೧೧. ಏಕಾದಸಮವಗ್ಗೋ

೧೦೧. ‘‘ಹಿತ್ವಾ ಗಿಹಿತ್ತಂ ಅನವೋಸಿತತ್ತೋ, ಮುಖನಙ್ಗಲೀ ಓದರಿಕೋ ಕುಸೀತೋ;

ಮಹಾವರಾಹೋವ ನಿವಾಪಪುಟ್ಠೋ, ಪುನಪ್ಪುನಂ ಗಬ್ಭಮುಪೇತಿ ಮನ್ದೋ’’ತಿ.

… ಬೇಲಟ್ಠಾನಿಕೋ ಥೇರೋ….

೧೦೨. ‘‘ಮಾನೇನ ವಞ್ಚಿತಾಸೇ, ಸಙ್ಖಾರೇಸು ಸಂಕಿಲಿಸ್ಸಮಾನಾಸೇ;

ಲಾಭಾಲಾಭೇನ ಮಥಿತಾ, ಸಮಾಧಿಂ ನಾಧಿಗಚ್ಛನ್ತೀ’’ತಿ.

… ಸೇತುಚ್ಛೋ ಥೇರೋ….

೧೦೩. ‘‘ನಾಹಂ ಏತೇನ ಅತ್ಥಿಕೋ, ಸುಖಿತೋ ಧಮ್ಮರಸೇನ ತಪ್ಪಿತೋ;

ಪಿತ್ವಾ [ಪೀತ್ವಾನ (ಸೀ. ಸ್ಯಾ.)] ರಸಗ್ಗಮುತ್ತಮಂ, ನ ಚ ಕಾಹಾಮಿ ವಿಸೇನ ಸನ್ಥವ’’ನ್ತಿ.

… ಬನ್ಧುರೋ [ಬನ್ಧನೋ (ಕ.)] ಥೇರೋ….

೧೦೪. ‘‘ಲಹುಕೋ ವತ ಮೇ ಕಾಯೋ, ಫುಟ್ಠೋ ಚ ಪೀತಿಸುಖೇನ ವಿಪುಲೇನ;

ತೂಲಮಿವ ಏರಿತಂ ಮಾಲುತೇನ, ಪಿಲವತೀವ ಮೇ ಕಾಯೋ’’ತಿ.

… ಖಿತಕೋ ಥೇರೋ….

೧೦೫. ‘‘ಉಕ್ಕಣ್ಠಿತೋಪಿ ನ ವಸೇ, ರಮಮಾನೋಪಿ ಪಕ್ಕಮೇ;

ನ ತ್ವೇವಾನತ್ಥಸಂಹಿತಂ, ವಸೇ ವಾಸಂ ವಿಚಕ್ಖಣೋ’’ತಿ.

… ಮಲಿತವಮ್ಭೋ ಥೇರೋ….

೧೦೬. ‘‘ಸತಲಿಙ್ಗಸ್ಸ ಅತ್ಥಸ್ಸ, ಸತಲಕ್ಖಣಧಾರಿನೋ;

ಏಕಙ್ಗದಸ್ಸೀ ದುಮ್ಮೇಧೋ, ಸತದಸ್ಸೀ ಚ ಪಣ್ಡಿತೋ’’ತಿ.

… ಸುಹೇಮನ್ತೋ ಥೇರೋ….

೧೦೭. ‘‘ಪಬ್ಬಜಿಂ ತುಲಯಿತ್ವಾನ, ಅಗಾರಸ್ಮಾನಗಾರಿಯಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಧಮ್ಮಸವೋ ಥೇರೋ….

೧೦೮. ‘‘ಸ ವೀಸವಸ್ಸಸತಿಕೋ, ಪಬ್ಬಜಿಂ ಅನಗಾರಿಯಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ.

… ಧಮ್ಮಸವಪಿತು ಥೇರೋ….

೧೦೯. ‘‘ನ ನೂನಾಯಂ ಪರಮಹಿತಾನುಕಮ್ಪಿನೋ, ರಹೋಗತೋ ಅನುವಿಗಣೇತಿ ಸಾಸನಂ;

ತಥಾಹಯಂ ವಿಹರತಿ ಪಾಕತಿನ್ದ್ರಿಯೋ, ಮಿಗೀ ಯಥಾ ತರುಣಜಾತಿಕಾ ವನೇ’’ತಿ.

… ಸಙ್ಘರಕ್ಖಿತೋ ಥೇರೋ….

೧೧೦. ‘‘ನಗಾ ನಗಗ್ಗೇಸು ಸುಸಂವಿರೂಳ್ಹಾ, ಉದಗ್ಗಮೇಘೇನ ನವೇನ ಸಿತ್ತಾ;

ವಿವೇಕಕಾಮಸ್ಸ ಅರಞ್ಞಸಞ್ಞಿನೋ, ಜನೇತಿ ಭಿಯ್ಯೋ ಉಸಭಸ್ಸ ಕಲ್ಯತ’’ನ್ತಿ.

… ಉಸಭೋ ಥೇರೋ….

ವಗ್ಗೋ ಏಕಾದಸಮೋ ನಿಟ್ಠಿತೋ.

ತಸ್ಸುದ್ದಾನಂ –

ಬೇಲಟ್ಠಾನಿಕೋ ಸೇತುಚ್ಛೋ, ಬನ್ಧುರೋ ಖಿತಕೋ ಇಸಿ;

ಮಲಿತವಮ್ಭೋ ಸುಹೇಮನ್ತೋ, ಧಮ್ಮಸವೋ ಧಮ್ಮಸವಪಿತಾ;

ಸಙ್ಘರಕ್ಖಿತತ್ಥೇರೋ ಚ, ಉಸಭೋ ಚ ಮಹಾಮುನೀತಿ.