೪. ಸಕುಲಾಥೇರೀಅಪದಾನಂ

೧೩೧. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.

೧೩೨. ‘‘ಹಿತಾಯ ಸಬ್ಬಸತ್ತಾನಂ, ಸುಖಾಯ ವದತಂ ವರೋ;

ಅತ್ಥಾಯ ಪುರಿಸಾಜಞ್ಞೋ, ಪಟಿಪನ್ನೋ ಸದೇವಕೇ.

೧೩೩. ‘‘ಯಸಗ್ಗಪತ್ತೋ ಸಿರಿಮಾ, ಕಿತ್ತಿವಣ್ಣಗತೋ ಜಿನೋ;

ಪೂಜಿತೋ ಸಬ್ಬಲೋಕಸ್ಸ, ದಿಸಾಸಬ್ಬಾಸು ವಿಸ್ಸುತೋ.

೧೩೪. ‘‘ಉತ್ತಿಣ್ಣವಿಚಿಕಿಚ್ಛೋ ಸೋ, ವೀತಿವತ್ತಕಥಂಕಥೋ;

ಸಮ್ಪುಣ್ಣಮನಸಙ್ಕಪ್ಪೋ, ಪತ್ತೋ ಸಮ್ಬೋಧಿಮುತ್ತಮಂ.

೧೩೫. ‘‘ಅನುಪ್ಪನ್ನಸ್ಸ ಮಗ್ಗಸ್ಸ, ಉಪ್ಪಾದೇತಾ ನರುತ್ತಮೋ;

ಅನಕ್ಖಾತಞ್ಚ ಅಕ್ಖಾಸಿ, ಅಸಞ್ಜಾತಞ್ಚ ಸಞ್ಜನೀ.

೧೩೬. ‘‘ಮಗ್ಗಞ್ಞೂ ಚ ಮಗ್ಗವಿದೂ, ಮಗ್ಗಕ್ಖಾಯೀ ನರಾಸಭೋ;

ಮಗ್ಗಸ್ಸ ಕುಸಲೋ ಸತ್ಥಾ, ಸಾರಥೀನಂ ವರುತ್ತಮೋ.

೧೩೭. ‘‘ಮಹಾಕಾರುಣಿಕೋ ಸತ್ಥಾ, ಧಮ್ಮಂ ದೇಸೇಸಿ ನಾಯಕೋ;

ನಿಮುಗ್ಗೇ ಕಾಮಪಙ್ಕಮ್ಹಿ, ಸಮುದ್ಧರತಿ ಪಾಣಿನೇ.

೧೩೮. ‘‘ತದಾಹಂ ಹಂಸವತಿಯಂ, ಜಾತಾ ಖತ್ತಿಯನನ್ದನಾ;

ಸುರೂಪಾ ಸಧನಾ ಚಾಪಿ, ದಯಿತಾ ಚ ಸಿರೀಮತೀ.

೧೩೯. ‘‘ಆನನ್ದಸ್ಸ ಮಹಾರಞ್ಞೋ, ಧೀತಾ ಪರಮಸೋಭಣಾ;

ವೇಮಾತಾ [ವೇಮಾತು (ಸೀ.)] ಭಗಿನೀ ಚಾಪಿ, ಪದುಮುತ್ತರನಾಮಿನೋ.

೧೪೦. ‘‘ರಾಜಕಞ್ಞಾಹಿ ಸಹಿತಾ, ಸಬ್ಬಾಭರಣಭೂಸಿತಾ;

ಉಪಾಗಮ್ಮ ಮಹಾವೀರಂ, ಅಸ್ಸೋಸಿಂ ಧಮ್ಮದೇಸನಂ.

೧೪೧. ‘‘ತದಾ ಹಿ ಸೋ ಲೋಕಗರು, ಭಿಕ್ಖುನಿಂ ದಿಬ್ಬಚಕ್ಖುಕಂ;

ಕಿತ್ತಯಂ ಪರಿಸಾಮಜ್ಝೇ [ಚತುಪರಿಸಾಯ ಮಜ್ಝೇ (ಸ್ಯಾ.)], ಅಗ್ಗಟ್ಠಾನೇ ಠಪೇಸಿ ತಂ.

೧೪೨. ‘‘ಸುಣಿತ್ವಾ ತಮಹಂ ಹಟ್ಠಾ, ದಾನಂ ದತ್ವಾನ ಸತ್ಥುನೋ;

ಪೂಜಿತ್ವಾನ ಚ ಸಮ್ಬುದ್ಧಂ, ದಿಬ್ಬಚಕ್ಖುಂ ಅಪತ್ಥಯಿಂ.

೧೪೩. ‘‘ತತೋ ಅವೋಚ ಮಂ ಸತ್ಥಾ, ‘ನನ್ದೇ ಲಚ್ಛಸಿ ಪತ್ಥಿತಂ;

ಪದೀಪಧಮ್ಮದಾನಾನಂ, ಫಲಮೇತಂ ಸುನಿಚ್ಛಿತಂ.

೧೪೪. ‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೧೪೫. ‘‘‘ತಸ್ಸ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;

ಸಕುಲಾ ನಾಮ ನಾಮೇನ [ಸಕುಲಾತಿ ಚ ನಾಮೇನ (ಸ್ಯಾ.)], ಹೇಸ್ಸತಿ ಸತ್ಥು ಸಾವಿಕಾ’.

೧೪೬. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೧೪೭. ‘‘ಇಮಮ್ಹಿ ಭದ್ದಕೇ ಕಪ್ಪೇ, ಬ್ರಹ್ಮಬನ್ಧು ಮಹಾಯಸೋ;

ಕಸ್ಸಪೋ ನಾಮ ಗೋತ್ತೇನ, ಉಪ್ಪಜ್ಜಿ ವದತಂ ವರೋ.

೧೪೮. ‘‘ಪರಿಬ್ಬಾಜಕಿನೀ ಆಸಿಂ, ತದಾಹಂ ಏಕಚಾರಿನೀ;

ಭಿಕ್ಖಾಯ ವಿಚರಿತ್ವಾನ, ಅಲಭಿಂ ತೇಲಮತ್ತಕಂ.

೧೪೯. ‘‘ತೇನ ದೀಪಂ ಪದೀಪೇತ್ವಾ, ಉಪಟ್ಠಿಂ ಸಬ್ಬಸಂವರಿಂ;

ಚೇತಿಯಂ ದ್ವಿಪದಗ್ಗಸ್ಸ [ದಿಪದಗ್ಗಸ್ಸ (ಸೀ. ಸ್ಯಾ. ಪೀ.)], ವಿಪ್ಪಸನ್ನೇನ ಚೇತಸಾ.

೧೫೦. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೧೫೧. ‘‘ಯತ್ಥ ಯತ್ಥೂಪಪಜ್ಜಾಮಿ, ತಸ್ಸ ಕಮ್ಮಸ್ಸ ವಾಹಸಾ;

ಪಜ್ಜಲನ್ತಿ [ಸಞ್ಜಲನ್ತಿ (ಸ್ಯಾ. ಕ.), ಸಂಚರನ್ತಿ (ಪೀ.)] ಮಹಾದೀಪಾ, ತತ್ಥ ತತ್ಥ ಗತಾಯ ಮೇ.

೧೫೨. ‘‘ತಿರೋಕುಟ್ಟಂ ತಿರೋಸೇಲಂ, ಸಮತಿಗ್ಗಯ್ಹ ಪಬ್ಬತಂ;

ಪಸ್ಸಾಮಹಂ ಯದಿಚ್ಛಾಮಿ, ದೀಪದಾನಸ್ಸಿದಂ ಫಲಂ.

೧೫೩. ‘‘ವಿಸುದ್ಧನಯನಾ ಹೋಮಿ, ಯಸಸಾ ಚ ಜಲಾಮಹಂ;

ಸದ್ಧಾಪಞ್ಞಾವತೀ ಚೇವ, ದೀಪದಾನಸ್ಸಿದಂ ಫಲಂ.

೧೫೪. ‘‘ಪಚ್ಛಿಮೇ ಚ ಭವೇ ದಾನಿ, ಜಾತಾ ವಿಪ್ಪಕುಲೇ ಅಹಂ;

ಪಹೂತಧನಧಞ್ಞಮ್ಹಿ, ಮುದಿತೇ ರಾಜಪೂಜಿತೇ.

೧೫೫. ‘‘ಅಹಂ ಸಬ್ಬಙ್ಗಸಮ್ಪನ್ನಾ, ಸಬ್ಬಾಭರಣಭೂಸಿತಾ;

ಪುರಪ್ಪವೇಸೇ ಸುಗತಂ, ವಾತಪಾನೇ ಠಿತಾ ಅಹಂ.

೧೫೬. ‘‘ದಿಸ್ವಾ ಜಲನ್ತಂ ಯಸಸಾ, ದೇವಮನುಸ್ಸಸಕ್ಕತಂ;

ಅನುಬ್ಯಞ್ಜನಸಮ್ಪನ್ನಂ, ಲಕ್ಖಣೇಹಿ ವಿಭೂಸಿತಂ.

೧೫೭. ‘‘ಉದಗ್ಗಚಿತ್ತಾ ಸುಮನಾ, ಪಬ್ಬಜ್ಜಂ ಸಮರೋಚಯಿಂ;

ನ ಚಿರೇನೇವ ಕಾಲೇನ, ಅರಹತ್ತಮಪಾಪುಣಿಂ.

೧೫೮. ‘‘ಇದ್ಧೀಸು ಚ ವಸೀ ಹೋಮಿ, ದಿಬ್ಬಾಯ ಸೋತಧಾತುಯಾ;

ಪರಚಿತ್ತಾನಿ ಜಾನಾಮಿ, ಸತ್ಥುಸಾಸನಕಾರಿಕಾ.

೧೫೯. ‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;

ಖೇಪೇತ್ವಾ ಆಸವೇ ಸಬ್ಬೇ, ವಿಸುದ್ಧಾಸಿಂ ಸುನಿಮ್ಮಲಾ.

೧೬೦. ‘‘ಪರಿಚಿಣ್ಣೋ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;

ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ.

೧೬೧. ‘‘ಯಸ್ಸತ್ಥಾಯ ಪಬ್ಬಜಿತಾ, ಅಗಾರಸ್ಮಾನಗಾರಿಯಂ;

ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ.

೧೬೨. ‘‘ತತೋ ಮಹಾಕಾರುಣಿಕೋ, ಏತದಗ್ಗೇ ಠಪೇಸಿ ಮಂ;

ದಿಬ್ಬಚಕ್ಖುಕಾನಂ ಅಗ್ಗಾ, ಸಕುಲಾತಿ ನರುತ್ತಮೋ.

೧೬೩. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.

೧೬೪. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೬೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಸಕುಲಾ ಭಿಕ್ಖುನೀ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸಕುಲಾಥೇರಿಯಾಪದಾನಂ ಚತುತ್ಥಂ.