ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ಖುದ್ದಕನಿಕಾಯೇ

ಥೇರಗಾಥಾಪಾಳಿ

ನಿದಾನಗಾಥಾ

ಸೀಹಾನಂವ ನದನ್ತಾನಂ, ದಾಠೀನಂ ಗಿರಿಗಬ್ಭರೇ;

ಸುಣಾಥ ಭಾವಿತತ್ತಾನಂ, ಗಾಥಾ ಅತ್ಥೂಪನಾಯಿಕಾ [ಅತ್ತೂಪನಾಯಿಕಾ (ಸೀ. ಕ.)].

ಯಥಾನಾಮಾ ಯಥಾಗೋತ್ತಾ, ಯಥಾಧಮ್ಮವಿಹಾರಿನೋ;

ಯಥಾಧಿಮುತ್ತಾ ಸಪ್ಪಞ್ಞಾ, ವಿಹರಿಂಸು ಅತನ್ದಿತಾ.

ತತ್ಥ ತತ್ಥ ವಿಪಸ್ಸಿತ್ವಾ, ಫುಸಿತ್ವಾ ಅಚ್ಚುತಂ ಪದಂ;

ಕತನ್ತಂ ಪಚ್ಚವೇಕ್ಖನ್ತಾ, ಇಮಮತ್ಥಮಭಾಸಿಸುಂ.

೧. ಏಕಕನಿಪಾತೋ

೧. ಪಠಮವಗ್ಗೋ

೧. ಸುಭೂತಿತ್ಥೇರಗಾಥಾ

೧. ‘‘ಛನ್ನಾ ಮೇ ಕುಟಿಕಾ ಸುಖಾ ನಿವಾತಾ, ವಸ್ಸ ದೇವ ಯಥಾಸುಖಂ;

ಚಿತ್ತಂ ಮೇ ಸುಸಮಾಹಿತಂ ವಿಮುತ್ತಂ, ಆತಾಪೀ ವಿಹರಾಮಿ ವಸ್ಸ ದೇವಾ’’ತಿ.

ಇತ್ಥಂ ಸುದಂ [ಇತ್ಥಂ ಸುಮಂ (ಕ. ಅಟ್ಠ.)] ಆಯಸ್ಮಾ ಸುಭೂತಿತ್ಥೇರೋ ಗಾಥಂ ಅಭಾಸಿತ್ಥಾತಿ.

೨. ಮಹಾಕೋಟ್ಠಿಕತ್ಥೇರಗಾಥಾ

೨. ‘‘ಉಪಸನ್ತೋ ಉಪರತೋ, ಮನ್ತಭಾಣೀ ಅನುದ್ಧತೋ;

ಧುನಾತಿ ಪಾಪಕೇ ಧಮ್ಮೇ, ದುಮಪತ್ತಂವ ಮಾಲುತೋ’’ತಿ.

ಇತ್ಥಂ ಸುದಂ ಆಯಸ್ಮಾ ಮಹಾಕೋಟ್ಠಿಕೋ [ಮಹಾಕೋಟ್ಠಿತೋ (ಸೀ. ಸ್ಯಾ.)] ಥೇರೋ ಗಾಥಂ ಅಭಾಸಿತ್ಥಾತಿ.

೩. ಕಙ್ಖಾರೇವತತ್ಥೇರಗಾಥಾ

೩. ‘‘ಪಞ್ಞಂ ಇಮಂ ಪಸ್ಸ ತಥಾಗತಾನಂ, ಅಗ್ಗಿ ಯಥಾ ಪಜ್ಜಲಿತೋ ನಿಸೀಥೇ;

ಆಲೋಕದಾ ಚಕ್ಖುದದಾ ಭವನ್ತಿ, ಯೇ ಆಗತಾನಂ ವಿನಯನ್ತಿ ಕಙ್ಖ’’ನ್ತಿ.

ಇತ್ಥಂ ಸುದಂ ಆಯಸ್ಮಾ ಕಙ್ಖಾರೇವತೋ ಥೇರೋ ಗಾಥಂ ಅಭಾಸಿತ್ಥಾತಿ.

೪. ಪುಣ್ಣತ್ಥೇರಗಾಥಾ

೪. ‘‘ಸಮ್ಭಿರೇವ ಸಮಾಸೇಥ, ಪಣ್ಡಿತೇಹತ್ಥದಸ್ಸಿಭಿ;

ಅತ್ಥಂ ಮಹನ್ತಂ ಗಮ್ಭೀರಂ, ದುದ್ದಸಂ ನಿಪುಣಂ ಅಣುಂ;

ಧೀರಾ ಸಮಧಿಗಚ್ಛನ್ತಿ, ಅಪ್ಪಮತ್ತಾ ವಿಚಕ್ಖಣಾ’’ತಿ.

ಇತ್ಥಂ ಸುದಂ ಆಯಸ್ಮಾ ಪುಣ್ಣೋ ಮನ್ತಾಣಿಪುತ್ತೋ [ಮನ್ತಾನಿಪುತ್ತೋ (ಸ್ಯಾ. ಕ.)] ಥೇರೋ ಗಾಥಂ ಅಭಾಸಿತ್ಥಾತಿ.

೫. ದಬ್ಬತ್ಥೇರಗಾಥಾ

೫. ‘‘ಯೋ ದುದ್ದಮಿಯೋ ದಮೇನ ದನ್ತೋ, ದಬ್ಬೋ ಸನ್ತುಸಿತೋ ವಿತಿಣ್ಣಕಙ್ಖೋ;

ವಿಜಿತಾವೀ ಅಪೇತಭೇರವೋ ಹಿ, ದಬ್ಬೋ ಸೋ ಪರಿನಿಬ್ಬುತೋ ಠಿತತ್ತೋ’’ತಿ.

ಇತ್ಥಂ ಸುದಂ ಆಯಸ್ಮಾ ದಬ್ಬೋ ಥೇರೋ ಗಾಥಂ ಅಭಾಸಿತ್ಥಾತಿ.

೬. ಸೀತವನಿಯತ್ಥೇರಗಾಥಾ

೬. ‘‘ಯೋ ಸೀತವನಂ ಉಪಗಾ ಭಿಕ್ಖು, ಏಕೋ ಸನ್ತುಸಿತೋ ಸಮಾಹಿತತ್ತೋ;

ವಿಜಿತಾವೀ ಅಪೇತಲೋಮಹಂಸೋ, ರಕ್ಖಂ ಕಾಯಗತಾಸತಿಂ ಧಿತಿಮಾ’’ತಿ.

ಇತ್ಥಂ ಸುದಂ ಆಯಸ್ಮಾ ಸೀತವನಿಯೋ ಥೇರೋ ಗಾಥಂ ಅಭಾಸಿತ್ಥಾತಿ.

೭. ಭಲ್ಲಿಯತ್ಥೇರಗಾಥಾ

೭. ‘‘ಯೋಪಾನುದೀ ಮಚ್ಚುರಾಜಸ್ಸ ಸೇನಂ, ನಳಸೇತುಂವ ಸುದುಬ್ಬಲಂ ಮಹೋಘೋ;

ವಿಜಿತಾವೀ ಅಪೇತಭೇರವೋ ಹಿ, ದನ್ತೋ ಸೋ ಪರಿನಿಬ್ಬುತೋ ಠಿತತ್ತೋ’’ತಿ.

ಇತ್ಥಂ ಸುದಂ ಆಯಸ್ಮಾ ಭಲ್ಲಿಯೋ ಥೇರೋ ಗಾಥಂ ಅಭಾಸಿತ್ಥಾತಿ.

೮. ವೀರತ್ಥೇರಗಾಥಾ

೮. ‘‘ಯೋ ದುದ್ದಮಿಯೋ ದಮೇನ ದನ್ತೋ, ವೀರೋ ಸನ್ತುಸಿತೋ ವಿತಿಣ್ಣಕಙ್ಖೋ;

ವಿಜಿತಾವೀ ಅಪೇತಲೋಮಹಂಸೋ, ವೀರೋ ಸೋ ಪರಿನಿಬ್ಬುತೋ ಠಿತತ್ತೋ’’ತಿ.

ಇತ್ಥಂ ಸುದಂ ಆಯಸ್ಮಾ ವೀರೋ ಥೇರೋ ಗಾಥಂ ಅಭಾಸಿತ್ಥಾತಿ.

೯. ಪಿಲಿನ್ದವಚ್ಛತ್ಥೇರಗಾಥಾ

೯. ‘‘ಸ್ವಾಗತಂ ನ ದುರಾಗತಂ [ನಾಪಗತಂ (ಸೀ. ಸ್ಯಾ.)], ನಯಿದಂ ದುಮನ್ತಿತಂ ಮಮ;

ಸಂವಿಭತ್ತೇಸು ಧಮ್ಮೇಸು, ಯಂ ಸೇಟ್ಠಂ ತದುಪಾಗಮಿ’’ನ್ತಿ.

ಇತ್ಥಂ ಸುದಂ ಆಯಸ್ಮಾ ಪಿಲಿನ್ದವಚ್ಛೋ [ಪಿಲಿನ್ದಿವಚ್ಛೋ (ಸೀ.)] ಥೇರೋ ಗಾಥಂ ಅಭಾಸಿತ್ಥಾತಿ.

೧೦. ಪುಣ್ಣಮಾಸತ್ಥೇರಗಾಥಾ

೧೦. ‘‘ವಿಹರಿ ಅಪೇಕ್ಖಂ ಇಧ ವಾ ಹುರಂ ವಾ, ಯೋ ವೇದಗೂ ಸಮಿತೋ ಯತತ್ತೋ;

ಸಬ್ಬೇಸು ಧಮ್ಮೇಸು ಅನೂಪಲಿತ್ತೋ, ಲೋಕಸ್ಸ ಜಞ್ಞಾ ಉದಯಬ್ಬಯಞ್ಚಾ’’ತಿ.

ಇತ್ಥಂ ಸುದಂ ಆಯಸ್ಮಾ ಪುಣ್ಣಮಾಸೋ ಥೇರೋ ಗಾಥಂ ಅಭಾಸಿತ್ಥಾತಿ.

ವಗ್ಗೋ ಪಠಮೋ ನಿಟ್ಠಿತೋ.

ತಸ್ಸುದ್ದಾನಂ –

ಸುಭೂತಿ ಕೋಟ್ಠಿಕೋ ಥೇರೋ, ಕಙ್ಖಾರೇವತಸಮ್ಮತೋ;

ಮನ್ತಾಣಿಪುತ್ತೋ ದಬ್ಬೋ ಚ, ಸೀತವನಿಯೋ ಚ ಭಲ್ಲಿಯೋ;

ವೀರೋ ಪಿಲಿನ್ದವಚ್ಛೋ ಚ, ಪುಣ್ಣಮಾಸೋ ತಮೋನುದೋತಿ.

೨. ದುತಿಯವಗ್ಗೋ

೧. ಚೂಳವಚ್ಛತ್ಥೇರಗಾಥಾ

೧೧. ‘‘ಪಾಮೋಜ್ಜಬಹುಲೋ ಭಿಕ್ಖು, ಧಮ್ಮೇ ಬುದ್ಧಪ್ಪವೇದಿತೇ;

ಅಧಿಗಚ್ಛೇ ಪದಂ ಸನ್ತಂ, ಸಙ್ಖಾರೂಪಸಮಂ ಸುಖ’’ನ್ತಿ.

… ಚೂಳವಚ್ಛೋ [ಚೂಲಗವಚ್ಛೋ (ಸೀ.)] ಥೇರೋ….

೨. ಮಹಾವಚ್ಛತ್ಥೇರಗಾಥಾ

೧೨. ‘‘ಪಞ್ಞಾಬಲೀ ಸೀಲವತೂಪಪನ್ನೋ, ಸಮಾಹಿತೋ ಝಾನರತೋ ಸತೀಮಾ;

ಯದತ್ಥಿಯಂ ಭೋಜನಂ ಭುಞ್ಜಮಾನೋ, ಕಙ್ಖೇಥ ಕಾಲಂ ಇಧ ವೀತರಾಗೋ’’ತಿ.

… ಮಹಾವಚ್ಛೋ [ಮಹಾಗವಚ್ಛೋ (ಸೀ.)] ಥೇರೋ….

೩. ವನವಚ್ಛತ್ಥೇರಗಾಥಾ

೧೩. ‘‘ನೀಲಬ್ಭವಣ್ಣಾ ರುಚಿರಾ, ಸೀತವಾರೀ ಸುಚಿನ್ಧರಾ;

ಇನ್ದಗೋಪಕಸಞ್ಛನ್ನಾ, ತೇ ಸೇಲಾ ರಮಯನ್ತಿ ಮ’’ನ್ತಿ.

… ವನವಚ್ಛೋ ಥೇರೋ….

೪. ಸಿವಕಸಾಮಣೇರಗಾಥಾ

೧೪. ‘‘ಉಪಜ್ಝಾಯೋ ಮಂ ಅವಚ, ಇತೋ ಗಚ್ಛಾಮ ಸೀವಕ;

ಗಾಮೇ ಮೇ ವಸತಿ ಕಾಯೋ, ಅರಞ್ಞಂ ಮೇ ಗತೋ ಮನೋ;

ಸೇಮಾನಕೋಪಿ ಗಚ್ಛಾಮಿ, ನತ್ಥಿ ಸಙ್ಗೋ ವಿಜಾನತ’’ನ್ತಿ.

… ಸಿವಕೋ ಸಾಮಣೇರೋ….

೫. ಕುಣ್ಡಧಾನತ್ಥೇರಗಾಥಾ

೧೫. ‘‘ಪಞ್ಚ ಛಿನ್ದೇ ಪಞ್ಚ ಜಹೇ, ಪಞ್ಚ ಚುತ್ತರಿ ಭಾವಯೇ;

ಪಞ್ಚಸಙ್ಗಾತಿಗೋ ಭಿಕ್ಖು, ಓಘತಿಣ್ಣೋತಿ ವುಚ್ಚತೀ’’ತಿ.

… ಕುಣ್ಡಧಾನೋ ಥೇರೋ….

೬. ಬೇಲಟ್ಠಸೀಸತ್ಥೇರಗಾಥಾ

೧೬. ‘‘ಯಥಾಪಿ ಭದ್ದೋ ಆಜಞ್ಞೋ, ನಙ್ಗಲಾವತ್ತನೀ ಸಿಖೀ;

ಗಚ್ಛತಿ ಅಪ್ಪಕಸಿರೇನ, ಏವಂ ರತ್ತಿನ್ದಿವಾ ಮಮ;

ಗಚ್ಛನ್ತಿ ಅಪ್ಪಕಸಿರೇನ, ಸುಖೇ ಲದ್ಧೇ ನಿರಾಮಿಸೇ’’ತಿ.

… ಬೇಲಟ್ಠಸೀಸೋ ಥೇರೋ….

೭. ದಾಸಕತ್ಥೇರಗಾಥಾ

೧೭. ‘‘ಮಿದ್ಧೀ ಯದಾ ಹೋತಿ ಮಹಗ್ಘಸೋ ಚ, ನಿದ್ದಾಯಿತಾ ಸಮ್ಪರಿವತ್ತಸಾಯೀ;

ಮಹಾವರಾಹೋವ ನಿವಾಪಪುಟ್ಠೋ, ಪುನಪ್ಪುನಂ ಗಬ್ಭಮುಪೇತಿ ಮನ್ದೋ’’ತಿ.

… ದಾಸಕೋ ಥೇರೋ….

೮. ಸಿಙ್ಗಾಲಪಿತುತ್ಥೇರಗಾಥಾ

೧೮. ‘‘ಅಹು ಬುದ್ಧಸ್ಸ ದಾಯಾದೋ, ಭಿಕ್ಖು ಭೇಸಕಳಾವನೇ;

ಕೇವಲಂ ಅಟ್ಠಿಸಞ್ಞಾಯ, ಅಫರೀ ಪಥವಿಂ [ಪಠವಿಂ (ಸೀ. ಸ್ಯಾ.)] ಇಮಂ;

ಮಞ್ಞೇಹಂ ಕಾಮರಾಗಂ ಸೋ, ಖಿಪ್ಪಮೇವ ಪಹಿಸ್ಸತೀ’’ತಿ [ಪಹೀಯಭಿ (ಸಬ್ಬತ್ಥ ಪಾಳಿಯಂ)].

… ಸಿಙ್ಗಾಲಪಿತಾ [ಸೀಗಾಲಪಿತಾ (ಸೀ.)] ಥೇರೋ….

೯. ಕುಲತ್ಥೇರಗಾಥಾ

೧೯. [ಧ. ಪ. ೮೦, ೧೪೫ ಧಮ್ಮಪದೇಪಿ] ‘‘ಉದಕಂ ಹಿ ನಯನ್ತಿ ನೇತ್ತಿಕಾ, ಉಸುಕಾರಾ ನಮಯನ್ತಿ [ದಮಯನ್ತಿ (ಕ.)] ತೇಜನಂ;

ದಾರುಂ ನಮಯನ್ತಿ ತಚ್ಛಕಾ, ಅತ್ತಾನಂ ದಮಯನ್ತಿ ಸುಬ್ಬತಾ’’ತಿ.

… ಕುಲೋ [ಕುಣ್ಡಲೋ (ಸೀ.), ಕುಳೋ (ಸ್ಯಾ. ಕ.)] ಥೇರೋ….

೧೦. ಅಜಿತತ್ಥೇರಗಾಥಾ

೨೦. ‘‘ಮರಣೇ ಮೇ ಭಯಂ ನತ್ಥಿ, ನಿಕನ್ತಿ ನತ್ಥಿ ಜೀವಿತೇ;

ಸನ್ದೇಹಂ ನಿಕ್ಖಿಪಿಸ್ಸಾಮಿ, ಸಮ್ಪಜಾನೋ ಪಟಿಸ್ಸತೋ’’ತಿ [ಪತಿಸ್ಸತೋತಿ (ಸೀ. ಸ್ಯಾ.)].

… ಅಜಿತೋ ಥೇರೋ ….

ವಗ್ಗೋ ದುತಿಯೋ ನಿಟ್ಠಿತೋ.

ತಸ್ಸುದ್ದಾನಂ –

ಚೂಳವಚ್ಛೋ ಮಹಾವಚ್ಛೋ, ವನವಚ್ಛೋ ಚ ಸೀವಕೋ;

ಕುಣ್ಡಧಾನೋ ಚ ಬೇಲಟ್ಠಿ, ದಾಸಕೋ ಚ ತತೋಪರಿ;

ಸಿಙ್ಗಾಲಪಿತಿಕೋ ಥೇರೋ, ಕುಲೋ ಚ ಅಜಿತೋ ದಸಾತಿ.

೩. ತತಿಯವಗ್ಗೋ

೧. ನಿಗ್ರೋಧತ್ಥೇರಗಾಥಾ

೨೧. ‘‘ನಾಹಂ ಭಯಸ್ಸ ಭಾಯಾಮಿ, ಸತ್ಥಾ ನೋ ಅಮತಸ್ಸ ಕೋವಿದೋ;

ಯತ್ಥ ಭಯಂ ನಾವತಿಟ್ಠತಿ, ತೇನ ಮಗ್ಗೇನ ವಜನ್ತಿ ಭಿಕ್ಖವೋ’’ತಿ.

… ನಿಗ್ರೋಧೋ ಥೇರೋ….

೨. ಚಿತ್ತಕತ್ಥೇರಗಾಥಾ

೨೨. ‘‘ನೀಲಾ ಸುಗೀವಾ ಸಿಖಿನೋ, ಮೋರಾ ಕಾರಮ್ಭಿಯಂ [ಕಾರಂವಿಯಂ (ಸೀ.), ಕಾರವಿಯಂ (ಸ್ಯಾ.)] ಅಭಿನದನ್ತಿ;

ತೇ ಸೀತವಾತಕೀಳಿತಾ [ಸೀತವಾತಕದ್ದಿತಕಲಿತಾ (ಸೀ.), ಸೀತವಾತಕಲಿತಾ (ಸ್ಯಾ.)], ಸುತ್ತಂ ಝಾಯಂ [ಝಾನಂ (ಸ್ಯಾ.), ಝಾಯಿಂ (?)] ನಿಬೋಧೇನ್ತೀ’’ತಿ.

… ಚಿತ್ತಕೋ ಥೇರೋ….

೩. ಗೋಸಾಲತ್ಥೇರಗಾಥಾ

೨೩. ‘‘ಅಹಂ ಖೋ ವೇಳುಗುಮ್ಬಸ್ಮಿಂ, ಭುತ್ವಾನ ಮಧುಪಾಯಸಂ;

ಪದಕ್ಖಿಣಂ ಸಮ್ಮಸನ್ತೋ, ಖನ್ಧಾನಂ ಉದಯಬ್ಬಯಂ;

ಸಾನುಂ ಪಟಿಗಮಿಸ್ಸಾಮಿ, ವಿವೇಕಮನುಬ್ರೂಹಯ’’ನ್ತಿ.

… ಗೋಸಾಲೋ ಥೇರೋ….

೪. ಸುಗನ್ಧತ್ಥೇರಗಾಥಾ

೨೪. ‘‘ಅನುವಸ್ಸಿಕೋ ಪಬ್ಬಜಿತೋ, ಪಸ್ಸ ಧಮ್ಮಸುಧಮ್ಮತಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಸುಗನ್ಧೋ ಥೇರೋ….

೫. ನನ್ದಿಯತ್ಥೇರಗಾಥಾ

೨೫. ‘‘ಓಭಾಸಜಾತಂ ಫಲಗಂ, ಚಿತ್ತಂ ಯಸ್ಸ ಅಭಿಣ್ಹಸೋ;

ತಾದಿಸಂ ಭಿಕ್ಖುಮಾಸಜ್ಜ, ಕಣ್ಹ ದುಕ್ಖಂ ನಿಗಚ್ಛಸೀ’’ತಿ.

… ನನ್ದಿಯೋ ಥೇರೋ….

೬. ಅಭಯತ್ಥೇರಗಾಥಾ

೨೬. ‘‘ಸುತ್ವಾ ಸುಭಾಸಿತಂ ವಾಚಂ, ಬುದ್ಧಸ್ಸಾದಿಚ್ಚಬನ್ಧುನೋ;

ಪಚ್ಚಬ್ಯಧಿಂ ಹಿ ನಿಪುಣಂ, ವಾಲಗ್ಗಂ ಉಸುನಾ ಯಥಾ’’ತಿ.

… ಅಭಯೋ ಥೇರೋ….

೭. ಲೋಮಸಕಙ್ಗಿಯತ್ಥೇರಗಾಥಾ

೨೭. ‘‘ದಬ್ಬಂ ಕುಸಂ ಪೋಟಕಿಲಂ, ಉಸೀರಂ ಮುಞ್ಜಪಬ್ಬಜಂ;

ಉರಸಾ ಪನುದಿಸ್ಸಾಮಿ, ವಿವೇಕಮನುಬ್ರೂಹಯ’’ನ್ತಿ.

… ಲೋಮಸಕಙ್ಗಿಯೋ ಥೇರೋ….

೮. ಜಮ್ಬುಗಾಮಿಕಪುತ್ತತ್ಥೇರಗಾಥಾ

೨೮. ‘‘ಕಚ್ಚಿ ನೋ ವತ್ಥಪಸುತೋ, ಕಚ್ಚಿ ನೋ ಭೂಸನಾರತೋ;

ಕಚ್ಚಿ ಸೀಲಮಯಂ ಗನ್ಧಂ, ಕಿಂ ತ್ವಂ ವಾಯಸಿ [ಕಚ್ಚಿ ಸೀಲಮಯಂ ಗನ್ಧಂ, ತ್ವಂ ವಾಸಿ (ಸ್ಯಾ.)] ನೇತರಾ ಪಜಾ’’ತಿ.

… ಜಮ್ಬುಗಾಮಿಕಪುತ್ತೋ ಥೇರೋ….

೯. ಹಾರಿತತ್ಥೇರಗಾಥಾ

೨೯. ‘‘ಸಮುನ್ನಮಯಮತ್ತಾನಂ, ಉಸುಕಾರೋವ ತೇಜನಂ;

ಚಿತ್ತಂ ಉಜುಂ ಕರಿತ್ವಾನ, ಅವಿಜ್ಜಂ ಭಿನ್ದ ಹಾರಿತಾ’’ತಿ.

… ಹಾರಿತೋ ಥೇರೋ….

೧೦. ಉತ್ತಿಯತ್ಥೇರಗಾಥಾ

೩೦. ‘‘ಆಬಾಧೇ ಮೇ ಸಮುಪ್ಪನ್ನೇ, ಸತಿ ಮೇ ಉದಪಜ್ಜಥ;

ಆಬಾಧೋ ಮೇ ಸಮುಪ್ಪನ್ನೋ, ಕಾಲೋ ಮೇ ನಪ್ಪಮಜ್ಜಿತು’’ನ್ತಿ.

… ಉತ್ತಿಯೋ ಥೇರೋ….

ವಗ್ಗೋ ತತಿಯೋ ನಿಟ್ಠಿತೋ.