೫. ನನ್ದಾಥೇರೀಅಪದಾನಂ

೧೬೬. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.

೧೬೭. ‘‘ಓವಾದಕೋ ವಿಞ್ಞಾಪಕೋ, ತಾರಕೋ ಸಬ್ಬಪಾಣಿನಂ;

ದೇಸನಾಕುಸಲೋ ಬುದ್ಧೋ, ತಾರೇಸಿ ಜನತಂ ಬಹುಂ.

೧೬೮. ‘‘ಅನುಕಮ್ಪಕೋ ಕಾರುಣಿಕೋ, ಹಿತೇಸೀ ಸಬ್ಬಪಾಣಿನಂ;

ಸಮ್ಪತ್ತೇ ತಿತ್ಥಿಯೇ ಸಬ್ಬೇ, ಪಞ್ಚಸೀಲೇ ಪತಿಟ್ಠಪಿ.

೧೬೯. ‘‘ಏವಂ ನಿರಾಕುಲಂ ಆಸಿ, ಸುಞ್ಞತಂ ತಿತ್ಥಿಯೇಹಿ ಚ;

ವಿಚಿತ್ತಂ ಅರಹನ್ತೇಹಿ, ವಸೀಭೂತೇಹಿ ತಾದಿಭಿ.

೧೭೦. ‘‘ರತನಾನಟ್ಠಪಞ್ಞಾಸಂ, ಉಗ್ಗತೋವ ಮಹಾಮುನಿ;

ಕಞ್ಚನಗ್ಘಿಯಸಙ್ಕಾಸೋ, ಬಾತ್ತಿಂಸವರಲಕ್ಖಣೋ.

೧೭೧. ‘‘ವಸ್ಸಸತಸಹಸ್ಸಾನಿ, ಆಯು ವಿಜ್ಜತಿ ತಾವದೇ;

ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.

೧೭೨. ‘‘ತದಾಹಂ ಹಂಸವತಿಯಂ, ಜಾತಾ ಸೇಟ್ಠಿಕುಲೇ ಅಹುಂ;

ನಾನಾರತನಪಜ್ಜೋತೇ, ಮಹಾಸುಖಸಮಪ್ಪಿತಾ.

೧೭೩. ‘‘ಉಪೇತ್ವಾ ತಂ ಮಹಾವೀರಂ, ಅಸ್ಸೋಸಿಂ ಧಮ್ಮದೇಸನಂ;

ಅಮತಂ ಪರಮಸ್ಸಾದಂ, ಪರಮತ್ಥನಿವೇದಕಂ.

೧೭೪. ‘‘ತದಾ ನಿಮನ್ತಯಿತ್ವಾನ, ಸಸಙ್ಘಂ ಲೋಕನಾಯಕಂ;

ದತ್ವಾ ತಸ್ಸ ಮಹಾದಾನಂ, ಪಸನ್ನಾ ಸೇಹಿ ಪಾಣಿಭಿ.

೧೭೫. ‘‘ಝಾಯಿನೀನಂ ಭಿಕ್ಖುನೀನಂ, ಅಗ್ಗಟ್ಠಾನಮಪತ್ಥಯಿಂ;

ನಿಪಚ್ಚ ಸಿರಸಾ ಧೀರಂ, ಸಸಙ್ಘಂ ಲೋಕನಾಯಕಂ.

೧೭೬. ‘‘ತದಾ ಅದನ್ತದಮಕೋ, ತಿಲೋಕಸರಣೋ ಪಭೂ;

ಬ್ಯಾಕಾಸಿ ನರಸಾರಥಿ, ‘ಲಚ್ಛಸೇ ತಂ ಸುಪತ್ಥಿತಂ.

೧೭೭. ‘‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೧೭೮. ‘‘‘ತಸ್ಸ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;

ನನ್ದಾತಿ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಿಕಾ’.

೧೭೯. ‘‘ತಂ ಸುತ್ವಾ ಮುದಿತಾ ಹುತ್ವಾ, ಯಾವಜೀವಂ ತದಾ ಜಿನಂ;

ಮೇತ್ತಚಿತ್ತಾ ಪರಿಚರಿಂ, ಪಚ್ಚಯೇಹಿ ವಿನಾಯಕಂ.

೧೮೦. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೧೮೧. ‘‘ತತೋ ಚುತಾ ಯಾಮಮಗಂ, ತತೋಹಂ ತುಸಿತಂ ಗತಾ [ಅಗಂ (ಸೀ. ಪೀ. ಕ.)];

ತತೋ ಚ ನಿಮ್ಮಾನರತಿಂ, ವಸವತ್ತಿಪುರಂ ತತೋ [ಗತಾ (ಸ್ಯಾ.)].

೧೮೨. ‘‘ಯತ್ಥ ಯತ್ಥೂಪಪಜ್ಜಾಮಿ, ತಸ್ಸ ಕಮ್ಮಸ್ಸ ವಾಹಸಾ;

ತತ್ಥ ತತ್ಥೇವ ರಾಜೂನಂ, ಮಹೇಸಿತ್ತಮಕಾರಯಿಂ.

೧೮೩. ‘‘ತತೋ ಚುತಾ ಮನುಸ್ಸತ್ತೇ, ರಾಜಾನಂ ಚಕ್ಕವತ್ತಿನಂ;

ಮಣ್ಡಲೀನಞ್ಚ ರಾಜೂನಂ, ಮಹೇಸಿತ್ತಮಕಾರಯಿಂ.

೧೮೪. ‘‘ಸಮ್ಪತ್ತಿಂ ಅನುಭೋತ್ವಾನ, ದೇವೇಸು ಮನುಜೇಸು ಚ;

ಸಬ್ಬತ್ಥ ಸುಖಿತಾ ಹುತ್ವಾ, ನೇಕಕಪ್ಪೇಸು ಸಂಸರಿಂ.

೧೮೫. ‘‘ಪಚ್ಛಿಮೇ ಭವೇ ಸಮ್ಪತ್ತೇ, ಸುರಮ್ಮೇ [ಪುರಸ್ಮಿಂ (ಸ್ಯಾ.)] ಕಪಿಲವ್ಹಯೇ;

ರಞ್ಞೋ ಸುದ್ಧೋದನಸ್ಸಾಹಂ, ಧೀತಾ ಆಸಿಂ ಅನಿನ್ದಿತಾ.

೧೮೬. ‘‘ಸಿರಿಯಾ [ಸಿರಿಂವ (ಸೀ.), ರಂಸಿರಿವ (ಸ್ಯಾ.)] ರೂಪಿನಿಂ ದಿಸ್ವಾ, ನನ್ದಿತಂ ಆಸಿ ತಂ ಕುಲಂ;

ತೇನ ನನ್ದಾತಿ ಮೇ ನಾಮಂ, ಸುನ್ದರಂ ಪವರಂ ಅಹು.

೧೮೭. ‘‘ಯುವತೀನಞ್ಚ ಸಬ್ಬಾಸಂ, ಕಲ್ಯಾಣೀತಿ ಚ ವಿಸ್ಸುತಾ;

ತಸ್ಮಿಮ್ಪಿ ನಗರೇ ರಮ್ಮೇ, ಠಪೇತ್ವಾ ತಂ ಯಸೋಧರಂ.

೧೮೮. ‘‘ಜೇಟ್ಠೋ ಭಾತಾ ತಿಲೋಕಗ್ಗೋ, ಪಚ್ಛಿಮೋ [ಮಜ್ಝಿಮೋ (ಪೀ.)] ಅರಹಾ ತಥಾ;

ಏಕಾಕಿನೀ ಗಹಟ್ಠಾಹಂ, ಮಾತರಾ ಪರಿಚೋದಿತಾ.

೧೮೯. ‘‘‘ಸಾಕಿಯಮ್ಹಿ ಕುಲೇ ಜಾತಾ, ಪುತ್ತೇ ಬುದ್ಧಾನುಜಾ ತುವಂ;

ನನ್ದೇನಪಿ ವಿನಾ ಭೂತಾ, ಅಗಾರೇ ಕಿಂ ನು ಅಚ್ಛಸಿ.

೧೯೦. ‘‘‘ಜರಾವಸಾನಂ ಯೋಬ್ಬಞ್ಞಂ, ರೂಪಂ ಅಸುಚಿಸಮ್ಮತಂ;

ರೋಗನ್ತಮಪಿಚಾರೋಗ್ಯಂ, ಜೀವಿತಂ ಮರಣನ್ತಿಕಂ.

೧೯೧. ‘‘‘ಇದಮ್ಪಿ ತೇ ಸುಭಂ ರೂಪಂ, ಸಸೀಕನ್ತಂ ಮನೋಹರಂ;

ಭೂಸನಾನಂ ಅಲಙ್ಕಾರಂ, ಸಿರಿಸಙ್ಘಾಟಸನ್ನಿಭಂ.

೧೯೨. ‘‘‘ಪುಞ್ಜಿತಂ ಲೋಕಸಾರಂವ, ನಯನಾನಂ ರಸಾಯನಂ;

ಪುಞ್ಞಾನಂ ಕಿತ್ತಿಜನನಂ, ಉಕ್ಕಾಕಕುಲನನ್ದನಂ.

೧೯೩. ‘‘‘ನ ಚಿರೇನೇವ ಕಾಲೇನ, ಜರಾ ಸಮಧಿಸೇಸ್ಸತಿ [ಸಮಭಿಭೋಸ್ಸತಿ (ಸೀ. ಸ್ಯಾ.), ಸಮಧಿಹೇಸ್ಸತಿ (ಪೀ.)];

ವಿಹಾಯ ಗೇಹಂ ಕಾರುಞ್ಞೇ [ಕಾರುಞ್ಞೇ (ಸೀ. ಪೀ.), ಪಾರಯ್ಹಿಂ (ಸ್ಯಾ.)], ಚರ ಧಮ್ಮಮನಿನ್ದಿತೇ’.

೧೯೪. ‘‘ಸುತ್ವಾಹಂ ಮಾತು ವಚನಂ, ಪಬ್ಬಜಿಂ ಅನಗಾರಿಯಂ;

ದೇಹೇನ ನ ತು ಚಿತ್ತೇನ, ರೂಪಯೋಬ್ಬನಲಾಳಿತಾ.

೧೯೫. ‘‘ಮಹತಾ ಚ ಪಯತ್ತೇನ, ಝಾನಜ್ಝೇನ ಪರಂ ಮಮ;

ಕಾತುಞ್ಚ ವದತೇ ಮಾತಾ, ನ ಚಾಹಂ ತತ್ಥ ಉಸ್ಸುಕಾ.

೧೯೬. ‘‘ತತೋ ಮಹಾಕಾರುಣಿಕೋ, ದಿಸ್ವಾ ಮಂ ಕಾಮಲಾಲಸಂ [ಕಮಲಾನನಂ (ಸ್ಯಾ.)];

ನಿಬ್ಬಿನ್ದನತ್ಥಂ ರೂಪಸ್ಮಿಂ, ಮಮ ಚಕ್ಖುಪಥೇ ಜಿನೋ.

೧೯೭. ‘‘ಸಕೇನ ಆನುಭಾವೇನ, ಇತ್ಥಿಂ ಮಾಪೇಸಿ ಸೋಭಿನಿಂ;

ದಸ್ಸನೀಯಂ ಸುರುಚಿರಂ, ಮಮತೋಪಿ ಸುರೂಪಿನಿಂ.

೧೯೮. ‘‘ತಮಹಂ ವಿಮ್ಹಿತಾ ದಿಸ್ವಾ, ಅತಿವಿಮ್ಹಿತದೇಹಿನಿಂ;

ಚಿನ್ತಯಿಂ ಸಫಲಂ ಮೇತಿ, ನೇತ್ತಲಾಭಞ್ಚ ಮಾನುಸಂ.

೧೯೯. ‘‘ತಮಹಂ ಏಹಿ ಸುಭಗೇ, ಯೇನತ್ಥೋ ತಂ ವದೇಹಿ ಮೇ;

ಕುಲಂ ತೇ ನಾಮಗೋತ್ತಞ್ಚ, ವದ ಮೇ ಯದಿ ತೇ ಪಿಯಂ.

೨೦೦. ‘ನ ವಞ್ಚಕಾಲೋ ಸುಭಗೇ [ಪಞ್ಹಕಾಲೋ ಸುಭಣೇ (ಸೀ. ಸ್ಯಾ. ಪೀ.)], ಉಚ್ಛಙ್ಗೇ ಮಂ ನಿವಾಸಯ;

ಸೀದನ್ತೀವ ಮಮಙ್ಗಾನಿ, ಪಸುಪ್ಪಯ ಮುಹುತ್ತಕಂ’.

೨೦೧. ‘‘ತತೋ ಸೀಸಂ ಮಮಙ್ಕೇ ಸಾ, ಕತ್ವಾ ಸಯಿ ಸುಲೋಚನಾ;

ತಸ್ಸಾ ನಲಾಟೇ ಪತಿತಾ, ಲುದ್ಧಾ [ಲೂತಾ (ಸ್ಯಾ.)] ಪರಮದಾರುಣಾ.

೨೦೨. ‘‘ಸಹ ತಸ್ಸಾ ನಿಪಾತೇನ, ಪಿಳಕಾ ಉಪಪಜ್ಜಥ;

ಪಗ್ಘರಿಂಸು ಪಭಿನ್ನಾ ಚ, ಕುಣಪಾ ಪುಬ್ಬಲೋಹಿತಾ.

೨೦೩. ‘‘ಪಭಿನ್ನಂ ವದನಞ್ಚಾಪಿ, ಕುಣಪಂ ಪೂತಿಗನ್ಧನಂ;

ಉದ್ಧುಮಾತಂ ವಿನಿಲಞ್ಚ, ಪುಬ್ಬಞ್ಚಾಪಿ ಸರೀರಕಂ.

೨೦೪. ‘‘ಸಾ ಪವೇದಿತಸಬ್ಬಙ್ಗೀ, ನಿಸ್ಸಸನ್ತೀ ಮುಹುಂ ಮುಹುಂ;

ವೇದಯನ್ತೀ ಸಕಂ ದುಕ್ಖಂ, ಕರುಣಂ ಪರಿದೇವಯಿ.

೨೦೫. ‘‘‘ದುಕ್ಖೇನ ದುಕ್ಖಿತಾ ಹೋಮಿ, ಫುಸಯನ್ತಿ ಚ ವೇದನಾ;

ಮಹಾದುಕ್ಖೇ ನಿಮುಗ್ಗಮ್ಹಿ, ಸರಣಂ ಹೋಹಿ ಮೇ ಸಖೀ’.

೨೦೬. ‘‘‘ಕುಹಿಂ ವದನಸೋಭಂ ತೇ, ಕುಹಿಂ ತೇ ತುಙ್ಗನಾಸಿಕಾ;

ತಮ್ಬಬಿಮ್ಬವರೋಟ್ಠಂ ತೇ, ವದನಂ ತೇ ಕುಹಿಂ ಗತಂ.

೨೦೭. ‘‘‘ಕುಹಿಂ ಸಸೀನಿಭಂ ವಣ್ಣಂ, ಕಮ್ಬುಗೀವಾ ಕುಹಿಂ ಗತಾ;

ದೋಳಾಲೋಲಾವ [ದಾಮಾಮಾಲಞ್ಚ (ಸ್ಯಾ.), ದೋಲೋಲುಲ್ಲಾವ (ಕ.)] ತೇ ಕಣ್ಣಾ, ವೇವಣ್ಣಂ ಸಮುಪಾಗತಾ.

೨೦೮. ‘‘‘ಮಕುಳಖಾರಕಾಕಾರಾ [ಮಕುಲಮ್ಬುರೂಹಾಕಾರಾ (ಸೀ.), ಮಕುಳಪದುಮಾಕಾರಾ (ಸ್ಯಾ.)], ಕಲಿಕಾವ [ಕಲಸಾವ (ಸೀ. ಸ್ಯಾ. ಪೀ.)] ಪಯೋಧರಾ;

ಪಭಿನ್ನಾ ಪೂತಿಕುಣಪಾ, ದುಟ್ಠಗನ್ಧಿತ್ತಮಾಗತಾ.

೨೦೯. ‘‘‘ವೇದಿಮಜ್ಝಾವ ಸುಸ್ಸೋಣೀ [ತನುಮಜ್ಝಾ ಪುಥುಸ್ಸೋಣೀ (ಸೀ. ಸ್ಯಾ.), ವೇದಿಮಜ್ಝಾ ಪುಥುಸ್ಸೋಣೀ (ಪೀ.)], ಸೂನಾವ ನೀತಕಿಬ್ಬಿಸಾ;

ಜಾತಾ ಅಮೇಜ್ಝಭರಿತಾ, ಅಹೋ ರೂಪಮಸಸ್ಸತಂ.

೨೧೦. ‘‘‘ಸಬ್ಬಂ ಸರೀರಸಞ್ಜಾತಂ, ಪೂತಿಗನ್ಧಂ ಭಯಾನಕಂ;

ಸುಸಾನಮಿವ ಬೀಭಚ್ಛಂ, ರಮನ್ತೇ ಯತ್ಥ ಬಾಲಿಸಾ’.

೨೧೧. ‘‘ತದಾ ಮಹಾಕಾರುಣಿಕೋ, ಭಾತಾ ಮೇ ಲೋಕನಾಯಕೋ;

ದಿಸ್ವಾ ಸಂವಿಗ್ಗಚಿತ್ತಂ ಮಂ, ಇಮಾ ಗಾಥಾ ಅಭಾಸಥ.

೨೧೨. ‘‘‘ಆತುರಂ ಕುಣಪಂ ಪೂತಿಂ, ಪಸ್ಸ ನನ್ದೇ ಸಮುಸ್ಸಯಂ;

ಅಸುಭಾಯ ಚಿತ್ತಂ ಭಾವೇಹಿ, ಏಕಗ್ಗಂ ಸುಸಮಾಹಿತಂ.

೨೧೩. ‘‘‘ಯಥಾ ಇದಂ ತಥಾ ಏತಂ, ಯಥಾ ಏತಂ ತಥಾ ಇದಂ;

ದುಗ್ಗನ್ಧಂ ಪೂತಿಕಂ ವಾತಿ, ಬಾಲಾನಂ ಅಭಿನನ್ದಿತಂ.

೨೧೪. ‘‘‘ಏವಮೇತಂ ಅವೇಕ್ಖನ್ತೀ, ರತ್ತಿನ್ದಿವಮತನ್ದಿತಾ;

ತತೋ ಸಕಾಯ ಪಞ್ಞಾಯ, ಅಭಿನಿಬ್ಬಿಜ್ಝ ದಕ್ಖಸಿ’.

೨೧೫. ‘‘ತತೋಹಂ ಅತಿಸಂವಿಗ್ಗಾ, ಸುತ್ವಾ ಗಾಥಾ ಸುಭಾಸಿತಾ;

ತತ್ರಟ್ಠಿತಾವಹಂ ಸನ್ತೀ, ಅರಹತ್ತಮಪಾಪುಣಿಂ.

೨೧೬. ‘‘ಯತ್ಥ ಯತ್ಥ ನಿಸಿನ್ನಾಹಂ, ಸದಾ ಝಾನಪರಾಯನಾ;

ಜಿನೋ ತಸ್ಮಿಂ ಗುಣೇ ತುಟ್ಠೋ, ಏತದಗ್ಗೇ ಠಪೇಸಿ ಮಂ.

೨೧೭. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವಾ.

೨೧೮. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೨೧೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ನನ್ದಾ ಭಿಕ್ಖುನೀ ಜನಪದಕಲ್ಯಾಣೀ ಇಮಾ ಗಾಥಾಯೋ ಅಭಾಸಿತ್ಥಾತಿ.

ನನ್ದಾಥೇರಿಯಾಪದಾನಂ ಪಞ್ಚಮಂ.