೮. ಅಙ್ಗುಲಿಮಾಲತ್ಥೇರಗಾಥಾ

೮೬೬. ‘‘ಗಚ್ಛಂ ವದೇಸಿ ಸಮಣ ‘ಟ್ಠಿತೋಮ್ಹಿ’, ಮಮಞ್ಚ ಬ್ರೂಸಿ ಠಿತಮಟ್ಠಿತೋತಿ;

ಪುಚ್ಛಾಮಿ ತಂ ಸಮಣ ಏತಮತ್ಥಂ, ‘ಕಥಂ ಠಿತೋ ತ್ವಂ ಅಹಮಟ್ಠಿತೋಮ್ಹಿ’’’.

೮೬೭. ‘‘ಠಿತೋ ಅಹಂ ಅಙ್ಗುಲಿಮಾಲ ಸಬ್ಬದಾ, ಸಬ್ಬೇಸು ಭೂತೇಸು ನಿಧಾಯ ದಣ್ಡಂ;

ತುವಞ್ಚ ಪಾಣೇಸು ಅಸಞ್ಞತೋಸಿ, ತಸ್ಮಾ ಠಿತೋಹಂ ತುವಮಟ್ಠಿತೋಸಿ’’.

೮೬೮. ‘‘ಚಿರಸ್ಸಂ ವತ ಮೇ ಮಹಿತೋ ಮಹೇಸೀ, ಮಹಾವನಂ ಸಮಣೋ ಪಚ್ಚಪಾದಿ [ಪಚ್ಚುಪಾದಿ (ಸಬ್ಬತ್ಥ)];

ಸೋಹಂ ಚಜಿಸ್ಸಾಮಿ ಸಹಸ್ಸಪಾಪಂ, ಸುತ್ವಾನ ಗಾಥಂ ತವ ಧಮ್ಮಯುತ್ತಂ’’.

೮೬೯. ಇಚ್ಚೇವ ಚೋರೋ ಅಸಿಮಾವುಧಞ್ಚ, ಸೋಬ್ಭೇ ಪಪಾತೇ ನರಕೇ ಅನ್ವಕಾಸಿ [ಅಕಿರಿ (ಮ. ನಿ. ೨.೩೪೯)];

ಅವನ್ದಿ ಚೋರೋ ಸುಗತಸ್ಸ ಪಾದೇ, ತತ್ಥೇವ ಪಬ್ಬಜ್ಜಮಯಾಚಿ ಬುದ್ಧಂ.

೮೭೦. ಬುದ್ಧೋ ಚ ಖೋ ಕಾರುಣಿಕೋ ಮಹೇಸಿ, ಯೋ ಸತ್ಥಾ ಲೋಕಸ್ಸ ಸದೇವಕಸ್ಸ;

‘ತಮೇಹಿ ಭಿಕ್ಖೂ’ತಿ ತದಾ ಅವೋಚ, ಏಸೇವ ತಸ್ಸ ಅಹು ಭಿಕ್ಖುಭಾವೋ.

೮೭೧. ‘‘ಯೋ ಚ ಪುಬ್ಬೇ ಪಮಜ್ಜಿತ್ವಾ, ಪಚ್ಛಾ ಸೋ ನಪ್ಪಮಜ್ಜತಿ;

ಸೋಮಂ ಲೋಕಂ ಪಭಾಸೇತಿ, ಅಬ್ಭಾ ಮುತ್ತೋವ ಚನ್ದಿಮಾ.

೮೭೨. ‘‘ಯಸ್ಸ ಪಾಪಂ ಕತಂ ಕಮ್ಮಂ, ಕುಸಲೇನ ಪಿಧೀಯತಿ [ಪಿಥೀಯತಿ (ಸೀ. ಸ್ಯಾ.)];

ಸೋಮಂ ಲೋಕಂ ಪಭಾಸೇತಿ, ಅಬ್ಭಾ ಮುತ್ತೋವ ಚನ್ದಿಮಾ.

೮೭೩. ‘‘ಯೋ ಹವೇ ದಹರೋ ಭಿಕ್ಖು, ಯುಞ್ಜತಿ ಬುದ್ಧಸಾಸನೇ;

ಸೋಮಂ ಲೋಕಂ ಪಭಾಸೇತಿ, ಅಬ್ಭಾ ಮುತ್ತೋವ ಚನ್ದಿಮಾ.

೮೭೪. [ದಿಸಾ ಹಿ (ಸ್ಯಾ. ಕ., ಮ. ನಿ. ೨.೩೫೨)] ‘‘ದಿಸಾಪಿ ಮೇ ಧಮ್ಮಕಥಂ ಸುಣನ್ತು, ದಿಸಾಪಿ ಮೇ ಯುಞ್ಜನ್ತು ಬುದ್ಧಸಾಸನೇ;

ದಿಸಾಪಿ ಮೇ ತೇ ಮನುಜೇ ಭಜನ್ತು, ಯೇ ಧಮ್ಮಮೇವಾದಪಯನ್ತಿ ಸನ್ತೋ.

೮೭೫. ‘‘ದಿಸಾ ಹಿ ಮೇ ಖನ್ತಿವಾದಾನಂ, ಅವಿರೋಧಪ್ಪಸಂಸಿನಂ;

ಸುಣನ್ತು ಧಮ್ಮಂ ಕಾಲೇನ, ತಞ್ಚ ಅನುವಿಧೀಯನ್ತು.

೮೭೬. ‘‘ನ ಹಿ ಜಾತು ಸೋ ಮಮಂ ಹಿಂಸೇ, ಅಞ್ಞಂ ವಾ ಪನ ಕಿಞ್ಚನಂ [ಕಞ್ಚಿನಂ (ಸೀ. ಸ್ಯಾ.), ಕಞ್ಚನಂ (?)];

ಪಪ್ಪುಯ್ಯ ಪರಮಂ ಸನ್ತಿಂ, ರಕ್ಖೇಯ್ಯ ತಸಥಾವರೇ.

೮೭೭. [ಥೇರಗಾ. ೧೯] ‘‘ಉದಕಞ್ಹಿ ನಯನ್ತಿ ನೇತ್ತಿಕಾ, ಉಸುಕಾರಾ ನಮಯನ್ತಿ [ದಮಯನ್ತಿ (ಕ.)] ತೇಜನಂ;

ದಾರುಂ ನಮಯನ್ತಿ [ದಮಯನ್ತಿ (ಕ.)] ತಚ್ಛಕಾ, ಅತ್ತಾನಂ ದಮಯನ್ತಿ ಪಣ್ಡಿತಾ.

೮೭೮. ‘‘ದಣ್ಡೇನೇಕೇ ದಮಯನ್ತಿ, ಅಙ್ಕುಸೇಭಿ ಕಸಾಹಿ ಚ;

ಅದಣ್ಡೇನ ಅಸತ್ಥೇನ, ಅಹಂ ದನ್ತೋಮ್ಹಿ ತಾದಿನಾ.

೮೭೯. ‘‘‘ಅಹಿಂಸಕೋ’ತಿ ಮೇ ನಾಮಂ, ಹಿಂಸಕಸ್ಸ ಪುರೇ ಸತೋ;

ಅಜ್ಜಾಹಂ ಸಚ್ಚನಾಮೋಮ್ಹಿ, ನ ನಂ ಹಿಂಸಾಮಿ ಕಿಞ್ಚನಂ [ಕಞ್ಚಿನಂ (ಸೀ. ಸ್ಯಾ.), ಕಞ್ಚನಂ (?)].

೮೮೦. ‘‘ಚೋರೋ ಅಹಂ ಪುರೇ ಆಸಿಂ, ಅಙ್ಗುಲಿಮಾಲೋತಿ ವಿಸ್ಸುತೋ;

ವುಯ್ಹಮಾನೋ ಮಹೋಘೇನ, ಬುದ್ಧಂ ಸರಣಮಾಗಮಂ.

೮೮೧. ‘‘ಲೋಹಿತಪಾಣಿ ಪುರೇ ಆಸಿಂ, ಅಙ್ಗುಲಿಮಾಲೋತಿ ವಿಸ್ಸುತೋ;

ಸರಣಗಮನಂ ಪಸ್ಸ, ಭವನೇತ್ತಿ ಸಮೂಹತಾ.

೮೮೨. ‘‘ತಾದಿಸಂ ಕಮ್ಮಂ ಕತ್ವಾನ, ಬಹುಂ ದುಗ್ಗತಿಗಾಮಿನಂ;

ಫುಟ್ಠೋ ಕಮ್ಮವಿಪಾಕೇನ, ಅನಣೋ ಭುಞ್ಜಾಮಿ ಭೋಜನಂ.

೮೮೩. ‘‘ಪಮಾದಮನುಯುಞ್ಜನ್ತಿ, ಬಾಲಾ ದುಮ್ಮೇಧಿನೋ ಜನಾ;

ಅಪ್ಪಮಾದಞ್ಚ ಮೇಧಾವೀ, ಧನಂ ಸೇಟ್ಠಂವ ರಕ್ಖತಿ.

೮೮೪. ‘‘ಮಾ ಪಮಾದಮನುಯುಞ್ಜೇಥ, ಮಾ ಕಾಮರತಿಸನ್ಥವಂ [ಸನ್ಧವಂ (ಕ.)];

ಅಪ್ಪಮತ್ತೋ ಹಿ ಝಾಯನ್ತೋ, ಪಪ್ಪೋತಿ ಪರಮಂ ಸುಖಂ.

೮೮೫. ‘‘ಸ್ವಾಗತಂ ನಾಪಗತಂ, ನೇತಂ ದುಮ್ಮನ್ತಿತಂ ಮಮ;

ಸವಿಭತ್ತೇಸು ಧಮ್ಮೇಸು, ಯಂ ಸೇಟ್ಠಂ ತದುಪಾಗಮಂ.

೮೮೬. ‘‘ಸ್ವಾಗತಂ ನಾಪಗತಂ, ನೇತಂ ದುಮ್ಮನ್ತಿತಂ ಮಮ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೮೮೭. ‘‘ಅರಞ್ಞೇ ರುಕ್ಖಮೂಲೇ ವಾ, ಪಬ್ಬತೇಸು ಗುಹಾಸು ವಾ;

ತತ್ಥ ತತ್ಥೇವ ಅಟ್ಠಾಸಿಂ, ಉಬ್ಬಿಗ್ಗಮನಸೋ ತದಾ.

೮೮೮. ‘‘ಸುಖಂ ಸಯಾಮಿ ಠಾಯಾಮಿ, ಸುಖಂ ಕಪ್ಪೇಮಿ ಜೀವಿತಂ;

ಅಹತ್ಥಪಾಸೋ ಮಾರಸ್ಸ, ಅಹೋ ಸತ್ಥಾನುಕಮ್ಪಿತೋ.

೮೮೯. ‘‘ಬ್ರಹ್ಮಜಚ್ಚೋ ಪುರೇ ಆಸಿಂ, ಉದಿಚ್ಚೋ ಉಭತೋ ಅಹು;

ಸೋಜ್ಜ ಪುತ್ತೋ ಸುಗತಸ್ಸ, ಧಮ್ಮರಾಜಸ್ಸ ಸತ್ಥುನೋ.

೮೯೦. ‘‘ವೀತತಣ್ಹೋ ಅನಾದಾನೋ, ಗುತ್ತದ್ವಾರೋ ಸುಸಂವುತೋ;

ಅಘಮೂಲಂ ವಧಿತ್ವಾನ, ಪತ್ತೋ ಮೇ ಆಸವಕ್ಖಯೋ.

೮೯೧. ‘‘ಪರಿಚಿಣ್ಣೋ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ;

ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ’’ತಿ.

… ಅಙ್ಗುಲಿಮಾಲೋ ಥೇರೋ….