೨೧. ಮಹಾನಿಪಾತೋ

೧. ವಙ್ಗೀಸತ್ಥೇರಗಾಥಾ

೧೨೧೮. ‘‘ನಿಕ್ಖನ್ತಂ ವತ ಮಂ ಸನ್ತಂ, ಅಗಾರಸ್ಮಾನಗಾರಿಯಂ;

ವಿತಕ್ಕಾ ಉಪಧಾವನ್ತಿ, ಪಗಬ್ಭಾ ಕಣ್ಹತೋ ಇಮೇ.

೧೨೧೯. ‘‘ಉಗ್ಗಪುತ್ತಾ ಮಹಿಸ್ಸಾಸಾ, ಸಿಕ್ಖಿತಾ ದಳ್ಹಧಮ್ಮಿನೋ [ದಳ್ಹಧನ್ವಿನೋ (ಸೀ. ಅಟ್ಠ.)];

ಸಮನ್ತಾ ಪರಿಕಿರೇಯ್ಯುಂ, ಸಹಸ್ಸಂ ಅಪಲಾಯಿನಂ.

೧೨೨೦. ‘‘ಸಚೇಪಿ ಏತ್ತಕಾ [ಏತತೋ (ಸಂ. ನಿ. ೧.೨೦೯)] ಭಿಯ್ಯೋ, ಆಗಮಿಸ್ಸನ್ತಿ ಇತ್ಥಿಯೋ;

ನೇವ ಮಂ ಬ್ಯಾಧಯಿಸ್ಸನ್ತಿ [ಬ್ಯಾಥಯಿಸ್ಸನ್ತಿ (?)], ಧಮ್ಮೇ ಸಮ್ಹಿ [ಧಮ್ಮೇಸ್ವಮ್ಹಿ (ಸ್ಯಾ. ಕ.)] ಪತಿಟ್ಠಿತೋ.

೧೨೨೧. ‘‘ಸಕ್ಖೀ ಹಿ ಮೇ ಸುತಂ ಏತಂ, ಬುದ್ಧಸ್ಸಾದಿಚ್ಚಬನ್ಧುನೋ;

ನಿಬ್ಬಾನಗಮನಂ ಮಗ್ಗಂ, ತತ್ಥ ಮೇ ನಿರತೋ ಮನೋ.

೧೨೨೨. ‘‘ಏವಂ ಚೇ ಮಂ ವಿಹರನ್ತಂ, ಪಾಪಿಮ ಉಪಗಚ್ಛಸಿ;

ತಥಾ ಮಚ್ಚು ಕರಿಸ್ಸಾಮಿ, ನ ಮೇ ಮಗ್ಗಮ್ಪಿ ದಕ್ಖಸಿ.

೧೨೨೩. ‘‘ಅರತಿಞ್ಚ [ಅರತಿಂ (ಬಹೂಸು)] ರತಿಞ್ಚ ಪಹಾಯ, ಸಬ್ಬಸೋ ಗೇಹಸಿತಞ್ಚ ವಿತಕ್ಕಂ;

ವನಥಂ ನ ಕರೇಯ್ಯ ಕುಹಿಞ್ಚಿ, ನಿಬ್ಬನಥೋ ಅವನಥೋ ಸ [ನಿಬ್ಬನಥೋ ಅರತೋ ಸ ಹಿ (ಸಂ. ನಿ. ೧.೨೧೦)] ಭಿಕ್ಖು.

೧೨೨೪. ‘‘ಯಮಿಧ ಪಥವಿಞ್ಚ ವೇಹಾಸಂ, ರೂಪಗತಂ ಜಗತೋಗಧಂ ಕಿಞ್ಚಿ;

ಪರಿಜೀಯತಿ ಸಬ್ಬಮನಿಚ್ಚಂ, ಏವಂ ಸಮೇಚ್ಚ ಚರನ್ತಿ ಮುತತ್ತಾ.

೧೨೨೫. ‘‘ಉಪಧೀಸು ಜನಾ ಗಧಿತಾಸೇ, ದಿಟ್ಠಸುತೇ [ದಿಟ್ಠೇ ಸುತೇ (ಸೀ.)] ಪಟಿಘೇ ಚ ಮುತೇ ಚ;

ಏತ್ಥ ವಿನೋದಯ ಛನ್ದಮನೇಜೋ, ಯೋ ಹೇತ್ಥ ನ ಲಿಮ್ಪತಿ ಮುನಿ ತಮಾಹು [ತಂ ಮುನಿಮಾಹು (ಸಂ. ನಿ. ೧.೨೧೦)].

೧೨೨೬. ‘‘ಅಥ ಸಟ್ಠಿಸಿತಾ ಸವಿತಕ್ಕಾ, ಪುಥುಜ್ಜನತಾಯ [ಪುಥೂ ಜನತಾಯ (ಸಂ. ನಿ. ೧.೨೧೦)] ಅಧಮ್ಮಾ ನಿವಿಟ್ಠಾ;

ನ ಚ ವಗ್ಗಗತಸ್ಸ ಕುಹಿಞ್ಚಿ, ನೋ ಪನ ದುಟ್ಠುಲ್ಲಗಾಹೀ [ದುಟ್ಠುಲ್ಲಭಾಣೀ (ಸಂ. ನಿ. ೧.೨೧೦)] ಸ ಭಿಕ್ಖು.

೧೨೨೭. ‘‘ದಬ್ಬೋ ಚಿರರತ್ತಸಮಾಹಿತೋ, ಅಕುಹಕೋ ನಿಪಕೋ ಅಪಿಹಾಲು;

ಸನ್ತಂ ಪದಂ ಅಜ್ಝಗಮಾ ಮುನಿ, ಪಟಿಚ್ಚ ಪರಿನಿಬ್ಬುತೋ ಕಙ್ಖತಿ ಕಾಲಂ.

೧೨೨೮. ‘‘ಮಾನಂ ಪಜಹಸ್ಸು ಗೋತಮ, ಮಾನಪಥಞ್ಚ ಜಹಸ್ಸು ಅಸೇಸಂ;

ಮಾನಪಥಮ್ಹಿ ಸ ಮುಚ್ಛಿತೋ, ವಿಪ್ಪಟಿಸಾರೀಹುವಾ ಚಿರರತ್ತಂ.

೧೨೨೯. ‘‘ಮಕ್ಖೇನ ಮಕ್ಖಿತಾ ಪಜಾ, ಮಾನಹತಾ ನಿರಯಂ ಪಪತನ್ತಿ;

ಸೋಚನ್ತಿ ಜನಾ ಚಿರರತ್ತಂ, ಮಾನಹತಾ ನಿರಯಂ ಉಪಪನ್ನಾ.

೧೨೩೦. ‘‘ನ ಹಿ ಸೋಚತಿ ಭಿಕ್ಖು ಕದಾಚಿ, ಮಗ್ಗಜಿನೋ ಸಮ್ಮಾ ಪಟಿಪನ್ನೋ;

ಕಿತ್ತಿಞ್ಚ ಸುಖಞ್ಚಾನುಭೋತಿ, ಧಮ್ಮದಸೋತಿ ತಮಾಹು ತಥತ್ತಂ.

೧೨೩೧. ‘‘ತಸ್ಮಾ ಅಖಿಲೋ ಇಧ [ಅಖಿಲೋ (ಸೀ.), ಅಖಿಲೋಧ (ಸಂ. ನಿ. ೧.೨೧೧)] ಪಧಾನವಾ, ನೀವರಣಾನಿ ಪಹಾಯ ವಿಸುದ್ಧೋ;

ಮಾನಞ್ಚ ಪಹಾಯ ಅಸೇಸಂ, ವಿಜ್ಜಾಯನ್ತಕರೋ ಸಮಿತಾವೀ.

೧೨೩೨. ‘‘ಕಾಮರಾಗೇನ ಡಯ್ಹಾಮಿ, ಚಿತ್ತಂ ಮೇ ಪರಿಡಯ್ಹತಿ;

ಸಾಧು ನಿಬ್ಬಾಪನಂ ಬ್ರೂಹಿ, ಅನುಕಮ್ಪಾಯ ಗೋತಮ.

೧೨೩೩. ‘‘ಸಞ್ಞಾಯ ವಿಪರಿಯೇಸಾ, ಚಿತ್ತಂ ತೇ ಪರಿಡಯ್ಹತಿ;

ನಿಮಿತ್ತಂ ಪರಿವಜ್ಜೇಹಿ, ಸುಭಂ ರಾಗೂಪಸಂಹಿತಂ ( ) [(ಸಙ್ಖಾರೇ ಪರತೋ ಪಸ್ಸ, ದುಕ್ಖತೋ ಮಾ ಚ ಅತ್ತತೋ; ನಿಬ್ಬಾಪೇಹಿ ಮಹಾರಾಗಂ, ಮಾ ದಯ್ಹಿತ್ಥೋ ಪುನಪ್ಪುನಂ;) (ಸೀ. ಸಂ. ನಿ. ೧.೨೧೨) ಉದ್ದಾನಗಾಥಾಯಂ ಏಕಸತ್ತತೀತಿಸಙ್ಖ್ಯಾ ಚ, ಥೇರಗಾಥಾಟ್ಠಕಥಾ ಚ ಪಸ್ಸಿತಬ್ಬಾ].

೧೨೩೪. ‘‘ಅಸುಭಾಯ ಚಿತ್ತಂ ಭಾವೇಹಿ, ಏಕಗ್ಗಂ ಸುಸಮಾಹಿತಂ;

ಸತಿ ಕಾಯಗತಾ ತ್ಯತ್ಥು, ನಿಬ್ಬಿದಾಬಹುಲೋ ಭವ.

೧೨೩೫. ‘‘ಅನಿಮಿತ್ತಞ್ಚ ಭಾವೇಹಿ, ಮಾನಾನುಸಯಮುಜ್ಜಹ;

ತತೋ ಮಾನಾಭಿಸಮಯಾ, ಉಪಸನ್ತೋ ಚರಿಸ್ಸಸಿ.

೧೨೩೬. ‘‘ತಮೇವ ವಾಚಂ ಭಾಸೇಯ್ಯ, ಯಾಯತ್ತಾನಂ ನ ತಾಪಯೇ;

ಪರೇ ಚ ನ ವಿಹಿಂಸೇಯ್ಯ, ಸಾ ವೇ ವಾಚಾ ಸುಭಾಸಿತಾ.

೧೨೩೭. ‘‘ಪಿಯವಾಚಮೇವ ಭಾಸೇಯ್ಯ, ಯಾ ವಾಚಾ ಪಟಿನನ್ದಿತಾ;

ಯಂ ಅನಾದಾಯ ಪಾಪಾನಿ, ಪರೇಸಂ ಭಾಸತೇ ಪಿಯಂ.

೧೨೩೮. ‘‘ಸಚ್ಚಂ ವೇ ಅಮತಾ ವಾಚಾ, ಏಸ ಧಮ್ಮೋ ಸನನ್ತನೋ;

ಸಚ್ಚೇ ಅತ್ಥೇ ಚ ಧಮ್ಮೇ ಚ, ಆಹು ಸನ್ತೋ ಪತಿಟ್ಠಿತಾ.

೧೨೩೯. ‘‘ಯಂ ಬುದ್ಧೋ ಭಾಸತಿ ವಾಚಂ, ಖೇಮಂ ನಿಬ್ಬಾನಪತ್ತಿಯಾ;

ದುಕ್ಖಸ್ಸನ್ತಕಿರಿಯಾಯ, ಸಾ ವೇ ವಾಚಾನಮುತ್ತಮಾ.

೧೨೪೦. ‘‘ಗಮ್ಭೀರಪಞ್ಞೋ ಮೇಧಾವೀ, ಮಗ್ಗಾಮಗ್ಗಸ್ಸ ಕೋವಿದೋ;

ಸಾರಿಪುತ್ತೋ ಮಹಾಪಞ್ಞೋ, ಧಮ್ಮಂ ದೇಸೇತಿ ಭಿಕ್ಖುನಂ.

೧೨೪೧. ‘‘ಸಙ್ಖಿತ್ತೇನಪಿ ದೇಸೇತಿ, ವಿತ್ಥಾರೇನಪಿ ಭಾಸತಿ;

ಸಾಲಿಕಾಯಿವ ನಿಗ್ಘೋಸೋ, ಪಟಿಭಾನಂ ಉದಿಯ್ಯತಿ [ಉದೀರಯಿ (ಸೀ.), ಉದೀಯ್ಯತಿ (ಸ್ಯಾ.), ಉದಯ್ಯತಿ (?) ಉಟ್ಠಹತೀತಿ ತಂಸಂವಣ್ಣನಾ].

೧೨೪೨. ‘‘ತಸ್ಸ ತಂ ದೇಸಯನ್ತಸ್ಸ, ಸುಣನ್ತಿ ಮಧುರಂ ಗಿರಂ;

ಸರೇನ ರಜನೀಯೇನ, ಸವನೀಯೇನ ವಗ್ಗುನಾ;

ಉದಗ್ಗಚಿತ್ತಾ ಮುದಿತಾ, ಸೋತಂ ಓಧೇನ್ತಿ ಭಿಕ್ಖವೋ.

೧೨೪೩. ‘‘ಅಜ್ಜ ಪನ್ನರಸೇ ವಿಸುದ್ಧಿಯಾ, ಭಿಕ್ಖೂ ಪಞ್ಚಸತಾ ಸಮಾಗತಾ;

ಸಂಯೋಜನಬನ್ಧನಚ್ಛಿದಾ, ಅನೀಘಾ ಖೀಣಪುನಬ್ಭವಾ ಇಸೀ.

೧೨೪೪. ‘‘ಚಕ್ಕವತ್ತೀ ಯಥಾ ರಾಜಾ, ಅಮಚ್ಚಪರಿವಾರಿತೋ;

ಸಮನ್ತಾ ಅನುಪರಿಯೇತಿ, ಸಾಗರನ್ತಂ ಮಹಿಂ ಇಮಂ.

೧೨೪೫. ‘‘ಏವಂ ವಿಜಿತಸಙ್ಗಾಮಂ, ಸತ್ಥವಾಹಂ ಅನುತ್ತರಂ;

ಸಾವಕಾ ಪಯಿರುಪಾಸನ್ತಿ, ತೇವಿಜ್ಜಾ ಮಚ್ಚುಹಾಯಿನೋ.

೧೨೪೬. ‘‘ಸಬ್ಬೇ ಭಗವತೋ ಪುತ್ತಾ, ಪಲಾಪೇತ್ಥ ನ ವಿಜ್ಜತಿ;

ತಣ್ಹಾಸಲ್ಲಸ್ಸ ಹನ್ತಾರಂ, ವನ್ದೇ ಆದಿಚ್ಚಬನ್ಧುನಂ.

೧೨೪೭. ‘‘ಪರೋಸಹಸ್ಸಂ ಭಿಕ್ಖೂನಂ, ಸುಗತಂ ಪಯಿರುಪಾಸತಿ;

ದೇಸೇನ್ತಂ ವಿರಜಂ ಧಮ್ಮಂ, ನಿಬ್ಬಾನಂ ಅಕುತೋಭಯಂ.

೧೨೪೮. ‘‘ಸುಣನ್ತಿ ಧಮ್ಮಂ ವಿಮಲಂ, ಸಮ್ಮಾಸಮ್ಬುದ್ಧದೇಸಿತಂ;

ಸೋಭತಿ ವತ ಸಮ್ಬುದ್ಧೋ, ಭಿಕ್ಖುಸಙ್ಘಪುರಕ್ಖತೋ.

೧೨೪೯. ‘‘‘ನಾಗನಾಮೋ’ಸಿ ಭಗವಾ, ಇಸೀನಂ ಇಸಿಸತ್ತಮೋ;

ಮಹಾಮೇಘೋವ ಹುತ್ವಾನ, ಸಾವಕೇ ಅಭಿವಸ್ಸಸಿ.

೧೨೫೦. ‘‘ದಿವಾ ವಿಹಾರಾ ನಿಕ್ಖಮ್ಮ, ಸತ್ಥುದಸ್ಸನಕಮ್ಯತಾ;

ಸಾವಕೋ ತೇ ಮಹಾವೀರ, ಪಾದೇ ವನ್ದತಿ ವಙ್ಗಿಸೋ.

೧೨೫೧. ‘‘ಉಮ್ಮಗ್ಗಪಥಂ ಮಾರಸ್ಸ, ಅಭಿಭುಯ್ಯ ಚರತಿ ಪಭಿಜ್ಜ ಖೀಲಾನಿ;

ತಂ ಪಸ್ಸಥ ಬನ್ಧಪಮುಞ್ಚಕರಂ, ಅಸಿತಂವ ಭಾಗಸೋ ಪವಿಭಜ್ಜ.

೧೨೫೨. ‘‘ಓಘಸ್ಸ ಹಿ ನಿತರಣತ್ಥಂ, ಅನೇಕವಿಹಿತಂ ಮಗ್ಗಂ ಅಕ್ಖಾಸಿ;

ತಸ್ಮಿಞ್ಚ ಅಮತೇ ಅಕ್ಖಾತೇ, ಧಮ್ಮದಸಾ ಠಿತಾ ಅಸಂಹೀರಾ.

೧೨೫೩. ‘‘ಪಜ್ಜೋತಕರೋ ಅತಿವಿಜ್ಝ [ಅತಿವಿಜ್ಝ ಧಮ್ಮಂ (ಸೀ.)], ಸಬ್ಬಠಿತೀನಂ ಅತಿಕ್ಕಮಮದ್ದಸ [ಅತಿಕ್ಕಮಮದ್ದ (ಸೀ. ಕ.)];

ಞತ್ವಾ ಚ ಸಚ್ಛಿಕತ್ವಾ ಚ, ಅಗ್ಗಂ ಸೋ ದೇಸಯಿ ದಸದ್ಧಾನಂ.

೧೨೫೪. ‘‘ಏವಂ ಸುದೇಸಿತೇ ಧಮ್ಮೇ, ಕೋ ಪಮಾದೋ ವಿಜಾನತಂ ಧಮ್ಮಂ;

ತಸ್ಮಾ ಹಿ ತಸ್ಸ ಭಗವತೋ ಸಾಸನೇ, ಅಪ್ಪಮತ್ತೋ ಸದಾ ನಮಸ್ಸಮನುಸಿಕ್ಖೇ.

೧೨೫೫. ‘‘ಬುದ್ಧಾನುಬುದ್ಧೋ ಯೋ ಥೇರೋ, ಕೋಣ್ಡಞ್ಞೋ ತಿಬ್ಬನಿಕ್ಕಮೋ;

ಲಾಭೀ ಸುಖವಿಹಾರಾನಂ, ವಿವೇಕಾನಂ ಅಭಿಣ್ಹಸೋ.

೧೨೫೬. ‘‘ಯಂ ಸಾವಕೇನ ಪತ್ತಬ್ಬಂ, ಸತ್ಥು ಸಾಸನಕಾರಿನಾ;

ಸಬ್ಬಸ್ಸ ತಂ ಅನುಪ್ಪತ್ತಂ, ಅಪ್ಪಮತ್ತಸ್ಸ ಸಿಕ್ಖತೋ.

೧೨೫೭. ‘‘ಮಹಾನುಭಾವೋ ತೇವಿಜ್ಜೋ, ಚೇತೋಪರಿಯಕೋವಿದೋ;

ಕೋಣ್ಡಞ್ಞೋ ಬುದ್ಧದಾಯಾದೋ, ಪಾದೇ ವನ್ದತಿ ಸತ್ಥುನೋ.

೧೨೫೮. ‘‘ನಗಸ್ಸ ಪಸ್ಸೇ ಆಸೀನಂ, ಮುನಿಂ ದುಕ್ಖಸ್ಸ ಪಾರಗುಂ;

ಸಾವಕಾ ಪಯಿರುಪಾಸನ್ತಿ, ತೇವಿಜ್ಜಾ ಮಚ್ಚುಹಾಯಿನೋ.

೧೨೫೯. ‘‘ಚೇತಸಾ [ತೇ ಚೇತಸಾ (ಸಂ. ನಿ. ೧.೨೧೮)] ಅನುಪರಿಯೇತಿ, ಮೋಗ್ಗಲ್ಲಾನೋ ಮಹಿದ್ಧಿಕೋ;

ಚಿತ್ತಂ ನೇಸಂ ಸಮನ್ವೇಸಂ [ಸಮನ್ನೇಸಂ (ಸಂ. ನಿ. ೧.೨೧೮)], ವಿಪ್ಪಮುತ್ತಂ ನಿರೂಪಧಿಂ.

೧೨೬೦. ‘‘ಏವಂ ಸಬ್ಬಙ್ಗಸಮ್ಪನ್ನಂ, ಮುನಿಂ ದುಕ್ಖಸ್ಸ ಪಾರಗುಂ;

ಅನೇಕಾಕಾರಸಮ್ಪನ್ನಂ, ಪಯಿರುಪಾಸನ್ತಿ ಗೋತಮಂ.

೧೨೬೧. ‘‘ಚನ್ದೋ ಯಥಾ ವಿಗತವಲಾಹಕೇ ನಭೇ, ವಿರೋಚತಿ ವೀತಮಲೋವ ಭಾಣುಮಾ;

ಏವಮ್ಪಿ ಅಙ್ಗೀರಸ ತ್ವಂ ಮಹಾಮುನಿ, ಅತಿರೋಚಸಿ ಯಸಸಾ ಸಬ್ಬಲೋಕಂ.

೧೨೬೨. ‘‘ಕಾವೇಯ್ಯಮತ್ತಾ ವಿಚರಿಮ್ಹ ಪುಬ್ಬೇ, ಗಾಮಾ ಗಾಮಂ ಪುರಾ ಪುರಂ;

ಅಥದ್ದಸಾಮ ಸಮ್ಬುದ್ಧಂ, ಸಬ್ಬಧಮ್ಮಾನ ಪಾರಗುಂ.

೧೨೬೩. ‘‘ಸೋ ಮೇ ಧಮ್ಮಮದೇಸೇಸಿ, ಮುನಿ ದುಕ್ಖಸ್ಸ ಪಾರಗೂ;

ಧಮ್ಮಂ ಸುತ್ವಾ ಪಸೀದಿಮ್ಹ, ಸದ್ಧಾ [ಅದ್ಧಾ (ಸೀ. ಅಟ್ಠ.)] ನೋ ಉದಪಜ್ಜಥ.

೧೨೬೪. ‘‘ತಸ್ಸಾಹಂ ವಚನಂ ಸುತ್ವಾ, ಖನ್ಧೇ ಆಯತನಾನಿ ಚ;

ಧಾತುಯೋ ಚ ವಿದಿತ್ವಾನ, ಪಬ್ಬಜಿಂ ಅನಗಾರಿಯಂ.

೧೨೬೫. ‘‘ಬಹೂನಂ ವತ ಅತ್ಥಾಯ, ಉಪ್ಪಜ್ಜನ್ತಿ ತಥಾಗತಾ;

ಇತ್ಥೀನಂ ಪುರಿಸಾನಞ್ಚ, ಯೇ ತೇ ಸಾಸನಕಾರಕಾ.

೧೨೬೬. ‘‘ತೇಸಂ ಖೋ ವತ ಅತ್ಥಾಯ, ಬೋಧಿಮಜ್ಝಗಮಾ ಮುನಿ;

ಭಿಕ್ಖೂನಂ ಭಿಕ್ಖುನೀನಞ್ಚ, ಯೇ ನಿರಾಮಗತದ್ದಸಾ.

೧೨೬೭. ‘‘ಸುದೇಸಿತಾ ಚಕ್ಖುಮತಾ, ಬುದ್ಧೇನಾದಿಚ್ಚಬನ್ಧುನಾ;

ಚತ್ತಾರಿ ಅರಿಯಸಚ್ಚಾನಿ, ಅನುಕಮ್ಪಾಯ ಪಾಣಿನಂ.

೧೨೬೮. ‘‘ದುಕ್ಖಂ ದುಕ್ಖಸಮುಪ್ಪಾದಂ, ದುಕ್ಖಸ್ಸ ಚ ಅತಿಕ್ಕಮಂ;

ಅರಿಯಂ ಚಟ್ಠಙ್ಗಿಕಂ ಮಗ್ಗಂ, ದುಕ್ಖೂಪಸಮಗಾಮಿನಂ.

೧೨೬೯. ‘‘ಏವಮೇತೇ ತಥಾ ವುತ್ತಾ, ದಿಟ್ಠಾ ಮೇ ತೇ ಯಥಾ ತಥಾ;

ಸದತ್ಥೋ ಮೇ ಅನುಪ್ಪತ್ತೋ, ಕತಂ ಬುದ್ಧಸ್ಸ ಸಾಸನಂ.

೧೨೭೦. ‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;

ಸುವಿಭತ್ತೇಸು [ಸವಿಭತ್ತೇಸು (ಸೀ. ಕ.)] ಧಮ್ಮೇಸು, ಯಂ ಸೇಟ್ಠಂ ತದುಪಾಗಮಿಂ.

೧೨೭೧. ‘‘ಅಭಿಞ್ಞಾಪಾರಮಿಪ್ಪತ್ತೋ, ಸೋತಧಾತು ವಿಸೋಧಿತಾ;

ತೇವಿಜ್ಜೋ ಇದ್ಧಿಪತ್ತೋಮ್ಹಿ, ಚೇತೋಪರಿಯಕೋವಿದೋ.

೧೨೭೨. ‘‘ಪುಚ್ಛಾಮಿ ಸತ್ಥಾರಮನೋಮಪಞ್ಞಂ, ದಿಟ್ಠೇವ ಧಮ್ಮೇ ಯೋ ವಿಚಿಕಿಚ್ಛಾನಂ ಛೇತ್ತಾ;

ಅಗ್ಗಾಳವೇ ಕಾಲಮಕಾಸಿ ಭಿಕ್ಖು, ಞಾತೋ ಯಸಸ್ಸೀ ಅಭಿನಿಬ್ಬುತತ್ತೋ.

೧೨೭೩. ‘‘ನಿಗ್ರೋಧಕಪ್ಪೋ ಇತಿ ತಸ್ಸ ನಾಮಂ, ತಯಾ ಕತಂ ಭಗವಾ ಬ್ರಾಹ್ಮಣಸ್ಸ;

ಸೋ ತಂ ನಮಸ್ಸಂ ಅಚರಿ ಮುತ್ಯಪೇಖೋ, ಆರದ್ಧವೀರಿಯೋ ದಳ್ಹಧಮ್ಮದಸ್ಸೀ.

೧೨೭೪. ‘‘ತಂ ಸಾವಕಂ ಸಕ್ಕ ಮಯಮ್ಪಿ ಸಬ್ಬೇ, ಅಞ್ಞಾತುಮಿಚ್ಛಾಮ ಸಮನ್ತಚಕ್ಖು;

ಸಮವಟ್ಠಿತಾ ನೋ ಸವನಾಯ ಸೋತಾ [ಹೇತುಂ (ಸೀ. ಸ್ಯಾ.) ಸುತ್ತನಿಪಾತಟ್ಠಕಥಾ ಪಸ್ಸಿತಬ್ಬಾ], ತುವಂ ನೋ ಸತ್ಥಾ ತ್ವಮನುತ್ತರೋಸಿ’’.

೧೨೭೫. ಛಿನ್ದ ನೋ ವಿಚಿಕಿಚ್ಛಂ ಬ್ರೂಹಿ ಮೇತಂ, ಪರಿನಿಬ್ಬುತಂ ವೇದಯ ಭೂರಿಪಞ್ಞ;

ಮಜ್ಝೇವ ನೋ ಭಾಸ ಸಮನ್ತಚಕ್ಖು, ಸಕ್ಕೋವ ದೇವಾನ ಸಹಸ್ಸನೇತ್ತೋ.

೧೨೭೬. ‘‘ಯೇ ಕೇಚಿ ಗನ್ಥಾ ಇಧ ಮೋಹಮಗ್ಗಾ, ಅಞ್ಞಾಣಪಕ್ಖಾ ವಿಚಿಕಿಚ್ಛಠಾನಾ;

ತಥಾಗತಂ ಪತ್ವಾ ನ ತೇ ಭವನ್ತಿ, ಚಕ್ಖುಞ್ಹಿ ಏತಂ ಪರಮಂ ನರಾನಂ.

೧೨೭೭. ‘‘ನೋ ಚೇ ಹಿ ಜಾತು ಪುರಿಸೋ ಕಿಲೇಸೇ, ವಾತೋ ಯಥಾ ಅಬ್ಭಘನಂ ವಿಹಾನೇ;

ತಮೋವಸ್ಸ ನಿವುತೋ ಸಬ್ಬಲೋಕೋ, ಜೋತಿಮನ್ತೋಪಿ ನ ಪಭಾಸೇಯ್ಯುಂ [ನ ಜೋತಿಮನ್ತೋಪಿ ನರಾ ತಪೇಯ್ಯುಂ (ಸು. ನಿ. ೩೫೦)].

೧೨೭೮. ‘‘ಧೀರಾ ಚ ಪಜ್ಜೋತಕರಾ ಭವನ್ತಿ, ತಂ ತಂ ಅಹಂ ವೀರ ತಥೇವ ಮಞ್ಞೇ;

ವಿಪಸ್ಸಿನಂ ಜಾನಮುಪಾಗಮಿಮ್ಹ, ಪರಿಸಾಸು ನೋ ಆವಿಕರೋಹಿ ಕಪ್ಪಂ.

೧೨೭೯. ‘‘ಖಿಪ್ಪಂ ಗಿರಂ ಏರಯ ವಗ್ಗು ವಗ್ಗುಂ, ಹಂಸೋವ ಪಗ್ಗಯ್ಹ ಸಣಿಕಂ ನಿಕೂಜ;

ಬಿನ್ದುಸ್ಸರೇನ ಸುವಿಕಪ್ಪಿತೇನ, ಸಬ್ಬೇವ ತೇ ಉಜ್ಜುಗತಾ ಸುಣೋಮ.

೧೨೮೦. ‘‘ಪಹೀನಜಾತಿಮರಣಂ ಅಸೇಸಂ, ನಿಗ್ಗಯ್ಹ ಧೋನಂ ವದೇಸ್ಸಾಮಿ [ಪಟಿವೇದಿಯಾಮಿ (ಸೀ. ಕ.)] ಧಮ್ಮಂ;

ನ ಕಾಮಕಾರೋ ಹಿ [ಹೋತಿ (ಸೀ. ಕ.)] ಪುಥುಜ್ಜನಾನಂ, ಸಙ್ಖೇಯ್ಯಕಾರೋ ಚ [ವ (ಬಹೂಸು)] ತಥಾಗತಾನಂ.

೧೨೮೧. ‘‘ಸಮ್ಪನ್ನವೇಯ್ಯಾಕರಣಂ ತವೇದಂ, ಸಮುಜ್ಜುಪಞ್ಞಸ್ಸ ಸಮುಗ್ಗಹೀತಂ;

ಅಯಮಞ್ಜಲಿ ಪಚ್ಛಿಮೋ ಸುಪ್ಪಣಾಮಿತೋ, ಮಾ ಮೋಹಯೀ ಜಾನಮನೋಮಪಞ್ಞ.

೧೨೮೨. ‘‘ಪರೋಪರಂ ಅರಿಯಧಮ್ಮಂ ವಿದಿತ್ವಾ, ಮಾ ಮೋಹಯೀ ಜಾನಮನೋಮವೀರಿಯ;

ವಾರಿಂ ಯಥಾ ಘಮ್ಮನಿ ಘಮ್ಮತತ್ತೋ, ವಾಚಾಭಿಕಙ್ಖಾಮಿ ಸುತಂ ಪವಸ್ಸ.

೧೨೮೩. ‘‘ಯದತ್ಥಿಕಂ ಬ್ರಹ್ಮಚರಿಯಂ ಅಚರೀ, ಕಪ್ಪಾಯನೋ ಕಚ್ಚಿಸ್ಸತಂ ಅಮೋಘಂ;

ನಿಬ್ಬಾಯಿ ಸೋ ಆದು ಸಉಪಾದಿಸೇಸೋ [ಅನುಪಾದಿಸೇಸಾ (ಸೀ.), ಅನುಪಾದಿಸೇಸೋ (ಕ.)], ಯಥಾ ವಿಮುತ್ತೋ ಅಹು ತಂ ಸುಣೋಮ.

೧೨೮೪. ‘‘‘ಅಚ್ಛೇಚ್ಛಿ ತಣ್ಹಂ ಇಧ ನಾಮರೂಪೇ,

(ಇತಿ ಭಗವಾ) ಕಣ್ಹಸ್ಸ ಸೋತಂ ದೀಘರತ್ತಾನುಸಯಿತಂ;

ಅತಾರಿ ಜಾತಿಂ ಮರಣಂ ಅಸೇಸಂ’, ಇಚ್ಚಬ್ರವಿ ಭಗವಾ ಪಞ್ಚಸೇಟ್ಠೋ.

೧೨೮೫. ‘‘ಏಸ ಸುತ್ವಾ ಪಸೀದಾಮಿ, ವಚೋ ತೇ ಇಸಿಸತ್ತಮ;

ಅಮೋಘಂ ಕಿರ ಮೇ ಪುಟ್ಠಂ, ನ ಮಂ ವಞ್ಚೇಸಿ ಬ್ರಾಹ್ಮಣೋ.

೧೨೮೬. ‘‘ಯಥಾ ವಾದೀ ತಥಾ ಕಾರೀ, ಅಹು ಬುದ್ಧಸ್ಸ ಸಾವಕೋ;

ಅಚ್ಛೇಚ್ಛಿ ಮಚ್ಚುನೋ ಜಾಲಂ, ತತಂ ಮಾಯಾವಿನೋ ದಳ್ಹಂ.

೧೨೮೭. ‘‘ಅದ್ದಸ ಭಗವಾ ಆದಿಂ, ಉಪಾದಾನಸ್ಸ ಕಪ್ಪಿಯೋ;

ಅಚ್ಚಗಾ ವತ ಕಪ್ಪಾನೋ, ಮಚ್ಚುಧೇಯ್ಯಂ ಸುದುತ್ತರಂ.

೧೨೮೮. ‘‘ತಂ ದೇವದೇವಂ ವನ್ದಾಮಿ, ಪುತ್ತಂ ತೇ ದ್ವಿಪದುತ್ತಮ;

ಅನುಜಾತಂ ಮಹಾವೀರಂ, ನಾಗಂ ನಾಗಸ್ಸ ಓರಸ’’ನ್ತಿ.

ಇತ್ಥಂ ಸುದಂ ಆಯಸ್ಮಾ ವಙ್ಗೀಸೋ ಥೇರೋ ಗಾಥಾಯೋ

ಅಭಾಸಿತ್ಥಾತಿ.

ಮಹಾನಿಪಾತೋ ನಿಟ್ಠಿತೋ.