೪. ಖತ್ತಿಯಾವಗ್ಗೋ

೧. ಯಸವತೀಪಮುಖಅಟ್ಠಾರಸಭಿಕ್ಖುನೀಸಹಸ್ಸಅಪದಾನಂ

೧. ‘‘ಭವಾ ಸಬ್ಬೇ ಪರಿಕ್ಖೀಣಾ, ಭವಾ ಸನ್ತಿ ವಿಮೋಚಿತಾ;

ಸಬ್ಬಾಸವಾ ಚ ನೋ ನತ್ಥಿ, ಆರೋಚೇಮ ಮಹಾಮುನೇ.

೨. ‘‘ಪುರಿಮಂ ಕುಸಲಂ ಕಮ್ಮಂ [ಪರಿಕಮ್ಮಞ್ಚ ಕುಸಲಂ (ಸ್ಯಾ.)], ಯಂ ಕಿಞ್ಚಿ ಸಾಧುಪತ್ಥಿತಂ;

ಪರಿಭೋಗಮಯಂ ದಿನ್ನಂ, ತುಯ್ಹತ್ಥಾಯ ಮಹಾಮುನೇ.

೩. ‘‘ಬುದ್ಧಪಚ್ಚೇಕಬುದ್ಧಾನಂ, ಸಾವಕಾನಞ್ಚ ಪತ್ಥಿತಂ [ಬುದ್ಧಾನಂ ಸಾವಕಾನಞ್ಚ (ಸೀ. ಕ.)];

ಪರಿಭೋಗಮಯಂ ದಿನ್ನಂ, ತುಯ್ಹತ್ಥಾಯ ಮಹಾಮುನೇ.

೪. ‘‘ಉಚ್ಚನೀಚಮಯಂ ಕಮ್ಮಂ, ಭಿಕ್ಖೂನಂ ಸಾಧುಪತ್ಥಿತಂ;

ಉಚ್ಚಾಕುಲಪರಿಕಮ್ಮಂ, ಕತಮೇತಂ ಮಹಾಮುನೇ [ಕತಮ್ಹೇಹಿ ಮಹಾಮುನೇ (ಸ್ಯಾ. ಪೀ.)].

೫. ‘‘ತೇನೇವ ಸುಕ್ಕಮೂಲೇನ, ಚೋದಿತಾ ಕಮ್ಮಸಮ್ಪದಾ;

ಮಾನುಸಿಕಮತಿಕ್ಕನ್ತಾ, ಜಾಯಿಂಸು ಖತ್ತಿಯೇ ಕುಲೇ.

೬. ‘‘ಉಪ್ಪತ್ತೇ ಚ ಕತೇ ಕಮ್ಮೇ, ಜಾತಿಯಾ ವಾಪಿ ಏಕತೋ;

ಪಚ್ಛಿಮೇ ಏಕತೋ ಜಾತಾ, ಖತ್ತಿಯಾ ಕುಲಸಮ್ಭವಾ.

೭. ‘‘ರೂಪವತೀ ಭೋಗವತೀ, ಲಾಭಸಕ್ಕಾರಪೂಜಿತಾ;

ಅನ್ತೇಪುರೇ ಮಹಾವೀರ, ದೇವಾನಂ ವಿಯ ನನ್ದನೇ.

೮. ‘‘ನಿಬ್ಬಿನ್ದಿತ್ವಾ ಅಗಾರಮ್ಹಾ, ಪಬ್ಬಜಿಮ್ಹನಗಾರಿಯಂ;

ಕತಿಪಾಹಂ ಉಪಾದಾಯ, ಸಬ್ಬಾ ಪತ್ತಾಮ್ಹ ನಿಬ್ಬುತಿಂ.

೯. ‘‘ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;

ಉಪನೇನ್ತಿ ಬಹೂ ಅಮ್ಹೇ, ಸದಾ ಸಕ್ಕತಪೂಜಿತಾ.

೧೦. ‘‘ಕಿಲೇಸಾ ಝಾಪಿತಾ ಅಮ್ಹಂ, ಭವಾ ಸಬ್ಬೇ ಸಮೂಹತಾ;

ನಾಗೀವ ಬನ್ಧನಂ ಛೇತ್ವಾ, ವಿಹರಾಮ ಅನಾಸವಾ.

೧೧. ‘‘ಸ್ವಾಗತಂ ವತ ನೋ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೧೨. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಯಸವತೀಪಮುಖಾನಿ ಖತ್ತಿಯಕಞ್ಞಾಭಿಕ್ಖುನಿಯೋ ಅಟ್ಠಾರಸಸಹಸ್ಸಾನಿ ಭಗವತೋ ಸಮ್ಮುಖಾ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಯಸವತೀಪಮುಖಅಟ್ಠಾರಸಭಿಕ್ಖುನೀಸಹಸ್ಸಾಪದಾನಂ ಪಠಮಂ.

೨. ಚತುರಾಸೀತಿಭಿಕ್ಖುನೀಸಹಸ್ಸಅಪದಾನಂ

೧೩. ‘‘ಚುಲ್ಲಾಸೀತಿಸಹಸ್ಸಾನಿ, ಬ್ರಾಹ್ಮಞ್ಞಕುಲಸಮ್ಭವಾ [ಬ್ರಾಹ್ಮಣಕುಲಸಮ್ಭವಾ (ಸ್ಯಾ. ಕ.)];

ಸುಖುಮಾಲಹತ್ಥಪಾದಾ, ಪುರೇ ತುಯ್ಹಂ ಮಹಾಮುನೇ.

೧೪. ‘‘ವೇಸ್ಸಸುದ್ದಕುಲೇ ಜಾತಾ, ದೇವಾ ನಾಗಾ ಚ ಕಿನ್ನರಾ;

ಚಾತುದ್ದೀಪಾ ಬಹೂ ಕಞ್ಞಾ, ಪುರೇ ತುಯ್ಹಂ ಮಹಾಮುನೇ.

೧೫. ‘‘ಕಾಚಿ ಪಬ್ಬಜಿತಾ ಅತ್ಥಿ, ಸಬ್ಬದಸ್ಸಾವಿನೋ [ಸಚ್ಚದಸ್ಸಾವಿನೋ (ಸೀ. ಪೀ.)] ಹೂ;

ದೇವಾ ಚ ಕಿನ್ನರಾ ನಾಗಾ, ಫುಸಿಸ್ಸನ್ತಿ ಅನಾಗತೇ.

೧೬. ‘‘ಅನುಭೋತ್ವಾ ಯಸಂ ಸಬ್ಬಂ, ಪತ್ವಾನ ಸಬ್ಬಸಮ್ಪದಾ;

ತುಮ್ಹಂ [ತ್ವಯಿ (ಸೀ. ಪೀ.)] ಪಸಾದಂ ಪಟಿಲದ್ಧಾ, ಬುಜ್ಝಿಸ್ಸನ್ತಿ ಅನಾಗತೇ.

೧೭. ‘‘ಅಮ್ಹೇ ಬ್ರಾಹ್ಮಣಧೀತಾ ತು, ಬ್ರಾಹ್ಮಞ್ಞಕುಲಸಮ್ಭವಾ;

ಪೇಕ್ಖತೋ ನೋ [ಲಕ್ಖಣಾ ಚ (ಸ್ಯಾ.)] ಮಹಾವೀರ, ಪಾದೇ ವನ್ದಾಮ ಚಕ್ಖುಮ.

೧೮. ‘‘ಉಪಹತಾ ಭವಾ ಸಬ್ಬೇ, ಮೂಲತಣ್ಹಾ ಸಮೂಹತಾ;

ಸಮುಚ್ಛಿನ್ನಾ ಅನುಸಯಾ, ಪುಞ್ಞಸಙ್ಖಾರದಾಲಿತಾ.

೧೯. ‘‘ಸಮಾಧಿಗೋಚರಾ ಸಬ್ಬಾ, ಸಮಾಪತ್ತಿವಸೀ ಕತಾ;

ಝಾನೇನ ಧಮ್ಮರತಿಯಾ, ವಿಹರಿಸ್ಸಾಮ ನೋ ಸದಾ.

೨೦. ‘‘ಭವನೇತ್ತಿ ಅವಿಜ್ಜಾ ಚ, ಸಙ್ಖಾರಾಪಿ ಚ ಖೇಪಿತಾ;

ಸುದುದ್ದಸಂ ಪದಂ ಗನ್ತ್ವಾ, ಅನುಜಾನಾಥ [ಅನುಜಾನಿಮ್ಹ (ಸ್ಯಾ. ಪೀ. ಕ.)] ನಾಯಕ.

೨೧. ‘‘ಉಪಕಾರಾ ಮಮಂ ತುಮ್ಹೇ, ದೀಘರತ್ತಂ ಕತಾವಿನೋ;

ಚತುನ್ನಂ ಸಂಸಯಂ ಛೇತ್ವಾ, ಸಬ್ಬಾ ಗಚ್ಛನ್ತು ನಿಬ್ಬುತಿಂ.

೨೨. ‘‘ವನ್ದಿತ್ವಾ ಮುನಿನೋ ಪಾದೇ, ಕತ್ವಾ ಇದ್ಧಿವಿಕುಬ್ಬನಂ;

ಕಾಚಿ ದಸ್ಸೇನ್ತಿ ಆಲೋಕಂ, ಅನ್ಧಕಾರಮಥಾಪರಾ.

೨೩. ‘‘ದಸ್ಸೇನ್ತಿ ಚನ್ದಸೂರಿಯೇ, ಸಾಗರಞ್ಚ ಸಮಚ್ಛಕಂ;

ಸಿನೇರುಂ ಪರಿಭಣ್ಡಞ್ಚ, ದಸ್ಸೇನ್ತಿ ಪಾರಿಛತ್ತಕಂ.

೨೪. ‘‘ತಾವತಿಂಸಞ್ಚ ಭವನಂ, ಯಾಮಂ ದಸ್ಸೇನ್ತಿ ಇದ್ಧಿಯಾ;

ತುಸಿತಂ ನಿಮ್ಮಿತೇ ದೇವೇ, ವಸವತ್ತೀ ಮಹಿಸ್ಸರೇ.

೨೫. ‘‘ಬ್ರಹ್ಮಾನೋ ಕಾಚಿ ದಸ್ಸೇನ್ತಿ, ಚಙ್ಕಮಞ್ಚ ಮಹಾರಹಂ;

ಬ್ರಹ್ಮವಣ್ಣಞ್ಚ ಮಾಪೇತ್ವಾ, ಧಮ್ಮಂ ದೇಸೇನ್ತಿ ಸುಞ್ಞತಂ.

೨೬. ‘‘ನಾನಾವಿಕುಬ್ಬನಂ ಕತ್ವಾ, ಇದ್ಧಿಂ ದಸ್ಸಿಯ ಸತ್ಥುನೋ;

ದಸ್ಸಯಿಂಸು ಬಲಂ ಸಬ್ಬಾ, ಪಾದೇ ವನ್ದಿಂಸು ಸತ್ಥುನೋ.

೨೭. ‘‘ಇದ್ಧೀಸು ಚ ವಸೀ ಹೋಮ, ದಿಬ್ಬಾಯ ಸೋತಧಾತುಯಾ;

ಚೇತೋಪರಿಯಞಾಣಸ್ಸ, ವಸೀ ಹೋಮ ಮಹಾಮುನೇ.

೨೮. ‘‘ಪುಬ್ಬೇನಿವಾಸಂ ಜಾನಾಮ, ದಿಬ್ಬಚಕ್ಖು ವಿಸೋಧಿತಂ;

ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.

೨೯. ‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;

ಞಾಣಂ ಅಮ್ಹಂ ಮಹಾವೀರ, ಉಪ್ಪನ್ನಂ ತವ ಸನ್ತಿಕೇ.

೩೦. ‘‘ಪುಬ್ಬಾನಂ ಲೋಕನಾಥಾನಂ, ಸಙ್ಗಮಂ ನೋ ನಿದಸ್ಸಿತಂ;

ಅಧಿಕಾರಂ ಬಹುಂ ಅಮ್ಹಂ, ತುಯ್ಹತ್ಥಾಯ ಮಹಾಮುನೇ.

೩೧. ‘‘ಯಂ ಅಮ್ಹೇಹಿ ಕತಂ ಕಮ್ಮಂ, ಕುಸಲಂ ಸರ ತಂ ಮುನೇ;

ತುಯ್ಹತ್ಥಾಯ ಮಹಾವೀರ, ಪುಞ್ಞಾನುಪಚಿತಾನಿ ನೋ.

೩೨. ‘‘ಸತಸಹಸ್ಸಿತೋ ಕಪ್ಪೇ, ಪದುಮುತ್ತರೋ ಮಹಾಮುನಿ;

ಪುರಂ ಹಂಸವತೀ ನಾಮ, ಸಮ್ಬುದ್ಧಸ್ಸ ಕುಲಾಸಯಂ.

೩೩. ‘‘ದ್ವಾರೇನ ಹಂಸವತಿಯಾ, ಗಙ್ಗಾ ಸನ್ದತಿ ಸಬ್ಬದಾ;

ಉಬ್ಬಳ್ಹಾ ನದಿಯಾ ಭಿಕ್ಖೂ, ಗಮನಂ ನ ಲಭನ್ತಿ ತೇ.

೩೪. ‘‘ದಿವಸಂ ದ್ವೇ ತಯೋ ಚೇವ, ಸತ್ತಾಹಂ ಮಾಸಿಕಂ ತತೋ;

ಚತುಮಾಸಮ್ಪಿ ಸಮ್ಪುಣ್ಣಂ, ಗಮನಂ ನ ಲಭನ್ತಿ ತೇ.

೩೫. ‘‘ತದಾ ಅಹು ಸತ್ತಸಾರೋ, ಜಟಿಲೋ ನಾಮ ರಟ್ಠಿಕೋ;

ಓರುದ್ಧೇ [ಓರತೀರೇ (ಸ್ಯಾ.)] ಭಿಕ್ಖವೋ ದಿಸ್ವಾ, ಸೇತುಂ ಗಙ್ಗಾಯ ಕಾರಯಿ.

೩೬. ‘‘ತದಾ ಸತಸಹಸ್ಸೇಹಿ, ಸೇತುಂ ಗಙ್ಗಾಯ ಕಾರಯಿ;

ಸಙ್ಘಸ್ಸ ಓರಿಮೇ ತೀರೇ, ವಿಹಾರಞ್ಚ ಅಕಾರಯಿ.

೩೭. ‘‘ಇತ್ಥಿಯೋ ಪುರಿಸಾ ಚೇವ, ಉಚ್ಚನೀಚಕುಲಾನಿ ಚ;

ತಸ್ಸ ಸೇತುಂ ವಿಹಾರಞ್ಚ [ತೇಸು ಸೇತುವಿಹಾರೇಸು (ಸೀ.), ತಸ್ಸ ಸೇತೂ ವಿಹಾರೇ ಚ (ಪೀ.)], ಸಮಭಾಗಂ ಅಕಂಸು ತೇ.

೩೮. ‘‘ಅಮ್ಹೇ ಅಞ್ಞೇ ಚ ಮಾನುಜಾ, ವಿಪ್ಪಸನ್ನೇನ ಚೇತಸಾ;

ತಸ್ಸ ಧಮ್ಮೇಸು ದಾಯಾದಾ, ನಗರೇ ಜನಪದೇಸು ಚ.

೩೯. ‘‘ಇತ್ಥೀ ಪುಮಾ ಕುಮಾರಾ ಚ, ಬಹೂ ಚೇವ ಕುಮಾರಿಕಾ;

ಸೇತುನೋ ಚ ವಿಹಾರಸ್ಸ, ವಾಲುಕಾ ಆಕಿರಿಂಸು ತೇ.

೪೦. ‘‘ವೀಥಿಂ ಸಮ್ಮಜ್ಜನಂ ಕತ್ವಾ, ಕದಲೀಪುಣ್ಣಘಟೇ ಧಜೇ;

ಧೂಪಂ ಚುಣ್ಣಞ್ಚ ಮಾಲಞ್ಚ, ಕಾರಂ ಕತ್ವಾನ ಸತ್ಥುನೋ.

೪೧. ‘‘ಸೇತುವಿಹಾರೇ ಕಾರೇತ್ವಾ, ನಿಮನ್ತೇತ್ವಾ ವಿನಾಯಕಂ;

ಮಹಾದಾನಂ ದದಿತ್ವಾನ, ಸಮ್ಬೋಧಿಂ ಅಭಿಪತ್ಥಯಿಂ.

೪೨. ‘‘ಪದುಮುತ್ತರೋ ಮಹಾವೀರೋ, ತಾರಕೋ ಸಬ್ಬಪಾಣಿನಂ;

ಅನುಮೋದನೀಯಂಕಾಸಿ, ಜಟಿಲಸ್ಸ ಮಹಾಮುನಿ [ಕತ್ವಾ, ವಿಯಾಕಾಸಿ ಮಹಾಮುನಿ (ಸ್ಯಾ.)].

೪೩. ‘‘‘ಸತಸಹಸ್ಸಾತಿಕ್ಕನ್ತೇ, ಕಪ್ಪೋ ಹೇಸ್ಸತಿ ಭದ್ದಕೋ;

ಭವಾಭವೇನುಭೋತ್ವಾನ, ಪಾಪುಣಿಸ್ಸತಿ ಬೋಧಿಯಂ.

೪೪. ‘‘‘ಕಾಚಿ ಹತ್ಥಪರಿಕಮ್ಮಂ, ಕತಾವೀ ನರನಾರಿಯೋ;

ಅನಾಗತಮ್ಹಿ ಅದ್ಧಾನೇ, ಸಬ್ಬಾ ಹೇಸ್ಸನ್ತಿ ಸಮ್ಮುಖಾ’.

೪೫. ‘‘ತೇನ ಕಮ್ಮವಿಪಾಕೇನ, ಚೇತನಾಪಣಿಧೀಹಿ ಚ;

ಉಪ್ಪನ್ನಾ ದೇವಭವನಂ, ತುಯ್ಹಂ ತಾ ಪರಿಚಾರಿಕಾ.

೪೬. ‘‘ದಿಬ್ಬಸುಖಂ ಅಸಙ್ಖಿಯಂ, ಮಾನುಸಞ್ಚ ಅಸಙ್ಖಿಯಂ;

ತುಯ್ಹಂ ತೇ ಪರಿಚಾರೇಮ, ಸಂಸರಿಮ್ಹ ಭವಾಭವೇ.

೪೭. ‘‘ಸತಸಹಸ್ಸಿತೋ ಕಪ್ಪೇ, ಸುಕತಂ ಕಮ್ಮಸಮ್ಪದಂ;

ಸುಖುಮಾಲೀ ಮನುಸ್ಸಾನಂ, ಅಥೋ ದೇವಪುರೇ ವರೇ.

೪೮. ‘‘ರೂಪಭೋಗಯಸೇ ಚೇವ, ಅಥೋ ಕಿತ್ತಿಞ್ಚ ಸಕ್ಕತಂ [ಕಿತ್ತಿಸುಖಂ ಪಿಯಂ (ಸ್ಯಾ.)];

ಲಭಾಮ ಸತತಂ ಸಬ್ಬಂ, ಸುಕತಂ ಕಮ್ಮಸಮ್ಪದಂ.

೪೯. ‘‘ಪಚ್ಛಿಮೇ ಭವೇ ಸಮ್ಪತ್ತೇ, ಜಾತಾಮ್ಹ ಬ್ರಾಹ್ಮಣೇ ಕುಲೇ;

ಸುಖುಮಾಲಹತ್ಥಪಾದಾ, ಸಕ್ಯಪುತ್ತನಿವೇಸನೇ.

೫೦. ‘‘ಸಬ್ಬಕಾಲಮ್ಪಿ ಪಥವಿಂ, ನ ಪಸ್ಸಾಮ ನ ಲಙ್ಕತಂ;

ಚಿಕ್ಖಲ್ಲಭೂಮಿಮಸುಚಿಂ [ಚಿಕ್ಖಲ್ಲಂ ಭೂಮಿಂ ಗಮನಂ (ಸ್ಯಾ.)], ನ ಪಸ್ಸಾಮ ಮಹಾಮುನೇ.

೫೧. ‘‘ಅಗಾರಂ ವಸನ್ತೇ ಅಮ್ಹೇ, ಸಕ್ಕಾರಂ ಸಬ್ಬಕಾಲಿಕಂ;

ಉಪನೇನ್ತಿ ಸದಾ ಸಬ್ಬಂ, ಪುಬ್ಬಕಮ್ಮಫಲೇನ ನೋ [ಪುಬ್ಬಕಮ್ಮಫಲಂ ತತೋ (ಸೀ. ಪೀ.)].

೫೨. ‘‘ಅಗಾರಂ ಪಜಹಿತ್ವಾನ, ಪಬ್ಬಜಿತ್ವಾನಗಾರಿಯಂ;

ಸಂಸಾರಪಥನಿತ್ಥಿಣ್ಣಾ, ವೀತರಾಗಾ ಭವಾಮಸೇ [ನತ್ಥಿ ದಾನಿ ಪುನಬ್ಭವೋ (ಸೀ. ಸ್ಯಾ. ಪೀ.)].

೫೩. ‘‘ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;

ಉಪನೇನ್ತಿ ಸದಾ ಅಮ್ಹೇ, ಸಹಸ್ಸಾನಿ ತತೋ ತತೋ.

೫೪. ‘‘ಕಿಲೇಸಾ ಝಾಪಿತಾ ಅಮ್ಹಂ…ಪೇ… ವಿಹರಾಮ ಅನಾಸವಾ.

೫೫. ‘‘ಸ್ವಾಗತಂ ವತ ನೋ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೫೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಚತುರಾಸೀತಿಬ್ರಾಹ್ಮಣಕಞ್ಞಾಭಿಕ್ಖುನೀಸಹಸ್ಸಾನಿ ಭಗವತೋ ಸಮ್ಮುಖಾ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಚತುರಾಸೀತಿಭಿಕ್ಖುನೀಸಹಸ್ಸಾಪದಾನಂ ದುತಿಯಂ.

೩. ಉಪ್ಪಲದಾಯಿಕಾಥೇರೀಅಪದಾನಂ

೫೭. ‘‘ನಗರೇ ಅರುಣವತಿಯಾ, ಅರುಣೋ ನಾಮ ಖತ್ತಿಯೋ;

ತಸ್ಸ ರಞ್ಞೋ ಅಹುಂ ಭರಿಯಾ, ಏಕಜ್ಝಂ ಚಾರಯಾಮಹಂ.

೫೮. ‘‘ರಹೋಗತಾ ನಿಸೀದಿತ್ವಾ, ಏವಂ ಚಿನ್ತೇಸಹಂ ತದಾ;

‘ಕುಸಲಂ ಮೇ ಕತಂ ನತ್ಥಿ, ಆದಾಯ ಗಮಿಯಂ ಮಮ.

೫೯. ‘‘‘ಮಹಾಭಿತಾಪಂ ಕಟುಕಂ, ಘೋರರೂಪಂ ಸುದಾರುಣಂ;

ನಿರಯಂ ನೂನ ಗಚ್ಛಾಮಿ, ಏತ್ಥ ಮೇ ನತ್ಥಿ ಸಂಸಯೋ’.

೬೦. ‘‘ಏವಾಹಂ ಚಿನ್ತಯಿತ್ವಾನ, ಪಹಂಸೇತ್ವಾನ ಮಾನಸಂ;

ರಾಜಾನಂ ಉಪಗನ್ತ್ವಾನ, ಇದಂ ವಚನಮಬ್ರವಿಂ.

೬೧. ‘‘‘ಇತ್ಥೀ ನಾಮ ಮಯಂ ದೇವ, ಪುರಿಸಾನಿತ್ತರಾ ಅಹು [ಪುರಿಸಾನುಗತಾ ಸದಾ (ಸೀ.), ಪುರಿಸಾ ನ ಭವಾಮ ನೋ (ಸ್ಯಾ.), ಪುರಿಸಾನಂ ಭರಾ ಮಯಂ (ಪೀ.)];

ಏಕಂ ಮೇ ಸಮಣಂ ದೇಹಿ, ಭೋಜಯಿಸ್ಸಾಮಿ ಖತ್ತಿಯ’.

೬೨. ‘‘ಅದಾಸಿ ಮೇ ತದಾ ರಾಜಾ, ಸಮಣಂ ಭಾವಿತಿನ್ದ್ರಿಯಂ;

ತಸ್ಸ ಪತ್ತಂ ಗಹೇತ್ವಾನ, ಪರಮನ್ನೇನ ಪೂರಯಿಂ.

೬೩. ‘‘ಪೂರೇತ್ವಾ ಪರಮಂ ಅನ್ನಂ, ಸಹ ಸುಗನ್ಧಲೇಪನಂ;

ಮಹಾಚೇಲೇನ ಛಾದಿತ್ವಾ, ಅದಾಸಿಂ ತುಟ್ಠಮಾನಸಾ.

೬೪. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೬೫. ‘‘ಸಹಸ್ಸದೇವರಾಜೂನಂ, ಮಹೇಸಿತ್ತಮಕಾರಯಿಂ;

ಸಹಸ್ಸಚಕ್ಕವತ್ತೀನಂ, ಮಹೇಸಿತ್ತಮಕಾರಯಿಂ.

೬೬. ‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;

ನಾನಾವಿಧಂ ಬಹುಂ ಅಞ್ಞಂ, ತಸ್ಸ ಕಮ್ಮಫಲಂ ತತೋ.

೬೭. ‘‘ಉಪ್ಪಲಸ್ಸೇವ ಮೇ ವಣ್ಣೋ, ಅಭಿರೂಪಾ ಸುದಸ್ಸನಾ;

ಇತ್ಥಿಸಬ್ಬಙ್ಗಸಮ್ಪನ್ನಾ, ಅಭಿಜಾತಾ ಜುತಿನ್ಧರಾ.

೬೮. ‘‘ಪಚ್ಛಿಮೇ ಭವೇ ಸಮ್ಪತ್ತೇ, ಅಜಾಯಿಂ ಸಾಕಿಯೇ ಕುಲೇ;

ನಾರೀಸಹಸ್ಸಪಾಮೋಕ್ಖಾ, ಸುದ್ಧೋದನಸುತಸ್ಸಹಂ.

೬೯. ‘‘ನಿಬ್ಬಿನ್ದಿತ್ವಾ ಅಗಾರೇಹಂ, ಪಬ್ಬಜಿಂ ಅನಗಾರಿಯಂ;

ಸತ್ತಮೀರತ್ತಿಸಮ್ಪತ್ತಾ [ಸತ್ತಮಿಂರತ್ತಿಮಪತ್ತಾ (ಸೀ. ಸ್ಯಾ. ಪೀ.)], ಚತುಸಚ್ಚಮಪಾಪುಣಿಂ.

೭೦. ‘‘ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;

ಪರಿಮೇತುಂ ನ ಸಕ್ಕೋಮಿ, ಪಿಣ್ಡಪಾತಸ್ಸಿದಂ ಫಲಂ.

೭೧. ‘‘ಯಂ ಮಯ್ಹಂ ಪೂರಿತಂ ಕಮ್ಮಂ, ಕುಸಲಂ ಸರಸೇ ಮುನಿ;

ತುಯ್ಹತ್ಥಾಯ ಮಹಾವೀರ, ಪರಿಚತ್ತಂ ಬಹುಂ ಮಯಾ.

೭೨. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪಿಣ್ಡಪಾತಸ್ಸಿದಂ ಫಲಂ.

೭೩. ‘‘ದ್ವೇ ಗತಿಯೋ ಪಜಾನಾಮಿ, ದೇವತ್ತಂ ಅಥ ಮಾನುಸಂ;