೧೬. ವೀಸತಿನಿಪಾತೋ

೧. ಅಧಿಮುತ್ತತ್ಥೇರಗಾಥಾ

೭೦೫. ‘‘ಯಞ್ಞತ್ಥಂ ವಾ ಧನತ್ಥಂ ವಾ, ಯೇ ಹನಾಮ ಮಯಂ ಪುರೇ;

ಅವಸೇಸಂ [ಅವಸೇ ತಂ (ಸೀ. ಅಟ್ಠ. ಮೂಲಪಾಠೋ), ಅವಸೇಸಾನಂ (ಅಟ್ಠ.?)] ಭಯಂ ಹೋತಿ, ವೇಧನ್ತಿ ವಿಲಪನ್ತಿ ಚ.

೭೦೬. ‘‘ತಸ್ಸ ತೇ ನತ್ಥಿ ಭೀತತ್ತಂ, ಭಿಯ್ಯೋ ವಣ್ಣೋ ಪಸೀದತಿ;

ಕಸ್ಮಾ ನ ಪರಿದೇವೇಸಿ, ಏವರೂಪೇ ಮಹಬ್ಭಯೇ.

೭೦೭. ‘‘ನತ್ಥಿ ಚೇತಸಿಕಂ ದುಕ್ಖಂ, ಅನಪೇಕ್ಖಸ್ಸ ಗಾಮಣಿ;

ಅತಿಕ್ಕನ್ತಾ ಭಯಾ ಸಬ್ಬೇ, ಖೀಣಸಂಯೋಜನಸ್ಸ ವೇ.

೭೦೮. ‘‘ಖೀಣಾಯ ಭವನೇತ್ತಿಯಾ, ದಿಟ್ಠೇ ಧಮ್ಮೇ ಯಥಾತಥೇ;

ನ ಭಯಂ ಮರಣೇ ಹೋತಿ, ಭಾರನಿಕ್ಖೇಪನೇ ಯಥಾ.

೭೦೯. ‘‘ಸುಚಿಣ್ಣಂ ಬ್ರಹ್ಮಚರಿಯಂ ಮೇ, ಮಗ್ಗೋ ಚಾಪಿ ಸುಭಾವಿತೋ;

ಮರಣೇ ಮೇ ಭಯಂ ನತ್ಥಿ, ರೋಗಾನಮಿವ ಸಙ್ಖಯೇ.

೭೧೦. ‘‘ಸುಚಿಣ್ಣಂ ಬ್ರಹ್ಮಚರಿಯಂ ಮೇ, ಮಗ್ಗೋ ಚಾಪಿ ಸುಭಾವಿತೋ;

ನಿರಸ್ಸಾದಾ ಭವಾ ದಿಟ್ಠಾ, ವಿಸಂ ಪಿತ್ವಾವ [ಪೀತ್ವಾವ (ಸೀ.)] ಛಡ್ಡಿತಂ.

೭೧೧. ‘‘ಪಾರಗೂ ಅನುಪಾದಾನೋ, ಕತಕಿಚ್ಚೋ ಅನಾಸವೋ;

ತುಟ್ಠೋ ಆಯುಕ್ಖಯಾ ಹೋತಿ, ಮುತ್ತೋ ಆಘಾತನಾ ಯಥಾ.

೭೧೨. ‘‘ಉತ್ತಮಂ ಧಮ್ಮತಂ ಪತ್ತೋ, ಸಬ್ಬಲೋಕೇ ಅನತ್ಥಿಕೋ;

ಆದಿತ್ತಾವ ಘರಾ ಮುತ್ತೋ, ಮರಣಸ್ಮಿಂ ನ ಸೋಚತಿ.

೭೧೩. ‘‘ಯದತ್ಥಿ ಸಙ್ಗತಂ ಕಿಞ್ಚಿ, ಭವೋ ವಾ ಯತ್ಥ ಲಬ್ಭತಿ;

ಸಬ್ಬಂ ಅನಿಸ್ಸರಂ ಏತಂ, ಇತಿ ವುತ್ತಂ ಮಹೇಸಿನಾ.

೭೧೪. ‘‘ಯೋ ತಂ ತಥಾ ಪಜಾನಾತಿ, ಯಥಾ ಬುದ್ಧೇನ ದೇಸಿತಂ;

ನ ಗಣ್ಹಾತಿ ಭವಂ ಕಿಞ್ಚಿ, ಸುತತ್ತಂವ ಅಯೋಗುಳಂ.

೭೧೫. ‘‘ನ ಮೇ ಹೋತಿ ‘ಅಹೋಸಿ’ನ್ತಿ, ‘ಭವಿಸ್ಸ’ನ್ತಿ ನ ಹೋತಿ ಮೇ;

ಸಙ್ಖಾರಾ ವಿಗಮಿಸ್ಸನ್ತಿ, ತತ್ಥ ಕಾ ಪರಿದೇವನಾ.

೭೧೬. ‘‘ಸುದ್ಧಂ ಧಮ್ಮಸಮುಪ್ಪಾದಂ, ಸುದ್ಧಂ ಸಙ್ಖಾರಸನ್ತತಿಂ;

ಪಸ್ಸನ್ತಸ್ಸ ಯಥಾಭೂತಂ, ನ ಭಯಂ ಹೋತಿ ಗಾಮಣಿ.

೭೧೭. ‘‘ತಿಣಕಟ್ಠಸಮಂ ಲೋಕಂ, ಯದಾ ಪಞ್ಞಾಯ ಪಸ್ಸತಿ;

ಮಮತ್ತಂ ಸೋ ಅಸಂವಿನ್ದಂ, ‘ನತ್ಥಿ ಮೇ’ತಿ ನ ಸೋಚತಿ.

೭೧೮. ‘‘ಉಕ್ಕಣ್ಠಾಮಿ ಸರೀರೇನ, ಭವೇನಮ್ಹಿ ಅನತ್ಥಿಕೋ;

ಸೋಯಂ ಭಿಜ್ಜಿಸ್ಸತಿ ಕಾಯೋ, ಅಞ್ಞೋ ಚ ನ ಭವಿಸ್ಸತಿ.

೭೧೯. ‘‘ಯಂ ವೋ ಕಿಚ್ಚಂ ಸರೀರೇನ, ತಂ ಕರೋಥ ಯದಿಚ್ಛಥ;

ನ ಮೇ ತಪ್ಪಚ್ಚಯಾ ತತ್ಥ, ದೋಸೋ ಪೇಮಞ್ಚ ಹೇಹಿತಿ’’.

೭೨೦. ತಸ್ಸ ತಂ ವಚನಂ ಸುತ್ವಾ, ಅಬ್ಭುತಂ ಲೋಮಹಂಸನಂ;

ಸತ್ಥಾನಿ ನಿಕ್ಖಿಪಿತ್ವಾನ, ಮಾಣವಾ ಏತದಬ್ರವುಂ.

೭೨೧. ‘‘ಕಿಂ ಭದನ್ತೇ ಕರಿತ್ವಾನ, ಕೋ ವಾ ಆಚರಿಯೋ ತವ;

ಕಸ್ಸ ಸಾಸನಮಾಗಮ್ಮ, ಲಬ್ಭತೇ ತಂ ಅಸೋಕತಾ’’.

೭೨೨. ‘‘ಸಬ್ಬಞ್ಞೂ ಸಬ್ಬದಸ್ಸಾವೀ, ಜಿನೋ ಆಚರಿಯೋ ಮಮ;

ಮಹಾಕಾರುಣಿಕೋ ಸತ್ಥಾ, ಸಬ್ಬಲೋಕತಿಕಿಚ್ಛಕೋ.

೭೨೩. ‘‘ತೇನಾಯಂ ದೇಸಿತೋ ಧಮ್ಮೋ, ಖಯಗಾಮೀ ಅನುತ್ತರೋ;

ತಸ್ಸ ಸಾಸನಮಾಗಮ್ಮ, ಲಬ್ಭತೇ ತಂ ಅಸೋಕತಾ’’.

೭೨೪. ಸುತ್ವಾನ ಚೋರಾ ಇಸಿನೋ ಸುಭಾಸಿತಂ, ನಿಕ್ಖಿಪ್ಪ ಸತ್ಥಾನಿ ಚ ಆವುಧಾನಿ ಚ;

ತಮ್ಹಾ ಚ ಕಮ್ಮಾ ವಿರಮಿಂಸು ಏಕೇ, ಏಕೇ ಚ ಪಬ್ಬಜ್ಜಮರೋಚಯಿಂಸು.

೭೨೫. ತೇ ಪಬ್ಬಜಿತ್ವಾ ಸುಗತಸ್ಸ ಸಾಸನೇ, ಭಾವೇತ್ವ ಬೋಜ್ಝಙ್ಗಬಲಾನಿ ಪಣ್ಡಿತಾ;

ಉದಗ್ಗಚಿತ್ತಾ ಸುಮನಾ ಕತಿನ್ದ್ರಿಯಾ, ಫುಸಿಂಸು ನಿಬ್ಬಾನಪದಂ ಅಸಙ್ಖತನ್ತಿ.

…ಅಧಿಮುತ್ತೋ ಥೇರೋ….

೨. ಪಾರಾಪರಿಯತ್ಥೇರಗಾಥಾ

೭೨೬. ‘‘ಸಮಣಸ್ಸ ಅಹು ಚಿನ್ತಾ, ಪಾರಾಪರಿಯಸ್ಸ ಭಿಕ್ಖುನೋ;

ಏಕಕಸ್ಸ ನಿಸಿನ್ನಸ್ಸ, ಪವಿವಿತ್ತಸ್ಸ ಝಾಯಿನೋ.

೭೨೭. ‘‘ಕಿಮಾನುಪುಬ್ಬಂ ಪುರಿಸೋ, ಕಿಂ ವತಂ ಕಿಂ ಸಮಾಚಾರಂ;

ಅತ್ತನೋ ಕಿಚ್ಚಕಾರೀಸ್ಸ, ನ ಚ ಕಞ್ಚಿ ವಿಹೇಠಯೇ.

೭೨೮. ‘‘ಇನ್ದ್ರಿಯಾನಿ ಮನುಸ್ಸಾನಂ, ಹಿತಾಯ ಅಹಿತಾಯ ಚ;

ಅರಕ್ಖಿತಾನಿ ಅಹಿತಾಯ, ರಕ್ಖಿತಾನಿ ಹಿತಾಯ ಚ.

೭೨೯. ‘‘ಇನ್ದ್ರಿಯಾನೇವ ಸಾರಕ್ಖಂ, ಇನ್ದ್ರಿಯಾನಿ ಚ ಗೋಪಯಂ;

ಅತ್ತನೋ ಕಿಚ್ಚಕಾರೀಸ್ಸ, ನ ಚ ಕಞ್ಚಿ ವಿಹೇಠಯೇ.

೭೩೦. ‘‘ಚಕ್ಖುನ್ದ್ರಿಯಂ ಚೇ ರೂಪೇಸು, ಗಚ್ಛನ್ತಂ ಅನಿವಾರಯಂ;

ಅನಾದೀನವದಸ್ಸಾವೀ, ಸೋ ದುಕ್ಖಾ ನ ಹಿ ಮುಚ್ಚತಿ.

೭೩೧. ‘‘ಸೋತಿನ್ದ್ರಿಯಂ ಚೇ ಸದ್ದೇಸು, ಗಚ್ಛನ್ತಂ ಅನಿವಾರಯಂ;

ಅನಾದೀನವದಸ್ಸಾವೀ, ಸೋ ದುಕ್ಖಾ ನ ಹಿ ಮುಚ್ಚತಿ.

೭೩೨. ‘‘ಅನಿಸ್ಸರಣದಸ್ಸಾವೀ, ಗನ್ಧೇ ಚೇ ಪಟಿಸೇವತಿ;

ನ ಸೋ ಮುಚ್ಚತಿ ದುಕ್ಖಮ್ಹಾ, ಗನ್ಧೇಸು ಅಧಿಮುಚ್ಛಿತೋ.

೭೩೩. ‘‘ಅಮ್ಬಿಲಂ ಮಧುರಗ್ಗಞ್ಚ, ತಿತ್ತಕಗ್ಗಮನುಸ್ಸರಂ;

ರಸತಣ್ಹಾಯ ಗಧಿತೋ, ಹದಯಂ ನಾವಬುಜ್ಝತಿ.

೭೩೪. ‘‘ಸುಭಾನ್ಯಪ್ಪಟಿಕೂಲಾನಿ, ಫೋಟ್ಠಬ್ಬಾನಿ ಅನುಸ್ಸರಂ;

ರತ್ತೋ ರಾಗಾಧಿಕರಣಂ, ವಿವಿಧಂ ವಿನ್ದತೇ ದುಖಂ.

೭೩೫. ‘‘ಮನಂ ಚೇತೇಹಿ ಧಮ್ಮೇಹಿ, ಯೋ ನ ಸಕ್ಕೋತಿ ರಕ್ಖಿತುಂ;

ತತೋ ನಂ ದುಕ್ಖಮನ್ವೇತಿ, ಸಬ್ಬೇಹೇತೇಹಿ ಪಞ್ಚಹಿ.

೭೩೬. ‘‘ಪುಬ್ಬಲೋಹಿತಸಮ್ಪುಣ್ಣಂ, ಬಹುಸ್ಸ ಕುಣಪಸ್ಸ ಚ;

ನರವೀರಕತಂ ವಗ್ಗುಂ, ಸಮುಗ್ಗಮಿವ ಚಿತ್ತಿತಂ.

೭೩೭. ‘‘ಕಟುಕಂ ಮಧುರಸ್ಸಾದಂ, ಪಿಯನಿಬನ್ಧನಂ ದುಖಂ;

ಖುರಂವ ಮಧುನಾ ಲಿತ್ತಂ, ಉಲ್ಲಿಹಂ ನಾವಬುಜ್ಝತಿ.

೭೩೮. ‘‘ಇತ್ಥಿರೂಪೇ ಇತ್ಥಿಸರೇ, ಫೋಟ್ಠಬ್ಬೇಪಿ ಚ ಇತ್ಥಿಯಾ;

ಇತ್ಥಿಗನ್ಧೇಸು ಸಾರತ್ತೋ, ವಿವಿಧಂ ವಿನ್ದತೇ ದುಖಂ.

೭೩೯. ‘‘ಇತ್ಥಿಸೋತಾನಿ ಸಬ್ಬಾನಿ, ಸನ್ದನ್ತಿ ಪಞ್ಚ ಪಞ್ಚಸು;

ತೇಸಮಾವರಣಂ ಕಾತುಂ, ಯೋ ಸಕ್ಕೋತಿ ವೀರಿಯವಾ.

೭೪೦. ‘‘ಸೋ ಅತ್ಥವಾ ಸೋ ಧಮ್ಮಟ್ಠೋ, ಸೋ ದಕ್ಖೋ ಸೋ ವಿಚಕ್ಖಣೋ;

ಕರೇಯ್ಯ ರಮಮಾನೋಪಿ, ಕಿಚ್ಚಂ ಧಮ್ಮತ್ಥಸಂಹಿತಂ.

೭೪೧. ‘‘ಅಥೋ ಸೀದತಿ ಸಞ್ಞುತ್ತಂ, ವಜ್ಜೇ ಕಿಚ್ಚಂ ನಿರತ್ಥಕಂ;

‘ನ ತಂ ಕಿಚ್ಚ’ನ್ತಿ ಮಞ್ಞಿತ್ವಾ, ಅಪ್ಪಮತ್ತೋ ವಿಚಕ್ಖಣೋ.

೭೪೨. ‘‘ಯಞ್ಚ ಅತ್ಥೇನ ಸಞ್ಞುತ್ತಂ, ಯಾ ಚ ಧಮ್ಮಗತಾ ರತಿ;

ತಂ ಸಮಾದಾಯ ವತ್ತೇಥ, ಸಾ ಹಿ ವೇ ಉತ್ತಮಾ ರತಿ.

೭೪೩. ‘‘ಉಚ್ಚಾವಚೇಹುಪಾಯೇಹಿ, ಪರೇಸಮಭಿಜಿಗೀಸತಿ;

ಹನ್ತ್ವಾ ವಧಿತ್ವಾ ಅಥ ಸೋಚಯಿತ್ವಾ, ಆಲೋಪತಿ ಸಾಹಸಾ ಯೋ ಪರೇಸಂ.

೭೪೪. ‘‘ತಚ್ಛನ್ತೋ ಆಣಿಯಾ ಆಣಿಂ, ನಿಹನ್ತಿ ಬಲವಾ ಯಥಾ;

ಇನ್ದ್ರಿಯಾನಿನ್ದ್ರಿಯೇಹೇವ, ನಿಹನ್ತಿ ಕುಸಲೋ ತಥಾ.

೭೪೫. ‘‘ಸದ್ಧಂ ವೀರಿಯಂ ಸಮಾಧಿಞ್ಚ, ಸತಿಪಞ್ಞಞ್ಚ ಭಾವಯಂ;

ಪಞ್ಚ ಪಞ್ಚಹಿ ಹನ್ತ್ವಾನ, ಅನೀಘೋ ಯಾತಿ ಬ್ರಾಹ್ಮಣೋ.

೭೪೬. ‘‘ಸೋ ಅತ್ಥವಾ ಸೋ ಧಮ್ಮಟ್ಠೋ, ಕತ್ವಾ ವಾಕ್ಯಾನುಸಾಸನಿಂ;

ಸಬ್ಬೇನ ಸಬ್ಬಂ ಬುದ್ಧಸ್ಸ, ಸೋ ನರೋ ಸುಖಮೇಧತೀ’’ತಿ.

…ಪಾರಾಪರಿಯೋ ಥೇರೋ….

೩. ತೇಲಕಾನಿತ್ಥೇರಗಾಥಾ

೭೪೭. ‘‘ಚಿರರತ್ತಂ ವತಾತಾಪೀ, ಧಮ್ಮಂ ಅನುವಿಚಿನ್ತಯಂ;

ಸಮಂ ಚಿತ್ತಸ್ಸ ನಾಲತ್ಥಂ, ಪುಚ್ಛಂ ಸಮಣಬ್ರಾಹ್ಮಣೇ.

೭೪೮. ‘‘‘ಕೋ ಸೋ ಪಾರಙ್ಗತೋ ಲೋಕೇ, ಕೋ ಪತ್ತೋ ಅಮತೋಗಧಂ;

ಕಸ್ಸ ಧಮ್ಮಂ ಪಟಿಚ್ಛಾಮಿ, ಪರಮತ್ಥವಿಜಾನನಂ’.

೭೪೯. ‘‘ಅನ್ತೋವಙ್ಕಗತೋ ಆಸಿ, ಮಚ್ಛೋವ ಘಸಮಾಮಿಸಂ;

ಬದ್ಧೋ ಮಹಿನ್ದಪಾಸೇನ, ವೇಪಚಿತ್ಯಸುರೋ ಯಥಾ.

೭೫೦. ‘‘ಅಞ್ಛಾಮಿ ನಂ ನ ಮುಞ್ಚಾಮಿ, ಅಸ್ಮಾ ಸೋಕಪರಿದ್ದವಾ;

ಕೋ ಮೇ ಬನ್ಧಂ ಮುಞ್ಚಂ ಲೋಕೇ, ಸಮ್ಬೋಧಿಂ ವೇದಯಿಸ್ಸತಿ.

೭೫೧. ‘‘ಸಮಣಂ ಬ್ರಾಹ್ಮಣಂ ವಾ ಕಂ, ಆದಿಸನ್ತಂ ಪಭಙ್ಗುನಂ.

ಕಸ್ಸ ಧಮ್ಮಂ ಪಟಿಚ್ಛಾಮಿ, ಜರಾಮಚ್ಚುಪವಾಹನಂ.

೭೫೨. ‘‘ವಿಚಿಕಿಚ್ಛಾಕಙ್ಖಾಗನ್ಥಿತಂ, ಸಾರಮ್ಭಬಲಸಞ್ಞುತಂ;

ಕೋಧಪ್ಪತ್ತಮನತ್ಥದ್ಧಂ, ಅಭಿಜಪ್ಪಪ್ಪದಾರಣಂ.

೭೫೩. ‘‘ತಣ್ಹಾಧನುಸಮುಟ್ಠಾನಂ, ದ್ವೇ ಚ ಪನ್ನರಸಾಯುತಂ [ದ್ವೇಧಾಪನ್ನರಸಾಯುತಂ (?)];

ಪಸ್ಸ ಓರಸಿಕಂ ಬಾಳ್ಹಂ, ಭೇತ್ವಾನ ಯದಿ [ಯದ (ಸೀ. ಅಟ್ಠ.) ಹದಿ (?) ‘‘ಹದಯೇ’’ತಿ ತಂಸಂವಣ್ಣನಾ] ತಿಟ್ಠತಿ.

೭೫೪. ‘‘ಅನುದಿಟ್ಠೀನಂ ಅಪ್ಪಹಾನಂ, ಸಙ್ಕಪ್ಪಪರತೇಜಿತಂ;

ತೇನ ವಿದ್ಧೋ ಪವೇಧಾಮಿ, ಪತ್ತಂವ ಮಾಲುತೇರಿತಂ.

೭೫೫. ‘‘ಅಜ್ಝತ್ತಂ ಮೇ ಸಮುಟ್ಠಾಯ, ಖಿಪ್ಪಂ ಪಚ್ಚತಿ ಮಾಮಕಂ;

ಛಫಸ್ಸಾಯತನೀ ಕಾಯೋ, ಯತ್ಥ ಸರತಿ ಸಬ್ಬದಾ.

೭೫೬. ‘‘ತಂ ನ ಪಸ್ಸಾಮಿ ತೇಕಿಚ್ಛಂ, ಯೋ ಮೇತಂ ಸಲ್ಲಮುದ್ಧರೇ;

ನಾನಾರಜ್ಜೇನ ಸತ್ಥೇನ [ನಾರಗ್ಗೇನ ನ ಸತ್ಥೇನ (?)], ನಾಞ್ಞೇನ ವಿಚಿಕಿಚ್ಛಿತಂ.

೭೫೭. ‘‘ಕೋ ಮೇ ಅಸತ್ಥೋ ಅವಣೋ, ಸಲ್ಲಮಬ್ಭನ್ತರಪಸ್ಸಯಂ;

ಅಹಿಂಸಂ ಸಬ್ಬಗತ್ತಾನಿ, ಸಲ್ಲಂ ಮೇ ಉದ್ಧರಿಸ್ಸತಿ.

೭೫೮. ‘‘ಧಮ್ಮಪ್ಪತಿ ಹಿ ಸೋ ಸೇಟ್ಠೋ, ವಿಸದೋಸಪ್ಪವಾಹಕೋ;

ಗಮ್ಭೀರೇ ಪತಿತಸ್ಸ ಮೇ, ಥಲಂ ಪಾಣಿಞ್ಚ ದಸ್ಸಯೇ.

೭೫೯. ‘‘ರಹದೇಹಮಸ್ಮಿ ಓಗಾಳ್ಹೋ, ಅಹಾರಿಯರಜಮತ್ತಿಕೇ;

ಮಾಯಾಉಸೂಯಸಾರಮ್ಭ, ಥಿನಮಿದ್ಧಮಪತ್ಥಟೇ.

೭೬೦. ‘‘ಉದ್ಧಚ್ಚಮೇಘಥನಿತಂ, ಸಂಯೋಜನವಲಾಹಕಂ;

ವಾಹಾ ವಹನ್ತಿ ಕುದ್ದಿಟ್ಠಿಂ [ದುದ್ದಿಟ್ಠಿಂ (ಸೀ. ಧ. ಪ. ೩೩೯)], ಸಙ್ಕಪ್ಪಾ ರಾಗನಿಸ್ಸಿತಾ.

೭೬೧. ‘‘ಸವನ್ತಿ ಸಬ್ಬಧಿ ಸೋತಾ, ಲತಾ ಉಬ್ಭಿಜ್ಜ ತಿಟ್ಠತಿ;

ತೇ ಸೋತೇ ಕೋ ನಿವಾರೇಯ್ಯ, ತಂ ಲತಂ ಕೋ ಹಿ ಛೇಚ್ಛತಿ.

೭೬೨. ‘‘ವೇಲಂ ಕರೋಥ ಭದ್ದನ್ತೇ, ಸೋತಾನಂ ಸನ್ನಿವಾರಣಂ;

ಮಾ ತೇ ಮನೋಮಯೋ ಸೋತೋ, ರುಕ್ಖಂವ ಸಹಸಾ ಲುವೇ.

೭೬೩. ‘‘ಏವಂ ಮೇ ಭಯಜಾತಸ್ಸ, ಅಪಾರಾ ಪಾರಮೇಸತೋ;

ತಾಣೋ ಪಞ್ಞಾವುಧೋ ಸತ್ಥಾ, ಇಸಿಸಙ್ಘನಿಸೇವಿತೋ.

೭೬೪. ‘‘ಸೋಪಾಣಂ ಸುಗತಂ ಸುದ್ಧಂ, ಧಮ್ಮಸಾರಮಯಂ ದಳ್ಹಂ;

ಪಾದಾಸಿ ವುಯ್ಹಮಾನಸ್ಸ, ‘ಮಾ ಭಾಯೀ’ತಿ ಚ ಮಬ್ರವಿ.

೭೬೫. ‘‘ಸತಿಪಟ್ಠಾನಪಾಸಾದಂ, ಆರುಯ್ಹ ಪಚ್ಚವೇಕ್ಖಿಸಂ;

ಯಂ ತಂ ಪುಬ್ಬೇ ಅಮಞ್ಞಿಸ್ಸಂ, ಸಕ್ಕಾಯಾಭಿರತಂ ಪಜಂ.

೭೬೬. ‘‘ಯದಾ ಚ ಮಗ್ಗಮದ್ದಕ್ಖಿಂ, ನಾವಾಯ ಅಭಿರೂಹನಂ;

ಅನಧಿಟ್ಠಾಯ ಅತ್ತಾನಂ, ತಿತ್ಥಮದ್ದಕ್ಖಿಮುತ್ತಮಂ.

೭೬೭. ‘‘ಸಲ್ಲಂ ಅತ್ತಸಮುಟ್ಠಾನಂ, ಭವನೇತ್ತಿಪ್ಪಭಾವಿತಂ;

ಏತೇಸಂ ಅಪ್ಪವತ್ತಾಯ [ಅಪ್ಪವತ್ತಿಯಾ (?)], ದೇಸೇಸಿ ಮಗ್ಗಮುತ್ತಮಂ.

೭೬೮. ‘‘ದೀಘರತ್ತಾನುಸಯಿತಂ, ಚಿರರತ್ತಮಧಿಟ್ಠಿತಂ;

ಬುದ್ಧೋ ಮೇಪಾನುದೀ ಗನ್ಥಂ, ವಿಸದೋಸಪ್ಪವಾಹನೋ’’ತಿ.

…ತೇಲಕಾನಿ ಥೇರೋ….

೪. ರಟ್ಠಪಾಲತ್ಥೇರಗಾಥಾ

೭೬೯. [ಮ. ನಿ. ೨.೩೦೨] ‘‘ಪಸ್ಸ ಚಿತ್ತಕತಂ ಬಿಮ್ಬಂ, ಅರುಕಾಯಂ ಸಮುಸ್ಸಿತಂ;

ಆತುರಂ ಬಹುಸಙ್ಕಪ್ಪಂ, ಯಸ್ಸ ನತ್ಥಿ ಧುವಂ ಠಿತಿ.

೭೭೦. ‘‘ಪಸ್ಸ ಚಿತ್ತಕತಂ ರೂಪಂ, ಮಣಿನಾ ಕುಣ್ಡಲೇನ ಚ;

ಅಟ್ಠಿಂ ತಚೇನ ಓನದ್ಧಂ, ಸಹ ವತ್ಥೇಹಿ ಸೋಭತಿ.

೭೭೧. ‘‘ಅಲತ್ತಕಕತಾ ಪಾದಾ, ಮುಖಂ ಚುಣ್ಣಕಮಕ್ಖಿತಂ;

ಅಲಂ ಬಾಲಸ್ಸ ಮೋಹಾಯ, ನೋ ಚ ಪಾರಗವೇಸಿನೋ.

೭೭೨. ‘‘ಅಟ್ಠಪದಕತಾ ಕೇಸಾ, ನೇತ್ತಾ ಅಞ್ಜನಮಕ್ಖಿತಾ;

ಅಲಂ ಬಾಲಸ್ಸ ಮೋಹಾಯ, ನೋ ಚ ಪಾರಗವೇಸಿನೋ.

೭೭೩. ‘‘ಅಞ್ಜನೀವ ನವಾ ಚಿತ್ತಾ, ಪೂತಿಕಾಯೋ ಅಲಙ್ಕತೋ;

ಅಲಂ ಬಾಲಸ್ಸ ಮೋಹಾಯ, ನೋ ಚ ಪಾರಗವೇಸಿನೋ.

೭೭೪. ‘‘ಓದಹಿ ಮಿಗವೋ ಪಾಸಂ, ನಾಸದಾ ವಾಗುರಂ ಮಿಗೋ;

ಭುತ್ವಾ ನಿವಾಪಂ ಗಚ್ಛಾಮ, ಕನ್ದನ್ತೇ ಮಿಗಬನ್ಧಕೇ.

೭೭೫. ‘‘ಛಿನ್ನೋ ಪಾಸೋ ಮಿಗವಸ್ಸ, ನಾಸದಾ ವಾಗುರಂ ಮಿಗೋ;

ಭುತ್ವಾ ನಿವಾಪಂ ಗಚ್ಛಾಮ, ಸೋಚನ್ತೇ ಮಿಗಲುದ್ದಕೇ.