೯. ಹೇಮವತಸುತ್ತಂ

೧೫೩. ‘‘ಅಜ್ಜ ಪನ್ನರಸೋ ಉಪೋಸಥೋ, (ಇತಿ ಸಾತಾಗಿರೋ ಯಕ್ಖೋ)

ದಿಬ್ಬಾ [ದಿಬ್ಯಾ (ಸೀ. ಸ್ಯಾ. ಕಂ. ಪೀ.)] ರತ್ತಿ ಉಪಟ್ಠಿತಾ;

ಅನೋಮನಾಮಂ ಸತ್ಥಾರಂ, ಹನ್ದ ಪಸ್ಸಾಮ ಗೋತಮಂ’’.

೧೫೪. ‘‘ಕಚ್ಚಿ ಮನೋ ಸುಪಣಿಹಿತೋ, (ಇತಿ ಹೇಮವತೋ ಯಕ್ಖೋ)

ಸಬ್ಬಭೂತೇಸು ತಾದಿನೋ;

ಕಚ್ಚಿ ಇಟ್ಠೇ ಅನಿಟ್ಠೇ ಚ, ಸಙ್ಕಪ್ಪಸ್ಸ ವಸೀಕತಾ’’.

೧೫೫. ‘‘ಮನೋ ಚಸ್ಸ ಸುಪಣಿಹಿತೋ, (ಇತಿ ಸಾತಾಗಿರೋ ಯಕ್ಖೋ)

ಸಬ್ಬಭೂತೇಸು ತಾದಿನೋ;

ಅಥೋ ಇಟ್ಠೇ ಅನಿಟ್ಠೇ ಚ, ಸಙ್ಕಪ್ಪಸ್ಸ ವಸೀಕತಾ’’.

೧೫೬. ‘‘ಕಚ್ಚಿ ಅದಿನ್ನಂ ನಾದಿಯತಿ, (ಇತಿ ಹೇಮವತೋ ಯಕ್ಖೋ)

ಕಚ್ಚಿ ಪಾಣೇಸು ಸಞ್ಞತೋ;

ಕಚ್ಚಿ ಆರಾ ಪಮಾದಮ್ಹಾ, ಕಚ್ಚಿ ಝಾನಂ ನ ರಿಞ್ಚತಿ’’.

೧೫೭. ‘‘ನ ಸೋ ಅದಿನ್ನಂ ಆದಿಯತಿ, (ಇತಿ ಸಾತಾಗಿರೋ ಯಕ್ಖೋ)

ಅಥೋ ಪಾಣೇಸು ಸಞ್ಞತೋ;

ಅಥೋ ಆರಾ ಪಮಾದಮ್ಹಾ, ಬುದ್ಧೋ ಝಾನಂ ನ ರಿಞ್ಚತಿ’’.

೧೫೮. ‘‘ಕಚ್ಚಿ ಮುಸಾ ನ ಭಣತಿ, (ಇತಿ ಹೇಮವತೋ ಯಕ್ಖೋ)

ಕಚ್ಚಿ ನ ಖೀಣಬ್ಯಪ್ಪಥೋ;

ಕಚ್ಚಿ ವೇಭೂತಿಯಂ ನಾಹ, ಕಚ್ಚಿ ಸಮ್ಫಂ ನ ಭಾಸತಿ’’.

೧೫೯. ‘‘ಮುಸಾ ಚ ಸೋ ನ ಭಣತಿ, (ಇತಿ ಸಾತಾಗಿರೋ ಯಕ್ಖೋ)

ಅಥೋ ನ ಖೀಣಬ್ಯಪ್ಪಥೋ;

ಅಥೋ ವೇಭೂತಿಯಂ ನಾಹ, ಮನ್ತಾ ಅತ್ಥಂ ಚ [ಅತ್ಥಂ ಸೋ (ಸೀ. ಪೀ. ಕ.)] ಭಾಸತಿ’’.

೧೬೦. ‘‘ಕಚ್ಚಿ ನ ರಜ್ಜತಿ ಕಾಮೇಸು, (ಇತಿ ಹೇಮವತೋ ಯಕ್ಖೋ)

ಕಚ್ಚಿ ಚಿತ್ತಂ ಅನಾವಿಲಂ;

ಕಚ್ಚಿ ಮೋಹಂ ಅತಿಕ್ಕನ್ತೋ, ಕಚ್ಚಿ ಧಮ್ಮೇಸು ಚಕ್ಖುಮಾ’’.

೧೬೧. ‘‘ನ ಸೋ ರಜ್ಜತಿ ಕಾಮೇಸು, (ಇತಿ ಸಾತಾಗಿರೋ ಯಕ್ಖೋ)

ಅಥೋ ಚಿತ್ತಂ ಅನಾವಿಲಂ;

ಸಬ್ಬಮೋಹಂ ಅತಿಕ್ಕನ್ತೋ, ಬುದ್ಧೋ ಧಮ್ಮೇಸು ಚಕ್ಖುಮಾ’’.

೧೬೨. ‘‘ಕಚ್ಚಿ ವಿಜ್ಜಾಯ ಸಮ್ಪನ್ನೋ, (ಇತಿ ಹೇಮವತೋ ಯಕ್ಖೋ )

ಕಚ್ಚಿ ಸಂಸುದ್ಧಚಾರಣೋ;

ಕಚ್ಚಿಸ್ಸ ಆಸವಾ ಖೀಣಾ, ಕಚ್ಚಿ ನತ್ಥಿ ಪುನಬ್ಭವೋ’’.

೧೬೩. ‘‘ವಿಜ್ಜಾಯ ಚೇವ ಸಮ್ಪನ್ನೋ, (ಇತಿ ಸಾತಾಗಿರೋ ಯಕ್ಖೋ)

ಅಥೋ ಸಂಸುದ್ಧಚಾರಣೋ;

ಸಬ್ಬಸ್ಸ ಆಸವಾ ಖೀಣಾ, ನತ್ಥಿ ತಸ್ಸ ಪುನಬ್ಭವೋ’’.

೧೬೪. ‘‘ಸಮ್ಪನ್ನಂ ಮುನಿನೋ ಚಿತ್ತಂ, ಕಮ್ಮುನಾ ಬ್ಯಪ್ಪಥೇನ ಚ;

ವಿಜ್ಜಾಚರಣಸಮ್ಪನ್ನಂ, ಧಮ್ಮತೋ ನಂ ಪಸಂಸತಿ’’.

೧೬೫. ‘‘ಸಮ್ಪನ್ನಂ ಮುನಿನೋ ಚಿತ್ತಂ, ಕಮ್ಮುನಾ ಬ್ಯಪ್ಪಥೇನ ಚ;

ವಿಜ್ಜಾಚರಣಸಮ್ಪನ್ನಂ, ಧಮ್ಮತೋ ಅನುಮೋದಸಿ’’.

೧೬೬. ‘‘ಸಮ್ಪನ್ನಂ ಮುನಿನೋ ಚಿತ್ತಂ, ಕಮ್ಮುನಾ ಬ್ಯಪ್ಪಥೇನ ಚ;

ವಿಜ್ಜಾಚರಣಸಮ್ಪನ್ನಂ, ಹನ್ದ ಪಸ್ಸಾಮ ಗೋತಮಂ.

೧೬೭. ‘‘ಏಣಿಜಙ್ಘಂ ಕಿಸಂ ವೀರಂ [ಧೀರಂ (ಸ್ಯಾ.)], ಅಪ್ಪಾಹಾರಂ ಅಲೋಲುಪಂ;

ಮುನಿಂ ವನಸ್ಮಿಂ ಝಾಯನ್ತಂ, ಏಹಿ ಪಸ್ಸಾಮ ಗೋತಮಂ.

೧೬೮. ‘‘ಸೀಹಂವೇಕಚರಂ ನಾಗಂ, ಕಾಮೇಸು ಅನಪೇಕ್ಖಿನಂ;

ಉಪಸಙ್ಕಮ್ಮ ಪುಚ್ಛಾಮ, ಮಚ್ಚುಪಾಸಪ್ಪಮೋಚನಂ.

೧೬೯. ‘‘ಅಕ್ಖಾತಾರಂ ಪವತ್ತಾರಂ, ಸಬ್ಬಧಮ್ಮಾನ ಪಾರಗುಂ;

ಬುದ್ಧಂ ವೇರಭಯಾತೀತಂ, ಮಯಂ ಪುಚ್ಛಾಮ ಗೋತಮಂ’’.

೧೭೦. ‘‘ಕಿಸ್ಮಿಂ ಲೋಕೋ ಸಮುಪ್ಪನ್ನೋ, (ಇತಿ ಹೇಮವತೋ ಯಕ್ಖೋ)

ಕಿಸ್ಮಿಂ ಕುಬ್ಬತಿ ಸನ್ಥವಂ [ಸನ್ಧವಂ (ಕ.)];

ಕಿಸ್ಸ ಲೋಕೋ ಉಪಾದಾಯ, ಕಿಸ್ಮಿಂ ಲೋಕೋ ವಿಹಞ್ಞತಿ’’.

೧೭೧. ‘‘ಛಸು [ಛಸ್ಸು (ಸೀ. ಪೀ.)] ಲೋಕೋ ಸಮುಪ್ಪನ್ನೋ, (ಹೇಮವತಾತಿ ಭಗವಾ)

ಛಸು ಕುಬ್ಬತಿ ಸನ್ಥವಂ;

ಛನ್ನಮೇವ ಉಪಾದಾಯ, ಛಸು ಲೋಕೋ ವಿಹಞ್ಞತಿ’’.

೧೭೨. ‘‘ಕತಮಂ ತಂ ಉಪಾದಾನಂ, ಯತ್ಥ ಲೋಕೋ ವಿಹಞ್ಞತಿ;

ನಿಯ್ಯಾನಂ ಪುಚ್ಛಿತೋ ಬ್ರೂಹಿ, ಕಥಂ ದುಕ್ಖಾ ಪಮುಚ್ಚತಿ’’ [ಪಮುಞ್ಚತಿ (ಸ್ಯಾ.)].

೧೭೩. ‘‘ಪಞ್ಚ ಕಾಮಗುಣಾ ಲೋಕೇ, ಮನೋಛಟ್ಠಾ ಪವೇದಿತಾ;

ಏತ್ಥ ಛನ್ದಂ ವಿರಾಜೇತ್ವಾ, ಏವಂ ದುಕ್ಖಾ ಪಮುಚ್ಚತಿ.

೧೭೪. ‘‘ಏತಂ ಲೋಕಸ್ಸ ನಿಯ್ಯಾನಂ, ಅಕ್ಖಾತಂ ವೋ ಯಥಾತಥಂ;

ಏತಂ ವೋ ಅಹಮಕ್ಖಾಮಿ, ಏವಂ ದುಕ್ಖಾ ಪಮುಚ್ಚತಿ’’.

೧೭೫. ‘‘ಕೋ ಸೂಧ ತರತಿ ಓಘಂ, ಕೋಧ ತರತಿ ಅಣ್ಣವಂ;

ಅಪ್ಪತಿಟ್ಠೇ ಅನಾಲಮ್ಬೇ, ಕೋ ಗಮ್ಭೀರೇ ನ ಸೀದತಿ’’.

೧೭೬. ‘‘ಸಬ್ಬದಾ ಸೀಲಸಮ್ಪನ್ನೋ, ಪಞ್ಞವಾ ಸುಸಮಾಹಿತೋ;

ಅಜ್ಝತ್ತಚಿನ್ತೀ [ಅಜ್ಝತ್ತಸಞ್ಞೀ (ಸ್ಯಾ. ಕಂ. ಕ.)] ಸತಿಮಾ, ಓಘಂ ತರತಿ ದುತ್ತರಂ.

೧೭೭. ‘‘ವಿರತೋ ಕಾಮಸಞ್ಞಾಯ, ಸಬ್ಬಸಂಯೋಜನಾತಿಗೋ;

ನನ್ದೀಭವಪರಿಕ್ಖೀಣೋ, ಸೋ ಗಮ್ಭೀರೇ ನ ಸೀದತಿ’’.

೧೭೮. ‘‘ಗಬ್ಭೀರಪಞ್ಞಂ ನಿಪುಣತ್ಥದಸ್ಸಿಂ, ಅಕಿಞ್ಚನಂ ಕಾಮಭವೇ ಅಸತ್ತಂ;

ತಂ ಪಸ್ಸಥ ಸಬ್ಬಧಿ ವಿಪ್ಪಮುತ್ತಂ, ದಿಬ್ಬೇ ಪಥೇ ಕಮಮಾನಂ ಮಹೇಸಿಂ.

೧೭೯. ‘‘ಅನೋಮನಾಮಂ ನಿಪುಣತ್ಥದಸ್ಸಿಂ, ಪಞ್ಞಾದದಂ ಕಾಮಾಲಯೇ ಅಸತ್ತಂ;

ತಂ ಪಸ್ಸಥ ಸಬ್ಬವಿದುಂ ಸುಮೇಧಂ, ಅರಿಯೇ ಪಥೇ ಕಮಮಾನಂ ಮಹೇಸಿಂ.

೧೮೦. ‘‘ಸುದಿಟ್ಠಂ ವತ ನೋ ಅಜ್ಜ, ಸುಪ್ಪಭಾತಂ ಸುಹುಟ್ಠಿತಂ;

ಯಂ ಅದ್ದಸಾಮ ಸಮ್ಬುದ್ಧಂ, ಓಘತಿಣ್ಣಮನಾಸವಂ.

೧೮೧. ‘‘ಇಮೇ ದಸಸತಾ ಯಕ್ಖಾ, ಇದ್ಧಿಮನ್ತೋ ಯಸಸ್ಸಿನೋ;

ಸಬ್ಬೇ ತಂ ಸರಣಂ ಯನ್ತಿ, ತ್ವಂ ನೋ ಸತ್ಥಾ ಅನುತ್ತರೋ.

೧೮೨. ‘‘ತೇ ಮಯಂ ವಿಚರಿಸ್ಸಾಮ, ಗಾಮಾ ಗಾಮಂ ನಗಾ ನಗಂ;

ನಮಸ್ಸಮಾನಾ ಸಮ್ಬುದ್ಧಂ, ಧಮ್ಮಸ್ಸ ಚ ಸುಧಮ್ಮತ’’ನ್ತಿ.

ಹೇಮವತಸುತ್ತಂ ನವಮಂ ನಿಟ್ಠಿತಂ.