೧೭. ತಿಂಸನಿಪಾತೋ

೧. ಫುಸ್ಸತ್ಥೇರಗಾಥಾ

೯೪೯. ಪಾಸಾದಿಕೇ ಬಹೂ ದಿಸ್ವಾ, ಭಾವಿತತ್ತೇ ಸುಸಂವುತೇ;

ಇಸಿ ಪಣ್ಡರಸಗೋತ್ತೋ [ಪಣ್ಡರಸ್ಸ ಗೋತ್ತೋ (ಸೀ.)], ಅಪುಚ್ಛಿ ಫುಸ್ಸಸವ್ಹಯಂ.

೯೫೦. ‘‘ಕಿಂಛನ್ದಾ ಕಿಮಧಿಪ್ಪಾಯಾ, ಕಿಮಾಕಪ್ಪಾ ಭವಿಸ್ಸರೇ;

ಅನಾಗತಮ್ಹಿ ಕಾಲಮ್ಹಿ, ತಂ ಮೇ ಅಕ್ಖಾಹಿ ಪುಚ್ಛಿತೋ’’.

೯೫೧. ‘‘ಸುಣೋಹಿ ವಚನಂ ಮಯ್ಹಂ, ಇಸಿಪಣ್ಡರಸವ್ಹಯ;

ಸಕ್ಕಚ್ಚಂ ಉಪಧಾರೇಹಿ, ಆಚಿಕ್ಖಿಸ್ಸಾಮ್ಯನಾಗತಂ.

೯೫೨. ‘‘ಕೋಧನಾ ಉಪನಾಹೀ ಚ, ಮಕ್ಖೀ ಥಮ್ಭೀ ಸಠಾ ಬಹೂ;

ಉಸ್ಸುಕೀ ನಾನಾವಾದಾ ಚ, ಭವಿಸ್ಸನ್ತಿ ಅನಾಗತೇ.

೯೫೩. ‘‘ಅಞ್ಞಾತಮಾನಿನೋ ಧಮ್ಮೇ, ಗಮ್ಭೀರೇ ತೀರಗೋಚರಾ;

ಲಹುಕಾ ಅಗರು ಧಮ್ಮೇ, ಅಞ್ಞಮಞ್ಞಮಗಾರವಾ.

೯೫೪. ‘‘ಬಹೂ ಆದೀನವಾ ಲೋಕೇ, ಉಪ್ಪಜ್ಜಿಸ್ಸನ್ತ್ಯನಾಗತೇ;

ಸುದೇಸಿತಂ ಇಮಂ ಧಮ್ಮಂ, ಕಿಲೇಸೇಸ್ಸನ್ತಿ [ಕಿಲೇಸಿಸ್ಸನ್ತಿ (ಸೀ.), ಕಿಲಿಸಿಸ್ಸನ್ತಿ (ಸ್ಯಾ. ಕ.)] ದುಮ್ಮತೀ.

೯೫೫. ‘‘ಗುಣಹೀನಾಪಿ ಸಙ್ಘಮ್ಹಿ, ವೋಹರನ್ತಾ ವಿಸಾರದಾ;

ಬಲವನ್ತೋ ಭವಿಸ್ಸನ್ತಿ, ಮುಖರಾ ಅಸ್ಸುತಾವಿನೋ.

೯೫೬. ‘‘ಗುಣವನ್ತೋಪಿ ಸಙ್ಘಮ್ಹಿ, ವೋಹರನ್ತಾ ಯಥಾತ್ಥತೋ;

ದುಬ್ಬಲಾ ತೇ ಭವಿಸ್ಸನ್ತಿ, ಹಿರೀಮನಾ ಅನತ್ಥಿಕಾ.

೯೫೭. ‘‘ರಜತಂ ಜಾತರೂಪಞ್ಚ, ಖೇತ್ತಂ ವತ್ಥುಮಜೇಳಕಂ;

ದಾಸಿದಾಸಞ್ಚ ದುಮ್ಮೇಧಾ, ಸಾದಿಯಿಸ್ಸನ್ತ್ಯನಾಗತೇ.

೯೫೮. ‘‘ಉಜ್ಝಾನಸಞ್ಞಿನೋ ಬಾಲಾ, ಸೀಲೇಸು ಅಸಮಾಹಿತಾ;

ಉನ್ನಳಾ ವಿಚರಿಸ್ಸನ್ತಿ, ಕಲಹಾಭಿರತಾ ಮಗಾ.

೯೫೯. ‘‘ಉದ್ಧತಾ ಚ ಭವಿಸ್ಸನ್ತಿ, ನೀಲಚೀವರಪಾರುತಾ;

ಕುಹಾ ಥದ್ಧಾ ಲಪಾ ಸಿಙ್ಗೀ, ಚರಿಸ್ಸನ್ತ್ಯರಿಯಾ ವಿಯ.

೯೬೦. ‘‘ತೇಲಸಣ್ಠೇಹಿ ಕೇಸೇಹಿ, ಚಪಲಾ ಅಞ್ಜನಕ್ಖಿಕಾ;

ರಥಿಯಾಯ ಗಮಿಸ್ಸನ್ತಿ, ದನ್ತವಣ್ಣಿಕಪಾರುತಾ.

೯೬೧. ‘‘ಅಜೇಗುಚ್ಛಂ ವಿಮುತ್ತೇಹಿ, ಸುರತ್ತಂ ಅರಹದ್ಧಜಂ;

ಜಿಗುಚ್ಛಿಸ್ಸನ್ತಿ ಕಾಸಾವಂ, ಓದಾತೇಸು ಸಮುಚ್ಛಿತಾ [ಓದಾತೇ ಸುಸಮುಚ್ಛಿತಾ (ಸೀ.)].

೯೬೨. ‘‘ಲಾಭಕಾಮಾ ಭವಿಸ್ಸನ್ತಿ, ಕುಸೀತಾ ಹೀನವೀರಿಯಾ;

ಕಿಚ್ಛನ್ತಾ ವನಪತ್ಥಾನಿ, ಗಾಮನ್ತೇಸು ವಸಿಸ್ಸರೇ.

೯೬೩. ‘‘ಯೇ ಯೇ ಲಾಭಂ ಲಭಿಸ್ಸನ್ತಿ, ಮಿಚ್ಛಾಜೀವರತಾ ಸದಾ;

ತೇ ತೇವ ಅನುಸಿಕ್ಖನ್ತಾ, ಭಜಿಸ್ಸನ್ತಿ ಅಸಂಯತಾ.

೯೬೪. ‘‘ಯೇ ಯೇ ಅಲಾಭಿನೋ ಲಾಭಂ, ನ ತೇ ಪುಜ್ಜಾ ಭವಿಸ್ಸರೇ;

ಸುಪೇಸಲೇಪಿ ತೇ ಧೀರೇ, ಸೇವಿಸ್ಸನ್ತಿ ನ ತೇ ತದಾ.

೯೬೫. ‘‘ಮಿಲಕ್ಖುರಜನಂ ರತ್ತಂ [ಪಿಲಕ್ಖರಜನಂ ರತ್ತಂ (?)], ಗರಹನ್ತಾ ಸಕಂ ಧಜಂ;

ತಿತ್ಥಿಯಾನಂ ಧಜಂ ಕೇಚಿ, ಧಾರಿಸ್ಸನ್ತ್ಯವದಾತಕಂ.

೯೬೬. ‘‘ಅಗಾರವೋ ಚ ಕಾಸಾವೇ, ತದಾ ತೇಸಂ ಭವಿಸ್ಸತಿ;

ಪಟಿಸಙ್ಖಾ ಚ ಕಾಸಾವೇ, ಭಿಕ್ಖೂನಂ ನ ಭವಿಸ್ಸತಿ.

೯೬೭. ‘‘ಅಭಿಭೂತಸ್ಸ ದುಕ್ಖೇನ, ಸಲ್ಲವಿದ್ಧಸ್ಸ ರುಪ್ಪತೋ;

ಪಟಿಸಙ್ಖಾ ಮಹಾಘೋರಾ, ನಾಗಸ್ಸಾಸಿ ಅಚಿನ್ತಿಯಾ.

೯೬೮. ‘‘ಛದ್ದನ್ತೋ ಹಿ ತದಾ ದಿಸ್ವಾ, ಸುರತ್ತಂ ಅರಹದ್ಧಜಂ;

ತಾವದೇವ ಭಣೀ ಗಾಥಾ, ಗಜೋ ಅತ್ಥೋಪಸಂಹಿತಾ’’.

೯೬೯. [ಧ. ಪ. ೯; ಜಾ. ೧.೨.೧೪೧; ೧.೧೬.೧೨೨] ‘‘ಅನಿಕ್ಕಸಾವೋ ಕಾಸಾವಂ, ಯೋ ವತ್ಥಂ ಪರಿಧಸ್ಸತಿ [ಪರಿದಹಿಸ್ಸತಿ (ಸೀ. ಸ್ಯಾ.)];

ಅಪೇತೋ ದಮಸಚ್ಚೇನ, ನ ಸೋ ಕಾಸಾವಮರಹತಿ.

೯೭೦. ‘‘ಯೋ ಚ ವನ್ತಕಾಸಾವಸ್ಸ, ಸೀಲೇಸು ಸುಸಮಾಹಿತೋ;

ಉಪೇತೋ ದಮಸಚ್ಚೇನ, ಸ ವೇ ಕಾಸಾವಮರಹತಿ.

೯೭೧. ‘‘ವಿಪನ್ನಸೀಲೋ ದುಮ್ಮೇಧೋ, ಪಾಕಟೋ ಕಾಮಕಾರಿಯೋ;

ವಿಬ್ಭನ್ತಚಿತ್ತೋ ನಿಸ್ಸುಕ್ಕೋ, ನ ಸೋ ಕಾಸಾವಮರಹತಿ.

೯೭೨. ‘‘ಯೋ ಚ ಸೀಲೇನ ಸಮ್ಪನ್ನೋ, ವೀತರಾಗೋ ಸಮಾಹಿತೋ;

ಓದಾತಮನಸಙ್ಕಪ್ಪೋ, ಸ ವೇ ಕಾಸಾವಮರಹತಿ.

೯೭೩. ‘‘ಉದ್ಧತೋ ಉನ್ನಳೋ ಬಾಲೋ, ಸೀಲಂ ಯಸ್ಸ ನ ವಿಜ್ಜತಿ;

ಓದಾತಕಂ ಅರಹತಿ, ಕಾಸಾವಂ ಕಿಂ ಕರಿಸ್ಸತಿ.

೯೭೪. ‘‘ಭಿಕ್ಖೂ ಚ ಭಿಕ್ಖುನಿಯೋ ಚ, ದುಟ್ಠಚಿತ್ತಾ ಅನಾದರಾ;

ತಾದೀನಂ ಮೇತ್ತಚಿತ್ತಾನಂ, ನಿಗ್ಗಣ್ಹಿಸ್ಸನ್ತ್ಯನಾಗತೇ.

೯೭೫. ‘‘ಸಿಕ್ಖಾಪೇನ್ತಾಪಿ ಥೇರೇಹಿ, ಬಾಲಾ ಚೀವರಧಾರಣಂ;

ನ ಸುಣಿಸ್ಸನ್ತಿ ದುಮ್ಮೇಧಾ, ಪಾಕಟಾ ಕಾಮಕಾರಿಯಾ.

೯೭೬. ‘‘ತೇ ತಥಾ ಸಿಕ್ಖಿತಾ ಬಾಲಾ, ಅಞ್ಞಮಞ್ಞಂ ಅಗಾರವಾ;

ನಾದಿಯಿಸ್ಸನ್ತುಪಜ್ಝಾಯೇ, ಖಳುಙ್ಕೋ ವಿಯ ಸಾರಥಿಂ.

೯೭೭. ‘‘ಏವಂ ಅನಾಗತದ್ಧಾನಂ, ಪಟಿಪತ್ತಿ ಭವಿಸ್ಸತಿ;

ಭಿಕ್ಖೂನಂ ಭಿಕ್ಖುನೀನಞ್ಚ, ಪತ್ತೇ ಕಾಲಮ್ಹಿ ಪಚ್ಛಿಮೇ.

೯೭೮. ‘‘ಪುರಾ ಆಗಚ್ಛತೇ ಏತಂ, ಅನಾಗತಂ ಮಹಬ್ಭಯಂ;

ಸುಬ್ಬಚಾ ಹೋಥ ಸಖಿಲಾ, ಅಞ್ಞಮಞ್ಞಂ ಸಗಾರವಾ.

೯೭೯. ‘‘ಮೇತ್ತಚಿತ್ತಾ ಕಾರುಣಿಕಾ, ಹೋಥ ಸೀಲೇಸು ಸಂವುತಾ;

ಆರದ್ಧವೀರಿಯಾ ಪಹಿತತ್ತಾ, ನಿಚ್ಚಂ ದಳ್ಹಪರಕ್ಕಮಾ.

೯೮೦. ‘‘ಪಮಾದಂ ಭಯತೋ ದಿಸ್ವಾ, ಅಪ್ಪಮಾದಞ್ಚ ಖೇಮತೋ;

ಭಾವೇಥಟ್ಠಙ್ಗಿಕಂ ಮಗ್ಗಂ, ಫುಸನ್ತಾ ಅಮತಂ ಪದ’’ನ್ತಿ.

… ಫುಸ್ಸೋ ಥೇರೋ….

೨. ಸಾರಿಪುತ್ತತ್ಥೇರಗಾಥಾ

೯೮೧. ‘‘ಯಥಾಚಾರೀ ಯಥಾಸತೋ ಸತೀಮಾ, ಯತಸಙ್ಕಪ್ಪಜ್ಝಾಯಿ ಅಪ್ಪಮತ್ತೋ;

ಅಜ್ಝತ್ತರತೋ ಸಮಾಹಿತತ್ತೋ, ಏಕೋ ಸನ್ತುಸಿತೋ ತಮಾಹು ಭಿಕ್ಖುಂ.

೯೮೨. ‘‘ಅಲ್ಲಂ ಸುಕ್ಖಂ ವಾ ಭುಞ್ಜನ್ತೋ, ನ ಬಾಳ್ಹಂ ಸುಹಿತೋ ಸಿಯಾ;

ಊನೂದರೋ ಮಿತಾಹಾರೋ, ಸತೋ ಭಿಕ್ಖು ಪರಿಬ್ಬಜೇ.

೯೮೩. ‘‘ಚತ್ತಾರೋ ಪಞ್ಚ ಆಲೋಪೇ, ಅಭುತ್ವಾ ಉದಕಂ ಪಿವೇ;

ಅಲಂ ಫಾಸುವಿಹಾರಾಯ, ಪಹಿತತ್ತಸ್ಸ ಭಿಕ್ಖುನೋ.

೯೮೪. ‘‘ಕಪ್ಪಿಯಂ ತಂ ಚೇ ಛಾದೇತಿ, ಚೀವರಂ ಇದಮತ್ಥಿಕಂ [ಇದಮತ್ಥಿತಂ (ಸೀ.)];

ಅಲಂ ಫಾಸುವಿಹಾರಾಯ, ಪಹಿತತ್ತಸ್ಸ ಭಿಕ್ಖುನೋ.

೯೮೫. ‘‘ಪಲ್ಲಙ್ಕೇನ ನಿಸಿನ್ನಸ್ಸ, ಜಣ್ಣುಕೇ ನಾಭಿವಸ್ಸತಿ;

ಅಲಂ ಫಾಸುವಿಹಾರಾಯ, ಪಹಿತತ್ತಸ್ಸ ಭಿಕ್ಖುನೋ.

೯೮೬. [ಸಂ. ನಿ. ೪.೨೫೩; ಇತಿವು. ೫೩] ‘‘ಯೋ ಸುಖಂ ದುಕ್ಖತೋ ಅದ್ದ, ದುಕ್ಖಮದ್ದಕ್ಖಿ ಸಲ್ಲತೋ;

ಉಭಯನ್ತರೇನ [ಉಭಯಮನ್ತರೇ (ಸೀ.)] ನಾಹೋಸಿ, ಕೇನ ಲೋಕಸ್ಮಿ ಕಿಂ ಸಿಯಾ.

೯೮೭. ‘‘ಮಾ ಮೇ ಕದಾಚಿ ಪಾಪಿಚ್ಛೋ, ಕುಸೀತೋ ಹೀನವೀರಿಯೋ;

ಅಪ್ಪಸ್ಸುತೋ ಅನಾದರೋ, ಕೇನ ಲೋಕಸ್ಮಿ ಕಿಂ ಸಿಯಾ.

೯೮೮. ‘‘ಬಹುಸ್ಸುತೋ ಚ ಮೇಧಾವೀ, ಸೀಲೇಸು ಸುಸಮಾಹಿತೋ;

ಚೇತೋಸಮಥಮನುಯುತ್ತೋ, ಅಪಿ ಮುದ್ಧನಿ ತಿಟ್ಠತು.

೯೮೯. ‘‘ಯೋ ಪಪಞ್ಚಮನುಯುತ್ತೋ, ಪಪಞ್ಚಾಭಿರತೋ ಮಗೋ;

ವಿರಾಧಯೀ ಸೋ ನಿಬ್ಬಾನಂ, ಯೋಗಕ್ಖೇಮಂ ಅನುತ್ತರಂ.

೯೯೦. ‘‘ಯೋ ಚ ಪಪಞ್ಚಂ ಹಿತ್ವಾನ, ನಿಪ್ಪಪಞ್ಚಪಥೇ ರತೋ;

ಆರಾಧಯೀ ಸೋ ನಿಬ್ಬಾನಂ, ಯೋಗಕ್ಖೇಮಂ ಅನುತ್ತರಂ.

೯೯೧. [ಧ. ಪ. ೯೮] ‘‘ಗಾಮೇ ವಾ ಯದಿ ವಾರಞ್ಞೇ, ನಿನ್ನೇ ವಾ ಯದಿ ವಾ ಥಲೇ;

ಯತ್ಥ ಅರಹನ್ತೋ ವಿಹರನ್ತಿ, ತಂ ಭೂಮಿರಾಮಣೇಯ್ಯಕಂ.

೯೯೨. ‘‘ರಮಣೀಯಾನಿ ಅರಞ್ಞಾನಿ, ಯತ್ಥ ನ ರಮತೀ ಜನೋ;

ವೀತರಾಗಾ ರಮಿಸ್ಸನ್ತಿ, ನ ತೇ ಕಾಮಗವೇಸಿನೋ.

೯೯೩. [ಧ. ಪ. ೭೬] ‘‘ನಿಧೀನಂವ ಪವತ್ತಾರಂ, ಯಂ ಪಸ್ಸೇ ವಜ್ಜದಸ್ಸಿನಂ;

ನಿಗ್ಗಯ್ಹವಾದಿಂ ಮೇಧಾವಿಂ, ತಾದಿಸಂ ಪಣ್ಡಿತಂ ಭಜೇ;

ತಾದಿಸಂ ಭಜಮಾನಸ್ಸ, ಸೇಯ್ಯೋ ಹೋತಿ ನ ಪಾಪಿಯೋ.

೯೯೪. [ಧ. ಪ. ೭೭] ‘‘ಓವದೇಯ್ಯಾನುಸಾಸೇಯ್ಯ, ಅಸಬ್ಭಾ ಚ ನಿವಾರಯೇ;

ಸತಞ್ಹಿ ಸೋ ಪಿಯೋ ಹೋತಿ, ಅಸತಂ ಹೋತಿ ಅಪ್ಪಿಯೋ.

೯೯೫. ‘‘ಅಞ್ಞಸ್ಸ ಭಗವಾ ಬುದ್ಧೋ, ಧಮ್ಮಂ ದೇಸೇಸಿ ಚಕ್ಖುಮಾ;

ಧಮ್ಮೇ ದೇಸಿಯಮಾನಮ್ಹಿ, ಸೋತಮೋಧೇಸಿಮತ್ಥಿಕೋ;

ತಂ ಮೇ ಅಮೋಘಂ ಸವನಂ, ವಿಮುತ್ತೋಮ್ಹಿ ಅನಾಸವೋ.

೯೯೬. ‘‘ನೇವ ಪುಬ್ಬೇನಿವಾಸಾಯ, ನಪಿ ದಿಬ್ಬಸ್ಸ ಚಕ್ಖುನೋ;

ಚೇತೋಪರಿಯಾಯ ಇದ್ಧಿಯಾ, ಚುತಿಯಾ ಉಪಪತ್ತಿಯಾ;

ಸೋತಧಾತುವಿಸುದ್ಧಿಯಾ, ಪಣಿಧೀ ಮೇ ನ ವಿಜ್ಜತಿ [ಕಥಾ. ೩೭೮].

೯೯೭. ‘‘ರುಕ್ಖಮೂಲಂವ ನಿಸ್ಸಾಯ, ಮುಣ್ಡೋ ಸಙ್ಘಾಟಿಪಾರುತೋ;

ಪಞ್ಞಾಯ ಉತ್ತಮೋ ಥೇರೋ, ಉಪತಿಸ್ಸೋವ [ಉಪತಿಸ್ಸೋ ಚ (ಸೀ. ಕ.)] ಝಾಯತಿ.

೯೯೮. ‘‘ಅವಿತಕ್ಕಂ ಸಮಾಪನ್ನೋ, ಸಮ್ಮಾಸಮ್ಬುದ್ಧಸಾವಕೋ;

ಅರಿಯೇನ ತುಣ್ಹೀಭಾವೇನ, ಉಪೇತೋ ಹೋತಿ ತಾವದೇ.

೯೯೯. [ಉದಾ. ೨೪] ‘‘ಯಥಾಪಿ ಪಬ್ಬತೋ ಸೇಲೋ, ಅಚಲೋ ಸುಪ್ಪತಿಟ್ಠಿತೋ;

ಏವಂ ಮೋಹಕ್ಖಯಾ ಭಿಕ್ಖು, ಪಬ್ಬತೋವ ನ ವೇಧತಿ.

೧೦೦೦. ‘‘ಅನಙ್ಗಣಸ್ಸ ಪೋಸಸ್ಸ, ನಿಚ್ಚಂ ಸುಚಿಗವೇಸಿನೋ;

ವಾಲಗ್ಗಮತ್ತಂ ಪಾಪಸ್ಸ, ಅಬ್ಭಮತ್ತಂವ ಖಾಯತಿ.

೧೦೦೧. ‘‘ನಾಭಿನನ್ದಾಮಿ ಮರಣಂ, ನಾಭಿನನ್ದಾಮಿ ಜೀವಿತಂ;

ನಿಕ್ಖಿಪಿಸ್ಸಂ ಇಮಂ ಕಾಯಂ, ಸಮ್ಪಜಾನೋ ಪತಿಸ್ಸತೋ.

೧೦೦೨. ‘‘ನಾಭಿನನ್ದಾಮಿ ಮರಣಂ, ನಾಭಿನನ್ದಾಮಿ ಜೀವಿತಂ;

ಕಾಲಞ್ಚ ಪಟಿಕಙ್ಖಾಮಿ, ನಿಬ್ಬಿಸಂ ಭತಕೋ ಯಥಾ.

೧೦೦೩. ‘‘ಉಭಯೇನ ಮಿದಂ ಮರಣಮೇವ, ನಾಮರಣಂ ಪಚ್ಛಾ ವಾ ಪುರೇ ವಾ;

ಪಟಿಪಜ್ಜಥ ಮಾ ವಿನಸ್ಸಥ, ಖಣೋ ವೋ ಮಾ ಉಪಚ್ಚಗಾ.

೧೦೦೪. ‘‘ನಗರಂ ಯಥಾ ಪಚ್ಚನ್ತಂ, ಗುತ್ತಂ ಸನ್ತರಬಾಹಿರಂ;

ಏವಂ ಗೋಪೇಥ ಅತ್ತಾನಂ, ಖಣೋ ವೋ ಮಾ ಉಪಚ್ಚಗಾ;

ಖಣಾತೀತಾ ಹಿ ಸೋಚನ್ತಿ, ನಿರಯಮ್ಹಿ ಸಮಪ್ಪಿತಾ.

೧೦೦೫. ‘‘ಉಪಸನ್ತೋ ಉಪರತೋ, ಮನ್ತಭಾಣೀ [ಮತ್ತಭಾಣೀ (ಸೀ.)] ಅನುದ್ಧತೋ;

ಧುನಾತಿ ಪಾಪಕೇ ಧಮ್ಮೇ, ದುಮಪತ್ತಂವ ಮಾಲುತೋ.

೧೦೦೬. ‘‘ಉಪಸನ್ತೋ ಉಪರತೋ, ಮನ್ತಭಾಣೀ ಅನುದ್ಧತೋ;

ಅಪ್ಪಾಸಿ [ಅಬ್ಬಹಿ (ಸ್ಯಾ.), ಅಭಾಸಿ (?)] ಪಾಪಕೇ ಧಮ್ಮೇ, ದುಮಪತ್ತಂವ ಮಾಲುತೋ.

೧೦೦೭. ‘‘ಉಪಸನ್ತೋ ಅನಾಯಾಸೋ, ವಿಪ್ಪಸನ್ನೋ ಅನಾವಿಲೋ;

ಕಲ್ಯಾಣಸೀಲೋ ಮೇಧಾವೀ, ದುಕ್ಖಸ್ಸನ್ತಕರೋ ಸಿಯಾ.

೧೦೦೮. ‘‘ನ ವಿಸ್ಸಸೇ ಏಕತಿಯೇಸು ಏವಂ, ಅಗಾರಿಸು ಪಬ್ಬಜಿತೇಸು ಚಾಪಿ;

ಸಾಧೂಪಿ ಹುತ್ವಾ ನ ಅಸಾಧು ಹೋನ್ತಿ, ಅಸಾಧು ಹುತ್ವಾ ಪುನ ಸಾಧು ಹೋನ್ತಿ.

೧೦೦೯. ‘‘ಕಾಮಚ್ಛನ್ದೋ ಚ ಬ್ಯಾಪಾದೋ, ಥಿನಮಿದ್ಧಞ್ಚ ಭಿಕ್ಖುನೋ;

ಉದ್ಧಚ್ಚಂ ವಿಚಿಕಿಚ್ಛಾ ಚ, ಪಞ್ಚೇತೇ ಚಿತ್ತಕೇಲಿಸಾ.

೧೦೧೦. ‘‘ಯಸ್ಸ ಸಕ್ಕರಿಯಮಾನಸ್ಸ, ಅಸಕ್ಕಾರೇನ ಚೂಭಯಂ;

ಸಮಾಧಿ ನ ವಿಕಮ್ಪತಿ, ಅಪ್ಪಮಾದವಿಹಾರಿನೋ.

೧೦೧೧. ‘‘ತಂ ಝಾಯಿನಂ ಸಾತತಿಕಂ, ಸುಖುಮದಿಟ್ಠಿವಿಪಸ್ಸಕಂ;

ಉಪಾದಾನಕ್ಖಯಾರಾಮಂ, ಆಹು ಸಪ್ಪುರಿಸೋ ಇತಿ.

೧೦೧೨. ‘‘ಮಹಾಸಮುದ್ದೋ ಪಥವೀ, ಪಬ್ಬತೋ ಅನಿಲೋಪಿ ಚ;

ಉಪಮಾಯ ನ ಯುಜ್ಜನ್ತಿ, ಸತ್ಥು ವರವಿಮುತ್ತಿಯಾ.

೧೦೧೩. ‘‘ಚಕ್ಕಾನುವತ್ತಕೋ ಥೇರೋ, ಮಹಾಞಾಣೀ ಸಮಾಹಿತೋ;

ಪಥವಾಪಗ್ಗಿಸಮಾನೋ, ನ ರಜ್ಜತಿ ನ ದುಸ್ಸತಿ.

೧೦೧೪. ‘‘ಪಞ್ಞಾಪಾರಮಿತಂ ಪತ್ತೋ, ಮಹಾಬುದ್ಧಿ ಮಹಾಮತಿ;

ಅಜಳೋ ಜಳಸಮಾನೋ, ಸದಾ ಚರತಿ ನಿಬ್ಬುತೋ.

೧೦೧೫. ‘‘ಪರಿಚಿಣ್ಣೋ ಮಯಾ ಸತ್ಥಾ…ಪೇ… ಭವನೇತ್ತಿ ಸಮೂಹತಾ.

೧೦೧೬. ‘‘ಸಮ್ಪಾದೇಥಪ್ಪಮಾದೇನ, ಏಸಾ ಮೇ ಅನುಸಾಸನೀ;

ಹನ್ದಾಹಂ ಪರಿನಿಬ್ಬಿಸ್ಸಂ, ವಿಪ್ಪಮುತ್ತೋಮ್ಹಿ ಸಬ್ಬಧೀ’’ತಿ.

… ಸಾರಿಪುತ್ತೋ ಥೇರೋ….

೩. ಆನನ್ದತ್ಥೇರಗಾಥಾ

೧೦೧೭. ‘‘ಪಿಸುಣೇನ ಚ ಕೋಧನೇನ ಚ, ಮಚ್ಛರಿನಾ ಚ ವಿಭೂತನನ್ದಿನಾ;

ಸಖಿತಂ ನ ಕರೇಯ್ಯ ಪಣ್ಡಿತೋ, ಪಾಪೋ ಕಾಪುರಿಸೇನ ಸಙ್ಗಮೋ.

೧೦೧೮. ‘‘ಸದ್ಧೇನ ಚ ಪೇಸಲೇನ ಚ, ಪಞ್ಞವತಾ ಬಹುಸ್ಸುತೇನ ಚ;

ಸಖಿತಂ ಕರೇಯ್ಯ ಪಣ್ಡಿತೋ, ಭದ್ದೋ ಸಪ್ಪುರಿಸೇನ ಸಙ್ಗಮೋ.

೧೦೧೯. ‘‘ಪಸ್ಸ ಚಿತ್ತಕತಂ ಬಿಮ್ಬಂ…ಪೇ… ಯಸ್ಸ ನತ್ಥಿ ಧುವಂ ಠಿತಿ.