೧೬. ಮಹಾನಿಪಾತೋ

೧. ಸುಮೇಧಾಥೇರೀಗಾಥಾ

೪೫೦. ಮನ್ತಾವತಿಯಾ ನಗರೇ, ರಞ್ಞೋ ಕೋಞ್ಚಸ್ಸ ಅಗ್ಗಮಹೇಸಿಯಾ;

ಧೀತಾ ಆಸಿಂ ಸುಮೇಧಾ, ಪಸಾದಿತಾ ಸಾಸನಕರೇಹಿ.

೪೫೧. ಸೀಲವತೀ ಚಿತ್ತಕಥಾ, ಬಹುಸ್ಸುತಾ ಬುದ್ಧಸಾಸನೇ ವಿನೀತಾ;

ಮಾತಾಪಿತರೋ ಉಪಗಮ್ಮ, ಭಣತಿ ‘‘ಉಭಯೋ ನಿಸಾಮೇಥ.

೪೫೨. ‘‘ನಿಬ್ಬಾನಾಭಿರತಾಹಂ, ಅಸಸ್ಸತಂ ಭವಗತಂ ಯದಿಪಿ ದಿಬ್ಬಂ;

ಕಿಮಙ್ಗಂ ಪನ [ಕಿಮಙ್ಗ ಪನ (ಸೀ. ಸ್ಯಾ.), ಕಿಂ ಪನ (?)] ತುಚ್ಛಾ ಕಾಮಾ, ಅಪ್ಪಸ್ಸಾದಾ ಬಹುವಿಘಾತಾ.

೪೫೩. ‘‘ಕಾಮಾ ಕಟುಕಾ ಆಸೀವಿಸೂಪಮಾ, ಯೇಸು ಮುಚ್ಛಿತಾ ಬಾಲಾ;

ತೇ ದೀಘರತ್ತಂ ನಿರಯೇ, ಸಮಪ್ಪಿತಾ ಹಞ್ಞನ್ತೇ ದುಕ್ಖಿತಾ [ಹಞ್ಞರೇ ದುಖಿತಾ (?)].

೪೫೪. ‘‘ಸೋಚನ್ತಿ ಪಾಪಕಮ್ಮಾ, ವಿನಿಪಾತೇ ಪಾಪವದ್ಧಿನೋ ಸದಾ;

ಕಾಯೇನ ಚ ವಾಚಾಯ ಚ, ಮನಸಾ ಚ ಅಸಂವುತಾ ಬಾಲಾ.

೪೫೫. ‘‘ಬಾಲಾ ತೇ ದುಪ್ಪಞ್ಞಾ, ಅಚೇತನಾ ದುಕ್ಖಸಮುದಯೋರುದ್ಧಾ;

ದೇಸನ್ತೇ ಅಜಾನನ್ತಾ, ನ ಬುಜ್ಝರೇ ಅರಿಯಸಚ್ಚಾನಿ.

೪೫೬. ‘‘ಸಚ್ಚಾನಿ ಅಮ್ಮ ಬುದ್ಧವರದೇಸಿತಾನಿ, ತೇ ಬಹುತರಾ ಅಜಾನನ್ತಾ ಯೇ;

ಅಭಿನನ್ದನ್ತಿ ಭವಗತಂ, ಪಿಹೇನ್ತಿ ದೇವೇಸು ಉಪಪತ್ತಿಂ.

೪೫೭. ‘‘ದೇವೇಸುಪಿ ಉಪಪತ್ತಿ, ಅಸಸ್ಸತಾ ಭವಗತೇ ಅನಿಚ್ಚಮ್ಹಿ;

ನ ಚ ಸನ್ತಸನ್ತಿ ಬಾಲಾ, ಪುನಪ್ಪುನಂ ಜಾಯಿತಬ್ಬಸ್ಸ.

೪೫೮. ‘‘ಚತ್ತಾರೋ ವಿನಿಪಾತಾ, ದುವೇ [ದ್ವೇ (ಸಬ್ಬತ್ಥ)] ಚ ಗತಿಯೋ ಕಥಞ್ಚಿ ಲಬ್ಭನ್ತಿ;

ನ ಚ ವಿನಿಪಾತಗತಾನಂ, ಪಬ್ಬಜ್ಜಾ ಅತ್ಥಿ ನಿರಯೇಸು.

೪೫೯. ‘‘ಅನುಜಾನಾಥ ಮಂ ಉಭಯೋ, ಪಬ್ಬಜಿತುಂ ದಸಬಲಸ್ಸ ಪಾವಚನೇ;

ಅಪ್ಪೋಸ್ಸುಕ್ಕಾ ಘಟಿಸ್ಸಂ, ಜಾತಿಮರಣಪ್ಪಹಾನಾಯ.

೪೬೦. ‘‘ಕಿಂ ಭವಗತೇ [ಭವಗತೇನ (ಸ್ಯಾ.)] ಅಭಿನನ್ದಿತೇನ, ಕಾಯಕಲಿನಾ ಅಸಾರೇನ;

ಭವತಣ್ಹಾಯ ನಿರೋಧಾ, ಅನುಜಾನಾಥ ಪಬ್ಬಜಿಸ್ಸಾಮಿ.

೪೬೧. ‘‘ಬುದ್ಧಾನಂ ಉಪ್ಪಾದೋ ವಿವಜ್ಜಿತೋ, ಅಕ್ಖಣೋ ಖಣೋ ಲದ್ಧೋ;

ಸೀಲಾನಿ ಬ್ರಹ್ಮಚರಿಯಂ, ಯಾವಜೀವಂ ನ ದೂಸೇಯ್ಯಂ’’.

೪೬೨. ಏವಂ ಭಣತಿ ಸುಮೇಧಾ, ಮಾತಾಪಿತರೋ ‘‘ನ ತಾವ ಆಹಾರಂ;

ಆಹರಿಸ್ಸಂ [ಆಹರಿಯಾಮಿ (ಸೀ.), ಆಹಾರಿಸಂ (?)] ಗಹಟ್ಠಾ, ಮರಣವಸಂ ಗತಾವ ಹೇಸ್ಸಾಮಿ’’.

೪೬೩. ಮಾತಾ ದುಕ್ಖಿತಾ ರೋದತಿ ಪಿತಾ ಚ, ಅಸ್ಸಾ ಸಬ್ಬಸೋ ಸಮಭಿಹತೋ;

ಘಟೇನ್ತಿ ಸಞ್ಞಾಪೇತುಂ, ಪಾಸಾದತಲೇ ಛಮಾಪತಿತಂ.

೪೬೪. ‘‘ಉಟ್ಠೇಹಿ ಪುತ್ತಕ ಕಿಂ ಸೋಚಿತೇನ, ದಿನ್ನಾಸಿ ವಾರಣವತಿಮ್ಹಿ;

ರಾಜಾ ಅನೀಕರತ್ತೋ [ಅಣೀಕದತ್ತೋ (ಸೀ. ಸ್ಯಾ.)], ಅಭಿರೂಪೋ ತಸ್ಸ ತ್ವಂ ದಿನ್ನಾ.

೪೬೫. ‘‘ಅಗ್ಗಮಹೇಸೀ ಭವಿಸ್ಸಸಿ, ಅನಿಕರತ್ತಸ್ಸ ರಾಜಿನೋ ಭರಿಯಾ;

ಸೀಲಾನಿ ಬ್ರಹ್ಮಚರಿಯಂ, ಪಬ್ಬಜ್ಜಾ ದುಕ್ಕರಾ ಪುತ್ತಕ.

೪೬೬. ‘‘ರಜ್ಜೇ ಆಣಾಧನಮಿಸ್ಸರಿಯಂ, ಭೋಗಾ ಸುಖಾ ದಹರಿಕಾಸಿ;

ಭುಞ್ಜಾಹಿ ಕಾಮಭೋಗೇ, ವಾರೇಯ್ಯಂ ಹೋತು ತೇ ಪುತ್ತ’’.

೪೬೭. ಅಥ ನೇ ಭಣತಿ ಸುಮೇಧಾ, ‘‘ಮಾ ಏದಿಸಿಕಾನಿ ಭವಗತಮಸಾರಂ;

ಪಬ್ಬಜ್ಜಾ ವಾ ಹೋಹಿತಿ, ಮರಣಂ ವಾ ಮೇ ನ ಚೇವ ವಾರೇಯ್ಯಂ.

೪೬೮. ‘‘ಕಿಮಿವ ಪೂತಿಕಾಯಮಸುಚಿಂ, ಸವನಗನ್ಧಂ ಭಯಾನಕಂ ಕುಣಪಂ;

ಅಭಿಸಂವಿಸೇಯ್ಯಂ ಭಸ್ತಂ, ಅಸಕಿಂ ಪಗ್ಘರಿತಂ ಅಸುಚಿಪುಣ್ಣಂ.

೪೬೯. ‘‘ಕಿಮಿವ ತಾಹಂ ಜಾನನ್ತೀ, ವಿಕುಲಕಂ ಮಂಸಸೋಣಿತುಪಲಿತ್ತಂ;

ಕಿಮಿಕುಲಾಲಯಂ ಸಕುಣಭತ್ತಂ, ಕಳೇವರಂ ಕಿಸ್ಸ ದಿಯ್ಯತಿ.

೪೭೦. ‘‘ನಿಬ್ಬುಯ್ಹತಿ ಸುಸಾನಂ, ಅಚಿರಂ ಕಾಯೋ ಅಪೇತವಿಞ್ಞಾಣೋ;

ಛುದ್ಧೋ [ಛಡ್ಡಿತೋ (ಸ್ಯಾ.), ಛುಟ್ಠೋ (ಕ.)] ಕಳಿಙ್ಗರಂ ವಿಯ, ಜಿಗುಚ್ಛಮಾನೇಹಿ ಞಾತೀಹಿ.

೪೭೧. ‘‘ಛುದ್ಧೂನ [ಛಡ್ಡೂನ (ಸ್ಯಾ.), ಛುಟ್ಠೂನ (ಕ.)] ನಂ ಸುಸಾನೇ, ಪರಭತ್ತಂ ನ್ಹಾಯನ್ತಿ [ನ್ಹಾಯರೇ (?)] ಜಿಗುಚ್ಛನ್ತಾ;

ನಿಯಕಾ ಮಾತಾಪಿತರೋ, ಕಿಂ ಪನ ಸಾಧಾರಣಾ ಜನತಾ.

೪೭೨. ‘‘ಅಜ್ಝೋಸಿತಾ ಅಸಾರೇ, ಕಳೇವರೇ ಅಟ್ಠಿನ್ಹಾರುಸಙ್ಘಾತೇ;

ಖೇಳಸ್ಸುಚ್ಚಾರಸ್ಸವ, ಪರಿಪುಣ್ಣೇ [ಖೇಳಸ್ಸುಚ್ಚಾರಪಸ್ಸವಪರಿಪುಣ್ಣೇ (ಸೀ.)] ಪೂತಿಕಾಯಮ್ಹಿ.

೪೭೩. ‘‘ಯೋ ನಂ ವಿನಿಬ್ಭುಜಿತ್ವಾ, ಅಬ್ಭನ್ತರಮಸ್ಸ ಬಾಹಿರಂ ಕಯಿರಾ;

ಗನ್ಧಸ್ಸ ಅಸಹಮಾನಾ, ಸಕಾಪಿ ಮಾತಾ ಜಿಗುಚ್ಛೇಯ್ಯ.

೪೭೪. ‘‘ಖನ್ಧಧಾತುಆಯತನಂ, ಸಙ್ಖತಂ ಜಾತಿಮೂಲಕಂ ದುಕ್ಖಂ;

ಯೋನಿಸೋ ಅನುವಿಚಿನನ್ತೀ, ವಾರೇಯ್ಯಂ ಕಿಸ್ಸ ಇಚ್ಛೇಯ್ಯಂ.

೪೭೫. ‘‘ದಿವಸೇ ದಿವಸೇ ತಿಸತ್ತಿ, ಸತಾನಿ ನವನವಾ ಪತೇಯ್ಯುಂ ಕಾಯಮ್ಹಿ;

ವಸ್ಸಸತಮ್ಪಿ ಚ ಘಾತೋ, ಸೇಯ್ಯೋ ದುಕ್ಖಸ್ಸ ಚೇವಂ ಖಯೋ.

೪೭೬. ‘‘ಅಜ್ಝುಪಗಚ್ಛೇ ಘಾತಂ, ಯೋ ವಿಞ್ಞಾಯೇವಂ ಸತ್ಥುನೋ ವಚನಂ;

‘ದೀಘೋ ತೇಸಂ [ವೋ (ಕ.)] ಸಂಸಾರೋ, ಪುನಪ್ಪುನಂ ಹಞ್ಞಮಾನಾನಂ’.

೪೭೭. ‘‘ದೇವೇಸು ಮನುಸ್ಸೇಸು ಚ, ತಿರಚ್ಛಾನಯೋನಿಯಾ ಅಸುರಕಾಯೇ;

ಪೇತೇಸು ಚ ನಿರಯೇಸು ಚ, ಅಪರಿಮಿತಾ ದಿಸ್ಸರೇ ಘಾತಾ.

೪೭೮. ‘‘ಘಾತಾ ನಿರಯೇಸು ಬಹೂ, ವಿನಿಪಾತಗತಸ್ಸ ಪೀಳಿಯಮಾನಸ್ಸ [ಕಿಲಿಸ್ಸಮಾನಸ್ಸ (ಸ್ಯಾ. ಕ.)];

ದೇವೇಸುಪಿ ಅತ್ತಾಣಂ, ನಿಬ್ಬಾನಸುಖಾ ಪರಂ ನತ್ಥಿ.

೪೭೯. ‘‘ಪತ್ತಾ ತೇ ನಿಬ್ಬಾನಂ, ಯೇ ಯುತ್ತಾ ದಸಬಲಸ್ಸ ಪಾವಚನೇ;

ಅಪ್ಪೋಸ್ಸುಕ್ಕಾ ಘಟೇನ್ತಿ, ಜಾತಿಮರಣಪ್ಪಹಾನಾಯ.

೪೮೦. ‘‘ಅಜ್ಜೇವ ತಾತಭಿನಿಕ್ಖಮಿಸ್ಸಂ, ಭೋಗೇಹಿ ಕಿಂ ಅಸಾರೇಹಿ;

ನಿಬ್ಬಿನ್ನಾ ಮೇ ಕಾಮಾ, ವನ್ತಸಮಾ ತಾಲವತ್ಥುಕತಾ’’.

೪೮೧. ಸಾ ಚೇವಂ ಭಣತಿ ಪಿತರಮನೀಕರತ್ತೋ ಚ ಯಸ್ಸ ಸಾ ದಿನ್ನಾ;

ಉಪಯಾಸಿ ವಾರಣವತೇ, ವಾರೇಯ್ಯಮುಪಟ್ಠಿತೇ ಕಾಲೇ.

೪೮೨. ಅಥ ಅಸಿತನಿಚಿತಮುದುಕೇ, ಕೇಸೇ ಖಗ್ಗೇನ ಛಿನ್ದಿಯ ಸುಮೇಧಾ;

ಪಾಸಾದಂ ಪಿದಹಿತ್ವಾ [ಪಿಧೇತ್ವಾ (ಸೀ. ಸ್ಯಾ.), ಪಿಧಿತ್ವಾ (ಕ.)], ಪಠಮಜ್ಝಾನಂ ಸಮಾಪಜ್ಜಿ.

೪೮೩. ಸಾ ಚ ತಹಿಂ ಸಮಾಪನ್ನಾ, ಅನೀಕರತ್ತೋ ಚ ಆಗತೋ ನಗರಂ;

ಪಾಸಾದೇ ಚ [ಪಾಸಾದೇವ (ಸೀ. ಸ್ಯಾ.)] ಸುಮೇಧಾ, ಅನಿಚ್ಚಸಞ್ಞಂ [ಅನಿಚ್ಚಸಞ್ಞಾ (ಸಬ್ಬತ್ಥ)] ಸುಭಾವೇತಿ.

೪೮೪. ಸಾ ಚ ಮನಸಿ ಕರೋತಿ, ಅನೀಕರತ್ತೋ ಚ ಆರುಹೀ ತುರಿತಂ;

ಮಣಿಕನಕಭೂಸಿತಙ್ಗೋ, ಕತಞ್ಜಲೀ ಯಾಚತಿ ಸುಮೇಧಂ.

೪೮೫. ‘‘ರಜ್ಜೇ ಆಣಾಧನಮಿಸ್ಸರಿಯಂ, ಭೋಗಾ ಸುಖಾ ದಹರಿಕಾಸಿ;

ಭುಞ್ಜಾಹಿ ಕಾಮಭೋಗೇ, ಕಾಮಸುಖಾ ದುಲ್ಲಭಾ ಲೋಕೇ.

೪೮೬. ‘‘ನಿಸ್ಸಟ್ಠಂ ತೇ ರಜ್ಜಂ, ಭೋಗೇ ಭುಞ್ಜಸ್ಸು ದೇಹಿ ದಾನಾನಿ;

ಮಾ ದುಮ್ಮನಾ ಅಹೋಸಿ, ಮಾತಾಪಿತರೋ ತೇ ದುಕ್ಖಿತಾ’’ [ಮಾತಾಪಿತರೋ ಚ ತೇ ದುಖಿತಾ (?)].

೪೮೭. ತಂ ತಂ ಭಣತಿ ಸುಮೇಧಾ, ಕಾಮೇಹಿ ಅನತ್ಥಿಕಾ ವಿಗತಮೋಹಾ;

‘‘ಮಾ ಕಾಮೇ ಅಭಿನನ್ದಿ, ಕಾಮೇಸ್ವಾದೀನವಂ ಪಸ್ಸ.

೪೮೮. ‘‘ಚಾತುದ್ದೀಪೋ ರಾಜಾ ಮನ್ಧಾತಾ, ಆಸಿ ಕಾಮಭೋಗಿನ ಮಗ್ಗೋ;

ಅತಿತ್ತೋ ಕಾಲಙ್ಕತೋ, ನ ಚಸ್ಸ ಪರಿಪೂರಿತಾ ಇಚ್ಛಾ.

೪೮೯. ‘‘ಸತ್ತ ರತನಾನಿ ವಸ್ಸೇಯ್ಯ, ವುಟ್ಠಿಮಾ ದಸದಿಸಾ ಸಮನ್ತೇನ;

ನ ಚತ್ಥಿ ತಿತ್ತಿ ಕಾಮಾನಂ, ಅತಿತ್ತಾವ ಮರನ್ತಿ ನರಾ.

೪೯೦. ‘‘ಅಸಿಸೂನೂಪಮಾ ಕಾಮಾ, ಕಾಮಾ ಸಪ್ಪಸಿರೋಪಮಾ;

ಉಕ್ಕೋಪಮಾ ಅನುದಹನ್ತಿ, ಅಟ್ಠಿಕಙ್ಕಲ [ಕಙ್ಖಲ (ಸೀ.)] ಸನ್ನಿಭಾ.

೪೯೧. ‘‘ಅನಿಚ್ಚಾ ಅದ್ಧುವಾ ಕಾಮಾ, ಬಹುದುಕ್ಖಾ ಮಹಾವಿಸಾ;

ಅಯೋಗುಳೋವ ಸನ್ತತ್ತೋ, ಅಘಮೂಲಾ ದುಖಪ್ಫಲಾ.

೪೯೨. ‘‘ರುಕ್ಖಪ್ಫಲೂಪಮಾ ಕಾಮಾ, ಮಂಸಪೇಸೂಪಮಾ ದುಖಾ;

ಸುಪಿನೋಪಮಾ ವಞ್ಚನಿಯಾ, ಕಾಮಾ ಯಾಚಿತಕೂಪಮಾ.

೪೯೩. ‘‘ಸತ್ತಿಸೂಲೂಪಮಾ ಕಾಮಾ, ರೋಗೋ ಗಣ್ಡೋ ಅಘಂ ನಿಘಂ;

ಅಙ್ಗಾರಕಾಸುಸದಿಸಾ, ಅಘಮೂಲಂ ಭಯಂ ವಧೋ.

೪೯೪. ‘‘ಏವಂ ಬಹುದುಕ್ಖಾ ಕಾಮಾ, ಅಕ್ಖಾತಾ ಅನ್ತರಾಯಿಕಾ;

ಗಚ್ಛಥ ನ ಮೇ ಭಗವತೇ, ವಿಸ್ಸಾಸೋ ಅತ್ಥಿ ಅತ್ತನೋ.

೪೯೫. ‘‘ಕಿಂ ಮಮ ಪರೋ ಕರಿಸ್ಸತಿ, ಅತ್ತನೋ ಸೀಸಮ್ಹಿ ಡಯ್ಹಮಾನಮ್ಹಿ;

ಅನುಬನ್ಧೇ ಜರಾಮರಣೇ, ತಸ್ಸ ಘಾತಾಯ ಘಟಿತಬ್ಬಂ’’.

೪೯೬. ದ್ವಾರಂ ಅಪಾಪುರಿತ್ವಾನಹಂ [ಅವಾಪುರಿತ್ವಾಹಂ (ಸೀ.)], ಮಾತಾಪಿತರೋ ಅನೀಕರತ್ತಞ್ಚ;

ದಿಸ್ವಾನ ಛಮಂ ನಿಸಿನ್ನೇ, ರೋದನ್ತೇ ಇದಮವೋಚಂ.

೪೯೭. ‘‘ದೀಘೋ ಬಾಲಾನಂ ಸಂಸಾರೋ, ಪುನಪ್ಪುನಞ್ಚ ರೋದತಂ;

ಅನಮತಗ್ಗೇ ಪಿತು ಮರಣೇ, ಭಾತು ವಧೇ ಅತ್ತನೋ ಚ ವಧೇ.

೪೯೮. ‘‘ಅಸ್ಸು ಥಞ್ಞಂ ರುಧಿರಂ, ಸಂಸಾರಂ ಅನಮತಗ್ಗತೋ ಸರಥ;

ಸತ್ತಾನಂ ಸಂಸರತಂ, ಸರಾಹಿ ಅಟ್ಠೀನಞ್ಚ ಸನ್ನಿಚಯಂ.

೪೯೯. ‘‘ಸರ ಚತುರೋದಧೀ [ಸರಸ್ಸು ಚತುರೋ ಉದಧೀ (?)], ಉಪನೀತೇ ಅಸ್ಸುಥಞ್ಞರುಧಿರಮ್ಹಿ;

ಸರ ಏಕಕಪ್ಪಮಟ್ಠೀನಂ, ಸಞ್ಚಯಂ ವಿಪುಲೇನ ಸಮಂ.

೫೦೦. ‘‘ಅನಮತಗ್ಗೇ ಸಂಸರತೋ, ಮಹಿಂ [ಮಹಾಮಹಿಂ (?)] ಜಮ್ಬುದೀಪಮುಪನೀತಂ;

ಕೋಲಟ್ಠಿಮತ್ತಗುಳಿಕಾ, ಮಾತಾ ಮಾತುಸ್ವೇವ ನಪ್ಪಹೋನ್ತಿ.

೫೦೧. ‘‘ತಿಣಕಟ್ಠಸಾಖಾಪಲಾಸಂ [ಸರ ತಿಣಕಟ್ಠಸಾಖಾಪಲಾಸಂ (ಸೀ.)], ಉಪನೀತಂ ಅನಮತಗ್ಗತೋ ಸರ;

ಚತುರಙ್ಗುಲಿಕಾ ಘಟಿಕಾ, ಪಿತುಪಿತುಸ್ವೇವ ನಪ್ಪಹೋನ್ತಿ.

೫೦೨. ‘‘ಸರ ಕಾಣಕಚ್ಛಪಂ ಪುಬ್ಬಸಮುದ್ದೇ, ಅಪರತೋ ಚ ಯುಗಛಿದ್ದಂ;

ಸಿರಂ [ಸರ (ಸೀ.)] ತಸ್ಸ ಚ ಪಟಿಮುಕ್ಕಂ, ಮನುಸ್ಸಲಾಭಮ್ಹಿ ಓಪಮ್ಮಂ.

೫೦೩. ‘‘ಸರ ರೂಪಂ ಫೇಣಪಿಣ್ಡೋಪಮಸ್ಸ, ಕಾಯಕಲಿನೋ ಅಸಾರಸ್ಸ;

ಖನ್ಧೇ ಪಸ್ಸ ಅನಿಚ್ಚೇ, ಸರಾಹಿ ನಿರಯೇ ಬಹುವಿಘಾತೇ.

೫೦೪. ‘‘ಸರ ಕಟಸಿಂ ವಡ್ಢೇನ್ತೇ, ಪುನಪ್ಪುನಂ ತಾಸು ತಾಸು ಜಾತೀಸು;

ಸರ ಕುಮ್ಭೀಲಭಯಾನಿ ಚ, ಸರಾಹಿ ಚತ್ತಾರಿ ಸಚ್ಚಾನಿ.

೫೦೫. ‘‘ಅಮತಮ್ಹಿ ವಿಜ್ಜಮಾನೇ, ಕಿಂ ತವ ಪಞ್ಚಕಟುಕೇನ ಪೀತೇನ;

ಸಬ್ಬಾ ಹಿ ಕಾಮರತಿಯೋ, ಕಟುಕತರಾ ಪಞ್ಚಕಟುಕೇನ.

೫೦೬. ‘‘ಅಮತಮ್ಹಿ ವಿಜ್ಜಮಾನೇ, ಕಿಂ ತವ ಕಾಮೇಹಿ ಯೇ ಪರಿಳಾಹಾ [ಸಪರಿಳಾಹಾ (ಸೀ. ಅಟ್ಠ.)];

ಸಬ್ಬಾ ಹಿ ಕಾಮರತಿಯೋ, ಜಲಿತಾ ಕುಥಿತಾ ಕಮ್ಪಿತಾ ಸನ್ತಾಪಿತಾ.

೫೦೭. ‘‘ಅಸಪತ್ತಮ್ಹಿ ಸಮಾನೇ, ಕಿಂ ತವ ಕಾಮೇಹಿ ಯೇ ಬಹುಸಪತ್ತಾ;

ರಾಜಗ್ಗಿಚೋರಉದಕಪ್ಪಿಯೇಹಿ, ಸಾಧಾರಣಾ ಕಾಮಾ ಬಹುಸಪತ್ತಾ.

೫೦೮. ‘‘ಮೋಕ್ಖಮ್ಹಿ ವಿಜ್ಜಮಾನೇ, ಕಿಂ ತವ ಕಾಮೇಹಿ ಯೇಸು ವಧಬನ್ಧೋ;

ಕಾಮೇಸು ಹಿ ಅಸಕಾಮಾ, ವಧಬನ್ಧದುಖಾನಿ ಅನುಭೋನ್ತಿ.

೫೦೯. ‘‘ಆದೀಪಿತಾ ತಿಣುಕ್ಕಾ, ಗಣ್ಹನ್ತಂ ದಹನ್ತಿ ನೇವ ಮುಞ್ಚನ್ತಂ;

ಉಕ್ಕೋಪಮಾ ಹಿ ಕಾಮಾ, ದಹನ್ತಿ ಯೇ ತೇ ನ ಮುಞ್ಚನ್ತಿ.

೫೧೦. ‘‘ಮಾ ಅಪ್ಪಕಸ್ಸ ಹೇತು, ಕಾಮಸುಖಸ್ಸ ವಿಪುಲಂ ಜಹೀ ಸುಖಂ;

ಮಾ ಪುಥುಲೋಮೋವ ಬಳಿಸಂ, ಗಿಲಿತ್ವಾ ಪಚ್ಛಾ ವಿಹಞ್ಞಸಿ.

೫೧೧. ‘‘ಕಾಮಂ ಕಾಮೇಸು ದಮಸ್ಸು, ತಾವ ಸುನಖೋವ ಸಙ್ಖಲಾಬದ್ಧೋ;

ಕಾಹಿನ್ತಿ ಖು ತಂ ಕಾಮಾ, ಛಾತಾ ಸುನಖಂವ ಚಣ್ಡಾಲಾ.

೫೧೨. ‘‘ಅಪರಿಮಿತಞ್ಚ ದುಕ್ಖಂ, ಬಹೂನಿ ಚ ಚಿತ್ತದೋಮನಸ್ಸಾನಿ;

ಅನುಭೋಹಿಸಿ ಕಾಮಯುತ್ತೋ, ಪಟಿನಿಸ್ಸಜ [ಪಟಿನಿಸ್ಸರ (ಸೀ.)] ಅದ್ಧುವೇ ಕಾಮೇ.

೫೧೩. ‘‘ಅಜರಮ್ಹಿ ವಿಜ್ಜಮಾನೇ, ಕಿಂ ತವ ಕಾಮೇಹಿ [ಯೇಸು ಜರಾಯ ಚ; ಮರಣಬ್ಯಾಧಿಹಿ ಗಹಿತಾ (?)] ಯೇಸು ಜರಾ;

ಮರಣಬ್ಯಾಧಿಗಹಿತಾ [ಯೇಸು ಜರಾಯ ಚ; ಮರಣಬ್ಯಾಧಿಹಿ ಗಹಿತಾ (?)], ಸಬ್ಬಾ ಸಬ್ಬತ್ಥ ಜಾತಿಯೋ.

೫೧೪. ‘‘ಇದಮಜರಮಿದಮಮರಂ [ಇದಂ ಅಜರಂ ಇದಂ ಅಮರಂ (?)], ಇದಮಜರಾಮರಂ ಪದಮಸೋಕಂ;

ಅಸಪತ್ತಮಸಮ್ಬಾಧಂ, ಅಖಲಿತಮಭಯಂ ನಿರುಪತಾಪಂ.

೫೧೫. ‘‘ಅಧಿಗತಮಿದಂ ಬಹೂಹಿ, ಅಮತಂ ಅಜ್ಜಾಪಿ ಚ ಲಭನೀಯಮಿದಂ;

ಯೋ ಯೋನಿಸೋ ಪಯುಞ್ಜತಿ, ನ ಚ ಸಕ್ಕಾ ಅಘಟಮಾನೇನ’’.

೫೧೬. ಏವಂ ಭಣತಿ ಸುಮೇಧಾ, ಸಙ್ಖಾರಗತೇ ರತಿಂ ಅಲಭಮಾನಾ;

ಅನುನೇನ್ತೀ ಅನಿಕರತ್ತಂ, ಕೇಸೇ ಚ ಛಮಂ ಖಿಪಿ ಸುಮೇಧಾ.

೫೧೭. ಉಟ್ಠಾಯ ಅನಿಕರತ್ತೋ, ಪಞ್ಜಲಿಕೋ ಯಾಚಿತಸ್ಸಾ ಪಿತರಂ ಸೋ;

‘‘ವಿಸ್ಸಜ್ಜೇಥ ಸುಮೇಧಂ, ಪಬ್ಬಜಿತುಂ ವಿಮೋಕ್ಖಸಚ್ಚದಸ್ಸಾ’’.

೫೧೮. ವಿಸ್ಸಜ್ಜಿತಾ ಮಾತಾಪಿತೂಹಿ, ಪಬ್ಬಜಿ ಸೋಕಭಯಭೀತಾ;

ಛ ಅಭಿಞ್ಞಾ ಸಚ್ಛಿಕತಾ, ಅಗ್ಗಫಲಂ ಸಿಕ್ಖಮಾನಾಯ.

೫೧೯. ಅಚ್ಛರಿಯಮಬ್ಭುತಂ ತಂ, ನಿಬ್ಬಾನಂ ಆಸಿ ರಾಜಕಞ್ಞಾಯ;

ಪುಬ್ಬೇನಿವಾಸಚರಿತಂ, ಯಥಾ ಬ್ಯಾಕರಿ ಪಚ್ಛಿಮೇ ಕಾಲೇ.

೫೨೦. ‘‘ಭಗವತಿ ಕೋಣಾಗಮನೇ, ಸಙ್ಘಾರಾಮಮ್ಹಿ ನವನಿವೇಸಮ್ಹಿ;

ಸಖಿಯೋ ತಿಸ್ಸೋ ಜನಿಯೋ, ವಿಹಾರದಾನಂ ಅದಾಸಿಮ್ಹ.

೫೨೧. ‘‘ದಸಕ್ಖತ್ತುಂ ಸತಕ್ಖತ್ತುಂ, ದಸಸತಕ್ಖತ್ತುಂ ಸತಾನಿ ಚ ಸತಕ್ಖತ್ತುಂ;

ದೇವೇಸು ಉಪ್ಪಜ್ಜಿಮ್ಹ, ಕೋ ಪನ ವಾದೋ ಮನುಸ್ಸೇಸು.

೫೨೨. ‘‘ದೇವೇಸು ಮಹಿದ್ಧಿಕಾ ಅಹುಮ್ಹ, ಮಾನುಸಕಮ್ಹಿ ಕೋ ಪನ ವಾದೋ;

ಸತ್ತರತನಸ್ಸ ಮಹೇಸೀ, ಇತ್ಥಿರತನಂ ಅಹಂ ಆಸಿಂ.

೫೨೩. ‘‘ಸೋ ಹೇತು ಸೋ ಪಭವೋ, ತಂ ಮೂಲಂ ಸಾವ ಸಾಸನೇ ಖನ್ತೀ;

ತಂ ಪಠಮಸಮೋಧಾನಂ, ತಂ ಧಮ್ಮರತಾಯ ನಿಬ್ಬಾನಂ’’.