೫. ಪಞ್ಚಮವಗ್ಗೋ

೧. ಕುಮಾರಕಸ್ಸಪತ್ಥೇರಗಾಥಾ

೨೦೧. ‘‘ಅಹೋ ಬುದ್ಧಾ ಅಹೋ ಧಮ್ಮಾ, ಅಹೋ ನೋ ಸತ್ಥು ಸಮ್ಪದಾ;

ಯತ್ಥ ಏತಾದಿಸಂ ಧಮ್ಮಂ, ಸಾವಕೋ ಸಚ್ಛಿಕಾಹಿ’’ತಿ.

೨೦೨. ‘‘ಅಸಙ್ಖೇಯ್ಯೇಸು ಕಪ್ಪೇಸು, ಸಕ್ಕಾಯಾಧಿಗತಾ ಅಹೂ;

ತೇಸಮಯಂ ಪಚ್ಛಿಮಕೋ, ಚರಿಮೋಯಂ ಸಮುಸ್ಸಯೋ;

ಜಾತಿಮರಣಸಂಸಾರೋ, ನತ್ಥಿ ದಾನಿ ಪುನಬ್ಭವೋ’’ತಿ.

… ಕುಮಾರಕಸ್ಸಪೋ ಥೇರೋ….

೨. ಧಮ್ಮಪಾಲತ್ಥೇರಗಾಥಾ

೨೦೩. ‘‘ಯೋ ಹವೇ ದಹರೋ ಭಿಕ್ಖು, ಯುಞ್ಜತಿ ಬುದ್ಧಸಾಸನೇ;

ಜಾಗರೋ ಸ ಹಿ ಸುತ್ತೇಸು [ಪತಿಸುತ್ತೇಸು (ಸೀ. ಕ.)], ಅಮೋಘಂ ತಸ್ಸ ಜೀವಿತಂ.

೨೦೪. ‘‘ತಸ್ಮಾ ಸದ್ಧಞ್ಚ ಸೀಲಞ್ಚ, ಪಸಾದಂ ಧಮ್ಮದಸ್ಸನಂ;

ಅನುಯುಞ್ಜೇಥ ಮೇಧಾವೀ, ಸರಂ ಬುದ್ಧಾನ ಸಾಸನ’’ನ್ತಿ.

… ಧಮ್ಮಪಾಲೋ ಥೇರೋ….

೩. ಬ್ರಹ್ಮಾಲಿತ್ಥೇರಗಾಥಾ

೨೦೫. ‘‘ಕಸ್ಸಿನ್ದ್ರಿಯಾನಿ ಸಮಥಙ್ಗತಾನಿ, ಅಸ್ಸಾ ಯಥಾ ಸಾರಥಿನಾ ಸುದನ್ತಾ;

ಪಹೀನಮಾನಸ್ಸ ಅನಾಸವಸ್ಸ, ದೇವಾಪಿ ಕಸ್ಸ [ತಸ್ಸ (ಬಹೂಸು)] ಪಿಹಯನ್ತಿ ತಾದಿನೋ’’ತಿ.

೨೦೬. [ಧ. ಪ. ೯೪ ಧಮ್ಮಪದೇಪಿ] ‘‘ಮಯ್ಹಿನ್ದ್ರಿಯಾನಿ ಸಮಥಙ್ಗತಾನಿ, ಅಸ್ಸಾ ಯಥಾ ಸಾರಥಿನಾ ಸುದನ್ತಾ;

ಪಹೀನಮಾನಸ್ಸ ಅನಾಸವಸ್ಸ, ದೇವಾಪಿ ಮಯ್ಹಂ ಪಿಹಯನ್ತಿ ತಾದಿನೋ’’ತಿ.

… ಬ್ರಹ್ಮಾಲಿ ಥೇರೋ….

೪. ಮೋಘರಾಜತ್ಥೇರಗಾಥಾ

೨೦೭. ‘‘ಛವಿಪಾಪಕ ಚಿತ್ತಭದ್ದಕ, ಮೋಘರಾಜ ಸತತಂ ಸಮಾಹಿತೋ;

ಹೇಮನ್ತಿಕಸೀತಕಾಲರತ್ತಿಯೋ [ಹೇಮನ್ತಿಕಕಾಲರತ್ತಿಯೋ (ಕ.)], ಭಿಕ್ಖು ತ್ವಂಸಿ ಕಥಂ ಕರಿಸ್ಸಸಿ’’.

೨೦೮. ‘‘ಸಮ್ಪನ್ನಸಸ್ಸಾ ಮಗಧಾ, ಕೇವಲಾ ಇತಿ ಮೇ ಸುತಂ;

ಪಲಾಲಚ್ಛನ್ನಕೋ ಸೇಯ್ಯಂ, ಯಥಞ್ಞೇ ಸುಖಜೀವಿನೋ’’ತಿ.

… ಮೋಘರಾಜಾ ಥೇರೋ….

೫. ವಿಸಾಖಪಞ್ಚಾಲಪುತ್ತತ್ಥೇರಗಾಥಾ

೨೦೯. ‘‘ನ ಉಕ್ಖಿಪೇ ನೋ ಚ ಪರಿಕ್ಖಿಪೇ ಪರೇ, ಓಕ್ಖಿಪೇ ಪಾರಗತಂ ನ ಏರಯೇ;

ನ ಚತ್ತವಣ್ಣಂ ಪರಿಸಾಸು ಬ್ಯಾಹರೇ, ಅನುದ್ಧತೋ ಸಮ್ಮಿತಭಾಣಿ ಸುಬ್ಬತೋ.

೨೧೦. ‘‘ಸುಸುಖುಮನಿಪುಣತ್ಥದಸ್ಸಿನಾ, ಮತಿಕುಸಲೇನ ನಿವಾತವುತ್ತಿನಾ;

ಸಂಸೇವಿತವುದ್ಧಸೀಲಿನಾ, ನಿಬ್ಬಾನಂ ನ ಹಿ ತೇನ ದುಲ್ಲಭ’’ನ್ತಿ.

… ವಿಸಾಖೋ ಪಞ್ಚಾಲಪುತ್ತೋ ಥೇರೋ ….

೬. ಚೂಳಕತ್ಥೇರಗಾಥಾ

೨೧೧. ‘‘ನದನ್ತಿ ಮೋರಾ ಸುಸಿಖಾ ಸುಪೇಖುಣಾ, ಸುನೀಲಗೀವಾ ಸುಮುಖಾ ಸುಗಜ್ಜಿನೋ;

ಸುಸದ್ದಲಾ ಚಾಪಿ ಮಹಾಮಹೀ ಅಯಂ, ಸುಬ್ಯಾಪಿತಮ್ಬು ಸುವಲಾಹಕಂ ನಭಂ.

೨೧೨. ‘‘ಸುಕಲ್ಲರೂಪೋ ಸುಮನಸ್ಸ ಝಾಯತಂ [ಝಾಯಿತಂ (ಸ್ಯಾ. ಕ.)], ಸುನಿಕ್ಕಮೋ ಸಾಧು ಸುಬುದ್ಧಸಾಸನೇ;

ಸುಸುಕ್ಕಸುಕ್ಕಂ ನಿಪುಣಂ ಸುದುದ್ದಸಂ, ಫುಸಾಹಿ ತಂ ಉತ್ತಮಮಚ್ಚುತಂ ಪದ’’ನ್ತಿ.

… ಚೂಳಕೋ [ಚೂಲಕೋ (ಸೀ. ಅಟ್ಠ.)] ಥೇರೋ….

೭. ಅನೂಪಮತ್ಥೇರಗಾಥಾ

೨೧೩. ‘‘ನನ್ದಮಾನಾಗತಂ ಚಿತ್ತಂ, ಸೂಲಮಾರೋಪಮಾನಕಂ;

ತೇನ ತೇನೇವ ವಜಸಿ, ಯೇನ ಸೂಲಂ ಕಲಿಙ್ಗರಂ.

೨೧೪. ‘‘ತಾಹಂ ಚಿತ್ತಕಲಿಂ ಬ್ರೂಮಿ, ತಂ ಬ್ರೂಮಿ ಚಿತ್ತದುಬ್ಭಕಂ;

ಸತ್ಥಾ ತೇ ದುಲ್ಲಭೋ ಲದ್ಧೋ, ಮಾನತ್ಥೇ ಮಂ ನಿಯೋಜಯೀ’’ತಿ.

… ಅನೂಪಮೋ ಥೇರೋ….

೮. ವಜ್ಜಿತತ್ಥೇರಗಾಥಾ

೨೧೫. ‘‘ಸಂಸರಂ ದೀಘಮದ್ಧಾನಂ, ಗತೀಸು ಪರಿವತ್ತಿಸಂ;

ಅಪಸ್ಸಂ ಅರಿಯಸಚ್ಚಾನಿ, ಅನ್ಧಭೂತೋ [ಅನ್ಧೀಭೂತೋ (ಕ.)] ಪುಥುಜ್ಜನೋ.

೨೧೬. ‘‘ತಸ್ಸ ಮೇ ಅಪ್ಪಮತ್ತಸ್ಸ, ಸಂಸಾರಾ ವಿನಳೀಕತಾ;

ಸಬ್ಬಾ ಗತೀ ಸಮುಚ್ಛಿನ್ನಾ, ನತ್ಥಿ ದಾನಿ ಪುನಬ್ಭವೋ’’ತಿ.

… ವಜ್ಜಿತೋ ಥೇರೋ….

೯. ಸನ್ಧಿತತ್ಥೇರಗಾಥಾ

೨೧೭. ‘‘ಅಸ್ಸತ್ಥೇ ಹರಿತೋಭಾಸೇ, ಸಂವಿರೂಳ್ಹಮ್ಹಿ ಪಾದಪೇ;

ಏಕಂ ಬುದ್ಧಗತಂ ಸಞ್ಞಂ, ಅಲಭಿತ್ಥಂ [ಅಲಭಿಂ ಹಂ (ಕ.)] ಪತಿಸ್ಸತೋ.

೨೧೮. ‘‘ಏಕತಿಂಸೇ ಇತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;

ತಸ್ಸಾ ಸಞ್ಞಾಯ ವಾಹಸಾ, ಪತ್ತೋ ಮೇ ಆಸವಕ್ಖಯೋ’’ತಿ.

… ಸನ್ಧಿತೋ ಥೇರೋ….

ವಗ್ಗೋ ಪಞ್ಚಮೋ ನಿಟ್ಠಿತೋ.

ತಸ್ಸುದ್ದಾನಂ –

ಕುಮಾರಕಸ್ಸಪೋ ಥೇರೋ, ಧಮ್ಮಪಾಲೋ ಚ ಬ್ರಹ್ಮಾಲಿ;

ಮೋಘರಾಜಾ ವಿಸಾಖೋ ಚ, ಚೂಳಕೋ ಚ ಅನೂಪಮೋ;

ವಜ್ಜಿತೋ ಸನ್ಧಿತೋ ಥೇರೋ, ಕಿಲೇಸರಜವಾಹನೋತಿ.

ದುಕನಿಪಾತೋ ನಿಟ್ಠಿತೋ.