೧೦. ದಸಮವಗ್ಗೋ

೧. ಪರಿಪುಣ್ಣಕತ್ಥೇರಗಾಥಾ

೯೧. ‘‘ನ ತಥಾ ಮತಂ ಸತರಸಂ, ಸುಧನ್ನಂ ಯಂ ಮಯಜ್ಜ ಪರಿಭುತ್ತಂ;

ಅಪರಿಮಿತದಸ್ಸಿನಾ ಗೋತಮೇನ, ಬುದ್ಧೇನ ದೇಸಿತೋ ಧಮ್ಮೋ’’ತಿ.

… ಪರಿಪುಣ್ಣಕೋ ಥೇರೋ….

೨. ವಿಜಯತ್ಥೇರಗಾಥಾ

೯೨. ‘‘ಯಸ್ಸಾಸವಾ ಪರಿಕ್ಖೀಣಾ, ಆಹಾರೇ ಚ ಅನಿಸ್ಸಿತೋ;

ಸುಞ್ಞತಾ ಅನಿಮಿತ್ತೋ ಚ, ವಿಮೋಕ್ಖೋ ಯಸ್ಸ ಗೋಚರೋ;

ಆಕಾಸೇವ ಸಕುನ್ತಾನಂ, ಪದಂ ತಸ್ಸ ದುರನ್ನಯ’’ನ್ತಿ.

… ವಿಜಯೋ ಥೇರೋ….

೩. ಏರಕತ್ಥೇರಗಾಥಾ

೯೩. ‘‘ದುಕ್ಖಾ ಕಾಮಾ ಏರಕ, ನ ಸುಖಾ ಕಾಮಾ ಏರಕ;

ಯೋ ಕಾಮೇ ಕಾಮಯತಿ, ದುಕ್ಖಂ ಸೋ ಕಾಮಯತಿ ಏರಕ;

ಯೋ ಕಾಮೇ ನ ಕಾಮಯತಿ, ದುಕ್ಖಂ ಸೋ ನ ಕಾಮಯತಿ ಏರಕಾ’’ತಿ.

… ಏರಕೋ ಥೇರೋ….

೪. ಮೇತ್ತಜಿತ್ಥೇರಗಾಥಾ

೯೪. ‘‘ನಮೋ ಹಿ ತಸ್ಸ ಭಗವತೋ, ಸಕ್ಯಪುತ್ತಸ್ಸ ಸಿರೀಮತೋ;

ತೇನಾಯಂ ಅಗ್ಗಪ್ಪತ್ತೇನ, ಅಗ್ಗಧಮ್ಮೋ [ಅಗ್ಗೋ ಧಮ್ಮೋ (ಸೀ.)] ಸುದೇಸಿತೋ’’ತಿ.

… ಮೇತ್ತಜಿ ಥೇರೋ….

೫. ಚಕ್ಖುಪಾಲತ್ಥೇರಗಾಥಾ

೯೫. ‘‘ಅನ್ಧೋಹಂ ಹತನೇತ್ತೋಸ್ಮಿ, ಕನ್ತಾರದ್ಧಾನಪಕ್ಖನ್ದೋ [ಪಕ್ಖನ್ನೋ (ಸೀ.), ಪಕ್ಕನ್ತೋ (ಸ್ಯಾ. ಸೀ. ಅಟ್ಠ.)];

ಸಯಮಾನೋಪಿ ಗಚ್ಛಿಸ್ಸಂ, ನ ಸಹಾಯೇನ ಪಾಪೇನಾ’’ತಿ.

… ಚಕ್ಖುಪಾಲೋ ಥೇರೋ….

೬. ಖಣ್ಡಸುಮನತ್ಥೇರಗಾಥಾ

೯೬. ‘‘ಏಕಪುಪ್ಫಂ ಚಜಿತ್ವಾನ, ಅಸೀತಿ [ಅಸೀತಿಂ (ಸೀ.)] ವಸ್ಸಕೋಟಿಯೋ;

ಸಗ್ಗೇಸು ಪರಿಚಾರೇತ್ವಾ, ಸೇಸಕೇನಮ್ಹಿ ನಿಬ್ಬುತೋ’’ತಿ.

… ಖಣ್ಡಸುಮನೋ ಥೇರೋ….

೭. ತಿಸ್ಸತ್ಥೇರಗಾಥಾ

೯೭. ‘‘ಹಿತ್ವಾ ಸತಪಲಂ ಕಂಸಂ, ಸೋವಣ್ಣಂ ಸತರಾಜಿಕಂ;

ಅಗ್ಗಹಿಂ ಮತ್ತಿಕಾಪತ್ತಂ, ಇದಂ ದುತಿಯಾಭಿಸೇಚನ’’ನ್ತಿ.

… ತಿಸ್ಸೋ ಥೇರೋ….

೮. ಅಭಯತ್ಥೇರಗಾಥಾ

೯೮. ‘‘ರೂಪಂ ದಿಸ್ವಾ ಸತಿ ಮುಟ್ಠಾ, ಪಿಯಂ ನಿಮಿತ್ತಂ ಮನಸಿಕರೋತೋ;

ಸಾರತ್ತಚಿತ್ತೋ ವೇದೇತಿ, ತಞ್ಚ ಅಜ್ಝೋಸ ತಿಟ್ಠತಿ;

ತಸ್ಸ ವಡ್ಢನ್ತಿ ಆಸವಾ, ಭವಮೂಲೋಪಗಾಮಿನೋ’’ತಿ [ಭವಮೂಲಾ ಭವಗಾಮಿನೋತಿ (ಸೀ. ಕ.)].

… ಅಭಯೋ ಥೇರೋ….

೯. ಉತ್ತಿಯತ್ಥೇರಗಾಥಾ

೯೯. ‘‘ಸದ್ದಂ ಸುತ್ವಾ ಸತಿ ಮುಟ್ಠಾ, ಪಿಯಂ ನಿಮಿತ್ತಂ ಮನಸಿಕರೋತೋ;

ಸಾರತ್ತಚಿತ್ತೋ ವೇದೇತಿ, ತಞ್ಚ ಅಜ್ಝೋಸ ತಿಟ್ಠತಿ;

ತಸ್ಸ ವಡ್ಢನ್ತಿ ಆಸವಾ, ಸಂಸಾರಂ ಉಪಗಾಮಿನೋ’’ತಿ.

… ಉತ್ತಿಯೋ ಥೇರೋ….

೧೦. (ದುತಿಯ)-ದೇವಸಭತ್ಥೇರಗಾಥಾ

೧೦೦. ‘‘ಸಮ್ಮಪ್ಪಧಾನಸಮ್ಪನ್ನೋ, ಸತಿಪಟ್ಠಾನಗೋಚರೋ;

ವಿಮುತ್ತಿಕುಸುಮಸಞ್ಛನ್ನೋ, ಪರಿನಿಬ್ಬಿಸ್ಸತ್ಯನಾಸವೋ’’ತಿ.

… ದೇವಸಭೋ ಥೇರೋ….

ವಗ್ಗೋ ದಸಮೋ ನಿಟ್ಠಿತೋ.

ತಸ್ಸುದ್ದಾನಂ –

ಪರಿಪುಣ್ಣಕೋ ಚ ವಿಜಯೋ, ಏರಕೋ ಮೇತ್ತಜೀ ಮುನಿ;

ಚಕ್ಖುಪಾಲೋ ಖಣ್ಡಸುಮನೋ, ತಿಸ್ಸೋ ಚ ಅಭಯೋ ತಥಾ;

ಉತ್ತಿಯೋ ಚ ಮಹಾಪಞ್ಞೋ, ಥೇರೋ ದೇವಸಭೋಪಿ ಚಾತಿ.