೮. ಮೇತ್ತಸುತ್ತಂ

೧೪೩. ಕರಣೀಯಮತ್ಥಕುಸಲೇನ, ಯನ್ತ ಸನ್ತಂ ಪದಂ ಅಭಿಸಮೇಚ್ಚ;

ಸಕ್ಕೋ ಉಜೂ ಚ ಸುಹುಜೂ [ಸೂಜೂ (ಸೀ.)] ಚ, ಸೂವಚೋ ಚಸ್ಸ ಮುದು ಅನತಿಮಾನೀ.

೧೪೪. ಸನ್ತುಸ್ಸಕೋ ಚ ಸುಭರೋ ಚ, ಅಪ್ಪಕಿಚ್ಚೋ ಚ ಸಲ್ಲಹುಕವುತ್ತಿ;

ಸನ್ತಿನ್ದ್ರಿಯೋ ಚ ನಿಪಕೋ ಚ, ಅಪ್ಪಗಬ್ಭೋ ಕುಲೇಸ್ವನನುಗಿದ್ಧೋ.

೧೪೫. ನ ಚ ಖುದ್ದಮಾಚರೇ ಕಿಞ್ಚಿ, ಯೇನ ವಿಞ್ಞೂ ಪರೇ ಉಪವದೇಯ್ಯುಂ;

ಸುಖಿನೋ ವ ಖೇಮಿನೋ ಹೋನ್ತು, ಸಬ್ಬಸತ್ತಾ [ಸಬ್ಬೇ ಸತ್ತಾ (ಸೀ. ಸ್ಯಾ.)] ಭವನ್ತು ಸುಖಿತತ್ತಾ.

೧೪೬. ಯೇ ಕೇಚಿ ಪಾಣಭೂತತ್ಥಿ, ತಸಾ ವಾ ಥಾವರಾ ವನವಸೇಸಾ;

ದೀಘಾ ವಾ ಯೇ ವ ಮಹನ್ತಾ [ಮಹನ್ತ (?)], ಮಜ್ಝಿಮಾ ರಸ್ಸಕಾ ಅಣುಕಥೂಲಾ.

೧೪೭. ದಿಟ್ಠಾ ವಾ ಯೇ ವ ಅದಿಟ್ಠಾ [ಅದಿಟ್ಠ (?)], ಯೇ ವ [ಯೇ ಚ (ಸೀ. ಸ್ಯಾ. ಕಂ. ಪೀ.)] ದೂರೇ ವಸನ್ತಿ ಅವಿದೂರೇ;

ಭೂತಾ ವ ಸಮ್ಭವೇಸೀ ವ [ಭೂತಾ ವಾ ಸಮ್ಭವೇಸೀ ವಾ (ಸ್ಯಾ. ಕಂ. ಪೀ. ಕ.)], ಸಬ್ಬಸತ್ತಾ ಭವನ್ತು ಸುಖಿತತ್ತಾ.

೧೪೮. ನ ಪರೋ ಪರಂ ನಿಕುಬ್ಬೇಥ, ನಾತಿಮಞ್ಞೇಥ ಕತ್ಥಚಿ ನ ಕಞ್ಚಿ [ನಂ ಕಞ್ಚಿ (ಸೀ. ಪೀ.), ನಂ ಕಿಞ್ಚಿ (ಸ್ಯಾ.), ನ ಕಿಞ್ಚಿ (ಕ.)];

ಬ್ಯಾರೋಸನಾ ಪಟಿಘಸಞ್ಞಾ, ನಾಞ್ಞಮಞ್ಞಸ್ಸ ದುಕ್ಖಮಿಚ್ಛೇಯ್ಯ.

೧೪೯. ಮಾತಾ ಯಥಾ ನಿಯಂ ಪುತ್ತಮಾಯುಸಾ ಏಕಪುತ್ತಮನುರಕ್ಖೇ;

ಏವಮ್ಪಿ ಸಬ್ಬಭೂತೇಸು, ಮಾನಸಂ ಭಾವಯೇ ಅಪರಿಮಾಣಂ.

೧೫೦. ಮೇತ್ತಞ್ಚ ಸಬ್ಬಲೋಕಸ್ಮಿ, ಮಾನಸಂ ಭಾವಯೇ ಅಪರಿಮಾಣಂ;

ಉದ್ಧಂ ಅಧೋ ಚ ತಿರಿಯಞ್ಚ, ಅಸಮ್ಬಾಧಂ ಅವೇರಮಸಪತ್ತಂ.

೧೫೧. ತಿಟ್ಠಂ ಚರಂ ನಿಸಿನ್ನೋ ವ [ವಾ (ಸೀ. ಸ್ಯಾ. ಕಂ. ಪೀ.)], ಸಯಾನೋ ಯಾವತಾಸ್ಸ ವಿತಮಿದ್ಧೋ [ವಿಗತಮಿದ್ಧೋ (ಬಹೂಸು)];

ಏತಂ ಸತಿಂ ಅಧಿಟ್ಠೇಯ್ಯ, ಬ್ರಹ್ಮಮೇತಂ ವಿಹಾರಮಿಧಮಾಹು.

೧೫೨. ದಿಟ್ಠಿಞ್ಚ ಅನುಪಗ್ಗಮ್ಮ, ಸೀಲವಾ ದಸ್ಸನೇನ ಸಮ್ಪನ್ನೋ;

ಕಾಮೇಸು ವಿನಯ [ವಿನೇಯ್ಯ (ಸೀ. ಸ್ಯಾ. ಪೀ.)] ಗೇಧಂ, ನ ಹಿ ಜಾತುಗ್ಗಬ್ಭಸೇಯ್ಯ ಪುನರೇತೀತಿ.

ಮೇತ್ತಸುತ್ತಂ ಅಟ್ಠಮಂ ನಿಟ್ಠಿತಂ.