೪. ಚತುತ್ಥವಗ್ಗೋ

೧. ಮಿಗಸಿರತ್ಥೇರಗಾಥಾ

೧೮೧. ‘‘ಯತೋ ಅಹಂ ಪಬ್ಬಜಿತೋ, ಸಮ್ಮಾಸಮ್ಬುದ್ಧಸಾಸನೇ;

ವಿಮುಚ್ಚಮಾನೋ ಉಗ್ಗಚ್ಛಿಂ, ಕಾಮಧಾತುಂ ಉಪಚ್ಚಗಂ.

೧೮೨. ‘‘ಬ್ರಹ್ಮುನೋ ಪೇಕ್ಖಮಾನಸ್ಸ, ತತೋ ಚಿತ್ತಂ ವಿಮುಚ್ಚಿ ಮೇ;

ಅಕುಪ್ಪಾ ಮೇ ವಿಮುತ್ತೀತಿ, ಸಬ್ಬಸಂಯೋಜನಕ್ಖಯಾ’’ತಿ.

… ಮಿಗಸಿರೋ ಥೇರೋ….

೨. ಸಿವಕತ್ಥೇರಗಾಥಾ

೧೮೩. ‘‘ಅನಿಚ್ಚಾನಿ ಗಹಕಾನಿ, ತತ್ಥ ತತ್ಥ ಪುನಪ್ಪುನಂ;

ಗಹಕಾರಂ [ಗಹಕಾರಕಂ (ಸೀ. ಪೀ.)] ಗವೇಸನ್ತೋ, ದುಕ್ಖಾ ಜಾತಿ ಪುನಪ್ಪುನಂ.

೧೮೪. ‘‘ಗಹಕಾರಕ ದಿಟ್ಠೋಸಿ, ಪುನ ಗೇಹಂ ನ ಕಾಹಸಿ;

ಸಬ್ಬಾ ತೇ ಫಾಸುಕಾ ಭಗ್ಗಾ, ಥೂಣಿಕಾ [ಥೂಣಿರಾ (ಪೀ. ಕ.), ಧುಣಿರಾ (ಸ್ಯಾ.)] ಚ ವಿದಾಲಿತಾ [ಪದಾಲಿತಾ (ಸೀ. ಸ್ಯಾ.)];

ವಿಮರಿಯಾದಿಕತಂ ಚಿತ್ತಂ, ಇಧೇವ ವಿಧಮಿಸ್ಸತೀ’’ತಿ.

… ಸಿವಕೋ [ಸೀವಕೋ (ಸೀ.)] ಥೇರೋ….

೩. ಉಪವಾಣತ್ಥೇರಗಾಥಾ

೧೮೫. ‘‘ಅರಹಂ ಸುಗತೋ ಲೋಕೇ, ವಾತೇಹಾಬಾಧಿತೋ [… ಬಾಧಿತೋ (ಕ.)] ಮುನಿ;

ಸಚೇ ಉಣ್ಹೋದಕಂ ಅತ್ಥಿ, ಮುನಿನೋ ದೇಹಿ ಬ್ರಾಹ್ಮಣ.

೧೮೬. ‘‘ಪೂಜಿತೋ ಪೂಜನೇಯ್ಯಾನಂ [ಪೂಜನೀಯಾನಂ (ಸೀ.)], ಸಕ್ಕರೇಯ್ಯಾನ ಸಕ್ಕತೋ;

ಅಪಚಿತೋಪಚೇಯ್ಯಾನಂ [ಅಪಚನೀಯಾನಂ (ಸೀ.), ಅಪಚಿನೇಯ್ಯಾನಂ (ಸ್ಯಾ.)], ತಸ್ಸ ಇಚ್ಛಾಮಿ ಹಾತವೇ’’ತಿ.

… ಉಪವಾಣೋ ಥೇರೋ….

೪. ಇಸಿದಿನ್ನತ್ಥೇರಗಾಥಾ

೧೮೭. ‘‘ದಿಟ್ಠಾ ಮಯಾ ಧಮ್ಮಧರಾ ಉಪಾಸಕಾ, ಕಾಮಾ ಅನಿಚ್ಚಾ ಇತಿ ಭಾಸಮಾನಾ;

ಸಾರತ್ತರತ್ತಾ ಮಣಿಕುಣ್ಡಲೇಸು, ಪುತ್ತೇಸು ದಾರೇಸು ಚ ತೇ ಅಪೇಕ್ಖಾ.

೧೮೮. ‘‘ಅದ್ಧಾ ನ ಜಾನನ್ತಿ ಯತೋಧ ಧಮ್ಮಂ, ಕಾಮಾ ಅನಿಚ್ಚಾ ಇತಿ ಚಾಪಿ ಆಹು;

ರಾಗಞ್ಚ ತೇಸಂ ನ ಬಲತ್ಥಿ ಛೇತ್ತುಂ, ತಸ್ಮಾ ಸಿತಾ ಪುತ್ತದಾರಂ ಧನಞ್ಚಾ’’ತಿ.

… ಇಸಿದಿನ್ನೋ ಥೇರೋ….

೫. ಸಮ್ಬುಲಕಚ್ಚಾನತ್ಥೇರಗಾಥಾ

೧೮೯. ‘‘ದೇವೋ ಚ ವಸ್ಸತಿ ದೇವೋ ಚ ಗಳಗಳಾಯತಿ,

ಏಕಕೋ ಚಾಹಂ ಭೇರವೇ ಬಿಲೇ ವಿಹರಾಮಿ;

ತಸ್ಸ ಮಯ್ಹಂ ಏಕಕಸ್ಸ ಭೇರವೇ ಬಿಲೇ ವಿಹರತೋ,

ನತ್ಥಿ ಭಯಂ ವಾ ಛಮ್ಭಿತತ್ತಂ ವಾ ಲೋಮಹಂಸೋ ವಾ.

೧೯೦. ‘‘ಧಮ್ಮತಾ ಮಮಸಾ ಯಸ್ಸ ಮೇ, ಏಕಕಸ್ಸ ಭೇರವೇ ಬಿಲೇ;

ವಿಹರತೋ ನತ್ಥಿ ಭಯಂ ವಾ, ಛಮ್ಭಿತತ್ತಂ ವಾ ಲೋಮಹಂಸೋ ವಾ’’ತಿ.

… ಸಮ್ಬುಲಕಚ್ಚಾನೋ [ಸಮ್ಬಹುಲಕಚ್ಚಾನೋ (ಕ.)] ಥೇರೋ….

೬. ನಿತಕತ್ಥೇರಗಾಥಾ

೧೯೧. [ಉದಾ. ೩೪ ಉದಾನೇಪಿ] ‘‘ಕಸ್ಸ ಸೇಲೂಪಮಂ ಚಿತ್ತಂ, ಠಿತಂ ನಾನುಪಕಮ್ಪತಿ;

ವಿರತ್ತಂ ರಜನೀಯೇಸು, ಕುಪ್ಪನೀಯೇ ನ ಕುಪ್ಪತಿ;

ಯಸ್ಸೇವಂ ಭಾವಿತಂ ಚಿತ್ತಂ, ಕುತೋ ತಂ ದುಕ್ಖಮೇಸ್ಸತಿ.

೧೯೨. ‘‘ಮಮ ಸೇಲೂಪಮಂ ಚಿತ್ತಂ, ಠಿತಂ ನಾನುಪಕಮ್ಪತಿ;

ವಿರತ್ತಂ ರಜನೀಯೇಸು, ಕುಪ್ಪನೀಯೇ ನ ಕುಪ್ಪತಿ;

ಮಮೇವಂ ಭಾವಿತಂ ಚಿತ್ತಂ, ಕುತೋ ಮಂ ದುಕ್ಖಮೇಸ್ಸತೀ’’ತಿ.

… ನಿತಕೋ [ಖಿತಕೋ (ಸೀ. ಸ್ಯಾ.)] ಥೇರೋ….

೭. ಸೋಣಪೋಟಿರಿಯತ್ಥೇರಗಾಥಾ

೧೯೩. ‘‘ನ ತಾವ ಸುಪಿತುಂ ಹೋತಿ, ರತ್ತಿ ನಕ್ಖತ್ತಮಾಲಿನೀ;

ಪಟಿಜಗ್ಗಿತುಮೇವೇಸಾ, ರತ್ತಿ ಹೋತಿ ವಿಜಾನತಾ.

೧೯೪. ‘‘ಹತ್ಥಿಕ್ಖನ್ಧಾವಪತಿತಂ, ಕುಞ್ಜರೋ ಚೇ ಅನುಕ್ಕಮೇ;

ಸಙ್ಗಾಮೇ ಮೇ ಮತಂ ಸೇಯ್ಯೋ, ಯಞ್ಚೇ ಜೀವೇ ಪರಾಜಿತೋ’’ತಿ.

… ಸೋಣೋ ಪೋಟಿರಿಯೋ [ಸೇಲಿಸ್ಸರಿಯೋ (ಸೀ.), ಪೋಟ್ಟಿರಿಯಪುತ್ತೋ (ಸ್ಯಾ.)] ಥೇರೋ ….

೮. ನಿಸಭತ್ಥೇರಗಾಥಾ

೧೯೫. ‘‘ಪಞ್ಚ ಕಾಮಗುಣೇ ಹಿತ್ವಾ, ಪಿಯರೂಪೇ ಮನೋರಮೇ;

ಸದ್ಧಾಯ ಘರಾ ನಿಕ್ಖಮ್ಮ, ದುಕ್ಖಸ್ಸನ್ತಕರೋ ಭವೇ.

೧೯೬. ‘‘ನಾಭಿನನ್ದಾಮಿ ಮರಣಂ, ನಾಭಿನನ್ದಾಮಿ ಜೀವಿತಂ;

ಕಾಲಞ್ಚ ಪಟಿಕಙ್ಖಾಮಿ, ಸಮ್ಪಜಾನೋ ಪತಿಸ್ಸತೋ’’ತಿ.

… ನಿಸಭೋ ಥೇರೋ….

೯. ಉಸಭತ್ಥೇರಗಾಥಾ

೧೯೭. ‘‘ಅಮ್ಬಪಲ್ಲವಸಙ್ಕಾಸಂ, ಅಂಸೇ ಕತ್ವಾನ ಚೀವರಂ;

ನಿಸಿನ್ನೋ ಹತ್ಥಿಗೀವಾಯಂ, ಗಾಮಂ ಪಿಣ್ಡಾಯ ಪಾವಿಸಿಂ.

೧೯೮. ‘‘ಹತ್ಥಿಕ್ಖನ್ಧತೋ ಓರುಯ್ಹ, ಸಂವೇಗಂ ಅಲಭಿಂ ತದಾ;

ಸೋಹಂ ದಿತ್ತೋ ತದಾ ಸನ್ತೋ, ಪತ್ತೋ ಮೇ ಆಸವಕ್ಖಯೋ’’ತಿ.

… ಉಸಭೋ ಥೇರೋ….

೧೦. ಕಪ್ಪಟಕುರತ್ಥೇರಗಾಥಾ

೧೯೯. ‘‘ಅಯಮಿತಿ ಕಪ್ಪಟೋ ಕಪ್ಪಟಕುರೋ, ಅಚ್ಛಾಯ ಅತಿಭರಿತಾಯ [ಅತಿಭರಿಯಾಯ (ಸೀ. ಕ.), ಅಚ್ಚಂ ಭರಾಯ (ಸ್ಯಾ.)];

ಅಮತಘಟಿಕಾಯಂ ಧಮ್ಮಕಟಮತ್ತೋ [ಧಮ್ಮಕಟಪತ್ತೋ (ಸ್ಯಾ. ಕ. ಅಟ್ಠ.), ಧಮ್ಮಕಟಮಗ್ಗೋ (ಸೀ. ಅಟ್ಠ.)], ಕತಪದಂ ಝಾನಾನಿ ಓಚೇತುಂ.

೨೦೦. ‘‘ಮಾ ಖೋ ತ್ವಂ ಕಪ್ಪಟ ಪಚಾಲೇಸಿ, ಮಾ ತ್ವಂ ಉಪಕಣ್ಣಮ್ಹಿ ತಾಳೇಸ್ಸಂ;

ನ ಹಿ [ನ ವಾ (ಕ.)] ತ್ವಂ ಕಪ್ಪಟ ಮತ್ತಮಞ್ಞಾಸಿ, ಸಙ್ಘಮಜ್ಝಮ್ಹಿ ಪಚಲಾಯಮಾನೋತಿ.

… ಕಪ್ಪಟಕುರೋ ಥೇರೋ….

ವಗ್ಗೋ ಚತುತ್ಥೋ ನಿಟ್ಠಿತೋ.

ತಸ್ಸುದ್ದಾನಂ –

ಮಿಗಸಿರೋ ಸಿವಕೋ ಚ, ಉಪವಾನೋ ಚ ಪಣ್ಡಿತೋ;

ಇಸಿದಿನ್ನೋ ಚ ಕಚ್ಚಾನೋ, ನಿತಕೋ ಚ ಮಹಾವಸೀ;

ಪೋಟಿರಿಯಪುತ್ತೋ ನಿಸಭೋ, ಉಸಭೋ ಕಪ್ಪಟಕುರೋತಿ.