೬. ಪರಾಭವಸುತ್ತಂ

ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ಅಥ ಖೋ ಅಞ್ಞತರಾ ದೇವತಾ ಅಭಿಕ್ಕನ್ತಾಯ ರತ್ತಿಯಾ ಅಭಿಕ್ಕನ್ತವಣ್ಣಾ ಕೇವಲಕಪ್ಪಂ ಜೇತವನಂ ಓಭಾಸೇತ್ವಾ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ಅಟ್ಠಾಸಿ. ಏಕಮನ್ತಂ ಠಿತಾ ಖೋ ಸಾ ದೇವತಾ ಭಗವನ್ತಂ ಗಾಥಾಯ ಅಜ್ಝಭಾಸಿ –

೯೧. ‘‘ಪರಾಭವನ್ತಂ ಪುರಿಸಂ, ಮಯಂ ಪುಚ್ಛಾಮ ಗೋತಮ [ಗೋತಮಂ (ಸೀ. ಸ್ಯಾ.)];

ಭಗವನ್ತಂ [ಭವನ್ತಂ (ಸ್ಯಾ. ಕ.)] ಪುಟ್ಠುಮಾಗಮ್ಮ, ಕಿಂ ಪರಾಭವತೋ ಮುಖಂ’’.

೯೨. ‘‘ಸುವಿಜಾನೋ ಭವಂ ಹೋತಿ, ಸುವಿಜಾನೋ [ದುವಿಜಾನೋ (ಸ್ಯಾ. ಕ.)] ಪರಾಭವೋ;

ಧಮ್ಮಕಾಮೋ ಭವಂ ಹೋತಿ, ಧಮ್ಮದೇಸ್ಸೀ ಪರಾಭವೋ’’.

೯೩. ‘‘ಇತಿ ಹೇತಂ ವಿಜಾನಾಮ, ಪಠಮೋ ಸೋ ಪರಾಭವೋ;

ದುತಿಯಂ ಭಗವಾ ಬ್ರೂಹಿ, ಕಿಂ ಪರಾಭವತೋ ಮುಖಂ’’.

೯೪. ‘‘ಅಸನ್ತಸ್ಸ ಪಿಯಾ ಹೋನ್ತಿ, ಸನ್ತೇ ನ ಕುರುತೇ ಪಿಯಂ;

ಅಸತಂ ಧಮ್ಮಂ ರೋಚೇತಿ, ತಂ ಪರಾಭವತೋ ಮುಖಂ’’.

೯೫. ‘‘ಇತಿ ಹೇತಂ ವಿಜಾನಾಮ, ದುತಿಯೋ ಸೋ ಪರಾಭವೋ;

ತತಿಯಂ ಭಗವಾ ಬ್ರೂಹಿ, ಕಿಂ ಪರಾಭವತೋ ಮುಖಂ’’.

೯೬. ‘‘ನಿದ್ದಾಸೀಲೀ ಸಭಾಸೀಲೀ, ಅನುಟ್ಠಾತಾ ಚ ಯೋ ನರೋ;

ಅಲಸೋ ಕೋಧಪಞ್ಞಾಣೋ, ತಂ ಪರಾಭವತೋ ಮುಖಂ’’.

೯೭. ‘‘ಇತಿ ಹೇತಂ ವಿಜಾನಾಮ, ತತಿಯೋ ಸೋ ಪರಾಭವೋ;

ಚತುತ್ಥಂ ಭಗವಾ ಬ್ರೂಹಿ, ಕಿಂ ಪರಾಭವತೋ ಮುಖಂ’’.

೯೮. ‘‘ಯೋ ಮಾತರಂ [ಯೋ ಮಾತರಂ ವಾ (ಸೀ. ಸ್ಯಾ. ಕಂ. ಪೀ.)] ಪಿತರಂ ವಾ, ಜಿಣ್ಣಕಂ ಗತಯೋಬ್ಬನಂ;

ಪಹು ಸನ್ತೋ ನ ಭರತಿ, ತಂ ಪರಾಭವತೋ ಮುಖಂ’’.

೯೯. ‘‘ಇತಿ ಹೇತಂ ವಿಜಾನಾಮ, ಚತುತ್ಥೋ ಸೋ ಪರಾಭವೋ;

ಪಞ್ಚಮಂ ಭಗವಾ ಬ್ರೂಹಿ, ಕಿಂ ಪರಾಭವತೋ ಮುಖಂ’’.

೧೦೦. ‘‘ಯೋ ಬ್ರಾಹ್ಮಣಂ [ಯೋ ಬ್ರಾಹ್ಮಣಂ ವಾ (ಸೀ. ಸ್ಯಾ. ಕಂ. ಪೀ.)] ಸಮಣಂ ವಾ, ಅಞ್ಞಂ ವಾಪಿ ವನಿಬ್ಬಕಂ;

ಮುಸಾವಾದೇನ ವಞ್ಚೇತಿ, ತಂ ಪರಾಭವತೋ ಮುಖಂ’’.

೧೦೧. ‘‘ಇತಿ ಹೇತಂ ವಿಜಾನಾಮ, ಪಞ್ಚಮೋ ಸೋ ಪರಾಭವೋ;

ಛಟ್ಠಮಂ ಭಗವಾ ಬ್ರೂಹಿ, ಕಿಂ ಪರಾಭವತೋ ಮುಖಂ’’.

೧೦೨. ‘‘ಪಹೂತವಿತ್ತೋ ಪುರಿಸೋ, ಸಹಿರಞ್ಞೋ ಸಭೋಜನೋ;

ಏಕೋ ಭುಞ್ಜತಿ ಸಾದೂನಿ, ತಂ ಪರಾಭವತೋ ಮುಖಂ’’.

೧೦೩. ‘‘ಇತಿ ಹೇತಂ ವಿಜಾನಾಮ, ಛಟ್ಠಮೋ ಸೋ ಪರಾಭವೋ;

ಸತ್ತಮಂ ಭಗವಾ ಬ್ರೂಹಿ, ಕಿಂ ಪರಾಭವತೋ ಮುಖಂ’’.

೧೦೪. ‘‘ಜಾತಿತ್ಥದ್ಧೋ ಧನತ್ಥದ್ಧೋ, ಗೋತ್ತತ್ಥದ್ಧೋ ಚ ಯೋ ನರೋ;

ಸಞ್ಞಾತಿಂ ಅತಿಮಞ್ಞೇತಿ, ತಂ ಪರಾಭವತೋ ಮುಖಂ’’.

೧೦೫. ‘‘ಇತಿ ಹೇತಂ ವಿಜಾನಾಮ, ಸತ್ತಮೋ ಸೋ ಪರಾಭವೋ;

ಅಟ್ಠಮಂ ಭಗವಾ ಬ್ರೂಹಿ, ಕಿಂ ಪರಾಭವತೋ ಮುಖಂ’’.

೧೦೬. ‘‘ಇತ್ಥಿಧುತ್ತೋ ಸುರಾಧುತ್ತೋ, ಅಕ್ಖಧುತ್ತೋ ಚ ಯೋ ನರೋ;

ಲದ್ಧಂ ಲದ್ಧಂ ವಿನಾಸೇತಿ, ತಂ ಪರಾಭವತೋ ಮುಖಂ’’.

೧೦೭. ‘‘ಇತಿ ಹೇತಂ ವಿಜಾನಾಮ, ಅಟ್ಠಮೋ ಸೋ ಪರಾಭವೋ;

ನವಮಂ ಭಗವಾ ಬ್ರೂಹಿ, ಕಿಂ ಪರಾಭವತೋ ಮುಖಂ’’.

೧೦೮. ‘‘ಸೇಹಿ ದಾರೇಹಿ ಅಸನ್ತುಟ್ಠೋ [ದಾರೇಹ್ಯಸನ್ತುಟ್ಠೋ (ಕ.)], ವೇಸಿಯಾಸು ಪದುಸ್ಸತಿ [ಪದಿಸ್ಸತಿ (ಸೀ.)];

ದುಸ್ಸತಿ [ದಿಸ್ಸತಿ (ಸೀ. ಪೀ.)] ಪರದಾರೇಸು, ತಂ ಪರಾಭವತೋ ಮುಖಂ’’.

೧೦೯. ‘‘ಇತಿ ಹೇತಂ ವಿಜಾನಾಮ, ನವಮೋ ಸೋ ಪರಾಭವೋ;

ದಸಮಂ ಭಗವಾ ಬ್ರೂಹಿ, ಕಿಂ ಪರಾಭವತೋ ಮುಖಂ’’.

೧೧೦. ‘‘ಅತೀತಯೋಬ್ಬನೋ ಪೋಸೋ, ಆನೇತಿ ತಿಮ್ಬರುತ್ಥನಿಂ;

ತಸ್ಸಾ ಇಸ್ಸಾ ನ ಸುಪತಿ, ತಂ ಪರಾಭವತೋ ಮುಖಂ’’.

೧೧೧. ‘‘ಇತಿ ಹೇತಂ ವಿಜಾನಾಮ, ದಸಮೋ ಸೋ ಪರಾಭವೋ;

ಏಕಾದಸಮಂ ಭಗವಾ ಬ್ರೂಹಿ, ಕಿಂ ಪರಾಭವತೋ ಮುಖಂ’’.

೧೧೨. ‘‘ಇತ್ಥಿಂ ಸೋಣ್ಡಿಂ ವಿಕಿರಣಿಂ, ಪುರಿಸಂ ವಾಪಿ ತಾದಿಸಂ;

ಇಸ್ಸರಿಯಸ್ಮಿಂ ಠಪೇತಿ [ಠಾಪೇತಿ (ಸೀ. ಪೀ.), ಥಪೇತಿ (ಕ.)], ತಂ ಪರಾಭವತೋ ಮುಖಂ’’.

೧೧೩. ‘‘ಇತಿ ಹೇತಂ ವಿಜಾನಾಮ, ಏಕಾದಸಮೋ ಸೋ ಪರಾಭವೋ;

ದ್ವಾದಸಮಂ ಭಗವಾ ಬ್ರೂಹಿ, ಕಿಂ ಪರಾಭವತೋ ಮುಖಂ’’.

೧೧೪. ‘‘ಅಪ್ಪಭೋಗೋ ಮಹಾತಣ್ಹೋ, ಖತ್ತಿಯೇ ಜಾಯತೇ ಕುಲೇ;

ಸೋ ಚ ರಜ್ಜಂ ಪತ್ಥಯತಿ, ತಂ ಪರಾಭವತೋ ಮುಖಂ’’.

೧೧೫. ‘‘ಏತೇ ಪರಾಭವೇ ಲೋಕೇ, ಪಣ್ಡಿತೋ ಸಮವೇಕ್ಖಿಯ;

ಅರಿಯೋ ದಸ್ಸನಸಮ್ಪನ್ನೋ, ಸ ಲೋಕಂ ಭಜತೇ ಸಿವ’’ನ್ತಿ.

ಪರಾಭವಸುತ್ತಂ ಛಟ್ಠಂ ನಿಟ್ಠಿತಂ.