೯. ಯಸೋಧರಾಪಮುಖದಸಭಿಕ್ಖುನೀಸಹಸ್ಸಅಪದಾನಂ

೪೧೧. ‘‘ಕಪ್ಪೇ ಚ ಸತಸಹಸ್ಸೇ, ಚತುರೋ ಚ ಅಸಙ್ಖಿಯೇ;

ದೀಪಙ್ಕರೋ ನಾಮ ಜಿನೋ, ಉಪ್ಪಜ್ಜಿ ಲೋಕನಾಯಕೋ.

೪೧೨. ‘‘ದೀಪಙ್ಕರೋ ಮಹಾವೀರೋ, ವಿಯಾಕಾಸಿ ವಿನಾಯಕೋ;

ಸುಮೇಧಞ್ಚ ಸುಮಿತ್ತಞ್ಚ, ಸಮಾನಸುಖದುಕ್ಖತಂ.

೪೧೩. ‘‘ಸದೇವಕಞ್ಚ ಪಸ್ಸನ್ತೋ, ವಿಚರನ್ತೋ ಸದೇವಕಂ;

ತೇಸಂ ಪಕಿತ್ತನೇ ಅಮ್ಹೇ, ಉಪಗಮ್ಮ ಸಮಾಗಮಂ.

೪೧೪. ‘‘ಅಮ್ಹಂ ಸಬ್ಬಪತಿ ಹೋಹಿ [ಸಬ್ಬಾ ಪತೀ ಹೋನ್ತಿ (ಪೀ.)], ಅನಾಗತಸಮಾಗಮೇ;

ಸಬ್ಬಾವ ತುಯ್ಹಂ ಭರಿಯಾ, ಮನಾಪಾ ಪಿಯವಾದಿಕಾ.

೪೧೫. ‘‘ದಾನಂ ಸೀಲಮಯಂ ಸಬ್ಬಂ, ಭಾವನಾ ಚ ಸುಭಾವಿತಾ;

ದೀಘರತ್ತಞ್ಚ ನೋ [ದೀಘರತ್ತಮಿದಂ (ಸ್ಯಾ. ಕ.)] ಸಬ್ಬಂ, ಪರಿಚ್ಚತ್ತಂ ಮಹಾಮುನೇ.

೪೧೬. ‘‘ಗನ್ಧಂ ವಿಲೇಪನಂ ಮಾಲಂ, ದೀಪಞ್ಚ ರತನಾಮಯಂ;

ಯಂಕಿಞ್ಚಿ ಪತ್ಥಿತಂ ಸಬ್ಬಂ, ಪರಿಚ್ಚತ್ತಂ ಮಹಾಮುನಿ.

೪೧೭. ‘‘ಅಞ್ಞಂ ವಾಪಿ ಕತಂ ಕಮ್ಮಂ, ಪರಿಭೋಗಞ್ಚ ಮಾನುಸಂ;

ದೀಘರತ್ತಞ್ಹಿ ನೋ ಸಬ್ಬಂ, ಪರಿಚ್ಚತ್ತಂ ಮಹಾಮುನಿ.

೪೧೮. ‘‘ಅನೇಕಜಾತಿಸಂಸಾರಂ, ಬಹುಂ ಪುಞ್ಞಮ್ಪಿ ನೋ ಕತಂ;

ಇಸ್ಸರಮನುಭೋತ್ವಾನ, ಸಂಸರಿತ್ವಾ ಭವಾಭವೇ.

೪೧೯. ‘‘ಪಚ್ಛಿಮೇ ಭವೇ ಸಮ್ಪತ್ತೇ, ಸಕ್ಯಪುತ್ತನಿವೇಸನೇ;

ನಾನಾಕುಲೂಪಪನ್ನಾಯೋ, ಅಚ್ಛರಾ ಕಾಮವಣ್ಣಿನೀ.

೪೨೦. ‘‘ಲಾಭಗ್ಗೇನ ಯಸಂ ಪತ್ತಾ, ಪೂಜಿತಾ ಸಬ್ಬಸಕ್ಕತಾ;

ಲಾಭಿಯೋ ಅನ್ನಪಾನಾನಂ, ಸದಾ ಸಮ್ಮಾನಿತಾ ಮಯಂ.

೪೨೧. ‘‘ಅಗಾರಂ ಪಜಹಿತ್ವಾನ, ಪಬ್ಬಜಿಮ್ಹನಗಾರಿಯಂ;

ಅಡ್ಢಮಾಸೇ ಅಸಮ್ಪತ್ತೇ, ಸಬ್ಬಾ ಪತ್ತಾಮ್ಹ ನಿಬ್ಬುತಿಂ.

೪೨೨. ‘‘ಲಾಭಿಯೋ ಅನ್ನಪಾನಾನಂ, ವತ್ಥಸೇನಾಸನಾನಿ ಚ;

ಉಪೇನ್ತಿ ಪಚ್ಚಯಾ ಸಬ್ಬೇ, ಸದಾ ಸಕ್ಕತಪೂಜಿತಾ.

೪೨೩. ‘‘ಕಿಲೇಸಾ ಝಾಪಿತಾ ಅಮ್ಹಂ…ಪೇ… ವಿಹರಾಮ ಅನಾಸವಾ.

೪೨೪. ‘‘ಸ್ವಾಗತಂ ವತ ನೋ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೪೨೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಯಸೋಧರಾಪಮುಖಾನಿ ದಸಭಿಕ್ಖುನೀಸಹಸ್ಸಾನಿ ಭಗವತೋ ಸಮ್ಮುಖಾ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಯಸೋಧರಾಪಮುಖದಸಭಿಕ್ಖುನೀಸಹಸ್ಸಾಪದಾನಂ ನವಮಂ.