೮. ಯಸೋಧರಾಥೇರೀಅಪದಾನಂ

೩೧೪. ಏಕಸ್ಮಿಂ ಸಮಯೇ ರಮ್ಮೇ, ಇದ್ಧೇ ರಾಜಗಹೇ ಪುರೇ;

ಪಬ್ಭಾರಮ್ಹಿ ವರೇಕಮ್ಹಿ, ವಸನ್ತೇ ನರನಾಯಕೇ.

೩೧೫. ವಸನ್ತಿಯಾ ತಮ್ಹಿ ನಗರೇ, ರಮ್ಮೇ ಭಿಕ್ಖುನುಪಸ್ಸಯೇ;

ಯಸೋಧರಾಭಿಕ್ಖುನಿಯಾ, ಏವಂ ಆಸಿ ವಿತಕ್ಕಿತಂ.

೩೧೬. ‘‘ಸುದ್ಧೋದನೋ ಮಹಾರಾಜಾ, ಗೋತಮೀ ಚ ಪಜಾಪತೀ;

ಅಭಿಞ್ಞಾತಾ ಮಹಾಥೇರಾ, ಥೇರಿಯೋ ಚ ಮಹಿದ್ಧಿಕಾ.

೩೧೭. ‘‘ಸನ್ತಿಂ ಗತಾವ ಆಸುಂ ತೇ, ದೀಪಚ್ಚೀವ ನಿರಾಸವಾ;

ಲೋಕನಾಥೇ ಧರನ್ತೇವ, ಅಹಮ್ಪಿ ಚ ಸಿವಂ ಪದಂ.

೩೧೮. ‘‘ಗಮಿಸ್ಸಾಮೀತಿ ಚಿನ್ತೇತ್ವಾ, ಪಸ್ಸನ್ತೀ ಆಯುಮತ್ತನೋ;

ಪಸ್ಸಿತ್ವಾ ಆಯುಸಙ್ಖಾರಂ, ತದಹೇವ ಖಯಂ ಗತಂ.

೩೧೯. ‘‘ಪತ್ತಚೀವರಮಾದಾಯ, ನಿಕ್ಖಮಿತ್ವಾ ಸಕಸ್ಸಮಾ;

ಪುರಕ್ಖತಾ ಭಿಕ್ಖುನೀಭಿ, ಸತೇಹಿ ಸಹಸ್ಸೇಹಿ ಸಾ [ಸಹ ಪಞ್ಚಹಿ (ಸೀ. ಪೀ.)].

೩೨೦. ‘‘ಮಹಿದ್ಧಿಕಾ ಮಹಾಪಞ್ಞಾ, ಸಮ್ಬುದ್ಧಂ ಉಪಸಙ್ಕಮಿ;

ಸಮ್ಬುದ್ಧಂ ಅಭಿವಾದೇತ್ವಾ, ಸತ್ಥುನೋ ಚಕ್ಕಲಕ್ಖಣೇ;

ನಿಸಿನ್ನಾ ಏಕಮನ್ತಮ್ಹಿ, ಇದಂ ವಚನಮಬ್ರವಿ.

೩೨೧. ‘‘‘ಅಟ್ಠಸತ್ತತಿವಸ್ಸಾಹಂ, ಪಚ್ಛಿಮೋ ವತ್ತತೇ ವಯೋ [ಪಚ್ಛಿಮಾ ವತ್ತಯಿ ವಯಾ (ಸ್ಯಾ.)];

ಪಬ್ಭಾರಮ್ಹಿ ಅನುಪ್ಪತ್ತಾ, ಆರೋಚೇಮಿ ಮಹಾಮುನಿ.

೩೨೨. ‘‘‘ಪರಿಪಕ್ಕೋ ವಯೋ ಮಯ್ಹಂ, ಪರಿತ್ತಂ ಮಮ ಜೀವಿತಂ;

ಪಹಾಯ ವೋ ಗಮಿಸ್ಸಾಮಿ, ಕತಂ ಮೇ ಸರಣಮತ್ತನೋ.

೩೨೩. ‘‘‘ವಯಮ್ಹಿ ಪಚ್ಛಿಮೇ ಕಾಲೇ, ಮರಣಂ ಉಪರುದ್ಧತಿ;

ಅಜ್ಜರತ್ತಿಂ ಮಹಾವೀರ, ಪಾಪುಣಿಸ್ಸಾಮಿ ನಿಬ್ಬುತಿಂ.

೩೨೪. ‘‘‘ನತ್ಥಿ ಜಾತಿ ಜರಾ ಬ್ಯಾಧಿ, ಮರಣಞ್ಚ ಮಹಾಮುನೇ;

ಅಜರಾಮರಣಂ ಪುರಂ, ಗಮಿಸ್ಸಾಮಿ ಅಸಙ್ಖತಂ.

೩೨೫. ‘‘‘ಯಾವತಾ ಪರಿಸಾ ನಾಮ, ಸಮುಪಾಸನ್ತಿ ಸತ್ಥುನೋ;

ಅಪರಾಧಮಜಾನನ್ತೀ [ಸಚೇ ಮೇತ್ಥಿ (ಸೀ.), ಪಜಾನನ್ತೀ (ಕ.)], ಖಮನ್ತಂ ಸಮ್ಮುಖಾ ಮುನೇ.

೩೨೬. ‘‘‘ಸಂಸರಿತ್ವಾ ಚ ಸಂಸಾರೇ, ಖಲಿತಞ್ಚೇ ಮಮಂ ತಯಿ;

ಆರೋಚೇಮಿ ಮಹಾವೀರ, ಅಪರಾಧಂ ಖಮಸ್ಸು ಮೇ’.

೩೨೭. ‘‘ಸುತ್ವಾನ ವಚನಂ ತಸ್ಸಾ, ಮುನಿನ್ದೋ ಇದಮಬ್ರವಿ;

‘ಕಿಮುತ್ತರಂ ತೇ ವಕ್ಖಾಮಿ, ನಿಬ್ಬಾನಾಯ ವಜನ್ತಿಯಾ.

೩೨೮. ‘‘‘ಇದ್ಧಿಞ್ಚಾಪಿ ನಿದಸ್ಸೇಹಿ, ಮಮ ಸಾಸನಕಾರಿಕೇ;

ಪರಿಸಾನಞ್ಚ ಸಬ್ಬಾಸಂ, ಕಙ್ಖಂ ಛಿನ್ದಸ್ಸು ಯಾವತಾ’.

೩೨೯. ‘‘ಸುತ್ವಾ ತಂ ಮುನಿನೋ ವಾಚಂ, ಭಿಕ್ಖುನೀ ಸಾ ಯಸೋಧರಾ;

ವನ್ದಿತ್ವಾ ಮುನಿರಾಜಂ ತಂ, ಇದಂ ವಚನಮಬ್ರವಿ.

೩೩೦. ‘‘‘ಯಸೋಧರಾ ಅಹಂ ವೀರ, ಅಗಾರೇ ತೇ ಪಜಾಪತಿ;

ಸಾಕಿಯಮ್ಹಿ ಕುಲೇ ಜಾತಾ, ಇತ್ಥಿಅಙ್ಗೇ ಪತಿಟ್ಠಿತಾ.

೩೩೧. ‘‘‘ಥೀನಂ ಸತಸಹಸ್ಸಾನಂ, ನವುತೀನಂ ಛದುತ್ತರಿ;

ಅಗಾರೇ ತೇ ಅಹಂ ವೀರ, ಪಾಮೋಕ್ಖಾ ಸಬ್ಬಾ ಇಸ್ಸರಾ.

೩೩೨. ‘‘‘ರೂಪಾಚಾರಗುಣೂಪೇತಾ, ಯೋಬ್ಬನಟ್ಠಾ ಪಿಯಂವದಾ;

ಸಬ್ಬಾ ಮಂ ಅಪಚಾಯನ್ತಿ, ದೇವತಾ ವಿಯ ಮಾನುಸಾ.

೩೩೩. ‘‘‘ಕಞ್ಞಾಸತಸಹಸ್ಸಪಮುಖಾ, ಸಕ್ಯಪುತ್ತನಿವೇಸನೇ;

ಸಮಾನಸುಖದುಕ್ಖತಾ, ದೇವತಾ ವಿಯ ನನ್ದನೇ.

೩೩೪. ‘‘‘ಕಾಮಧಾತುಮತಿಕ್ಕಮ್ಮ [ಕಾಮಧಾತುಮತಿಕ್ಕನ್ತಾ (ಸೀ. ಸ್ಯಾ. ಪೀ. ಕ.)], ಸಣ್ಠಿತಾ ರೂಪಧಾತುಯಾ;

ರೂಪೇನ ಸದಿಸಾ ನತ್ಥಿ, ಠಪೇತ್ವಾ ಲೋಕನಾಯಕಂ.

೩೩೫. ‘‘‘ಸಮ್ಬುದ್ಧಂ ಅಭಿವಾದೇತ್ವಾ, ಇದ್ಧಿಂ ದಸ್ಸೇಸಿ ಸತ್ಥುನೋ;

ನೇಕಾ ನಾನಾವಿಧಾಕಾರಾ, ಮಹಾಇದ್ಧೀಪಿ ದಸ್ಸಯೀ [ಏವಮಾದೀನಿ ವತ್ವಾನ, ಉಪತಿತ್ವಾನ ಅಮ್ಬರಂ; ಇದ್ಧೀ ಅನೇಕಾ ದಸ್ಸೇಸಿ, ಬುದ್ಧಾನುಞ್ಞಾ ಯಸೋಧರಾ; (ಸೀ.)].

೩೩೬. ‘‘‘ಚಕ್ಕವಾಳಸಮಂ ಕಾಯಂ, ಸೀಸಂ ಉತ್ತರತೋ ಕುರು;

ಉಭೋ ಪಕ್ಖಾ ದುವೇ ದೀಪಾ, ಜಮ್ಬುದೀಪಂ ಸರೀರತೋ.

೩೩೭. ‘‘‘ದಕ್ಖಿಣಞ್ಚ ಸರಂ ಪಿಞ್ಛಂ, ನಾನಾಸಾಖಾ ತು ಪತ್ತಕಾ;

ಚನ್ದಞ್ಚ ಸೂರಿಯಞ್ಚಕ್ಖಿ, ಮೇರುಪಬ್ಬತತೋ ಸಿಖಂ.

೩೩೮. ‘‘‘ಚಕ್ಕವಾಲಗಿರಿಂ ತುಣ್ಡಂ, ಜಮ್ಬುರುಕ್ಖಂ ಸಮೂಲಕಂ;

ಬೀಜಮಾನಾ ಉಪಾಗನ್ತ್ವಾ, ವನ್ದನ್ತೀ ಲೋಕನಾಯಕಂ.

೩೩೯. ‘‘‘ಹತ್ಥಿವಣ್ಣಂ ತಥೇವಸ್ಸಂ, ಪಬ್ಬತಂ ಜಲಧಿಂ ತಥಾ;

ಚನ್ದಿಮಂ ಸೂರಿಯಂ ಮೇರುಂ, ಸಕ್ಕವಣ್ಣಞ್ಚ ದಸ್ಸಯಿ.

೩೪೦. ‘‘‘ಯಸೋಧರಾ ಅಹಂ ವೀರ, ಪಾದೇ ವನ್ದಾಮಿ ಚಕ್ಖುಮ;

ಸಹಸ್ಸಲೋಕಧಾತೂನಂ, ಫುಲ್ಲಪದ್ಮೇನ ಛಾದಯಿ.

೩೪೧. ‘‘‘ಬ್ರಹ್ಮವಣ್ಣಞ್ಚ ಮಾಪೇತ್ವಾ, ಧಮ್ಮಂ ದೇಸೇಸಿ ಸುಞ್ಞತಂ;

ಯಸೋಧರಾ ಅಹಂ ವೀರ, ಪಾದೇ ವನ್ದಾಮಿ ಚಕ್ಖುಮ.

೩೪೨. ‘‘‘ಇದ್ಧೀಸು ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;

ಚೇತೋಪರಿಯಞಾಣಸ್ಸ, ವಸೀ ಹೋಮಿ ಮಹಾಮುನಿ.

೩೪೩. ‘‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;

ಸಬ್ಬಾಸವಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.

೩೪೪. ‘‘‘ಅತ್ಥಧಮ್ಮನಿರುತ್ತೀಸು, ಪಟಿಭಾನೇ ತಥೇವ ಚ;

ಞಾಣಂ ಮಯ್ಹಂ ಮಹಾವೀರ, ಉಪ್ಪನ್ನಂ ತವ ಸನ್ತಿಕೇ.

೩೪೫. ‘‘‘ಪುಬ್ಬಾನಂ ಲೋಕನಾಥಾನಂ, ಸಙ್ಗಮಂ ತೇ ನಿದಸ್ಸಿತಂ [ಸುದಸ್ಸಿತಂ (ಸ್ಯಾ. ಪೀ. ಕ.)];

ಅಧಿಕಾರಂ ಬಹುಂ ಮಯ್ಹಂ, ತುಯ್ಹತ್ಥಾಯ ಮಹಾಮುನೇ.

೩೪೬. ‘‘‘ಯಂ ಮಯ್ಹಂ ಪೂರಿತಂ ಕಮ್ಮಂ, ಕುಸಲಂ ಸರಸೇ ಮುನೇ;

ತುಯ್ಹತ್ಥಾಯ ಮಹಾವೀರ, ಪುಞ್ಞಂ ಉಪಚಿತಂ ಮಯಾ.

೩೪೭. ‘‘‘ಅಭಬ್ಬಟ್ಠಾನೇ ವಜ್ಜೇತ್ವಾ, ವಾರಯಿತ್ವಾ ಅನಾಚರಂ;

ತುಯ್ಹತ್ಥಾಯ ಮಹಾವೀರ, ಸಞ್ಚತ್ತಂ ಜೀವಿತಂ ಮಯಾ.

೩೪೮. ‘‘‘ನೇಕಕೋಟಿಸಹಸ್ಸಾನಿ, ಭರಿಯತ್ಥಾಯದಾಸಿ ಮಂ;

ನ ತತ್ಥ ವಿಮನಾ ಹೋಮಿ, ತುಯ್ಹತ್ಥಾಯ ಮಹಾಮುನಿ.

೩೪೯. ‘‘‘ನೇಕಕೋಟಿಸಹಸ್ಸಾನಿ, ಉಪಕಾರಾಯದಾಸಿ ಮಂ;

ನ ತತ್ಥ ವಿಮನಾ ಹೋಮಿ, ತುಯ್ಹತ್ಥಾಯ ಮಹಾಮುನಿ.

೩೫೦. ‘‘‘ನೇಕಕೋಟಿಸಹಸ್ಸಾನಿ, ಭೋಜನತ್ಥಾಯದಾಸಿ ಮಂ;

ನ ತತ್ಥ ವಿಮನಾ ಹೋಮಿ, ತುಯ್ಹತ್ಥಾಯ ಮಹಾಮುನಿ.

೩೫೧. ‘‘‘ನೇಕಕೋಟಿಸಹಸ್ಸಾನಿ, ಜೀವಿತಾನಿ ಪರಿಚ್ಚಜಿಂ;

ಭಯಮೋಕ್ಖಂ ಕರಿಸ್ಸನ್ತಿ, ದದಾಮಿ ಮಮ ಜೀವಿತಂ.

೩೫೨. ‘‘‘ಅಙ್ಗಗತೇ [ಅಙ್ಗೇ ಏವಂ (ಕ.)] ಅಲಙ್ಕಾರೇ, ವತ್ಥೇ ನಾನಾವಿಧೇ ಬಹೂ;

ಇತ್ಥಿಮಣ್ಡೇ ನ ಗೂಹಾಮಿ, ತುಯ್ಹತ್ಥಾಯ ಮಹಾಮುನಿ.

೩೫೩. ‘‘‘ಧನಧಞ್ಞಪರಿಚ್ಚಾಗಂ, ಗಾಮಾನಿ ನಿಗಮಾನಿ ಚ;

ಖೇತ್ತಂ ಪುತ್ತಾ ಚ ಧೀತಾ ಚ, ಪರಿಚ್ಚತ್ತಾ ಮಹಾಮುನಿ.

೩೫೪. ‘‘‘ಹತ್ಥೀ ಅಸ್ಸಾ ಗವಾ ಚಾಪಿ, ದಾಸಿಯೋ ಪರಿಚಾರಿಕಾ;

ತುಯ್ಹತ್ಥಾಯ ಮಹಾವೀರ, ಪರಿಚ್ಚತ್ತಾ ಅಸಙ್ಖಿಯಾ.

೩೫೫. ‘‘‘ಯಂ ಮಯ್ಹಂ ಪಟಿಮನ್ತೇಸಿ [ಪತಿಮನ್ತೇಸಿ (ಸೀ.)], ದಾನಂ ದಸ್ಸಾಮಿ ಯಾಚಕೇ;

ವಿಮನಂ ಮೇ ನ ಪಸ್ಸಾಮಿ, ದದತೋ ದಾನಮುತ್ತಮಂ.

೩೫೬. ‘‘‘ನಾನಾವಿಧಂ ಬಹುಂ ದುಕ್ಖಂ, ಸಂಸಾರೇ ಚ ಬಹುಬ್ಬಿಧೇ;

ತುಯ್ಹತ್ಥಾಯ ಮಹಾವೀರ, ಅನುಭುತ್ತಂ ಅಸಙ್ಖಿಯಂ.

೩೫೭. ‘‘‘ಸುಖಪ್ಪತ್ತಾನುಮೋದಾಮಿ, ನ ಚ ದುಕ್ಖೇಸು ದುಮ್ಮನಾ;

ಸಬ್ಬತ್ಥ ತುಲಿತಾ ಹೋಮಿ, ತುಯ್ಹತ್ಥಾಯ ಮಹಾಮುನಿ.

೩೫೮. ‘‘‘ಅನುಮಗ್ಗೇನ ಸಮ್ಬುದ್ಧೋ, ಯಂ ಧಮ್ಮಂ ಅಭಿನೀಹರಿ;

ಅನುಭೋತ್ವಾ ಸುಖಂ ದುಕ್ಖಂ, ಪತ್ತೋ ಬೋಧಿಂ ಮಹಾಮುನಿ.

೩೫೯. ‘‘‘ಬ್ರಹ್ಮದೇವಞ್ಚ ಸಮ್ಬುದ್ಧಂ, ಗೋತಮಂ ಲೋಕನಾಯಕಂ;

ಅಞ್ಞೇಸಂ ಲೋಕನಾಥಾನಂ, ಸಙ್ಗಮಂ ತೇ ಬಹುಂ ಮಯಾ.

೩೬೦. ‘‘‘ಅಧಿಕಾರಂ ಬಹುಂ ಮಯ್ಹಂ, ತುಯ್ಹತ್ಥಾಯ ಮಹಾಮುನಿ;

ಗವೇಸತೋ ಬುದ್ಧಧಮ್ಮೇ, ಅಹಂ ತೇ ಪರಿಚಾರಿಕಾ.

೩೬೧. ‘‘‘ಕಪ್ಪೇ ಚ ಸತಸಹಸ್ಸೇ, ಚತುರೋ ಚ ಅಸಙ್ಖಿಯೇ;

ದೀಪಙ್ಕರೋ ಮಹಾವೀರೋ, ಉಪ್ಪಜ್ಜಿ ಲೋಕನಾಯಕೋ.

೩೬೨. ‘‘‘ಪಚ್ಚನ್ತದೇಸವಿಸಯೇ, ನಿಮನ್ತೇತ್ವಾ ತಥಾಗತಂ;

ತಸ್ಸ ಆಗಮನಂ ಮಗ್ಗಂ, ಸೋಧೇನ್ತಿ ತುಟ್ಠಮಾನಸಾ.

೩೬೩. ‘‘‘ತೇನ ಕಾಲೇನ ಸೋ ಆಸಿ, ಸುಮೇಧೋ ನಾಮ ಬ್ರಾಹ್ಮಣೋ;

ಮಗ್ಗಞ್ಚ ಪಟಿಯಾದೇಸಿ, ಆಯತೋ [ಆಯತಂ (ಸೀ.)] ಸಬ್ಬದಸ್ಸಿನೋ.

೩೬೪. ‘‘‘ತೇನ ಕಾಲೇನಹಂ ಆಸಿಂ, ಕಞ್ಞಾ ಬ್ರಾಹ್ಮಣಸಮ್ಭವಾ;

ಸುಮಿತ್ತಾನಾಮ ನಾಮೇನ, ಉಪಗಚ್ಛಿಂ ಸಮಾಗಮಂ.

೩೬೫. ‘‘‘ಅಟ್ಠ ಉಪ್ಪಲಹತ್ಥಾನಿ, ಪೂಜನತ್ಥಾಯ ಸತ್ಥುನೋ;

ಆದಾಯ ಜನಸಂಮಜ್ಝೇ, ಅದ್ದಸಂ ಇಸಿ ಮುಗ್ಗತಂ.

೩೬೬. ‘‘‘ಚಿರಾನುಗತಂ ದಯಿತಂ [ಚಿರಾನುಪರಿ ಆಸೀನಂ (ಸೀ.)], ಅತಿಕ್ಕನ್ತಂ ಮನೋಹರಂ;

ದಿಸ್ವಾ ತದಾ ಅಮಞ್ಞಿಸ್ಸಂ, ಸಫಲಂ ಜೀವಿತಂ ಮಮ.

೩೬೭. ‘‘‘ಪರಕ್ಕಮಂ ತಂ ಸಫಲಂ, ಅದ್ದಸಂ ಇಸಿನೋ ತದಾ;

ಪುಬ್ಬಕಮ್ಮೇನ ಸಮ್ಬುದ್ಧೇ, ಚಿತ್ತಞ್ಚಾಪಿ ಪಸೀದಿ ಮೇ.

೩೬೮. ‘‘‘ಭಿಯ್ಯೋ ಚಿತ್ತಂ ಪಸಾದೇಸಿಂ, ಇಸೇ ಉಗ್ಗತಮಾನಸೇ;

ದೇಯ್ಯಂ ಅಞ್ಞಂ ನ ಪಸ್ಸಾಮಿ, ದೇಮಿ ಪುಪ್ಫಾನಿ ತೇ ಇಸಿ.

೩೬೯. ‘‘‘ಪಞ್ಚಹತ್ಥಾ ತವ ಹೋನ್ತು, ತಯೋ ಹೋನ್ತು ಮಮಂ ಇಸೇ;

ತೇನ ಸದ್ಧಿಂ ಸಮಾ ಹೋನ್ತು, ಬೋಧತ್ಥಾಯ ತವಂ ಇಸೇ’.

ಚತುತ್ಥಂ ಭಾಣವಾರಂ.

೩೭೦. ‘‘ಇಸಿ ಗಹೇತ್ವಾ ಪುಪ್ಫಾನಿ, ಆಗಚ್ಛನ್ತಂ ಮಹಾಯಸಂ;

ಪೂಜೇಸಿ ಜನಸಂಮಜ್ಝೇ, ಬೋಧತ್ಥಾಯ ಮಹಾಇಸಿ.

೩೭೧. ‘‘ಪಸ್ಸಿತ್ವಾ ಜನಸಂಮಜ್ಝೇ, ದೀಪಙ್ಕರೋ ಮಹಾಮುನಿ;

ವಿಯಾಕಾಸಿ ಮಹಾವೀರೋ, ಇಸಿ ಮುಗ್ಗತಮಾನಸಂ.

೩೭೨. ‘‘ಅಪರಿಮೇಯ್ಯೇ ಇತೋ ಕಪ್ಪೇ, ದೀಪಙ್ಕರೋ ಮಹಾಮುನಿ;

ಮಮ ಕಮ್ಮಂ ವಿಯಾಕಾಸಿ, ಉಜುಭಾವಂ ಮಹಾಮುನಿ.

೩೭೩. ‘‘‘ಸಮಚಿತ್ತಾ ಸಮಕಮ್ಮಾ, ಸಮಕಾರೀ ಭವಿಸ್ಸತಿ;

ಪಿಯಾ ಹೇಸ್ಸತಿ ಕಮ್ಮೇನ, ತುಯ್ಹತ್ಥಾಯ ಮಹಾಇಸಿ [ಮಹಾಇಸೇ (ಸ್ಯಾ.)].

೩೭೪. ‘‘‘ಸುದಸ್ಸನಾ ಸುಪಿಯಾ ಚ, ಮನಾಪಾ ಪಿಯವಾದಿನೀ;

ತಸ್ಸ ಧಮ್ಮೇಸು ದಾಯಾದಾ, ವಿಹರಿಸ್ಸತಿ ಇದ್ಧಿಕಾ.

೩೭೫. ‘‘‘ಯಥಾಪಿ ಭಣ್ಡಸಾಮುಗ್ಗಂ, ಅನುರಕ್ಖತಿ ಸಾಮಿನೋ;

ಏವಂ ಕುಸಲಧಮ್ಮಾನಂ, ಅನುರಕ್ಖಿಸ್ಸತೇ ಅಯಂ.

೩೭೬. ‘‘‘ತಸ್ಸ ತೇ [ತಸ್ಸ ತಂ (ಸ್ಯಾ.)] ಅನುಕಮ್ಪನ್ತೀ, ಪೂರಯಿಸ್ಸತಿ ಪಾರಮೀ;

ಸೀಹೋವ ಪಞ್ಜರಂ ಭೇತ್ವಾ [ಹಿತ್ವಾ (ಸ್ಯಾ.), ಹೇತ್ವಾ (ಪೀ.)], ಪಾಪುಣಿಸ್ಸತಿ ಬೋಧಿಯಂ’.

೩೭೭. ‘‘ಅಪರಿಮೇಯ್ಯೇ ಇತೋ ಕಪ್ಪೇ, ಯಂ ಮಂ ಬುದ್ಧೋ ವಿಯಾಕರೀ;

ತಂ ವಾಚಂ ಅನುಮೋದೇನ್ತೀ, ಏವಂಕಾರೀ ಭವಿಂ ಅಹಂ.

೩೭೮. ‘‘ತಸ್ಸ ಕಮ್ಮಸ್ಸ ಸುಕತಸ್ಸ, ತತ್ಥ ಚಿತ್ತಂ ಪಸಾದಯಿಂ;

ದೇವಮನುಸ್ಸಕಂ ಯೋನಿಂ, ಅನುಭೋತ್ವಾ ಅಸಙ್ಖಿಯಂ.

೩೭೯. ‘‘ಸುಖದುಕ್ಖೇನುಭೋತ್ವಾಹಂ, ದೇವೇಸು ಮಾನುಸೇಸು ಚ;

ಪಚ್ಛಿಮೇ ಭವೇ ಸಮ್ಪತ್ತೇ, ಅಜಾಯಿಂ ಸಾಕಿಯೇ ಕುಲೇ.

೩೮೦. ‘‘ರೂಪವತೀ ಭೋಗವತೀ, ಯಸಸೀಲವತೀ ತತೋ;

ಸಬ್ಬಙ್ಗಸಮ್ಪದಾ ಹೋಮಿ, ಕುಲೇಸು ಅಭಿಸಕ್ಕತಾ.

೩೮೧. ‘‘ಲಾಭಂ ಸಿಲೋಕಂ ಸಕ್ಕಾರಂ, ಲೋಕಧಮ್ಮಸಮಾಗಮಂ;

ಚಿತ್ತಞ್ಚ ದುಕ್ಖಿತಂ ನತ್ಥಿ, ವಸಾಮಿ ಅಕುತೋಭಯಾ.

೩೮೨. ‘‘ವುತ್ತಞ್ಹೇತಂ ಭಗವತಾ, ರಞ್ಞೋ ಅನ್ತೇಪುರೇ ತದಾ;

ಖತ್ತಿಯಾನಂ ಪುರೇ ವೀರ, ಉಪಕಾರಞ್ಚ ನಿದ್ದಿಸಿ.

೩೮೩. ‘‘ಉಪಕಾರಾ ಚ ಯಾ ನಾರೀ, ಯಾ ಚ ನಾರೀ ಸುಖೇ ದುಖೇ;

ಅತ್ಥಕ್ಖಾಯೀ ಚ ಯಾ ನಾರೀ, ಯಾ ಚ ನಾರೀನುಕಮ್ಪಿಕಾ.

೩೮೪. ‘‘ಪಞ್ಚಕೋಟಿಸತಾ ಬುದ್ಧಾ, ನವಕೋಟಿಸತಾನಿ ಚ;

ಏತೇಸಂ ದೇವದೇವಾನಂ, ಮಹಾದಾನಂ ಪವತ್ತಯಿಂ.

೩೮೫. ‘‘ಅಧಿಕಾರಂ ಮಹಾ [ಸದಾ (ಪೀ.) ಏವಮುಪರಿಪಿ] ಮಯ್ಹಂ, ಧಮ್ಮರಾಜ ಸುಣೋಹಿ ಮೇ;

ಏಕಾದಸಕೋಟಿಸತಾ, ಬುದ್ಧಾ ದ್ವಾದಸ ಕೋಟಿಯೋ [ಹೋನ್ತಿ ಲೋಕಗ್ಗನಾಯಕಾ (ಸೀ. ಸ್ಯಾ.), ಪಣ್ಣಾಕೋಟಿಸತಾನಿ ಚ (ಪೀ.)].

೩೮೬. ‘‘ಏತೇಸಂ ದೇವದೇವಾನಂ, ಮಹಾದಾನಂ ಪವತ್ತಯಿಂ;

ಅಧಿಕಾರಂ ಮಹಾ ಮಯ್ಹಂ, ಧಮ್ಮರಾಜ ಸುಣೋಹಿ ಮೇ.

೩೮೭. ‘‘‘ವೀಸಕೋಟಿಸತಾ ಬುದ್ಧಾ, ತಿಂಸಕೋಟಿಸತಾನಿ ಚ;