೩. ಕುಣ್ಡಲಕೇಸೀವಗ್ಗೋ

೧. ಕುಣ್ಡಲಕೇಸಾಥೇರೀಅಪದಾನಂ

೧. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.

೨. ‘‘ತದಾಹಂ ಹಂಸವತಿಯಂ, ಜಾತಾ ಸೇಟ್ಠಿಕುಲೇ ಅಹುಂ;

ನಾನಾರತನಪಜ್ಜೋತೇ, ಮಹಾಸುಖಸಮಪ್ಪಿತಾ.

೩. ‘‘ಉಪೇತ್ವಾ ತಂ ಮಹಾವೀರಂ, ಅಸ್ಸೋಸಿಂ ಧಮ್ಮದೇಸನಂ;

ತತೋ ಜಾತಪ್ಪಸಾದಾಹಂ, ಉಪೇಸಿಂ ಸರಣಂ ಜಿನಂ.

೪. ‘‘ತದಾ ಮಹಾಕಾರುಣಿಕೋ, ಪದುಮುತ್ತರನಾಮಕೋ;

ಖಿಪ್ಪಾಭಿಞ್ಞಾನಮಗ್ಗನ್ತಿ, ಠಪೇಸಿ ಭಿಕ್ಖುನಿಂ ಸುಭಂ.

೫. ‘‘ತಂ ಸುತ್ವಾ ಮುದಿತಾ ಹುತ್ವಾ, ದಾನಂ ದತ್ವಾ ಮಹೇಸಿನೋ;

ನಿಪಚ್ಚ ಸಿರಸಾ ಪಾದೇ, ತಂ ಠಾನಮಭಿಪತ್ಥಯಿಂ.

೬. ‘‘ಅನುಮೋದಿ ಮಹಾವೀರೋ, ‘ಭದ್ದೇ ಯಂ ತೇಭಿಪತ್ಥಿತಂ;

ಸಮಿಜ್ಝಿಸ್ಸತಿ ತಂ ಸಬ್ಬಂ, ಸುಖಿನೀ ಹೋಹಿ ನಿಬ್ಬುತಾ.

೭. ‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೮. ‘‘‘ತಸ್ಸ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;

ಭದ್ದಾಕುಣ್ಡಲಕೇಸಾತಿ, ಹೇಸ್ಸತಿ ಸತ್ಥು ಸಾವಿಕಾ’.

೯. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೧೦. ‘‘ತತೋ ಚುತಾ ಯಾಮಮಗಂ, ತತೋಹಂ ತುಸಿತಂ ಗತಾ;

ತತೋ ಚ ನಿಮ್ಮಾನರತಿಂ, ವಸವತ್ತಿಪುರಂ ತತೋ.

೧೧. ‘‘ಯತ್ಥ ಯತ್ಥೂಪಪಜ್ಜಾಮಿ, ತಸ್ಸ ಕಮ್ಮಸ್ಸ ವಾಹಸಾ;

ತತ್ಥ ತತ್ಥೇವ ರಾಜೂನಂ, ಮಹೇಸಿತ್ತಮಕಾರಯಿಂ.

೧೨. ‘‘ತತೋ ಚುತಾ ಮನುಸ್ಸೇಸು, ರಾಜೂನಂ ಚಕ್ಕವತ್ತಿನಂ;

ಮಣ್ಡಲೀನಞ್ಚ ರಾಜೂನಂ, ಮಹೇಸಿತ್ತಮಕಾರಯಿಂ.

೧೩. ‘‘ಸಮ್ಪತ್ತಿಂ ಅನುಭೋತ್ವಾನ, ದೇವೇಸು ಮಾನುಸೇಸು ಚ;

ಸಬ್ಬತ್ಥ ಸುಖಿತಾ ಹುತ್ವಾ, ನೇಕಕಪ್ಪೇಸು ಸಂಸರಿಂ.

೧೪. ‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;

ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.

೧೫. ‘‘ಉಪಟ್ಠಾಕೋ ಮಹೇಸಿಸ್ಸ, ತದಾ ಆಸಿ ನರಿಸ್ಸರೋ;

ಕಾಸಿರಾಜಾ ಕಿಕೀ ನಾಮ, ಬಾರಾಣಸಿಪುರುತ್ತಮೇ.

೧೬. ‘‘ತಸ್ಸ ಧೀತಾ ಚತುತ್ಥಾಸಿಂ, ಭಿಕ್ಖುದಾಯೀತಿ ವಿಸ್ಸುತಾ;

ಧಮ್ಮಂ ಸುತ್ವಾ ಜಿನಗ್ಗಸ್ಸ, ಪಬ್ಬಜ್ಜಂ ಸಮರೋಚಯಿಂ.

೧೭. ‘‘ಅನುಜಾನಿ ನ ನೋ ತಾತೋ, ಅಗಾರೇವ ತದಾ ಮಯಂ;

ವೀಸವಸ್ಸಸಹಸ್ಸಾನಿ, ವಿಚರಿಮ್ಹ ಅತನ್ದಿತಾ.

೧೮. ‘‘ಕೋಮಾರಿಬ್ರಹ್ಮಚರಿಯಂ, ರಾಜಕಞ್ಞಾ ಸುಖೇಧಿತಾ;

ಬುದ್ಧೋಪಟ್ಠಾನನಿರತಾ, ಮುದಿತಾ ಸತ್ತ ಧೀತರೋ.

೧೯. ‘‘ಸಮಣೀ ಸಮಣಗುತ್ತಾ ಚ, ಭಿಕ್ಖುನೀ ಭಿಕ್ಖುದಾಯಿಕಾ;

ಧಮ್ಮಾ ಚೇವ ಸುಧಮ್ಮಾ ಚ, ಸತ್ತಮೀ ಸಙ್ಘದಾಯಿಕಾ.

೨೦. ‘‘ಖೇಮಾ ಉಪ್ಪಲವಣ್ಣಾ ಚ, ಪಟಾಚಾರಾ ಅಹಂ ತದಾ;

ಕಿಸಾಗೋತಮೀ ಧಮ್ಮದಿನ್ನಾ, ವಿಸಾಖಾ ಹೋತಿ ಸತ್ತಮೀ.

೨೧. ‘‘ತೇಹಿ ಕಮ್ಮೇಹಿ ಸುಕತೇಹಿ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೨೨. ‘‘ಪಚ್ಛಿಮೇ ಚ ಭವೇ ದಾನಿ, ಗಿರಿಬ್ಬಜಪುರುತ್ತಮೇ;

ಜಾತಾ ಸೇಟ್ಠಿಕುಲೇ ಫೀತೇ, ಯದಾಹಂ ಯೋಬ್ಬನೇ ಠಿತಾ.

೨೩. ‘‘ಚೋರಂ ವಧತ್ಥಂ ನೀಯನ್ತಂ, ದಿಸ್ವಾ ರತ್ತಾ ತಹಿಂ ಅಹಂ;

ಪಿತಾ ಮೇ ತಂ ಸಹಸ್ಸೇನ, ಮೋಚಯಿತ್ವಾ ವಧಾ ತತೋ.

೨೪. ‘‘ಅದಾಸಿ ತಸ್ಸ ಮಂ ತಾತೋ, ವಿದಿತ್ವಾನ ಮನಂ ಮಮ;

ತಸ್ಸಾಹಮಾಸಿಂ ವಿಸಟ್ಠಾ, ಅತೀವ ದಯಿತಾ ಹಿತಾ.

೨೫. ‘‘ಸೋ ಮೇ ಭೂಸನಲೋಭೇನ, ಬಲಿಮಜ್ಝಾಸಯೋ [ಖಲಿತಜ್ಝಾಸಯೋ (ಸೀ.), ಬಲಿಂ ಪಚ್ಚಾಹರಂ (ಸ್ಯಾ.), ಮಾಲಪಚ್ಛಾಹತಂ (ಪೀ.)] ದಿಸೋ;

ಚೋರಪ್ಪಪಾತಂ ನೇತ್ವಾನ, ಪಬ್ಬತಂ ಚೇತಯೀ ವಧಂ.

೨೬. ‘‘ತದಾಹಂ ಪಣಮಿತ್ವಾನ, ಸತ್ತುಕಂ ಸುಕತಞ್ಜಲೀ;

ರಕ್ಖನ್ತೀ ಅತ್ತನೋ ಪಾಣಂ, ಇದಂ ವಚನಮಬ್ರವಿಂ.

೨೭. ‘‘‘ಇದಂ ಸುವಣ್ಣಕೇಯೂರಂ, ಮುತ್ತಾ ವೇಳುರಿಯಾ ಬಹೂ;

ಸಬ್ಬಂ ಹರಸ್ಸು [ವರಸ್ಸು (ಕ.)] ಭದ್ದನ್ತೇ, ಮಞ್ಚ ದಾಸೀತಿ ಸಾವಯ’.

೨೮. ‘‘‘ಓರೋಪಯಸ್ಸು ಕಲ್ಯಾಣೀ, ಮಾ ಬಾಳ್ಹಂ ಪರಿದೇವಸಿ;

ನ ಚಾಹಂ ಅಭಿಜಾನಾಮಿ, ಅಹನ್ತ್ವಾ ಧನಮಾಭತಂ’.

೨೯. ‘‘‘ಯತೋ ಸರಾಮಿ ಅತ್ತಾನಂ, ಯತೋ ಪತ್ತೋಸ್ಮಿ ವಿಞ್ಞುತಂ;

ನ ಚಾಹಂ ಅಭಿಜಾನಾಮಿ, ಅಞ್ಞಂ ಪಿಯತರಂ ತಯಾ’.

೩೦. ‘‘‘ಏಹಿ ತಂ ಉಪಗೂಹಿಸ್ಸಂ, ಕತ್ವಾನ ತಂ ಪದಕ್ಖಿಣಂ;

ನ ಚ ದಾನಿ ಪುನೋ ಅತ್ಥಿ [ತಂ ವನ್ದಾಮಿ ಪುನ ನತ್ಥಿ (ಸ್ಯಾ.)], ಮಮ ತುಯ್ಹಞ್ಚ ಸಙ್ಗಮೋ.

೩೧. ‘‘‘ನ ಹಿ ಸಬ್ಬೇಸು ಠಾನೇಸು, ಪುರಿಸೋ ಹೋತಿ ಪಣ್ಡಿತೋ;

ಇತ್ಥೀಪಿ ಪಣ್ಡಿತಾ ಹೋತಿ, ತತ್ಥ ತತ್ಥ ವಿಚಕ್ಖಣಾ.

೩೨. ‘‘‘ನ ಹಿ ಸಬ್ಬೇಸು ಠಾನೇಸು, ಪುರಿಸೋ ಹೋತಿ ಪಣ್ಡಿತೋ;

ಇತ್ಥೀಪಿ ಪಣ್ಡಿತಾ ಹೋತಿ, ಲಹುಂ ಅತ್ಥವಿಚಿನ್ತಿಕಾ.

೩೩. ‘‘‘ಲಹುಞ್ಚ ವತ ಖಿಪ್ಪಞ್ಚ, ನಿಕಟ್ಠೇ [ನೇಕತ್ಥೇ (ಸೀ. ಸ್ಯಾ.)] ಸಮಚೇತಯಿಂ;

ಮಿಗಂ ಉಣ್ಣಾ ಯಥಾ ಏವಂ [ಚಿತ್ತಪುಣ್ಣಾಯ ತಾನೇವ (ಸ್ಯಾ.), ಮಿಗಂ ಪುಣ್ಣಾಯ ತೇನೇವ (ಪೀ.)], ತದಾಹಂ ಸತ್ತುಕಂ ವಧಿಂ.

೩೪. ‘‘‘ಯೋ ಚ ಉಪ್ಪತಿತಂ ಅತ್ಥಂ, ನ ಖಿಪ್ಪಮನುಬುಜ್ಝತಿ;

ಸೋ ಹಞ್ಞತೇ ಮನ್ದಮತಿ, ಚೋರೋವ ಗಿರಿಗಬ್ಭರೇ.

೩೫. ‘‘‘ಯೋ ಚ ಉಪ್ಪತಿತಂ ಅತ್ಥಂ, ಖಿಪ್ಪಮೇವ ನಿಬೋಧತಿ;

ಮುಚ್ಚತೇ ಸತ್ತುಸಮ್ಬಾಧಾ, ತದಾಹಂ ಸತ್ತುಕಾ ಯಥಾ’.

೩೬. ‘‘ತದಾಹಂ ಪಾತಯಿತ್ವಾನ, ಗಿರಿದುಗ್ಗಮ್ಹಿ ಸತ್ತುಕಂ;

ಸನ್ತಿಕಂ ಸೇತವತ್ಥಾನಂ, ಉಪೇತ್ವಾ ಪಬ್ಬಜಿಂ ಅಹಂ.

೩೭. ‘‘ಸಣ್ಡಾಸೇನ ಚ ಕೇಸೇ ಮೇ, ಲುಞ್ಚಿತ್ವಾ ಸಬ್ಬಸೋ ತದಾ;

ಪಬ್ಬಜಿತ್ವಾನ ಸಮಯಂ, ಆಚಿಕ್ಖಿಂಸು ನಿರನ್ತರಂ.

೩೮. ‘‘ತತೋ ತಂ ಉಗ್ಗಹೇತ್ವಾಹಂ, ನಿಸೀದಿತ್ವಾನ ಏಕಿಕಾ;

ಸಮಯಂ ತಂ ವಿಚಿನ್ತೇಸಿಂ, ಸುವಾನೋ ಮಾನುಸಂ ಕರಂ.

೩೯. ‘‘ಛಿನ್ನಂ ಗಯ್ಹ ಸಮೀಪೇ ಮೇ, ಪಾತಯಿತ್ವಾ ಅಪಕ್ಕಮಿ;

ದಿಸ್ವಾ ನಿಮಿತ್ತಮಲಭಿಂ, ಹತ್ಥಂ ತಂ ಪುಳವಾಕುಲಂ.

೪೦. ‘‘ತತೋ ಉಟ್ಠಾಯ ಸಂವಿಗ್ಗಾ, ಅಪುಚ್ಛಿಂ ಸಹಧಮ್ಮಿಕೇ;

ತೇ ಅವೋಚುಂ ವಿಜಾನನ್ತಿ, ತಂ ಅತ್ಥಂ ಸಕ್ಯಭಿಕ್ಖವೋ.

೪೧. ‘‘ಸಾಹಂ ತಮತ್ಥಂ ಪುಚ್ಛಿಸ್ಸಂ, ಉಪೇತ್ವಾ ಬುದ್ಧಸಾವಕೇ;

ತೇ ಮಮಾದಾಯ ಗಚ್ಛಿಂಸು, ಬುದ್ಧಸೇಟ್ಠಸ್ಸ ಸನ್ತಿಕಂ.

೪೨. ‘‘ಸೋ ಮೇ ಧಮ್ಮಮದೇಸೇಸಿ, ಖನ್ಧಾಯತನಧಾತುಯೋ;

ಅಸುಭಾನಿಚ್ಚದುಕ್ಖಾತಿ, ಅನತ್ತಾತಿ ಚ ನಾಯಕೋ.

೪೩. ‘‘ತಸ್ಸ ಧಮ್ಮಂ ಸುಣಿತ್ವಾಹಂ, ಧಮ್ಮಚಕ್ಖುಂ ವಿಸೋಧಯಿಂ;

ತತೋ ವಿಞ್ಞಾತಸದ್ಧಮ್ಮಾ, ಪಬ್ಬಜ್ಜಂ ಉಪಸಮ್ಪದಂ.

೪೪. ‘‘ಆಯಾಚಿತೋ ತದಾ ಆಹ, ‘ಏಹಿ ಭದ್ದೇ’ತಿ ನಾಯಕೋ;

ತದಾಹಂ ಉಪಸಮ್ಪನ್ನಾ, ಪರಿತ್ತಂ ತೋಯಮದ್ದಸಂ.

೪೫. ‘‘ಪಾದಪಕ್ಖಾಲನೇನಾಹಂ, ಞತ್ವಾ ಸಉದಯಬ್ಬಯಂ;

ತಥಾ ಸಬ್ಬೇಪಿ ಸಙ್ಖಾರೇ, ಈದಿಸಂ ಚಿನ್ತಯಿಂ [ಸಙ್ಖಾರಾ, ಇತಿ ಸಂಚಿನ್ತಯಿಂ (ಸೀ. ಸ್ಯಾ. ಪೀ.)] ತದಾ.

೪೬. ‘‘ತತೋ ಚಿತ್ತಂ ವಿಮುಚ್ಚಿ ಮೇ, ಅನುಪಾದಾಯ ಸಬ್ಬಸೋ;

ಖಿಪ್ಪಾಭಿಞ್ಞಾನಮಗ್ಗಂ ಮೇ, ತದಾ ಪಞ್ಞಾಪಯೀ ಜಿನೋ.

೪೭. ‘‘ಇದ್ಧೀಸು ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;

ಪರಚಿತ್ತಾನಿ ಜಾನಾಮಿ, ಸತ್ಥುಸಾಸನಕಾರಿಕಾ.

೪೮. ‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;

ಖೇಪೇತ್ವಾ ಆಸವೇ ಸಬ್ಬೇ, ವಿಸುದ್ಧಾಸಿಂ ಸುನಿಮ್ಮಲಾ.

೪೯. ‘‘ಪರಿಚಿಣ್ಣೋ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;

ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ.

೫೦. ‘‘ಯಸ್ಸತ್ಥಾಯ ಪಬ್ಬಜಿತಾ, ಅಗಾರಸ್ಮಾನಗಾರಿಯಂ;

ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ.

೫೧. ‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;

ಞಾಣಂ ಮೇ ವಿಮಲಂ ಸುದ್ಧಂ, ಬುದ್ಧಸೇಟ್ಠಸ್ಸ ಸಾಸನೇ.

೫೨. ‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ನಾಗೀವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವಾ.

೫೩. ‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೫೪. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಭದ್ದಾಕುಣ್ಡಲಕೇಸಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಕುಣ್ಡಲಕೇಸಾಥೇರಿಯಾಪದಾನಂ ಪಠಮಂ.

೨. ಕಿಸಾಗೋತಮೀಥೇರೀಅಪದಾನಂ

೫೫. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.

೫೬. ‘‘ತದಾಹಂ ಹಂಸವತಿಯಂ, ಜಾತಾ ಅಞ್ಞತರೇ ಕುಲೇ;

ಉಪೇತ್ವಾ ತಂ ನರವರಂ, ಸರಣಂ ಸಮುಪಾಗಮಿಂ.

೫೭. ‘‘ಧಮ್ಮಞ್ಚ ತಸ್ಸ ಅಸ್ಸೋಸಿಂ, ಚತುಸಚ್ಚೂಪಸಞ್ಹಿತಂ;

ಮಧುರಂ ಪರಮಸ್ಸಾದಂ, ವಟ್ಟಸನ್ತಿಸುಖಾವಹಂ [ಚಿತ್ತಸನ್ತಿ … (ಸ್ಯಾ.)].

೫೮. ‘‘ತದಾ ಚ ಭಿಕ್ಖುನಿಂ ವೀರೋ, ಲೂಖಚೀವರಧಾರಿನಿಂ;

ಠಪೇನ್ತೋ ಏತದಗ್ಗಮ್ಹಿ, ವಣ್ಣಯೀ ಪುರಿಸುತ್ತಮೋ.

೫೯. ‘‘ಜನೇತ್ವಾನಪ್ಪಕಂ ಪೀತಿಂ, ಸುತ್ವಾ ಭಿಕ್ಖುನಿಯಾ ಗುಣೇ;

ಕಾರಂ ಕತ್ವಾನ ಬುದ್ಧಸ್ಸ, ಯಥಾಸತ್ತಿ ಯಥಾಬಲಂ.

೬೦. ‘‘ನಿಪಚ್ಚ ಮುನಿವರಂ ತಂ, ತಂ ಠಾನಮಭಿಪತ್ಥಯಿಂ;

ತದಾನುಮೋದಿ ಸಮ್ಬುದ್ಧೋ, ಠಾನಲಾಭಾಯ ನಾಯಕೋ.

೬೧. ‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೬೨. ‘‘‘ತಸ್ಸ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;

ಕಿಸಾಗೋತಮೀ [ಗೋತಮೀ ನಾಮ (ಸೀ. ಕ.)] ನಾಮೇನ, ಹೇಸ್ಸತಿ ಸತ್ಥು ಸಾವಿಕಾ’.

೬೩. ‘‘ತಂ ಸುತ್ವಾ ಮುದಿತಾ ಹುತ್ವಾ, ಯಾವಜೀವಂ ತದಾ ಜಿನಂ;

ಮೇತ್ತಚಿತ್ತಾ ಪರಿಚರಿಂ, ಪಚ್ಚಯೇಹಿ ವಿನಾಯಕಂ.

೬೪. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೬೫. ‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;

ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.

೬೬. ‘‘ಉಪಟ್ಠಾಕೋ ಮಹೇಸಿಸ್ಸ, ತದಾ ಆಸಿ ನರಿಸ್ಸರೋ;

ಕಾಸಿರಾಜಾ ಕಿಕೀ ನಾಮ, ಬಾರಾಣಸಿಪುರುತ್ತಮೇ.

೬೭. ‘‘ಪಞ್ಚಮೀ ತಸ್ಸ ಧೀತಾಸಿಂ, ಧಮ್ಮಾ ನಾಮೇನ ವಿಸ್ಸುತಾ;

ಧಮ್ಮಂ ಸುತ್ವಾ ಜಿನಗ್ಗಸ್ಸ, ಪಬ್ಬಜ್ಜಂ ಸಮರೋಚಯಿಂ.

೬೮. ‘‘ಅನುಜಾನಿ ನ ನೋ ತಾತೋ, ಅಗಾರೇವ ತದಾ ಮಯಂ;

ವೀಸವಸ್ಸಸಹಸ್ಸಾನಿ, ವಿಚರಿಮ್ಹ ಅತನ್ದಿತಾ.

೬೯. ‘‘ಕೋಮಾರಿಬ್ರಹ್ಮಚರಿಯಂ, ರಾಜಕಞ್ಞಾ ಸುಖೇಧಿತಾ;

ಬುದ್ಧೋಪಟ್ಠಾನನಿರತಾ, ಮುದಿತಾ ಸತ್ತ ಧೀತರೋ.

೭೦. ‘‘ಸಮಣೀ ಸಮಣಗುತ್ತಾ ಚ, ಭಿಕ್ಖುನೀ ಭಿಕ್ಖುದಾಯಿಕಾ;

ಧಮ್ಮಾ ಚೇವ ಸುಧಮ್ಮಾ ಚ, ಸತ್ತಮೀ ಸಙ್ಘದಾಯಿಕಾ.

೭೧. ‘‘ಖೇಮಾ ಉಪ್ಪಲವಣ್ಣಾ ಚ, ಪಟಾಚಾರಾ ಚ ಕುಣ್ಡಲಾ;

ಅಹಞ್ಚ ಧಮ್ಮದಿನ್ನಾ ಚ, ವಿಸಾಖಾ ಹೋತಿ ಸತ್ತಮೀ.

೭೨. ‘‘ತೇಹಿ ಕಮ್ಮೇಹಿ ಸುಕತೇಹಿ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೭೩. ‘‘ಪಚ್ಛಿಮೇ ಚ ಭವೇ ದಾನಿ, ಜಾತಾ ಸೇಟ್ಠಿಕುಲೇ ಅಹಂ;