೫. ಚುನ್ದಸುತ್ತಂ

೮೩. ‘‘ಪುಚ್ಛಾಮಿ ಮುನಿಂ ಪಹೂತಪಞ್ಞಂ, (ಇತಿ ಚುನ್ದೋ ಕಮ್ಮಾರಪುತ್ತೋ)

ಬುದ್ಧಂ ಧಮ್ಮಸ್ಸಾಮಿಂ ವೀತತಣ್ಹಂ;

ದ್ವಿಪದುತ್ತಮಂ [ದಿಪದುತ್ತಮಂ (ಸೀ. ಸ್ಯಾ. ಕಂ. ಪೀ.)] ಸಾರಥೀನಂ ಪವರಂ, ಕತಿ ಲೋಕೇ ಸಮಣಾ ತದಿಙ್ಘ ಬ್ರೂಹಿ’’.

೮೪. ‘‘ಚತುರೋ ಸಮಣಾ ನ ಪಞ್ಚಮತ್ಥಿ, (ಚುನ್ದಾತಿ ಭಗವಾ)

ತೇ ತೇ ಆವಿಕರೋಮಿ ಸಕ್ಖಿಪುಟ್ಠೋ;

ಮಗ್ಗಜಿನೋ ಮಗ್ಗದೇಸಕೋ ಚ, ಮಗ್ಗೇ ಜೀವತಿ ಯೋ ಚ ಮಗ್ಗದೂಸೀ’’.

೮೫. ‘‘ಕಂ ಮಗ್ಗಜಿನಂ ವದನ್ತಿ ಬುದ್ಧಾ, (ಇತಿ ಚುನ್ದೋ ಕಮ್ಮಾರಪುತ್ತೋ)

ಮಗ್ಗಕ್ಖಾಯೀ ಕಥಂ ಅತುಲ್ಯೋ ಹೋತಿ;

ಮಗ್ಗೇ ಜೀವತಿ ಮೇ ಬ್ರೂಹಿ ಪುಟ್ಠೋ, ಅಥ ಮೇ ಆವಿಕರೋಹಿ ಮಗ್ಗದೂಸಿಂ’’ [ಮಗ್ಗದೂಸೀ (ಕ.)].

೮೬. ‘‘ಯೋ ತಿಣ್ಣಕಥಂಕಥೋ ವಿಸಲ್ಲೋ, ನಿಬ್ಬಾನಾಭಿರತೋ ಅನಾನುಗಿದ್ಧೋ;

ಲೋಕಸ್ಸ ಸದೇವಕಸ್ಸ ನೇತಾ, ತಾದಿಂ ಮಗ್ಗಜಿನಂ ವದನ್ತಿ ಬುದ್ಧಾ.

೮೭. ‘‘ಪರಮಂ ಪರಮನ್ತಿ ಯೋಧ ಞತ್ವಾ, ಅಕ್ಖಾತಿ ವಿಭಜತೇ ಇಧೇವ ಧಮ್ಮಂ;

ತಂ ಕಙ್ಖಛಿದಂ ಮುನಿಂ ಅನೇಜಂ, ದುತಿಯಂ ಭಿಕ್ಖುನಮಾಹು ಮಗ್ಗದೇಸಿಂ.

೮೮. ‘‘ಯೋ ಧಮ್ಮಪದೇ ಸುದೇಸಿತೇ, ಮಗ್ಗೇ ಜೀವತಿ ಸಞ್ಞತೋ ಸತೀಮಾ;

ಅನವಜ್ಜಪದಾನಿ ಸೇವಮಾನೋ, ತತಿಯಂ ಭಿಕ್ಖುನಮಾಹು ಮಗ್ಗಜೀವಿಂ.

೮೯. ‘‘ಛದನಂ ಕತ್ವಾನ ಸುಬ್ಬತಾನಂ, ಪಕ್ಖನ್ದೀ ಕುಲದೂಸಕೋ ಪಗಬ್ಭೋ;

ಮಾಯಾವೀ ಅಸಞ್ಞತೋ ಪಲಾಪೋ, ಪತಿರೂಪೇನ ಚರಂ ಸ ಮಗ್ಗದೂಸೀ.

೯೦. ‘‘ಏತೇ ಚ ಪಟಿವಿಜ್ಝಿ ಯೋ ಗಹಟ್ಠೋ, ಸುತವಾ ಅರಿಯಸಾವಕೋ ಸಪಞ್ಞೋ;

ಸಬ್ಬೇ ನೇತಾದಿಸಾತಿ [ಸಬ್ಬೇ ನೇ ತಾದಿಸಾತಿ (ಸೀ. ಸ್ಯಾ. ಪೀ.)] ಞತ್ವಾ, ಇತಿ ದಿಸ್ವಾ ನ ಹಾಪೇತಿ ತಸ್ಸ ಸದ್ಧಾ;

ಕಥಂ ಹಿ ದುಟ್ಠೇನ ಅಸಮ್ಪದುಟ್ಠಂ, ಸುದ್ಧಂ ಅಸುದ್ಧೇನ ಸಮಂ ಕರೇಯ್ಯಾ’’ತಿ.

ಚುನ್ದಸುತ್ತಂ ಪಞ್ಚಮಂ ನಿಟ್ಠಿತಂ.