೧೨. ಬ್ರಹ್ಮದತ್ತತ್ಥೇರಗಾಥಾ

೪೪೧. ‘‘ಅಕ್ಕೋಧಸ್ಸ ಕುತೋ ಕೋಧೋ, ದನ್ತಸ್ಸ ಸಮಜೀವಿನೋ;

ಸಮ್ಮದಞ್ಞಾ ವಿಮುತ್ತಸ್ಸ, ಉಪಸನ್ತಸ್ಸ ತಾದಿನೋ.

೪೪೨. ‘‘ತಸ್ಸೇವ ತೇನ ಪಾಪಿಯೋ, ಯೋ ಕುದ್ಧಂ ಪಟಿಕುಜ್ಝತಿ;

ಕುದ್ಧಂ ಅಪ್ಪಟಿಕುಜ್ಝನ್ತೋ, ಸಙ್ಗಾಮಂ ಜೇತಿ ದುಜ್ಜಯಂ.

೪೪೩. [ಸಂ. ನಿ. ೧.೧೮೮, ೨೫೦] ‘‘ಉಭಿನ್ನಮತ್ಥಂ ಚರತಿ, ಅತ್ತನೋ ಚ ಪರಸ್ಸ ಚ;

ಪರಂ ಸಙ್ಕುಪಿತಂ ಞತ್ವಾ, ಯೋ ಸತೋ ಉಪಸಮ್ಮತಿ.

೪೪೪. [ಸಂ. ನಿ. ೧.೧೮೮, ೨೫೦] ‘‘ಉಭಿನ್ನಂ ತಿಕಿಚ್ಛನ್ತಂ ತಂ, ಅತ್ತನೋ ಚ ಪರಸ್ಸ ಚ;

ಜನಾ ಮಞ್ಞನ್ತಿ ಬಾಲೋತಿ, ಯೇ ಧಮ್ಮಸ್ಸ ಅಕೋವಿದಾ.

೪೪೫. ‘‘ಉಪ್ಪಜ್ಜೇ ತೇ ಸಚೇ ಕೋಧೋ, ಆವಜ್ಜ ಕಕಚೂಪಮಂ;

ಉಪ್ಪಜ್ಜೇ ಚೇ ರಸೇ ತಣ್ಹಾ, ಪುತ್ತಮಂಸೂಪಮಂ ಸರ.

೪೪೬. ‘‘ಸಚೇ ಧಾವತಿ ಚಿತ್ತಂ ತೇ, ಕಾಮೇಸು ಚ ಭವೇಸು ಚ;

ಖಿಪ್ಪಂ ನಿಗ್ಗಣ್ಹ ಸತಿಯಾ, ಕಿಟ್ಠಾದಂ ವಿಯ ದುಪ್ಪಸು’’ನ್ತಿ;

… ಬ್ರಹ್ಮದತ್ತೋ ಥೇರೋ….