

೪೨೪. ‘‘ಭಿಕ್ಖಾಯ ಚ ವಿಚರನ್ತಂ, ದಮಕಂ ದನ್ತಂ ಮೇ ಪಿತಾ ಭಣತಿ;

‘ಹೋಹಿಸಿ [ಸೋಹಿಸಿ (ಸಬ್ಬತ್ಥ)] ಮೇ ಜಾಮಾತಾ, ನಿಕ್ಖಿಪ ಪೋಟ್ಠಿಞ್ಚ [ಪೋನ್ತಿಂ (ಸೀ. ಸ್ಯಾ.)] ಘಟಿಕಞ್ಚ’.

೪೨೫. ‘‘ಸೋಪಿ ವಸಿತ್ವಾ ಪಕ್ಖಂ [ಪಕ್ಕಮಥ (ಸೀ.)], ಅಥ ತಾತಂ ಭಣತಿ ‘ದೇಹಿ ಮೇ ಪೋಟ್ಠಿಂ;

ಘಟಿಕಞ್ಚ ಮಲ್ಲಕಞ್ಚ, ಪುನಪಿ ಭಿಕ್ಖಂ ಚರಿಸ್ಸಾಮಿ’.

೪೨೬. ‘‘ಅಥ ನಂ ಭಣತೀ ತಾತೋ, ಅಮ್ಮಾ ಸಬ್ಬೋ ಚ ಮೇ ಞಾತಿಗಣವಗ್ಗೋ;

‘ಕಿಂ ತೇ ನ ಕೀರತಿ ಇಧ, ಭಣ ಖಿಪ್ಪಂ ತಂ ತೇ ಕರಿಹಿ’ತಿ.

೪೨೭. ‘‘ಏವಂ ಭಣಿತೋ ಭಣತಿ, ‘ಯದಿ ಮೇ ಅತ್ತಾ ಸಕ್ಕೋತಿ ಅಲಂ ಮಯ್ಹಂ;

ಇಸಿದಾಸಿಯಾ ನ ಸಹ ವಚ್ಛಂ, ಏಕಘರೇಹಂ ಸಹ ವತ್ಥುಂ’.

೪೨೮. ‘‘ವಿಸ್ಸಜ್ಜಿತೋ ಗತೋ ಸೋ, ಅಹಮ್ಪಿ ಏಕಾಕಿನೀ ವಿಚಿನ್ತೇಮಿ;

‘ಆಪುಚ್ಛಿತೂನ ಗಚ್ಛಂ, ಮರಿತುಯೇ [ಮರಿತಾಯೇ (ಸೀ.), ಮರಿತುಂ (ಸ್ಯಾ.)] ವಾ ಪಬ್ಬಜಿಸ್ಸಂ ವಾ’.

೪೨೯. ‘‘ಅಥ ಅಯ್ಯಾ ಜಿನದತ್ತಾ, ಆಗಚ್ಛೀ ಗೋಚರಾಯ ಚರಮಾನಾ;

ತಾತಕುಲಂ ವಿನಯಧರೀ, ಬಹುಸ್ಸುತಾ ಸೀಲಸಮ್ಪನ್ನಾ.

೪೩೦. ‘‘ತಂ ದಿಸ್ವಾನ ಅಮ್ಹಾಕಂ, ಉಟ್ಠಾಯಾಸನಂ ತಸ್ಸಾ ಪಞ್ಞಾಪಯಿಂ;

ನಿಸಿನ್ನಾಯ ಚ ಪಾದೇ, ವನ್ದಿತ್ವಾ ಭೋಜನಮದಾಸಿಂ.

೪೩೧. ‘‘ಅನ್ನೇನ ಚ ಪಾನೇನ ಚ, ಖಜ್ಜೇನ ಚ ಯಞ್ಚ ತತ್ಥ ಸನ್ನಿಹಿತಂ;

ಸನ್ತಪ್ಪಯಿತ್ವಾ ಅವಚಂ, ‘ಅಯ್ಯೇ ಇಚ್ಛಾಮಿ ಪಬ್ಬಜಿತುಂ’.

೪೩೨. ‘‘ಅಥ ಮಂ ಭಣತೀ ತಾತೋ, ‘ಇಧೇವ ಪುತ್ತಕ [ಪುತ್ತಿಕೇ (ಸ್ಯಾ. ಕ.)] ಚರಾಹಿ ತ್ವಂ ಧಮ್ಮಂ;

ಅನ್ನೇನ ಚ ಪಾನೇನ ಚ, ತಪ್ಪಯ ಸಮಣೇ ದ್ವಿಜಾತೀ ಚ’.

೪೩೩. ‘‘ಅಥಹಂ ಭಣಾಮಿ ತಾತಂ, ರೋದನ್ತೀ ಅಞ್ಜಲಿಂ ಪಣಾಮೇತ್ವಾ;

‘ಪಾಪಞ್ಹಿ ಮಯಾ ಪಕತಂ, ಕಮ್ಮಂ ತಂ ನಿಜ್ಜರೇಸ್ಸಾಮಿ’.

೪೩೪. ‘‘ಅಥ ಮಂ ಭಣತೀ ತಾತೋ, ‘ಪಾಪುಣ ಬೋಧಿಞ್ಚ ಅಗ್ಗಧಮ್ಮಞ್ಚ;

ನಿಬ್ಬಾನಞ್ಚ ಲಭಸ್ಸು, ಯಂ ಸಚ್ಛಿಕರೀ ದ್ವಿಪದಸೇಟ್ಠೋ’.

೪೩೫. ‘‘ಮಾತಾಪಿತೂ ಅಭಿವಾದಯಿತ್ವಾ, ಸಬ್ಬಞ್ಚ ಞಾತಿಗಣವಗ್ಗಂ;

ಸತ್ತಾಹಂ ಪಬ್ಬಜಿತಾ, ತಿಸ್ಸೋ ವಿಜ್ಜಾ ಅಫಸ್ಸಯಿಂ.

೪೩೬. ‘‘ಜಾನಾಮಿ ಅತ್ತನೋ ಸತ್ತ, ಜಾತಿಯೋ ಯಸ್ಸಯಂ ಫಲವಿಪಾಕೋ;

ತಂ ತವ ಆಚಿಕ್ಖಿಸ್ಸಂ, ತಂ ಏಕಮನಾ ನಿಸಾಮೇಹಿ.

೪೩೭. ‘‘ನಗರಮ್ಹಿ ಏರಕಚ್ಛೇ [ಏರಕಕಚ್ಛೇ (ಸ್ಯಾ. ಕ.)], ಸುವಣ್ಣಕಾರೋ ಅಹಂ ಪಹೂತಧನೋ;

ಯೋಬ್ಬನಮದೇನ ಮತ್ತೋ ಸೋ, ಪರದಾರಂ ಅಸೇವಿಹಂ.

೪೩೮. ‘‘ಸೋಹಂ ತತೋ ಚವಿತ್ವಾ, ನಿರಯಮ್ಹಿ ಅಪಚ್ಚಿಸಂ ಚಿರಂ;

ಪಕ್ಕೋ ತತೋ ಚ ಉಟ್ಠಹಿತ್ವಾ, ಮಕ್ಕಟಿಯಾ ಕುಚ್ಛಿಮೋಕ್ಕಮಿಂ.

೪೩೯. ‘‘ಸತ್ತಾಹಜಾತಕಂ ಮಂ, ಮಹಾಕಪಿ ಯೂಥಪೋ ನಿಲ್ಲಚ್ಛೇಸಿ;

ತಸ್ಸೇತಂ ಕಮ್ಮಫಲಂ, ಯಥಾಪಿ ಗನ್ತ್ವಾನ ಪರದಾರಂ.

೪೪೦. ‘‘ಸೋಹಂ ತತೋ ಚವಿತ್ವಾ, ಕಾಲಂ ಕರಿತ್ವಾ ಸಿನ್ಧವಾರಞ್ಞೇ;

ಕಾಣಾಯ ಚ ಖಞ್ಜಾಯ ಚ, ಏಳಕಿಯಾ ಕುಚ್ಛಿಮೋಕ್ಕಮಿಂ.

೪೪೧. ‘‘ದ್ವಾದಸ ವಸ್ಸಾನಿ ಅಹಂ, ನಿಲ್ಲಚ್ಛಿತೋ ದಾರಕೇ ಪರಿವಹಿತ್ವಾ;

ಕಿಮಿನಾವಟ್ಟೋ ಅಕಲ್ಲೋ, ಯಥಾಪಿ ಗನ್ತ್ವಾನ ಪರದಾರಂ.

೪೪೨. ‘‘ಸೋಹಂ ತತೋ ಚವಿತ್ವಾ, ಗೋವಾಣಿಜಕಸ್ಸ ಗಾವಿಯಾ ಜಾತೋ;

ವಚ್ಛೋ ಲಾಖಾತಮ್ಬೋ, ನಿಲ್ಲಚ್ಛಿತೋ ದ್ವಾದಸೇ ಮಾಸೇ.

೪೪೩. ‘‘ವೋಢೂನ [ತೇ ಪುನ (ಸ್ಯಾ. ಕ.), ವೋಧುನ (ಕ. ಅಟ್ಠ.)] ನಙ್ಗಲಮಹಂ, ಸಕಟಞ್ಚ ಧಾರಯಾಮಿ;

ಅನ್ಧೋವಟ್ಟೋ ಅಕಲ್ಲೋ, ಯಥಾಪಿ ಗನ್ತ್ವಾನ ಪರದಾರಂ.

೪೪೪. ‘‘ಸೋಹಂ ತತೋ ಚವಿತ್ವಾ, ವೀಥಿಯಾ ದಾಸಿಯಾ ಘರೇ ಜಾತೋ;

ನೇವ ಮಹಿಲಾ ನ ಪುರಿಸೋ, ಯಥಾಪಿ ಗನ್ತ್ವಾನ ಪರದಾರಂ.

೪೪೫. ‘‘ತಿಂಸತಿವಸ್ಸಮ್ಹಿ ಮತೋ, ಸಾಕಟಿಕಕುಲಮ್ಹಿ ದಾರಿಕಾ ಜಾತಾ;

ಕಪಣಮ್ಹಿ ಅಪ್ಪಭೋಗೇ, ಧನಿಕ [ಅಣಿಕ (ಅಟ್ಠ.), ತಂಸಂವಣ್ಣನಾಯಮ್ಪಿ ಅತ್ಥಯುತ್ತಿ ಗವೇಸಿತಬ್ಬಾ] ಪುರಿಸಪಾತಬಹುಲಮ್ಹಿ.

೪೪೬. ‘‘ತಂ ಮಂ ತತೋ ಸತ್ಥವಾಹೋ, ಉಸ್ಸನ್ನಾಯ ವಿಪುಲಾಯ ವಡ್ಢಿಯಾ;

ಓಕಡ್ಢತಿ ವಿಲಪನ್ತಿಂ, ಅಚ್ಛಿನ್ದಿತ್ವಾ ಕುಲಘರಸ್ಮಾ.

೪೪೭. ‘‘ಅಥ ಸೋಳಸಮೇ ವಸ್ಸೇ, ದಿಸ್ವಾ ಮಂ ಪತ್ತಯೋಬ್ಬನಂ ಕಞ್ಞಂ;

ಓರುನ್ಧತಸ್ಸ ಪುತ್ತೋ, ಗಿರಿದಾಸೋ ನಾಮ ನಾಮೇನ.

೪೪೮. ‘‘ತಸ್ಸಪಿ ಅಞ್ಞಾ ಭರಿಯಾ, ಸೀಲವತೀ ಗುಣವತೀ ಯಸವತೀ ಚ;

ಅನುರತ್ತಾ [ಅನುವತ್ತಾ (ಕ.)] ಭತ್ತಾರಂ, ತಸ್ಸಾಹಂ [ತಸ್ಸ ತಂ (?)] ವಿದ್ದೇಸನಮಕಾಸಿಂ.

೪೪೯. ‘‘ತಸ್ಸೇತಂ ಕಮ್ಮಫಲಂ, ಯಂ ಮಂ ಅಪಕೀರಿತೂನ ಗಚ್ಛನ್ತಿ;

ದಾಸೀವ ಉಪಟ್ಠಹನ್ತಿಂ, ತಸ್ಸಪಿ ಅನ್ತೋ ಕತೋ ಮಯಾ’’ತಿ.

… ಇಸಿದಾಸೀ ಥೇರೀ….

ಚತ್ತಾಲೀಸನಿಪಾತೋ ನಿಟ್ಠಿತೋ.