೧೦. ಕೋಕಾಲಿಕಸುತ್ತಂ

ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ಅಥ ಖೋ ಕೋಕಾಲಿಕೋ ಭಿಕ್ಖು ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ಕೋಕಾಲಿಕೋ ಭಿಕ್ಖು ಭಗವನ್ತಂ ಏತದವೋಚ – ‘‘ಪಾಪಿಚ್ಛಾ, ಭನ್ತೇ, ಸಾರಿಪುತ್ತಮೋಗ್ಗಲ್ಲಾನಾ, ಪಾಪಿಕಾನಂ ಇಚ್ಛಾನಂ ವಸಂ ಗತಾ’’ತಿ.

ಏವಂ ವುತ್ತೇ, ಭಗವಾ ಕೋಕಾಲಿಕಂ ಭಿಕ್ಖುಂ ಏತದವೋಚ – ‘‘ಮಾ ಹೇವಂ, ಕೋಕಾಲಿಕ, ಮಾ ಹೇವಂ, ಕೋಕಾಲಿಕ! ಪಸಾದೇಹಿ, ಕೋಕಾಲಿಕ, ಸಾರಿಪುತ್ತಮೋಗ್ಗಲ್ಲಾನೇಸು ಚಿತ್ತಂ. ಪೇಸಲಾ ಸಾರಿಪುತ್ತಮೋಗ್ಗಲ್ಲಾನಾ’’ತಿ.

ದುತಿಯಮ್ಪಿ ಖೋ…ಪೇ… ತತಿಯಮ್ಪಿ ಖೋ ಕೋಕಾಲಿಕೋ ಭಿಕ್ಖು ಭಗವನ್ತಂ ಏತದವೋಚ – ‘‘ಕಿಞ್ಚಾಪಿ ಮೇ, ಭನ್ತೇ, ಭಗವಾ ಸದ್ಧಾಯಿಕೋ ಪಚ್ಚಯಿಕೋ, ಅಥ ಖೋ ಪಾಪಿಚ್ಛಾವ ಸಾರಿಪುತ್ತಮೋಗ್ಗಲ್ಲಾನಾ, ಪಾಪಿಕಾನಂ ಇಚ್ಛಾನಂ ವಸಂ ಗತಾ’’ತಿ. ತತಿಯಮ್ಪಿ ಖೋ ಭಗವಾ ಕೋಕಾಲಿಕಂ ಭಿಕ್ಖುಂ ಏತದವೋಚ – ‘‘ಮಾ ಹೇವಂ, ಕೋಕಾಲಿಕ, ಮಾ ಹೇವಂ, ಕೋಕಾಲಿಕ! ಪಸಾದೇಹಿ, ಕೋಕಾಲಿಕ, ಸಾರಿಪುತ್ತಮೋಗ್ಗಲ್ಲಾನೇಸು ಚಿತ್ತಂ. ಪೇಸಲಾ ಸಾರಿಪುತ್ತಮೋಗ್ಗಲ್ಲಾನಾ’’ತಿ.

ಅಥ ಖೋ ಕೋಕಾಲಿಕೋ ಭಿಕ್ಖು ಉಟ್ಠಾಯಾಸನಾ ಭಗವನ್ತಂ ಅಭಿವಾದೇತ್ವಾ ಪದಕ್ಖಿಣಂ ಕತ್ವಾ ಪಕ್ಕಾಮಿ. ಅಚಿರಪ್ಪಕ್ಕನ್ತಸ್ಸ ಚ ಕೋಕಾಲಿಕಸ್ಸ ಭಿಕ್ಖುನೋ ಸಾಸಪಮತ್ತೀಹಿ ಪಿಳಕಾಹಿ ಸಬ್ಬೋ ಕಾಯೋ ಫುಟೋ [ಫುಟ್ಠೋ (ಸ್ಯಾ.)] ಅಹೋಸಿ; ಸಾಸಪಮತ್ತಿಯೋ ಹುತ್ವಾ ಮುಗ್ಗಮತ್ತಿಯೋ ಅಹೇಸುಂ; ಮುಗ್ಗಮತ್ತಿಯೋ ಹುತ್ವಾ ಕಳಾಯಮತ್ತಿಯೋ ಅಹೇಸುಂ; ಕಳಾಯಮತ್ತಿಯೋ ಹುತ್ವಾ ಕೋಲಟ್ಠಿಮತ್ತಿಯೋ ಅಹೇಸುಂ; ಕೋಲಟ್ಠಿಮತ್ತಿಯೋ ಹುತ್ವಾ ಕೋಲಮತ್ತಿಯೋ ಅಹೇಸುಂ; ಕೋಲಮತ್ತಿಯೋ ಹುತ್ವಾ ಆಮಲಕಮತ್ತಿಯೋ ಅಹೇಸುಂ; ಆಮಲಕಮತ್ತಿಯೋ ಹುತ್ವಾ ಬೇಳುವಸಲಾಟುಕಮತ್ತಿಯೋ ಅಹೇಸುಂ; ಬೇಳುವಸಲಾಟುಕಮತ್ತಿಯೋ ಹುತ್ವಾ ಬಿಲ್ಲಮತ್ತಿಯೋ ಅಹೇಸುಂ; ಬಿಲ್ಲಮತ್ತಿಯೋ ಹುತ್ವಾ ಪಭಿಜ್ಜಿಂಸು; ಪುಬ್ಬಞ್ಚ ಲೋಹಿತಞ್ಚ ಪಗ್ಘರಿಂಸು. ಅಥ ಖೋ ಕೋಕಾಲಿಕೋ ಭಿಕ್ಖು ತೇನೇವಾಬಾಧೇನ ಕಾಲಮಕಾಸಿ. ಕಾಲಙ್ಕತೋ ಚ ಕೋಕಾಲಿಕೋ ಭಿಕ್ಖು ಪದುಮಂ ನಿರಯಂ ಉಪಪಜ್ಜಿ ಸಾರಿಪುತ್ತಮೋಗ್ಗಲ್ಲಾನೇಸು ಚಿತ್ತಂ ಆಘಾತೇತ್ವಾ.

ಅಥ ಖೋ ಬ್ರಹ್ಮಾ ಸಹಮ್ಪತಿ ಅಭಿಕ್ಕನ್ತಾಯ ರತ್ತಿಯಾ ಅಭಿಕ್ಕನ್ತವಣ್ಣೋ ಕೇವಲಕಪ್ಪಂ ಜೇತವನಂ ಓಭಾಸೇತ್ವಾ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ಅಟ್ಠಾಸಿ. ಏಕಮನ್ತಂ, ಠಿತೋ ಖೋ ಬ್ರಹ್ಮಾ ಸಹಮ್ಪತಿ ಭಗವನ್ತಂ ಏತದವೋಚ – ‘‘ಕೋಕಾಲಿಕೋ, ಭನ್ತೇ, ಭಿಕ್ಖು ಕಾಲಙ್ಕತೋ; ಕಾಲಙ್ಕತೋ ಚ, ಭನ್ತೇ, ಕೋಕಾಲಿಕೋ ಭಿಕ್ಖು ಪದುಮಂ ನಿರಯಂ ಉಪಪನ್ನೋ ಸಾರಿಪುತ್ತಮೋಗ್ಗಲ್ಲಾನೇಸು ಚಿತ್ತಂ ಆಘಾತೇತ್ವಾ’’ತಿ. ಇದಮವೋಚ ಬ್ರಹ್ಮಾ ಸಹಮ್ಪತಿ; ಇದಂ ವತ್ವಾ ಭಗವನ್ತಂ ಅಭಿವಾದೇತ್ವಾ ಪದಕ್ಖಿಣಂ ಕತ್ವಾ ತತ್ಥೇವನ್ತರಧಾಯಿ.

ಅಥ ಖೋ ಭಗವಾ ತಸ್ಸಾ ರತ್ತಿಯಾ ಅಚ್ಚಯೇನ ಭಿಕ್ಖೂ ಆಮನ್ತೇಸಿ – ‘‘ಇಮಂ, ಭಿಕ್ಖವೇ, ರತ್ತಿಂ ಬ್ರಹ್ಮಾ ಸಹಮ್ಪತಿ ಅಭಿಕ್ಕನ್ತಾಯ ರತ್ತಿಯಾ…ಪೇ… ಇದಮವೋಚ, ಭಿಕ್ಖವೇ, ಬ್ರಹ್ಮಾ ಸಹಮ್ಪತಿ, ಇದಂ ವತ್ವಾ ಮಂ ಪದಕ್ಖಿಣಂ ಕತ್ವಾ ತತ್ಥೇವನ್ತರಧಾಯೀ’’ತಿ.

ಏವಂ ವುತ್ತೇ, ಅಞ್ಞತರೋ ಭಿಕ್ಖು ಭಗವನ್ತಂ ಏತದವೋಚ – ‘‘ಕೀವದೀಘಂ ನು ಖೋ, ಭನ್ತೇ, ಪದುಮೇ ನಿರಯೇ ಆಯುಪ್ಪಮಾಣ’’ನ್ತಿ? ‘‘ದೀಘಂ ಖೋ, ಭಿಕ್ಖು, ಪದುಮೇ ನಿರಯೇ ಆಯುಪ್ಪಮಾಣಂ; ತಂ ನ ಸುಕರಂ ಸಙ್ಖಾತುಂ ಏತ್ತಕಾನಿ ವಸ್ಸಾನಿ ಇತಿ ವಾ ಏತ್ತಕಾನಿ ವಸ್ಸಸತಾನಿ ಇತಿ ವಾ ಏತ್ತಕಾನಿ ವಸ್ಸಸಹಸ್ಸಾನಿ ಇತಿ ವಾ ಏತ್ತಕಾನಿ ವಸ್ಸಸತಸಹಸ್ಸಾನಿ ಇತಿ ವಾ’’ತಿ. ‘‘ಸಕ್ಕಾ ಪನ, ಭನ್ತೇ, ಉಪಮಾ [ಉಪಮಂ (ಸೀ. ಸ್ಯಾ. ಕ.)] ಕಾತು’’ನ್ತಿ? ‘‘ಸಕ್ಕಾ, ಭಿಕ್ಖೂ’’ತಿ ಭಗವಾ ಅವೋಚ –

‘‘ಸೇಯ್ಯಥಾಪಿ, ಭಿಕ್ಖು, ವೀಸತಿಖಾರಿಕೋ ಕೋಸಲಕೋ ತಿಲವಾಹೋ; ತತೋ ಪುರಿಸೋ ವಸ್ಸಸತಸ್ಸ ವಸ್ಸಸತಸ್ಸ ಅಚ್ಚಯೇನ ಏಕಮೇಕಂ ತಿಲಂ ಉದ್ಧರೇಯ್ಯ. ಖಿಪ್ಪತರಂ ಖೋ ಸೋ ಭಿಕ್ಖು ವೀಸತಿಖಾರಿಕೋ ಕೋಸಲಕೋ ತಿಲವಾಹೋ ಇಮಿನಾ ಉಪಕ್ಕಮೇನ ಪರಿಕ್ಖಯಂ ಪರಿಯಾದಾನಂ ಗಚ್ಛೇಯ್ಯ, ನತ್ವೇವ ಏಕೋ ಅಬ್ಬುದೋ ನಿರಯೋ. ಸೇಯ್ಯಥಾಪಿ, ಭಿಕ್ಖು, ವೀಸತಿ ಅಬ್ಬುದಾ ನಿರಯಾ ಏವಮೇಕೋ ನಿರಬ್ಬುದೋ ನಿರಯೋ. ಸೇಯ್ಯಥಾಪಿ, ಭಿಕ್ಖು, ವೀಸತಿ ನಿರಬ್ಬುದಾ ನಿರಯಾ ಏವಮೇಕೋ ಅಬಬೋ ನಿರಯೋ. ಸೇಯ್ಯಥಾಪಿ, ಭಿಕ್ಖು, ವೀಸತಿ ಅಬಬಾ ನಿರಯಾ ಏವಮೇಕೋ ಅಹಹೋ ನಿರಯೋ. ಸೇಯ್ಯಥಾಪಿ, ಭಿಕ್ಖು, ವೀಸತಿ ಅಹಹಾ ನಿರಯಾ ಏವಮೇಕೋ ಅಟಟೋ ನಿರಯೋ. ಸೇಯ್ಯಥಾಪಿ, ಭಿಕ್ಖು, ವೀಸತಿ ಅಟಟಾ ನಿರಯಾ ಏವಮೇಕೋ ಕುಮುದೋ ನಿರಯೋ. ಸೇಯ್ಯಥಾಪಿ, ಭಿಕ್ಖು, ವೀಸತಿ ಕುಮುದಾ ನಿರಯಾ ಏವಮೇಕೋ ಸೋಗನ್ಧಿಕೋ ನಿರಯೋ. ಸೇಯ್ಯಥಾಪಿ, ಭಿಕ್ಖು, ವೀಸತಿ ಸೋಗನ್ಧಿಕಾ ನಿರಯಾ ಏವಮೇಕೋ ಉಪ್ಪಲಕೋ ನಿರಯೋ. ಸೇಯ್ಯಥಾಪಿ, ಭಿಕ್ಖು, ವೀಸತಿ ಉಪ್ಪಲಕಾ ನಿರಯಾ ಏವಮೇಕೋ ಪುಣ್ಡರೀಕೋ ನಿರಯೋ. ಸೇಯ್ಯಥಾಪಿ, ಭಿಕ್ಖು, ವೀಸತಿ ಪುಣ್ಡರೀಕಾ ನಿರಯಾ ಏವಮೇಕೋ ಪದುಮೋ ನಿರಯೋ. ಪದುಮಂ ಖೋ ಪನ ಭಿಕ್ಖು ನಿರಯಂ ಕೋಕಾಲಿಕೋ ಭಿಕ್ಖು ಉಪಪನ್ನೋ ಸಾರಿಪುತ್ತಮೋಗ್ಗಲ್ಲಾನೇಸು ಚಿತ್ತಂ ಆಘಾತೇತ್ವಾ’’ತಿ. ಇದಮವೋಚ ಭಗವಾ, ಇದಂ ವತ್ವಾನ ಸುಗತೋ ಅಥಾಪರಂ ಏತದವೋಚ ಸತ್ಥಾ –

೬೬೨. ‘‘ಪುರಿಸಸ್ಸ ಹಿ ಜಾತಸ್ಸ, ಕುಠಾರೀ [ಕುಧಾರೀ (ಕ.)] ಜಾಯತೇ ಮುಖೇ;

ಯಾಯ ಛಿನ್ದತಿ ಅತ್ತಾನಂ, ಬಾಲೋ ದುಬ್ಭಾಸಿತಂ ಭಣಂ.

೬೬೩. ‘‘ಯೋ ನಿನ್ದಿಯಂ ಪಸಂಸತಿ, ತಂ ವಾ ನಿನ್ದತಿ ಯೋ ಪಸಂಸಿಯೋ;

ವಿಚಿನಾತಿ ಮುಖೇನ ಸೋ ಕಲಿಂ, ಕಲಿನಾ ತೇನ ಸುಖಂ ನ ವಿನ್ದತಿ.

೬೬೪. ‘‘ಅಪ್ಪಮತ್ತೋ ಅಯಂ ಕಲಿ, ಯೋ ಅಕ್ಖೇಸು ಧನಪರಾಜಯೋ;

ಸಬ್ಬಸ್ಸಾಪಿ ಸಹಾಪಿ ಅತ್ತನಾ, ಅಯಮೇವ ಮಹತ್ತರೋ [ಮಹನ್ತಕರೋ (ಸೀ.)] ಕಲಿ;

ಯೋ ಸುಗತೇಸು ಮನಂ ಪದೋಸಯೇ.

೬೬೫. ‘‘ಸತಂ ಸಹಸ್ಸಾನಂ ನಿರಬ್ಬುದಾನಂ, ಛತ್ತಿಂಸತಿ ಪಞ್ಚ ಚ ಅಬ್ಬುದಾನಿ [ಅಬ್ಬುದಾನಂ (ಕ.)];

ಯಮರಿಯಗರಹೀ ನಿರಯಂ ಉಪೇತಿ, ವಾಚಂ ಮನಞ್ಚ ಪಣಿಧಾಯ ಪಾಪಕಂ.

೬೬೬. ‘‘ಅಭೂತವಾದೀ ನಿರಯಂ ಉಪೇತಿ, ಯೋ ವಾಪಿ ಕತ್ವಾ ನ ಕರೋಮಿಚಾಹ;

ಉಭೋಪಿ ತೇ ಪೇಚ್ಚ ಸಮಾ ಭವನ್ತಿ, ನಿಹೀನಕಮ್ಮಾ ಮನುಜಾ ಪರತ್ಥ.

೬೬೭. ‘‘ಯೋ ಅಪ್ಪದುಟ್ಠಸ್ಸ ನರಸ್ಸ ದುಸ್ಸತಿ, ಸುದ್ಧಸ್ಸ ಪೋಸಸ್ಸ ಅನಙ್ಗಣಸ್ಸ;

ತಮೇವ ಬಾಲಂ ಪಚ್ಚೇತಿ ಪಾಪಂ, ಸುಖುಮೋ ರಜೋ ಪಟಿವಾತಂವ ಖಿತ್ತೋ.

೬೬೮. ‘‘ಯೋ ಲೋಭಗುಣೇ ಅನುಯುತ್ತೋ, ಸೋ ವಚಸಾ ಪರಿಭಾಸತಿ ಅಞ್ಞೇ;

ಅಸದ್ಧೋ ಕದರಿಯೋ ಅವದಞ್ಞೂ, ಮಚ್ಛರಿ ಪೇಸುಣಿಯಂ [ಪೇಸುಣಿಯಸ್ಮಿಂ (ಬಹೂಸು)] ಅನುಯುತ್ತೋ.

೬೬೯. ‘‘ಮುಖದುಗ್ಗ ವಿಭೂತ ಅನರಿಯ, ಭೂನಹು [ಭುನಹತ (ಸ್ಯಾ. ಕ.)] ಪಾಪಕ ದುಕ್ಕಟಕಾರಿ;

ಪುರಿಸನ್ತ ಕಲೀ ಅವಜಾತ, ಮಾ ಬಹುಭಾಣಿಧ ನೇರಯಿಕೋಸಿ.

೬೭೦. ‘‘ರಜಮಾಕಿರಸೀ ಅಹಿತಾಯ, ಸನ್ತೇ ಗರಹಸಿ ಕಿಬ್ಬಿಸಕಾರೀ;

ಬಹೂನಿ ದುಚ್ಚರಿತಾನಿ ಚರಿತ್ವಾ, ಗಚ್ಛಸಿ ಖೋ ಪಪತಂ ಚಿರರತ್ತಂ.

೬೭೧. ‘‘ನ ಹಿ ನಸ್ಸತಿ ಕಸ್ಸಚಿ ಕಮ್ಮಂ, ಏತಿ ಹತಂ ಲಭತೇವ ಸುವಾಮಿ;

ದುಕ್ಖಂ ಮನ್ದೋ ಪರಲೋಕೇ, ಅತ್ತನಿ ಪಸ್ಸತಿ ಕಿಬ್ಬಿಸಕಾರೀ.

೬೭೨. ‘‘ಅಯೋಸಙ್ಕುಸಮಾಹತಟ್ಠಾನಂ, ತಿಣ್ಹಧಾರಮಯಸೂಲಮುಪೇತಿ;

ಅಥ ತತ್ತಅಯೋಗುಳಸನ್ನಿಭಂ, ಭೋಜನಮತ್ಥಿ ತಥಾ ಪತಿರೂಪಂ.

೬೭೩. ‘‘ನ ಹಿ ವಗ್ಗು ವದನ್ತಿ ವದನ್ತಾ, ನಾಭಿಜವನ್ತಿ ನ ತಾಣಮುಪೇನ್ತಿ;

ಅಙ್ಗಾರೇ ಸನ್ಥತೇ ಸಯನ್ತಿ [ಸೇನ್ತಿ (ಸೀ. ಸ್ಯಾ. ಪೀ.)], ಗಿನಿಸಮ್ಪಜ್ಜಲಿತಂ ಪವಿಸನ್ತಿ.

೬೭೪. ‘‘ಜಾಲೇನ ಚ ಓನಹಿಯಾನ, ತತ್ಥ ಹನನ್ತಿ ಅಯೋಮಯಕುಟೇಭಿ [ಅಯೋಮಯಕೂಟೇಹಿ (ಸೀ. ಸ್ಯಾ. ಪೀ.)];

ಅನ್ಧಂವ ತಿಮಿಸಮಾಯನ್ತಿ, ತಂ ವಿತತಞ್ಹಿ ಯಥಾ ಮಹಿಕಾಯೋ.

೬೭೫. ‘‘ಅಥ ಲೋಹಮಯಂ ಪನ ಕುಮ್ಭಿಂ, ಗಿನಿಸಮ್ಪಜ್ಜಲಿತಂ ಪವಿಸನ್ತಿ;

ಪಚ್ಚನ್ತಿ ಹಿ ತಾಸು ಚಿರರತ್ತಂ, ಅಗ್ಗಿನಿಸಮಾಸು [ಗಿನಿಸ್ಸಮಾಸು (ಕ.)] ಸಮುಪ್ಪಿಲವಾತೇ.

೬೭೬. ‘‘ಅಥ ಪುಬ್ಬಲೋಹಿತಮಿಸ್ಸೇ, ತತ್ಥ ಕಿಂ ಪಚ್ಚತಿ ಕಿಬ್ಬಿಸಕಾರೀ;

ಯಂ ಯಂ ದಿಸಕಂ [ದಿಸತಂ (ಸೀ. ಸ್ಯಾ. ಪೀ.)] ಅಧಿಸೇತಿ, ತತ್ಥ ಕಿಲಿಸ್ಸತಿ ಸಮ್ಫುಸಮಾನೋ.

೬೭೭. ‘‘ಪುಳವಾವಸಥೇ ಸಲಿಲಸ್ಮಿಂ, ತತ್ಥ ಕಿಂ ಪಚ್ಚತಿ ಕಿಬ್ಬಿಸಕಾರೀ;

ಗನ್ತುಂ ನ ಹಿ ತೀರಮಪತ್ಥಿ, ಸಬ್ಬಸಮಾ ಹಿ ಸಮನ್ತಕಪಲ್ಲಾ.

೬೭೮. ‘‘ಅಸಿಪತ್ತವನಂ ಪನ ತಿಣ್ಹಂ, ತಂ ಪವಿಸನ್ತಿ ಸಮುಚ್ಛಿದಗತ್ತಾ;

ಜಿವ್ಹಂ ಬಲಿಸೇನ ಗಹೇತ್ವಾ, ಆರಜಯಾರಜಯಾ ವಿಹನನ್ತಿ.

೬೭೯. ‘‘ಅಥ ವೇತರಣಿಂ ಪನ ದುಗ್ಗಂ, ತಿಣ್ಹಧಾರಖುರಧಾರಮುಪೇನ್ತಿ;

ತತ್ಥ ಮನ್ದಾ ಪಪತನ್ತಿ, ಪಾಪಕರಾ ಪಾಪಾನಿ ಕರಿತ್ವಾ.

೬೮೦. ‘‘ಖಾದನ್ತಿ ಹಿ ತತ್ಥ ರುದನ್ತೇ, ಸಾಮಾ ಸಬಲಾ ಕಾಕೋಲಗಣಾ ಚ;

ಸೋಣಾ ಸಿಙ್ಗಾಲಾ [ಸಿಗಾಲಾ (ಸೀ. ಪೀ.)] ಪಟಿಗಿದ್ಧಾ [ಪಟಿಗಿಜ್ಝಾ (ಸ್ಯಾ. ಪೀ.)], ಕುಲಲಾ ವಾಯಸಾ ಚ [ಕುಲಲಾ ಚ ವಾಯಸಾ (?)] ವಿತುದನ್ತಿ.

೬೮೧. ‘‘ಕಿಚ್ಛಾ ವತಯಂ ಇಧ ವುತ್ತಿ, ಯಂ ಜನೋ ಫುಸತಿ [ಪಸ್ಸತಿ (ಸೀ. ಸ್ಯಾ. ಪೀ.)] ಕಿಬ್ಬಿಸಕಾರೀ;

ತಸ್ಮಾ ಇಧ ಜೀವಿತಸೇಸೇ, ಕಿಚ್ಚಕರೋ ಸಿಯಾ ನರೋ ನ ಚಪ್ಪಮಜ್ಜೇ.

೬೮೨. ‘‘ತೇ ಗಣಿತಾ ವಿದೂಹಿ ತಿಲವಾಹಾ, ಯೇ ಪದುಮೇ ನಿರಯೇ ಉಪನೀತಾ;

ನಹುತಾನಿ ಹಿ ಕೋಟಿಯೋ ಪಞ್ಚ ಭವನ್ತಿ, ದ್ವಾದಸ ಕೋಟಿಸತಾನಿ ಪುನಞ್ಞಾ [ಪನಯ್ಯೇ (ಕ.)].

೬೮೩. ‘‘ಯಾವ ದುಖಾ [ದುಕ್ಖಾ (ಸೀ. ಸ್ಯಾ.), ದುಕ್ಖ (ಪೀ. ಕ.)] ನಿರಯಾ ಇಧ ವುತ್ತಾ, ತತ್ಥಪಿ ತಾವ ಚಿರಂ ವಸಿತಬ್ಬಂ;

ತಸ್ಮಾ ಸುಚಿಪೇಸಲಸಾಧುಗುಣೇಸು, ವಾಚಂ ಮನಂ ಸತತಂ [ಪಕತಂ (ಸ್ಯಾ.)] ಪರಿರಕ್ಖೇ’’ತಿ.

ಕೋಕಾಲಿಕಸುತ್ತಂ ದಸಮಂ ನಿಟ್ಠಿತಂ.