೧. ಉರಗವಗ್ಗೋ

೧. ಉರಗಸುತ್ತಂ

೧. ಯೋ [ಯೋ ವೇ (ಸ್ಯಾ.)] ಉಪ್ಪತಿತಂ ವಿನೇತಿ ಕೋಧಂ, ವಿಸಟಂ ಸಪ್ಪವಿಸಂವ ಓಸಧೇಹಿ [ಓಸಧೇಭಿ (ಕ.)];

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ [ಜಿಣ್ಣಮಿವ ತಚಂ (ಸೀ. ಸ್ಯಾ. ಕಂ. ಪೀ.), ಜಿಣ್ಣಮಿವಾ ತಚಂ (?)] ಪುರಾಣಂ.

೨. ಯೋ ರಾಗಮುದಚ್ಛಿದಾ ಅಸೇಸಂ, ಭಿಸಪುಪ್ಫಂವ ಸರೋರುಹಂ [ಸರೇರುಹಂ (ಕ.)] ವಿಗಯ್ಹ;

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ, ಪುರಾಣಂ.

೩. ಯೋ ತಣ್ಹಮುದಚ್ಛಿದಾ ಅಸೇಸಂ, ಸರಿತಂ ಸೀಘಸರಂ ವಿಸೋಸಯಿತ್ವಾ;

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ ಪುರಾಣಂ.

೪. ಯೋ ಮಾನಮುದಬ್ಬಧೀ ಅಸೇಸಂ, ನಳಸೇತುಂವ ಸುದುಬ್ಬಲಂ ಮಹೋಘೋ;

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ ಪುರಾಣಂ.

೫. ಯೋ ನಾಜ್ಝಗಮಾ ಭವೇಸು ಸಾರಂ, ವಿಚಿನಂ ಪುಪ್ಫಮಿವ [ಪುಪ್ಫಮಿವ (ಬಹೂಸು)] ಉದುಮ್ಬರೇಸು;

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ ಪುರಾಣಂ.

೬. ಯಸ್ಸನ್ತರತೋ ನ ಸನ್ತಿ ಕೋಪಾ, ಇತಿಭವಾಭವತಞ್ಚ [ಇತಿಬ್ಭವಾಭವತಞ್ಚ (ಕ.)] ವೀತಿವತ್ತೋ;

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ ಪುರಾಣಂ.

೭. ಯಸ್ಸ ವಿತಕ್ಕಾ ವಿಧೂಪಿತಾ, ಅಜ್ಝತ್ತಂ ಸುವಿಕಪ್ಪಿತಾ ಅಸೇಸಾ;

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ ಪುರಾಣಂ.

೮. ಯೋ ನಾಚ್ಚಸಾರೀ ನ ಪಚ್ಚಸಾರೀ, ಸಬ್ಬಂ ಅಚ್ಚಗಮಾ ಇಮಂ ಪಪಞ್ಚಂ;

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ ಪುರಾಣಂ.

೯. ಯೋ ನಾಚ್ಚಸಾರೀ ನ ಪಚ್ಚಸಾರೀ, ಸಬ್ಬಂ ವಿತಥಮಿದನ್ತಿ ಞತ್ವಾ [ಉತ್ವಾ (ಸ್ಯಾ. ಪೀ. ಕ.)] ಲೋಕೇ;

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ ಪುರಾಣಂ.

೧೦. ಯೋ ನಾಚ್ಚಸಾರೀ ನ ಪಚ್ಚಸಾರೀ, ಸಬ್ಬಂ ವಿತಥಮಿದನ್ತಿ ವೀತಲೋಭೋ;

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ ಪುರಾಣಂ.

೧೧. ಯೋ ನಾಚ್ಚಸಾರೀ ನ ಪಚ್ಚಸಾರೀ, ಸಬ್ಬಂ ವಿತಥಮಿದನ್ತಿ ವೀತರಾಗೋ;

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ ಪುರಾಣಂ.

೧೨. ಯೋ ನಾಚ್ಚಸಾರೀ ನ ಪಚ್ಚಸಾರೀ, ಸಬ್ಬಂ ವಿತಥಮಿದನ್ತಿ ವೀತದೋಸೋ;

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ ಪುರಾಣಂ.

೧೩. ಯೋ ನಾಚ್ಚಸಾರೀ ನ ಪಚ್ಚಸಾರೀ, ಸಬ್ಬಂ ವಿತಥಮಿದನ್ತಿ ವೀತಮೋಹೋ;

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ ಪುರಾಣಂ.

೧೪. ಯಸ್ಸಾನುಸಯಾ ನ ಸನ್ತಿ ಕೇಚಿ, ಮೂಲಾ ಚ ಅಕುಸಲಾ ಸಮೂಹತಾಸೇ;

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ ಪುರಾಣಂ.

೧೫. ಯಸ್ಸ ದರಥಜಾ ನ ಸನ್ತಿ ಕೇಚಿ, ಓರಂ ಆಗಮನಾಯ ಪಚ್ಚಯಾಸೇ;

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ ಪುರಾಣಂ.

೧೬. ಯಸ್ಸ ವನಥಜಾ ನ ಸನ್ತಿ ಕೇಚಿ, ವಿನಿಬನ್ಧಾಯ ಭವಾಯ ಹೇತುಕಪ್ಪಾ;

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ ಪುರಾಣಂ.

೧೭. ಯೋ ನೀವರಣೇ ಪಹಾಯ ಪಞ್ಚ, ಅನಿಘೋ ತಿಣ್ಣಕಥಂಕಥೋ ವಿಸಲ್ಲೋ;

ಸೋ ಭಿಕ್ಖು ಜಹಾತಿ ಓರಪಾರಂ, ಉರಗೋ ಜಿಣ್ಣಮಿವತ್ತಚಂ ಪುರಾಣಂ.

ಉರಗಸುತ್ತಂ ಪಠಮಂ ನಿಟ್ಠಿತಂ.

೨. ಧನಿಯಸುತ್ತಂ

೧೮. ‘‘ಪಕ್ಕೋದನೋ ದುದ್ಧಖೀರೋಹಮಸ್ಮಿ, (ಇತಿ ಧನಿಯೋ ಗೋಪೋ)

ಅನುತೀರೇ ಮಹಿಯಾ ಸಮಾನವಾಸೋ;

ಛನ್ನಾ ಕುಟಿ ಆಹಿತೋ ಗಿನಿ, ಅಥ ಚೇ ಪತ್ಥಯಸೀ ಪವಸ್ಸ ದೇವ’’.

೧೯. ‘‘ಅಕ್ಕೋಧನೋ ವಿಗತಖಿಲೋಹಮಸ್ಮಿ [ವಿಗತಖೀಲೋಹಮಸ್ಮಿ (ಸೀ. ಪೀ.)], (ಇತಿ ಭಗವಾ)

ಅನುತೀರೇ ಮಹಿಯೇಕರತ್ತಿವಾಸೋ;

ವಿವಟಾ ಕುಟಿ ನಿಬ್ಬುತೋ ಗಿನಿ, ಅಥ ಚೇ ಪತ್ಥಯಸೀ ಪವಸ್ಸ ದೇವ’’.

೨೦. ‘‘ಅನ್ಧಕಮಕಸಾ ನ ವಿಜ್ಜರೇ, (ಇತಿ ಧನಿಯೋ ಗೋಪೋ)

ಕಚ್ಛೇ ರೂಳ್ಹತಿಣೇ ಚರನ್ತಿ ಗಾವೋ;

ವುಟ್ಠಿಮ್ಪಿ ಸಹೇಯ್ಯುಮಾಗತಂ, ಅಥ ಚೇ ಪತ್ಥಯಸೀ ಪವಸ್ಸ ದೇವ’’.

೨೧. ‘‘ಬದ್ಧಾಸಿ ಭಿಸೀ ಸುಸಙ್ಖತಾ, (ಇತಿ ಭಗವಾ)

ತಿಣ್ಣೋ ಪಾರಗತೋ ವಿನೇಯ್ಯ ಓಘಂ;

ಅತ್ಥೋ ಭಿಸಿಯಾ ನ ವಿಜ್ಜತಿ, ಅಥ ಚೇ ಪತ್ಥಯಸೀ ಪವಸ್ಸ ದೇವ’’.

೨೨. ‘‘ಗೋಪೀ ಮಮ ಅಸ್ಸವಾ ಅಲೋಲಾ, (ಇತಿ ಧನಿಯೋ ಗೋಪೋ)

ದೀಘರತ್ತಂ [ದೀಘರತ್ತ (ಕ.)] ಸಂವಾಸಿಯಾ ಮನಾಪಾ;

ತಸ್ಸಾ ನ ಸುಣಾಮಿ ಕಿಞ್ಚಿ ಪಾಪಂ, ಅಥ ಚೇ ಪತ್ಥಯಸೀ ಪವಸ್ಸ ದೇವ’’.

೨೩. ‘‘ಚಿತ್ತಂ ಮಮ ಅಸ್ಸವಂ ವಿಮುತ್ತಂ, (ಇತಿ ಭಗವಾ)

ದೀಘರತ್ತಂ ಪರಿಭಾವಿತಂ ಸುದನ್ತಂ;

ಪಾಪಂ ಪನ ಮೇ ನ ವಿಜ್ಜತಿ, ಅಥ ಚೇ ಪತ್ಥಯಸೀ ಪವಸ್ಸ ದೇವ’’.

೨೪. ‘‘ಅತ್ತವೇತನಭತೋಹಮಸ್ಮಿ, (ಇತಿ ಧನಿಯೋ ಗೋಪೋ)

ಪುತ್ತಾ ಚ ಮೇ ಸಮಾನಿಯಾ ಅರೋಗಾ;

ತೇಸಂ ನ ಸುಣಾಮಿ ಕಿಞ್ಚಿ ಪಾಪಂ, ಅಥ ಚೇ ಪತ್ಥಯಸೀ ಪವಸ್ಸ ದೇವ’’.

೨೫. ‘‘ನಾಹಂ ಭತಕೋಸ್ಮಿ ಕಸ್ಸಚಿ, (ಇತಿ ಭಗವಾ)

ನಿಬ್ಬಿಟ್ಠೇನ ಚರಾಮಿ ಸಬ್ಬಲೋಕೇ;

ಅತ್ಥೋ ಭತಿಯಾ ನ ವಿಜ್ಜತಿ, ಅಥ ಚೇ ಪತ್ಥಯಸೀ ಪವಸ್ಸ ದೇವ’’.

೨೬. ‘‘ಅತ್ಥಿ ವಸಾ ಅತ್ಥಿ ಧೇನುಪಾ, (ಇತಿ ಧನಿಯೋ ಗೋಪೋ)

ಗೋಧರಣಿಯೋ ಪವೇಣಿಯೋಪಿ ಅತ್ಥಿ;

ಉಸಭೋಪಿ ಗವಮ್ಪತೀಧ ಅತ್ಥಿ, ಅಥ ಚೇ ಪತ್ಥಯಸೀ ಪವಸ್ಸ ದೇವ’’.

೨೭. ‘‘ನತ್ಥಿ ವಸಾ ನತ್ಥಿ ಧೇನುಪಾ, (ಇತಿ ಭಗವಾ)

ಗೋಧರಣಿಯೋ ಪವೇಣಿಯೋಪಿ ನತ್ಥಿ;

ಉಸಭೋಪಿ ಗವಮ್ಪತೀಧ ನತ್ಥಿ, ಅಥ ಚೇ ಪತ್ಥಯಸೀ ಪವಸ್ಸ ದೇವ’’.

೨೮. ‘‘ಖಿಲಾ ನಿಖಾತಾ ಅಸಮ್ಪವೇಧೀ, (ಇತಿ ಧನಿಯೋ ಗೋಪೋ)

ದಾಮಾ ಮುಞ್ಜಮಯಾ ನವಾ ಸುಸಣ್ಠಾನಾ;

ನ ಹಿ ಸಕ್ಖಿನ್ತಿ ಧೇನುಪಾಪಿ ಛೇತ್ತುಂ [ಛೇತುಂ (ಕ.)], ಅಥ ಚೇ ಪತ್ಥಯಸೀ ಪವಸ್ಸ ದೇವ’’.

೨೯. ‘‘ಉಸಭೋರಿವ ಛೇತ್ವ [ಛೇತ್ವಾ (ಸ್ಯಾ. ಕ.)] ಬನ್ಧನಾನಿ, (ಇತಿ ಭಗವಾ)

ನಾಗೋ ಪೂತಿಲತಂವ ದಾಲಯಿತ್ವಾ [ಪೂತಿಲತಂ ಪದಾಲಯಿತ್ವಾ (ಸ್ಯಾ. ಕ.)];

ನಾಹಂ ಪುನುಪೇಸ್ಸಂ [ಪುನ ಉಪೇಸ್ಸಂ (ಸೀ. ಸ್ಯಾ. ಕಂ. ಪೀ.), ಪುನುಪೇಯ್ಯ (ಕ.)] ಗಬ್ಭಸೇಯ್ಯಂ, ಅಥ ಚೇ ಪತ್ಥಯಸೀ ಪವಸ್ಸ ದೇವ’’.

೩೦. ‘‘ನಿನ್ನಞ್ಚ ಥಲಞ್ಚ ಪೂರಯನ್ತೋ, ಮಹಾಮೇಘೋ ಪವಸ್ಸಿ ತಾವದೇವ;

ಸುತ್ವಾ ದೇವಸ್ಸ ವಸ್ಸತೋ, ಇಮಮತ್ಥಂ ಧನಿಯೋ ಅಭಾಸಥ.

೩೧. ‘‘ಲಾಭಾ ವತ ನೋ ಅನಪ್ಪಕಾ, ಯೇ ಮಯಂ ಭಗವನ್ತಂ ಅದ್ದಸಾಮ;

ಸರಣಂ ತಂ ಉಪೇಮ ಚಕ್ಖುಮ, ಸತ್ಥಾ ನೋ ಹೋಹಿ ತುವಂ ಮಹಾಮುನಿ.

೩೨. ‘‘ಗೋಪೀ ಚ ಅಹಞ್ಚ ಅಸ್ಸವಾ, ಬ್ರಹ್ಮಚರಿಯಂ [ಬ್ರಹ್ಮಚರಿಯ (ಕ.)] ಸುಗತೇ ಚರಾಮಸೇ;

ಜಾತಿಮರಣಸ್ಸ ಪಾರಗೂ [ಪಾರಗಾ (ಸೀ. ಸ್ಯಾ. ಕಂ. ಪೀ.)], ದುಕ್ಖಸ್ಸನ್ತಕರಾ ಭವಾಮಸೇ’’.

೩೩. ‘‘ನನ್ದತಿ ಪುತ್ತೇಹಿ ಪುತ್ತಿಮಾ, (ಇತಿ ಮಾರೋ ಪಾಪಿಮಾ)

ಗೋಮಾ [ಗೋಮಿಕೋ (ಸೀ. ಪೀ.), ಗೋಪಿಕೋ (ಸ್ಯಾ. ಕಂ.), ಗೋಪಿಯೋ (ಕ.)] ಗೋಹಿ ತಥೇವ ನನ್ದತಿ;

ಉಪಧೀ ಹಿ ನರಸ್ಸ ನನ್ದನಾ, ನ ಹಿ ಸೋ ನನ್ದತಿ ಯೋ ನಿರೂಪಧಿ’’.

೩೪. ‘‘ಸೋಚತಿ ಪುತ್ತೇಹಿ ಪುತ್ತಿಮಾ, (ಇತಿ ಭಗವಾ)

ಗೋಪಿಯೋ ಗೋಹಿ ತಥೇವ ಸೋಚತಿ;

ಉಪಧೀ ಹಿ ನರಸ್ಸ ಸೋಚನಾ, ನ ಹಿ ಸೋ ಸೋಚತಿ ಯೋ ನಿರೂಪಧೀ’’ತಿ.

ಧನಿಯಸುತ್ತಂ ದುತಿಯಂ ನಿಟ್ಠಿತಂ.

೩. ಖಗ್ಗವಿಸಾಣಸುತ್ತಂ

೩೫. ಸಬ್ಬೇಸು ಭೂತೇಸು ನಿಧಾಯ ದಣ್ಡಂ, ಅವಿಹೇಠಯಂ ಅಞ್ಞತರಮ್ಪಿ ತೇಸಂ;

ನ ಪುತ್ತಮಿಚ್ಛೇಯ್ಯ ಕುತೋ ಸಹಾಯಂ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೩೬. ಸಂಸಗ್ಗಜಾತಸ್ಸ ಭವನ್ತಿ ಸ್ನೇಹಾ, ಸ್ನೇಹನ್ವಯಂ ದುಕ್ಖಮಿದಂ ಪಹೋತಿ;

ಆದೀನವಂ ಸ್ನೇಹಜಂ ಪೇಕ್ಖಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೩೭. ಮಿತ್ತೇ ಸುಹಜ್ಜೇ ಅನುಕಮ್ಪಮಾನೋ, ಹಾಪೇತಿ ಅತ್ಥಂ ಪಟಿಬದ್ಧಚಿತ್ತೋ;

ಏತಂ ಭಯಂ ಸನ್ಥವೇ [ಸನ್ಧವೇ (ಕ.)] ಪೇಕ್ಖಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೩೮. ವಂಸೋ ವಿಸಾಲೋವ ಯಥಾ ವಿಸತ್ತೋ, ಪುತ್ತೇಸು ದಾರೇಸು ಚ ಯಾ ಅಪೇಕ್ಖಾ;

ವಂಸಕ್ಕಳೀರೋವ [ವಂಸಕಳೀರೋವ (ಸೀ.), ವಂಸಾಕಳೀರೋವ (ಸ್ಯಾ. ಕಂ. ಪೀ.), ವಂಸೇಕಳೀರೋವ (ನಿದ್ದೇಸ)] ಅಸಜ್ಜಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೩೯. ಮಿಗೋ ಅರಞ್ಞಮ್ಹಿ ಯಥಾ ಅಬದ್ಧೋ [ಅಬನ್ಧೋ (ಸ್ಯಾ. ಕಂ.)], ಯೇನಿಚ್ಛಕಂ ಗಚ್ಛತಿ ಗೋಚರಾಯ;

ವಿಞ್ಞೂ ನರೋ ಸೇರಿತಂ ಪೇಕ್ಖಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೪೦. ಆಮನ್ತನಾ ಹೋತಿ ಸಹಾಯಮಜ್ಝೇ, ವಾಸೇ ಠಾನೇ ಗಮನೇ ಚಾರಿಕಾಯ;

ಅನಭಿಜ್ಝಿತಂ ಸೇರಿತಂ ಪೇಕ್ಖಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೪೧. ಖಿಡ್ಡಾ ರತೀ ಹೋತಿ ಸಹಾಯಮಜ್ಝೇ, ಪುತ್ತೇಸು ಚ ವಿಪುಲಂ ಹೋತಿ ಪೇಮಂ;

ಪಿಯವಿಪ್ಪಯೋಗಂ ವಿಜಿಗುಚ್ಛಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೪೨. ಚಾತುದ್ದಿಸೋ ಅಪ್ಪಟಿಘೋ ಚ ಹೋತಿ, ಸನ್ತುಸ್ಸಮಾನೋ ಇತರೀತರೇನ;

ಪರಿಸ್ಸಯಾನಂ ಸಹಿತಾ ಅಛಮ್ಭೀ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೪೩. ದುಸ್ಸಙ್ಗಹಾ ಪಬ್ಬಜಿತಾಪಿ ಏಕೇ, ಅಥೋ ಗಹಟ್ಠಾ ಘರಮಾವಸನ್ತಾ;

ಅಪ್ಪೋಸ್ಸುಕ್ಕೋ ಪರಪುತ್ತೇಸು ಹುತ್ವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೪೪. ಓರೋಪಯಿತ್ವಾ ಗಿಹಿಬ್ಯಞ್ಜನಾನಿ [ಗಿಹಿವ್ಯಞ್ಜನಾನಿ (ಸ್ಯಾ. ಕಂ. ಪೀ.)], ಸಞ್ಛಿನ್ನಪತ್ತೋ [ಸಂಸೀನಪತ್ತೋ (ಸೀ.)] ಯಥಾ ಕೋವಿಳಾರೋ;

ಛೇತ್ವಾನ ವೀರೋ ಗಿಹಿಬನ್ಧನಾನಿ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೪೫. ಸಚೇ ಲಭೇಥ ನಿಪಕಂ ಸಹಾಯಂ, ಸದ್ಧಿಂ ಚರಂ ಸಾಧುವಿಹಾರಿಧೀರಂ;

ಅಭಿಭುಯ್ಯ ಸಬ್ಬಾನಿ ಪರಿಸ್ಸಯಾನಿ, ಚರೇಯ್ಯ ತೇನತ್ತಮನೋ ಸತೀಮಾ.

೪೬. ನೋ ಚೇ ಲಭೇಥ ನಿಪಕಂ ಸಹಾಯಂ, ಸದ್ಧಿಂ ಚರಂ ಸಾಧುವಿಹಾರಿಧೀರಂ;

ರಾಜಾವ ರಟ್ಠಂ ವಿಜಿತಂ ಪಹಾಯ, ಏಕೋ ಚರೇ ಮಾತಙ್ಗರಞ್ಞೇವ ನಾಗೋ.

೪೭. ಅದ್ಧಾ ಪಸಂಸಾಮ ಸಹಾಯಸಮ್ಪದಂ, ಸೇಟ್ಠಾ ಸಮಾ ಸೇವಿತಬ್ಬಾ ಸಹಾಯಾ;

ಏತೇ ಅಲದ್ಧಾ ಅನವಜ್ಜಭೋಜೀ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೪೮. ದಿಸ್ವಾ ಸುವಣ್ಣಸ್ಸ ಪಭಸ್ಸರಾನಿ, ಕಮ್ಮಾರಪುತ್ತೇನ ಸುನಿಟ್ಠಿತಾನಿ;

ಸಙ್ಘಟ್ಟಮಾನಾನಿ ದುವೇ ಭುಜಸ್ಮಿಂ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೪೯. ಏವಂ ದುತಿಯೇನ [ದುತಿಯೇನ (ಸಬ್ಬತ್ಥ)] ಸಹಾ ಮಮಸ್ಸ, ವಾಚಾಭಿಲಾಪೋ ಅಭಿಸಜ್ಜನಾ ವಾ;

ಏತಂ ಭಯಂ ಆಯತಿಂ ಪೇಕ್ಖಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೫೦. ಕಾಮಾ ಹಿ ಚಿತ್ರಾ ಮಧುರಾ ಮನೋರಮಾ, ವಿರೂಪರೂಪೇನ ಮಥೇನ್ತಿ ಚಿತ್ತಂ;

ಆದೀನವಂ ಕಾಮಗುಣೇಸು ದಿಸ್ವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೫೧. ಈತೀ ಚ ಗಣ್ಡೋ ಚ ಉಪದ್ದವೋ ಚ, ರೋಗೋ ಚ ಸಲ್ಲಞ್ಚ ಭಯಞ್ಚ ಮೇತಂ;

ಏತಂ ಭಯಂ ಕಾಮಗುಣೇಸು ದಿಸ್ವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೫೨. ಸೀತಞ್ಚ ಉಣ್ಹಞ್ಚ ಖುದಂ ಪಿಪಾಸಂ, ವಾತಾತಪೇ ಡಂಸಸರೀಸಪೇ [ಡಂಸಸಿರಿಂಸಪೇ (ಸೀ. ಸ್ಯಾ. ಕಂ. ಪೀ.)] ಚ;

ಸಬ್ಬಾನಿಪೇತಾನಿ ಅಭಿಸಮ್ಭವಿತ್ವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೫೩. ನಾಗೋವ ಯೂಥಾನಿ ವಿವಜ್ಜಯಿತ್ವಾ, ಸಞ್ಜಾತಖನ್ಧೋ ಪದುಮೀ ಉಳಾರೋ;

ಯಥಾಭಿರನ್ತಂ ವಿಹರಂ [ವಿಹರೇ (ಸೀ. ಪೀ. ನಿದ್ದೇಸ)] ಅರಞ್ಞೇ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೫೪. ಅಟ್ಠಾನತಂ ಸಙ್ಗಣಿಕಾರತಸ್ಸ, ಯಂ ಫಸ್ಸಯೇ [ಫುಸ್ಸಯೇ (ಸ್ಯಾ.)] ಸಾಮಯಿಕಂ ವಿಮುತ್ತಿಂ;

ಆದಿಚ್ಚಬನ್ಧುಸ್ಸ ವಚೋ ನಿಸಮ್ಮ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೫೫. ದಿಟ್ಠೀವಿಸೂಕಾನಿ ಉಪಾತಿವತ್ತೋ, ಪತ್ತೋ ನಿಯಾಮಂ ಪಟಿಲದ್ಧಮಗ್ಗೋ;

ಉಪ್ಪನ್ನಞಾಣೋಮ್ಹಿ ಅನಞ್ಞನೇಯ್ಯೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೫೬. ನಿಲ್ಲೋಲುಪೋ ನಿಕ್ಕುಹೋ ನಿಪ್ಪಿಪಾಸೋ, ನಿಮ್ಮಕ್ಖೋ ನಿದ್ಧನ್ತಕಸಾವಮೋಹೋ;

ನಿರಾಸಯೋ [ನಿರಾಸಾಸೋ (ಕ.)] ಸಬ್ಬಲೋಕೇ ಭವಿತ್ವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೫೭. ಪಾಪಂ ಸಹಾಯಂ ಪರಿವಜ್ಜಯೇಥ, ಅನತ್ಥದಸ್ಸಿಂ ವಿಸಮೇ ನಿವಿಟ್ಠಂ;

ಸಯಂ ನ ಸೇವೇ ಪಸುತಂ ಪಮತ್ತಂ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೫೮. ಬಹುಸ್ಸುತಂ ಧಮ್ಮಧರಂ ಭಜೇಥ, ಮಿತ್ತಂ ಉಳಾರಂ ಪಟಿಭಾನವನ್ತಂ;

ಅಞ್ಞಾಯ ಅತ್ಥಾನಿ ವಿನೇಯ್ಯ ಕಙ್ಖಂ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೫೯. ಖಿಡ್ಡಂ ರತಿಂ ಕಾಮಸುಖಞ್ಚ ಲೋಕೇ, ಅನಲಙ್ಕರಿತ್ವಾ ಅನಪೇಕ್ಖಮಾನೋ;

ವಿಭೂಸನಟ್ಠಾನಾ ವಿರತೋ ಸಚ್ಚವಾದೀ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೬೦. ಪುತ್ತಞ್ಚ ದಾರಂ ಪಿತರಞ್ಚ ಮಾತರಂ, ಧನಾನಿ ಧಞ್ಞಾನಿ ಚ ಬನ್ಧವಾನಿ [ಬನ್ಧವಾನಿ ಚ (ಪೀ.)];

ಹಿತ್ವಾನ ಕಾಮಾನಿ ಯಥೋಧಿಕಾನಿ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೬೧. ಸಙ್ಗೋ ಏಸೋ ಪರಿತ್ತಮೇತ್ಥ ಸೋಖ್ಯಂ, ಅಪ್ಪಸ್ಸಾದೋ ದುಕ್ಖಮೇತ್ಥ ಭಿಯ್ಯೋ;

ಗಳೋ ಏಸೋ ಇತಿ ಞತ್ವಾ ಮುತೀಮಾ [ಮತೀಮಾ (ಸ್ಯಾ. ಕ.)], ಏಕೋ ಚರೇ ಖಗ್ಗವಿಸಾಣಕಪ್ಪೋ.

೬೨. ಸನ್ದಾಲಯಿತ್ವಾನ [ಪದಾಲಯಿತ್ವಾನ (ಕ.)] ಸಂಯೋಜನಾನಿ, ಜಾಲಂವ ಭೇತ್ವಾ ಸಲಿಲಮ್ಬುಚಾರೀ;

ಅಗ್ಗೀವ ದಡ್ಢಂ ಅನಿವತ್ತಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೬೩. ಓಕ್ಖಿತ್ತಚಕ್ಖೂ ನ ಚ ಪಾದಲೋಲೋ, ಗುತ್ತಿನ್ದ್ರಿಯೋ ರಕ್ಖಿತಮಾನಸಾನೋ;

ಅನವಸ್ಸುತೋ ಅಪರಿಡಯ್ಹಮಾನೋ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೬೪. ಓಹಾರಯಿತ್ವಾ ಗಿಹಿಬ್ಯಞ್ಜನಾನಿ, ಸಞ್ಛನ್ನಪತ್ತೋ [ಸಞ್ಛಿನ್ನಪತ್ತೋ (ಸ್ಯಾ. ಪೀ.), ಪಚ್ಛಿನ್ನಪತ್ತೋ (ಕ.)] ಯಥಾ ಪಾರಿಛತ್ತೋ;

ಕಾಸಾಯವತ್ಥೋ ಅಭಿನಿಕ್ಖಮಿತ್ವಾ, ಏಕೋ ಚರೇ ಖಗ್ಗವಿಸಾಣಕಪ್ಪೋ.

೬೫. ರಸೇಸು ಗೇಧಂ ಅಕರಂ ಅಲೋಲೋ, ಅನಞ್ಞಪೋಸೀ ಸಪದಾನಚಾರೀ;

ಕುಲೇ ಕುಲೇ ಅಪ್ಪಟಿಬದ್ಧಚಿತ್ತೋ [ಅಪ್ಪಟಿಬನ್ಧಚಿತ್ತೋ (ಕ.)], ಏಕೋ ಚರೇ ಖಗ್ಗವಿಸಾಣಕಪ್ಪೋ.