೧೦. ಯಸೋಧರಾಪಮುಖಅಟ್ಠಾರಸಭಿಕ್ಖುನೀಸಹಸ್ಸಅಪದಾನಂ

೪೨೬. ‘‘ಅಟ್ಠಾರಸಸಹಸ್ಸಾನಿ, ಭಿಕ್ಖುನೀ ಸಕ್ಯಸಮ್ಭವಾ;

ಯಸೋಧರಾಪಮುಖಾನಿ, ಸಮ್ಬುದ್ಧಂ ಉಪಸಙ್ಕಮುಂ.

೪೨೭. ‘‘ಅಟ್ಠಾರಸಸಹಸ್ಸಾನಿ, ಸಬ್ಬಾ ಹೋನ್ತಿ ಮಹಿದ್ಧಿಕಾ;

ವನ್ದನ್ತೀ ಮುನಿನೋ ಪಾದೇ, ಆರೋಚೇನ್ತಿ ಯಥಾಬಲಂ.

೪೨೮. ‘‘‘ಜಾತಿ ಖೀಣಾ ಜರಾ ಬ್ಯಾಧಿ, ಮರಣಞ್ಚ ಮಹಾಮುನಿ;

ಅನಾಸವಂ ಪದಂ ಸನ್ತಂ, ಅಮತಂ ಯಾಮ ನಾಯಕ.

೪೨೯. ‘‘‘ಖಲಿತಞ್ಚೇ ಪುರೇ ಅತ್ಥಿ, ಸಬ್ಬಾಸಮ್ಪಿ ಮಹಾಮುನಿ;

ಅಪರಾಧಮಜಾನನ್ತೀ, ಖಮ ಅಮ್ಹಂ ವಿನಾಯಕ.

೪೩೦. ‘‘‘ಇದ್ಧಿಞ್ಚಾಪಿ ನಿದಸ್ಸೇಥ, ಮಮ ಸಾಸನಕಾರಿಕಾ;

ಪರಿಸಾನಞ್ಚ ಸಬ್ಬಾಸಂ, ಕಙ್ಖಂ ಛಿನ್ದಥ ಯಾವತಾ.

೪೩೧. ‘‘‘ಯಸೋಧರಾ ಮಹಾವೀರ, ಮನಾಪಾ ಪಿಯದಸ್ಸನಾ;

ಸಬ್ಬಾ ತುಯ್ಹಂ ಮಹಾವೀರ, ಅಗಾರಸ್ಮಿಂ ಪಜಾಪತಿ.

೪೩೨. ‘‘‘ಥೀನಂ ಸತಸಹಸ್ಸಾನಂ, ನವುತೀನಂ ಛದುತ್ತರಿ;

ಅಗಾರೇ ತೇ ಮಯಂ ವೀರ, ಪಾಮೋಕ್ಖಾ ಸಬ್ಬಾ ಇಸ್ಸರಾ.

೪೩೩. ‘‘‘ರೂಪಾಚಾರಗುಣೂಪೇತಾ, ಯೋಬ್ಬನಟ್ಠಾ ಪಿಯಂವದಾ;

ಸಬ್ಬಾ ನೋ ಅಪಚಾಯನ್ತಿ, ದೇವತಾ ವಿಯ ಮಾನುಸಾ.

೪೩೪. ‘‘‘ಅಟ್ಠಾರಸಸಹಸ್ಸಾನಿ, ಸಬ್ಬಾ ಸಾಕಿಯಸಮ್ಭವಾ;

ಯಸೋಧರಾಸಹಸ್ಸಾನಿ, ಪಾಮೋಕ್ಖಾ ಇಸ್ಸರಾ ತದಾ.

೪೩೫. ‘‘‘ಕಾಮಧಾತುಮತಿಕ್ಕಮ್ಮ, ಸಣ್ಠಿತಾ ರೂಪಧಾತುಯಾ;

ರೂಪೇನ ಸದಿಸಾ ನತ್ಥಿ, ಸಹಸ್ಸಾನಂ ಮಹಾಮುನಿ.

೪೩೬. ‘‘‘ಸಮ್ಬುದ್ಧಂ ಅಭಿವಾದೇತ್ವಾ, ಇದ್ಧಿಂ ದಸ್ಸಂಸು ಸತ್ಥುನೋ;

ನೇಕಾ ನಾನಾವಿಧಾಕಾರಾ, ಮಹಾಇದ್ಧೀಪಿ ದಸ್ಸಯುಂ.

೪೩೭. ‘‘‘ಚಕ್ಕವಾಳಸಮಂ ಕಾಯಂ, ಸೀಸಂ ಉತ್ತರತೋ ಕುರು;

ಉಭೋ ಪಕ್ಖಾ ದುವೇ ದೀಪಾ, ಜಮ್ಬುದೀಪಂ ಸರೀರತೋ.

೪೩೮. ‘‘‘ದಕ್ಖಿಣಞ್ಚ ಸರಂ ಪಿಞ್ಛಂ, ನಾನಾಸಾಖಾ ತು ಪತ್ತಕಾ;

ಚನ್ದಞ್ಚ ಸೂರಿಯಞ್ಚಕ್ಖಿ, ಮೇರುಪಬ್ಬತತೋ ಸಿಖಂ.

೪೩೯. ‘‘‘ಚಕ್ಕವಾಳಗಿರಿಂ ತುಣ್ಡಂ, ಜಮ್ಬುರುಕ್ಖಂ ಸಮೂಲಕಂ;

ಬೀಜಮಾನಾ ಉಪಾಗನ್ತ್ವಾ, ವನ್ದನ್ತೀ ಲೋಕನಾಯಕಂ.

೪೪೦. ‘‘‘ಹತ್ಥಿವಣ್ಣಂ ತಥೇವಸ್ಸಂ, ಪಬ್ಬತಂ ಜಲಧಿಂ ತಥಾ;

ಚನ್ದಞ್ಚ ಸೂರಿಯಂ ಮೇರುಂ, ಸಕ್ಕವಣ್ಣಞ್ಚ ದಸ್ಸಯುಂ.

೪೪೧. ‘‘‘ಯಸೋಧರಾ ಮಯಂ ವೀರ, ಪಾದೇ ವನ್ದಾಮ ಚಕ್ಖುಮ;

ತವ ಚಿರಪಭಾವೇನ, ನಿಪ್ಫನ್ನಾ ನರನಾಯಕ.

೪೪೨. ‘‘‘ಇದ್ಧೀಸು ಚ ವಸೀ ಹೋಮ, ದಿಬ್ಬಾಯ ಸೋತಧಾತುಯಾ;

ಚೇತೋಪರಿಯಞಾಣಸ್ಸ, ವಸೀ ಹೋಮ ಮಹಾಮುನೇ.

೪೪೩. ‘‘‘ಪುಬ್ಬೇನಿವಾಸಂ ಜಾನಾಮ, ದಿಬ್ಬಚಕ್ಖು ವಿಸೋಧಿತಂ;

ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.

೪೪೪. ‘‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;

ಞಾಣಂ ಅಮ್ಹಂ ಮಹಾವೀರ, ಉಪ್ಪನ್ನಂ ತವ ಸನ್ತಿಕೇ.

೪೪೫. ‘‘‘ಪುಬ್ಬಾನಂ ಲೋಕನಾಥಾನಂ, ಸಙ್ಗಮಂ ನೋ ನಿದಸ್ಸಿತಂ;

ಅಧಿಕಾರಾ ಬಹೂ ಅಮ್ಹಂ, ತುಯ್ಹತ್ಥಾಯ ಮಹಾಮುನೇ.

೪೪೬. ‘‘‘ಯಂ ಅಮ್ಹಂ ಪೂರಿತಂ ಕಮ್ಮಂ, ಕುಸಲಂ ಸರಸೇ ಮುನೇ;

ತುಯ್ಹತ್ಥಾಯ ಮಹಾವೀರ, ಪುಞ್ಞಾನುಪಚಿತಾನಿ ನೋ.

೪೪೭. ‘‘‘ಅಭಬ್ಬಟ್ಠಾನೇ ವಜ್ಜೇತ್ವಾ, ವಾರಯಿಮ್ಹ ಅನಾಚರಂ;

ತುಯ್ಹತ್ಥಾಯ ಮಹಾವೀರ, ಚತ್ತಾನಿ ಜೀವಿತಾನಿ ನೋ [ಸಞ್ಚತ್ತಂ ಜೀವಿತಮ್ಪಿ ನೋ (ಸ್ಯಾ.)].

೪೪೮. ‘‘‘ನೇಕಕೋಟಿಸಹಸ್ಸಾನಿ, ಭರಿಯತ್ಥಾಯದಾಸಿ ನೋ;

ನ ತತ್ಥ ವಿಮನಾ ಹೋಮ, ತುಯ್ಹತ್ಥಾಯ ಮಹಾಮುನೇ.

೪೪೯. ‘‘‘ನೇಕಕೋಟಿಸಹಸ್ಸಾನಿ, ಉಪಕಾರಾಯದಾಸಿ ನೋ;

ನ ತತ್ಥ ವಿಮನಾ ಹೋಮ, ತುಯ್ಹತ್ಥಾಯ ಮಹಾಮುನೇ.

೪೫೦. ‘‘‘ನೇಕಕೋಟಿಸಹಸ್ಸಾನಿ, ಭೋಜನತ್ಥಾಯದಾಸಿ ನೋ;

ನ ತತ್ಥ ವಿಮನಾ ಹೋಮ, ತುಯ್ಹತ್ಥಾಯ ಮಹಾಮುನೇ.

೪೫೧. ‘‘‘ನೇಕಕೋಟಿಸಹಸ್ಸಾನಿ, ಜೀವಿತಾನಿ ಚಜಿಮ್ಹಸೇ [ಚಜಿಮ್ಹ ನೋ (ಪೀ. ಕ.)];

ಭಯಮೋಕ್ಖಂ ಕರಿಸ್ಸಾಮ, ಜೀವಿತಾನಿ ಚಜಿಮ್ಹಸೇ.

೪೫೨. ‘‘‘ಅಙ್ಗಗತೇ ಅಲಙ್ಕಾರೇ, ವತ್ಥೇ ನಾನಾವಿಧೇ ಬಹೂ;

ಇತ್ಥಿಭಣ್ಡೇ ನ ಗೂಹಾಮ, ತುಯ್ಹತ್ಥಾಯ ಮಹಾಮುನೇ.

೪೫೩. ‘‘‘ಧನಧಞ್ಞಪರಿಚ್ಚಾಗಂ, ಗಾಮಾನಿ ನಿಗಮಾನಿ ಚ;

ಖೇತ್ತಂ ಪುತ್ತಾ ಚ ಧೀತಾ ಚ, ಪರಿಚ್ಚತ್ತಾ ಮಹಾಮುನೇ.

೪೫೪. ‘‘‘ಹತ್ಥೀ ಅಸ್ಸಾ ಗವಾ ಚಾಪಿ, ದಾಸಿಯೋ ಪರಿಚಾರಿಕಾ;

ತುಯ್ಹತ್ಥಾಯ ಮಹಾವೀರ, ಪರಿಚ್ಚತ್ತಂ ಅಸಙ್ಖಿಯಂ.

೪೫೫. ‘‘‘ಯಂ ಅಮ್ಹೇ ಪಟಿಮನ್ತೇಸಿ, ದಾನಂ ದಸ್ಸಾಮ ಯಾಚಕೇ;

ವಿಮನಂ ನೋ ನ ಪಸ್ಸಾಮ, ದದತೋ ದಾನಮುತ್ತಮಂ.

೪೫೬. ‘‘‘ನಾನಾವಿಧಂ ಬಹುಂ ದುಕ್ಖಂ, ಸಂಸಾರೇ ಚ ಬಹುಬ್ಬಿಧೇ;

ತುಯ್ಹತ್ಥಾಯ ಮಹಾವೀರ, ಅನುಭುತ್ತಂ ಅಸಙ್ಖಿಯಂ.

೪೫೭. ‘‘‘ಸುಖಪ್ಪತ್ತಾನುಮೋದಾಮ, ನ ಚ ದುಕ್ಖೇಸು ದುಮ್ಮನಾ;

ಸಬ್ಬತ್ಥ ತುಲಿತಾ ಹೋಮ, ತುಯ್ಹತ್ಥಾಯ ಮಹಾಮುನೇ.

೪೫೮. ‘‘‘ಅನುಮಗ್ಗೇನ ಸಮ್ಬುದ್ಧೋ, ಯಂ ಧಮ್ಮಂ ಅಭಿನೀಹರಿ;

ಅನುಭೋತ್ವಾ ಸುಖಂ ದುಕ್ಖಂ, ಪತ್ತೋ ಬೋಧಿಂ ಮಹಾಮುನೇ.

೪೫೯. ‘‘‘ಬ್ರಹ್ಮದೇವಞ್ಚ ಸಮ್ಬುದ್ಧಂ, ಗೋತಮಂ ಲೋಕನಾಯಕಂ;

ಅಞ್ಞೇಸಂ ಲೋಕನಾಥಾನಂ, ಸಙ್ಗಮಂ ತೇಹಿ ನೋ ಬಹೂ.

೪೬೦. ‘‘‘ಅಧಿಕಾರಂ ಬಹುಂ ಅಮ್ಹೇ, ತುಯ್ಹತ್ಥಾಯ ಮಹಾಮುನೇ;

ಗವೇಸತೋ ಬುದ್ಧಧಮ್ಮೇ, ಮಯಂ ತೇ ಪರಿಚಾರಿಕಾ.

೪೬೧. ‘‘‘ಕಪ್ಪೇ ಚ ಸತಸಹಸ್ಸೇ, ಚತುರೋ ಚ ಅಸಙ್ಖಿಯೇ;

ದೀಪಙ್ಕರೋ ಮಹಾವೀರೋ, ಉಪ್ಪಜ್ಜಿ ಲೋಕನಾಯಕೋ.

೪೬೨. ‘‘‘ಪಚ್ಚನ್ತದೇಸವಿಸಯೇ, ನಿಮನ್ತೇತ್ವಾ ತಥಾಗತಂ;

ತಸ್ಸ ಆಗಮನಂ ಮಗ್ಗಂ, ಸೋಧೇನ್ತಿ ತುಟ್ಠಮಾನಸಾ.

೪೬೩. ‘‘‘ತೇನ ಕಾಲೇನ ಸೋ ಆಸಿ, ಸುಮೇಧೋ ನಾಮ ಬ್ರಾಹ್ಮಣೋ;

ಮಗ್ಗಞ್ಚ ಪಟಿಯಾದೇಸಿ, ಆಯತೋ ಸಬ್ಬದಸ್ಸಿನೋ.

೪೬೪. ‘‘‘ತೇನ ಕಾಲೇನ ಅಹುಮ್ಹ, ಸಬ್ಬಾ ಬ್ರಾಹ್ಮಣಸಮ್ಭವಾ;

ಥಲೂದಜಾನಿ ಪುಪ್ಫಾನಿ, ಆಹರಿಮ್ಹ ಸಮಾಗಮಂ.

೪೬೫. ‘‘‘ತಸ್ಮಿಂ ಸೋ ಸಮಯೇ ಬುದ್ಧೋ, ದೀಪಙ್ಕರೋ ಮಹಾಯಸೋ;

ವಿಯಾಕಾಸಿ ಮಹಾವೀರೋ, ಇಸಿಮುಗ್ಗತಮಾನಸಂ.

೪೬೬. ‘‘‘ಚಲತೀ ರವತೀ ಪುಥವೀ, ಸಙ್ಕಮ್ಪತಿ ಸದೇವಕೇ;

ತಸ್ಸ ಕಮ್ಮಂ ಪಕಿತ್ತೇನ್ತೇ, ಇಸಿಮುಗ್ಗತಮಾನಸಂ.

೪೬೭. ‘‘‘ದೇವಕಞ್ಞಾ ಮನುಸ್ಸಾ ಚ, ಮಯಞ್ಚಾಪಿ ಸದೇವಕಾ;

ನಾನಾಪೂಜನೀಯಂ ಭಣ್ಡಂ, ಪೂಜಯಿತ್ವಾನ ಪತ್ಥಯುಂ.

೪೬೮. ‘‘‘ತೇಸಂ ಬುದ್ಧೋ ವಿಯಾಕಾಸಿ, ಜೋತಿದೀಪ ಸನಾಮಕೋ;

ಅಜ್ಜ ಯೇ ಪತ್ಥಿತಾ ಅತ್ಥಿ, ತೇ ಭವಿಸ್ಸನ್ತಿ ಸಮ್ಮುಖಾ.

೪೬೯. ‘‘‘ಅಪರಿಮೇಯ್ಯೇ ಇತೋ ಕಪ್ಪೇ, ಯಂ ನೋ ಬುದ್ಧೋ ವಿಯಾಕರಿ;

ತಂ ವಾಚಮನುಮೋದೇನ್ತಾ, ಏವಂಕಾರೀ ಅಹುಮ್ಹ ನೋ.

೪೭೦. ‘‘‘ತಸ್ಸ ಕಮ್ಮಸ್ಸ ಸುಕತಸ್ಸ, ತಸ್ಸ ಚಿತ್ತಂ ಪಸಾದಯುಂ;

ದೇವಮಾನುಸಿಕಂ ಯೋನಿಂ, ಅನುಭೋತ್ವಾ ಅಸಙ್ಖಿಯಂ.

೪೭೧. ‘‘‘ಸುಖದುಕ್ಖೇನುಭೋತ್ವಾನ, ದೇವೇಸು ಮಾನುಸೇಸು ಚ;

ಪಚ್ಛಿಮೇ ಭವೇ ಸಮ್ಪತ್ತೇ, ಜಾತಾಮ್ಹ ಸಾಕಿಯೇ ಕುಲೇ.

೪೭೨. ‘‘‘ರೂಪವತೀ ಭೋಗವತೀ, ಯಸಸೀಲವತೀ ತತೋ;

ಸಬ್ಬಙ್ಗಸಮ್ಪದಾ ಹೋಮ, ಕುಲೇಸು ಅಭಿಸಕ್ಕತಾ.

೪೭೩. ‘‘‘ಲಾಭಂ ಸಿಲೋಕಂ ಸಕ್ಕಾರಂ, ಲೋಕಧಮ್ಮಸಮಾಗಮಂ;

ಚಿತ್ತಞ್ಚ ದುಕ್ಖಿತಂ ನತ್ಥಿ, ವಸಾಮ ಅಕುತೋಭಯಾ.

೪೭೪. ‘‘‘ವುತ್ತಞ್ಹೇತಂ ಭಗವತಾ, ರಞ್ಞೋ ಅನ್ತೇಪುರೇ ತದಾ;

ಖತ್ತಿಯಾನಂ ಪುರೇ ವೀರ [ತಾಸಂ (ಸ್ಯಾ.)], ಉಪಕಾರಞ್ಚ ನಿದ್ದಿಸಿ.

೪೭೫. ‘‘‘ಉಪಕಾರಾ ಚ ಯಾ ನಾರೀ, ಯಾ ಚ ನಾರೀ ಸುಖೇ ದುಖೇ;

ಅತ್ಥಕ್ಖಾಯೀ ಚ ಯಾ ನಾರೀ, ಯಾ ಚ ನಾರೀನುಕಮ್ಪಿಕಾ.

೪೭೬. ‘‘‘ಧಮ್ಮಂ ಚರೇ ಸುಚರಿತಂ, ನ ನಂ ದುಚ್ಚರಿತಂ ಚರೇ;

ಧಮ್ಮಚಾರೀ ಸುಖಂ ಸೇತಿ, ಅಸ್ಮಿಂ ಲೋಕೇ ಪರಮ್ಹಿ ಚ.

೪೭೭. ‘‘‘ಅಗಾರಂ ವಿಜಹಿತ್ವಾನ, ಪಬ್ಬಜಿಮ್ಹನಗಾರಿಯಂ;

ಅಡ್ಢಮಾಸೇ ಅಸಮ್ಪತ್ತೇ, ಚತುಸಚ್ಚಂ ಫುಸಿಮ್ಹ ನೋ.

೪೭೮. ‘‘‘ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ;

ಉಪನೇನ್ತಿ ಬಹೂ ಅಮ್ಹೇ, ಸಾಗರಸ್ಸೇವ ಊಮಿಯೋ.

೪೭೯. ‘‘‘ಕಿಲೇಸಾ ಝಾಪಿತಾ ಅಮ್ಹಂ [ಮಯ್ಹಂ (ಸ್ಯಾ.), ಅಮ್ಹಾಕಂ (ಕ.)], ಭವಾ ಸಬ್ಬೇ ಸಮೂಹತಾ;

ನಾಗೀವ ಬನ್ಧನಂ ಛೇತ್ವಾ, ವಿಹರಾಮ ಅನಾಸವಾ.

೪೮೦. ‘‘‘ಸ್ವಾಗತಂ ವತ ನೋ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೪೮೧. ‘‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’.

೪೮೨. ‘‘ಏವಂ ಬಹುವಿಧಂ ದುಕ್ಖಂ, ಸಮ್ಪತ್ತೀ ಚ ಬಹುಬ್ಬಿಧಾ;

ವಿಸುದ್ಧಭಾವಂ ಸಮ್ಪತ್ತಾ, ಲಭಾಮ ಸಬ್ಬಸಮ್ಪದಾ.

೪೮೩. ‘‘ಯಾ ದದನ್ತಿ ಸಕತ್ತಾನಂ, ಪುಞ್ಞತ್ಥಾಯ ಮಹೇಸಿನೋ;

ಸಹಾಯಸಮ್ಪದಾ ಹೋನ್ತಿ, ನಿಬ್ಬಾನಪದಮಸಙ್ಖತಂ.

೪೮೪. ‘‘ಪರಿಕ್ಖೀಣಂ ಅತೀತಞ್ಚ, ಪಚ್ಚುಪ್ಪನ್ನಂ ಅನಾಗತಂ;

ಸಬ್ಬಕಮ್ಮಮ್ಪಿ ನೋ ಖೀಣಂ, ಪಾದೇ ವನ್ದಾಮ ಚಕ್ಖುಮ.

೪೮೫. ‘‘ನಿಬ್ಬಾನಾಯ ವದನ್ತೀನಂ, ಕಿಂ ವೋ ವಕ್ಖಾಮ ಉತ್ತರಿ;

ಸನ್ತಸಙ್ಖತದೋಸಞ್ಹಿ, ಪಪ್ಪೋಥ [ಸನ್ತಸಙ್ಖತದೋಸೋ ಯೋ, ಪಜ್ಜೋತಂ (ಸ್ಯಾ. ಪೀ. ಕ.)] ಅಮತಂ ಪದಂ’’.

ಇತ್ಥಂ ಸುದಂ ಯಸೋಧರಾಪಮುಖಾನಿ ಅಟ್ಠಾರಸಭಿಕ್ಖುನೀಸಹಸ್ಸಾನಿ ಭಗವತೋ ಸಮ್ಮುಖಾ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಯಸೋಧರಾಪಮುಖಅಟ್ಠಾರಸಭಿಕ್ಖುನೀಸಹಸ್ಸಾಪದಾನಂ ದಸಮಂ.

ಕುಣ್ಡಲಕೇಸೀವಗ್ಗೋ ತತಿಯೋ.