೧೩. ಸಿರಿಮಣ್ಡತ್ಥೇರಗಾಥಾ

೪೪೭. [ಉದಾ. ೪೫; ಚೂಳವ. ೩೮೫; ಪರಿ. ೩೩೯] ‘‘ಛನ್ನಮತಿವಸ್ಸತಿ, ವಿವಟಂ ನಾತಿವಸ್ಸತಿ;

ತಸ್ಮಾ ಛನ್ನಂ ವಿವರೇಥ, ಏವಂ ತಂ ನಾತಿವಸ್ಸತಿ.

೪೪೮. [ಸಂ. ನಿ. ೧.೬೬; ನೇತ್ತಿ. ೧೮] ‘‘ಮಚ್ಚುನಾಬ್ಭಹತೋ ಲೋಕೋ, ಜರಾಯ ಪರಿವಾರಿತೋ;

ತಣ್ಹಾಸಲ್ಲೇನ ಓತಿಣ್ಣೋ, ಇಚ್ಛಾಧೂಪಾಯಿತೋ ಸದಾ.

೪೪೯. ‘‘ಮಚ್ಚುನಾಬ್ಭಹತೋ ಲೋಕೋ, ಪರಿಕ್ಖಿತ್ತೋ ಜರಾಯ ಚ;

ಹಞ್ಞತಿ ನಿಚ್ಚಮತ್ತಾಣೋ, ಪತ್ತದಣ್ಡೋವ ತಕ್ಕರೋ.

೪೫೦. ‘‘ಆಗಚ್ಛನ್ತಗ್ಗಿಖನ್ಧಾವ, ಮಚ್ಚು ಬ್ಯಾಧಿ ಜರಾ ತಯೋ;

ಪಚ್ಚುಗ್ಗನ್ತುಂ ಬಲಂ ನತ್ಥಿ, ಜವೋ ನತ್ಥಿ ಪಲಾಯಿತುಂ.

೪೫೧. ‘‘ಅಮೋಘಂ ದಿವಸಂ ಕಯಿರಾ, ಅಪ್ಪೇನ ಬಹುಕೇನ ವಾ;

ಯಂ ಯಂ ವಿಜಹತೇ [ವಿರಹತೇ (ಸೀ. ಪೀ.), ವಿವಹತೇ (ಸ್ಯಾ.)] ರತ್ತಿಂ, ತದೂನಂ ತಸ್ಸ ಜೀವಿತಂ.

೪೫೨. ‘‘ಚರತೋ ತಿಟ್ಠತೋ ವಾಪಿ, ಆಸೀನಸಯನಸ್ಸ ವಾ;

ಉಪೇತಿ ಚರಿಮಾ ರತ್ತಿ, ನ ತೇ ಕಾಲೋ ಪಮಜ್ಜಿತು’’ನ್ತಿ.

… ಸಿರಿಮಣ್ಡೋ [ಸಿರಿಮನ್ದೋ (ಸೀ.)] ಥೇರೋ….