೩. ಉಪ್ಪಲದಾಯಿಕಾಥೇರೀಅಪದಾನಂ

೫೭. ‘‘ನಗರೇ ಅರುಣವತಿಯಾ, ಅರುಣೋ ನಾಮ ಖತ್ತಿಯೋ;

ತಸ್ಸ ರಞ್ಞೋ ಅಹುಂ ಭರಿಯಾ, ಏಕಜ್ಝಂ ಚಾರಯಾಮಹಂ.

೫೮. ‘‘ರಹೋಗತಾ ನಿಸೀದಿತ್ವಾ, ಏವಂ ಚಿನ್ತೇಸಹಂ ತದಾ;

‘ಕುಸಲಂ ಮೇ ಕತಂ ನತ್ಥಿ, ಆದಾಯ ಗಮಿಯಂ ಮಮ.

೫೯. ‘‘‘ಮಹಾಭಿತಾಪಂ ಕಟುಕಂ, ಘೋರರೂಪಂ ಸುದಾರುಣಂ;

ನಿರಯಂ ನೂನ ಗಚ್ಛಾಮಿ, ಏತ್ಥ ಮೇ ನತ್ಥಿ ಸಂಸಯೋ’.

೬೦. ‘‘ಏವಾಹಂ ಚಿನ್ತಯಿತ್ವಾನ, ಪಹಂಸೇತ್ವಾನ ಮಾನಸಂ;

ರಾಜಾನಂ ಉಪಗನ್ತ್ವಾನ, ಇದಂ ವಚನಮಬ್ರವಿಂ.

೬೧. ‘‘‘ಇತ್ಥೀ ನಾಮ ಮಯಂ ದೇವ, ಪುರಿಸಾನಿತ್ತರಾ ಅಹು [ಪುರಿಸಾನುಗತಾ ಸದಾ (ಸೀ.), ಪುರಿಸಾ ನ ಭವಾಮ ನೋ (ಸ್ಯಾ.), ಪುರಿಸಾನಂ ಭರಾ ಮಯಂ (ಪೀ.)];

ಏಕಂ ಮೇ ಸಮಣಂ ದೇಹಿ, ಭೋಜಯಿಸ್ಸಾಮಿ ಖತ್ತಿಯ’.

೬೨. ‘‘ಅದಾಸಿ ಮೇ ತದಾ ರಾಜಾ, ಸಮಣಂ ಭಾವಿತಿನ್ದ್ರಿಯಂ;

ತಸ್ಸ ಪತ್ತಂ ಗಹೇತ್ವಾನ, ಪರಮನ್ನೇನ ಪೂರಯಿಂ.

೬೩. ‘‘ಪೂರೇತ್ವಾ ಪರಮಂ ಅನ್ನಂ, ಸಹ ಸುಗನ್ಧಲೇಪನಂ;

ಮಹಾಚೇಲೇನ ಛಾದಿತ್ವಾ, ಅದಾಸಿಂ ತುಟ್ಠಮಾನಸಾ.

೬೪. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೬೫. ‘‘ಸಹಸ್ಸದೇವರಾಜೂನಂ, ಮಹೇಸಿತ್ತಮಕಾರಯಿಂ;

ಸಹಸ್ಸಚಕ್ಕವತ್ತೀನಂ, ಮಹೇಸಿತ್ತಮಕಾರಯಿಂ.

೬೬. ‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;

ನಾನಾವಿಧಂ ಬಹುಂ ಅಞ್ಞಂ, ತಸ್ಸ ಕಮ್ಮಫಲಂ ತತೋ.

೬೭. ‘‘ಉಪ್ಪಲಸ್ಸೇವ ಮೇ ವಣ್ಣೋ, ಅಭಿರೂಪಾ ಸುದಸ್ಸನಾ;

ಇತ್ಥಿಸಬ್ಬಙ್ಗಸಮ್ಪನ್ನಾ, ಅಭಿಜಾತಾ ಜುತಿನ್ಧರಾ.

೬೮. ‘‘ಪಚ್ಛಿಮೇ ಭವೇ ಸಮ್ಪತ್ತೇ, ಅಜಾಯಿಂ ಸಾಕಿಯೇ ಕುಲೇ;

ನಾರೀಸಹಸ್ಸಪಾಮೋಕ್ಖಾ, ಸುದ್ಧೋದನಸುತಸ್ಸಹಂ.

೬೯. ‘‘ನಿಬ್ಬಿನ್ದಿತ್ವಾ ಅಗಾರೇಹಂ, ಪಬ್ಬಜಿಂ ಅನಗಾರಿಯಂ;

ಸತ್ತಮೀರತ್ತಿಸಮ್ಪತ್ತಾ [ಸತ್ತಮಿಂರತ್ತಿಮಪತ್ತಾ (ಸೀ. ಸ್ಯಾ. ಪೀ.)], ಚತುಸಚ್ಚಮಪಾಪುಣಿಂ.

೭೦. ‘‘ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;

ಪರಿಮೇತುಂ ನ ಸಕ್ಕೋಮಿ, ಪಿಣ್ಡಪಾತಸ್ಸಿದಂ ಫಲಂ.

೭೧. ‘‘ಯಂ ಮಯ್ಹಂ ಪೂರಿತಂ ಕಮ್ಮಂ, ಕುಸಲಂ ಸರಸೇ ಮುನಿ;

ತುಯ್ಹತ್ಥಾಯ ಮಹಾವೀರ, ಪರಿಚತ್ತಂ ಬಹುಂ ಮಯಾ.

೭೨. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪಿಣ್ಡಪಾತಸ್ಸಿದಂ ಫಲಂ.

೭೩. ‘‘ದ್ವೇ ಗತಿಯೋ ಪಜಾನಾಮಿ, ದೇವತ್ತಂ ಅಥ ಮಾನುಸಂ;

ಅಞ್ಞಂ ಗತಿಂ ನ ಜಾನಾಮಿ, ಪಿಣ್ಡಪಾತಸ್ಸಿದಂ ಫಲಂ.

೭೪. ‘‘ಉಚ್ಚೇ ಕುಲೇ ಪಜಾಯಾಮಿ, ಮಹಾಸಾಲೇ [ತಯೋ ಸಾಲ (ಕ.)] ಮಹದ್ಧನೇ;

ಅಞ್ಞೇ ಕುಲೇ ನ ಜಾಯಾಮಿ, ಪಿಣ್ಡಪಾತಸ್ಸಿದಂ ಫಲಂ.

೭೫. ‘‘ಭವಾಭವೇ ಸಂಸರಿತ್ವಾ, ಸುಕ್ಕಮೂಲೇನ ಚೋದಿತಾ;

ಅಮನಾಪಂ ನ ಪಸ್ಸಾಮಿ, ಸೋಮನಸ್ಸಕತಂ ಫಲಂ.

೭೬. ‘‘ಇದ್ಧೀಸು ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;

ಚೇತೋಪರಿಯಞಾಣಸ್ಸ, ವಸೀ ಹೋಮಿ ಮಹಾಮುನೇ.

೭೭. ‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;

ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.

೭೮. ‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;

ಞಾಣಂ ಮಮ ಮಹಾವೀರ, ಉಪ್ಪನ್ನಂ ತವ ಸನ್ತಿಕೇ.

೭೯. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.

೮೦. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೮೧. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಉಪ್ಪಲದಾಯಿಕಾ ಭಿಕ್ಖುನೀ ಭಗವತೋ ಸಮ್ಮುಖಾ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಉಪ್ಪಲದಾಯಿಕಾಥೇರಿಯಾಪದಾನಂ ತತಿಯಂ.