೪. ಸಿಙ್ಗಾಲಮಾತುಥೇರೀಅಪದಾನಂ

೮೨. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.

೮೩. ‘‘ತದಾಹಂ ಹಂಸವತಿಯಂ, ಜಾತಾಮಚ್ಚಕುಲೇ ಅಹುಂ;

ನಾನಾರತನಪಜ್ಜೋತೇ, ಇದ್ಧೇ ಫೀತೇ ಮಹದ್ಧನೇ.

೮೪. ‘‘ಪಿತುನಾ ಸಹ ಗನ್ತ್ವಾನ, ಮಹಾಜನಪುರಕ್ಖತಾ;

ಧಮ್ಮಂ ಬುದ್ಧಸ್ಸ ಸುತ್ವಾನ, ಪಬ್ಬಜಿಂ ಅನಗಾರಿಯಂ.

೮೫. ‘‘ಪಬ್ಬಜಿತ್ವಾನ ಕಾಯೇನ, ಪಾಪಕಮ್ಮಂ ವಿವಜ್ಜಯಿಂ;

ವಚೀದುಚ್ಚರಿತಂ ಹಿತ್ವಾ, ಆಜೀವಂ ಪರಿಸೋಧಯಿಂ.

೮೬. ‘‘ಬುದ್ಧೇ ಪಸನ್ನಾ ಧಮ್ಮೇ ಚ, ಸಙ್ಘೇ ಚ ತಿಬ್ಬಗಾರವಾ;

ಸದ್ಧಮ್ಮಸ್ಸವನೇ ಯುತ್ತಾ, ಬುದ್ಧದಸ್ಸನಲಾಲಸಾ [ಬುದ್ಧದಸ್ಸನಸಾಲಯಾ (ಸ್ಯಾ.)].

೮೭. ‘‘ಅಗ್ಗಂ ಸದ್ಧಾಧಿಮುತ್ತಾನಂ, ಅಸ್ಸೋಸಿಂ ಭಿಕ್ಖುನಿಂ ತದಾ;

ತಂ ಠಾನಂ ಪತ್ಥಯಿತ್ವಾನ, ತಿಸ್ಸೋ ಸಿಕ್ಖಾ ಅಪೂರಯಿಂ.

೮೮. ‘‘ತತೋ ಮಂ ಸುಗತೋ ಆಹ, ಕರುಣಾನುಗತಾಸಯೋ;

‘ಯಸ್ಸ ಸದ್ಧಾ ತಥಾಗತೇ, ಅಚಲಾ ಸುಪ್ಪತಿಟ್ಠಿತಾ;

ಸೀಲಞ್ಚ ಯಸ್ಸ ಕಲ್ಯಾಣಂ, ಅರಿಯಕನ್ತಂ ಪಸಂಸಿತಂ.

೮೯. ‘‘‘ಸಙ್ಘೇ ಪಸಾದೋ ಯಸ್ಸತ್ಥಿ, ಉಜುಭೂತಞ್ಚ ದಸ್ಸನಂ;

ಅದಲಿದ್ದೋತಿ ತಂ ಆಹು, ಅಮೋಘಂ ತಸ್ಸ ಜೀವಿತಂ.

೯೦. ‘‘‘ತಸ್ಮಾ ಸದ್ಧಞ್ಚ ಸೀಲಞ್ಚ, ಪಸಾದಂ ಧಮ್ಮದಸ್ಸನಂ;

ಅನುಯುಞ್ಜೇಥ ಮೇಧಾವೀ, ಸರಂ ಬುದ್ಧಾನ [ಬುದ್ಧಾನುಸಾಸನಂ (ಸೀ.), ಬುದ್ಧಾನಂ ಸಾಸನಂ (ಸ್ಯಾ.)] ಸಾಸನಂ’.

೯೧. ‘‘ತಂ ಸುತ್ವಾಹಂ ಪಮುದಿತಾ, ಅಪುಚ್ಛಿಂ ಪಣಿಧಿಂ ಮಮ;

ತದಾ ಅನೋಮೋ ಅಮಿತೋ, ಬ್ಯಾಕರಿತ್ಥ ವಿನಾಯಕೋ;

‘ಬುದ್ಧೇ ಪಸನ್ನಾ ಕಲ್ಯಾಣೀ, ಲಚ್ಛಸೇ ತಂ ಸುಪತ್ಥಿತಂ.

೯೨. ‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೯೩. ‘‘‘ತಸ್ಸ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;

ಸಿಙ್ಗಾಲಕಸ್ಸ [ಸಿಗಾಲಕಸ್ಸ (ಸೀ. ಪೀ.)] ಮಾತಾತಿ, ಹೇಸ್ಸತಿ ಸತ್ಥು ಸಾವಿಕಾ’.

೯೪. ‘‘ತಂ ಸುತ್ವಾ ಮುದಿತಾ ಹುತ್ವಾ, ಯಾವಜೀವಂ ತದಾ ಜಿನಂ;

ಮೇತ್ತಚಿತ್ತಾ ಪರಿಚರಿಂ, ಪಟಿಪತ್ತೀಹಿ ನಾಯಕಂ.

೯೫. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೯೬. ‘‘ಪಚ್ಛಿಮೇ ಚ ಭವೇ ದಾನಿ, ಗಿರಿಬ್ಬಜಪುರುತ್ತಮೇ;

ಜಾತಾ ಸೇಟ್ಠಿಕುಲೇ ಫೀತೇ, ಮಹಾರತನಸಞ್ಚಯೇ.

೯೭. ‘‘ಪುತ್ತೋ ಸಿಙ್ಗಾಲಕೋ ನಾಮ, ಮಮಾಸಿ ವಿಪಥೇ ರತೋ;

ದಿಟ್ಠಿಗಹನಪಕ್ಖನ್ದೋ, ದಿಸಾಪೂಜನತಪ್ಪರೋ.

೯೮. ‘‘ನಾನಾದಿಸಾ ನಮಸ್ಸನ್ತಂ [ನಮಸ್ಸತಿ (ಸ್ಯಾ.)], ಪಿಣ್ಡಾಯ ನಗರಂ ವಜಂ;

ತಂ ದಿಸ್ವಾ ಓವದೀ ಬುದ್ಧೋ, ಮಗ್ಗೇ ಠತ್ವಾ ವಿನಾಯಕೋ.

೯೯. ‘‘ತಸ್ಸ ದೇಸಯತೋ ಧಮ್ಮಂ, ಪನಾದೋ ವಿಮ್ಹಯೋ ಅಹು;

ದ್ವೇಕೋಟಿನರನಾರೀನಂ, ಧಮ್ಮಾಭಿಸಮಯೋ ಅಹು.

೧೦೦. ‘‘ತದಾಹಂ ಪರಿಸಂ ಗನ್ತ್ವಾ, ಸುತ್ವಾ ಸುಗತಭಾಸಿತಂ;

ಸೋತಾಪತ್ತಿಫಲಂ ಪತ್ತಾ, ಪಬ್ಬಜಿಂ ಅನಗಾರಿಯಂ.

೧೦೧. ‘‘ನ ಚಿರೇನೇವ ಕಾಲೇನ, ಬುದ್ಧದಸ್ಸನಲಾಲಸಾ;

ಅನುಸ್ಸತಿಂ ತಂ ಭಾವೇತ್ವಾ, ಅರಹತ್ತಮಪಾಪುಣಿಂ.

೧೦೨. ‘‘ದಸ್ಸನತ್ಥಾಯ ಬುದ್ಧಸ್ಸ, ಸಬ್ಬದಾ ಚ ವಜಾಮಹಂ;

ಅತಿತ್ತಾಯೇವ ಪಸ್ಸಾಮಿ, ರೂಪಂ ನಯನನನ್ದನಂ.

೧೦೩. ‘‘ಸಬ್ಬಪಾರಮಿಸಮ್ಭೂತಂ, ಲಕ್ಖೀನಿಲಯನಂ ವರಂ;

ರೂಪಂ ಸಬ್ಬಸುಭಾಕಿಣ್ಣಂ, ಅತಿತ್ತಾ ವಿಹರಾಮಹಂ.

೧೦೪. ‘‘ಜಿನೋ ತಸ್ಮಿಂ ಗುಣೇ ತುಟ್ಠೋ, ಏತದಗ್ಗೇ ಠಪೇಸಿ ಮಂ;

ಸಿಙ್ಗಾಲಕಸ್ಸ ಯಾ ಮಾತಾ, ಅಗ್ಗಾ ಸದ್ಧಾಧಿಮುತ್ತಿಕಾ [ಸಂಘವಿಮುತ್ತಿಕಾ (ಪೀ.), ಮಮಾಧಿಮುತ್ತಿಕಾ (ಕ.)].

೧೦೫. ‘‘ಇದ್ಧೀಸು ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;

ಚೇತೋಪರಿಯಞಾಣಸ್ಸ, ವಸೀ ಹೋಮಿ ಮಹಾಮುನಿ.

೧೦೬. ‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;

ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.

೧೦೭. ‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;

ಞಾಣಂ ಮಮ ಮಹಾವೀರ, ಉಪ್ಪನ್ನಂ ತವ ಸನ್ತಿಕೇ.

೧೦೮. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.

೧೦೯. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೧೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಸಿಙ್ಗಾಲಮಾತಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸಿಙ್ಗಾಲಮಾತುಥೇರಿಯಾಪದಾನಂ ಚತುತ್ಥಂ.